Lokol Pej
Glad long Ol Singsing blong Hat
70 yia blong seves we i no tingbaot yuwan wetem wan simpol kwestin.
Walnetta Broederlow McCall i gat naen yia nomo taem wan misinari i askem sapos eniwan i save plei long piano blong kongregesen blong olgeta we i niu nomo. “!Mi leftemap han blong mi sloslo!” hem i tingbaot. Misinari ia, Elda Charles W. Ashman, i no mekem tingting i foldaon from yia blong gel ia o hamas eksperiens hem i nogat. Hem i givim ol hym long Walnetta blong praktis long hem, mo long wik we i kam afta, hem i kam man blong plei piano long ol miting blong olgeta.
Sam yia afta long Nambatu Wol Wo taem famli blong Walnetta i muvaot long Fiji i go long Devonpot long Not So blong Oklan, papa blong hem, Oscar P. Broederlow i bin wan memba ia nomo blong Jos Ia blong Jisas Kraes blong ol Lata-dei Sent, we oli save long eria ia. Be ol misinari oli stat blong wok mo i no long taem, i gat inaf niu konvet blong save mekem ol miting long Devonpot Leba Hol, we mama blong Walnetta, Hilda E. Lobendahn Broederlow, i arenjem.
Taem oli stanemap oganaesesen blong Rilif Sosaeti long we, smol grup ia blong ol sista bae oli mit evri wik long hom blong Sista Norma Roberts. Mama blong Walnetta i stap tekem Walnetta wetem hem blong mekem se hem i save plei piano blong ‘Ol Mama we Oli Stap Singsing’. “Oli no oganaesem Praemeri yet,” hem i tingbaot, “mekem se oltaem mi stap luklukbak mo stap konfius se, long mi, !blong stap go long Rilif Sosaeti i moa impoten long Praemeri!”
Ol miusik skil blong Walnetta i kam moa strong taem hem i stap gohed blong givim seves. Hem i bin witnesem bigfala gro blong Jos long eria blong hem, mo wetem hemia, hem i gat janis ia blong developem talen blong hem. Long ol eli yia blong hem long yangfala, branj blong hem i kam Oklan 5 Wod, mo niufala japel blong hem i gat wan lektrik paep ogan. Walnetta i neva plei long wan ogan bifo. “Man we i setemap ogan ia i givim mi wan buklet mo i givim wan kwik instraksen long olsem wanem blong yusum ogan ia—i bin tekem samples fiftin minit,” hem i talem. Bae hem i wan instraksen ia nomo blong plei long ogan we hem i bin kasem . . . be hem i no letem hemia i daonem hem. “Mi save se bae Lod i helpem mi. Afta mi mekem i kam gol blong mi blong lanem evri samting we mi save lanem mo blong !praktis, praktis, praktis!”
Blong 70 yia nao, dedikesen blong Walnetta long miusik i bin blesem laef blong fulap man. Taem Presiden Steve Midgely, wan stek presiden blong Wangarei Stek bifo, i bin gat hadtaem blong faenem wan blong plei ogan blong wan stek konfrens, Walnetta i bin hapi blong mekem hemia blong hem. Mo, enitaem we Eria Presiden David Baxter i prisaed long ol Sakramen miting blong Takapuna Wod, oltaem bae hem i stop long ogan afta long seves blong talem tangkyu long Walnetta from miusik.
“Mi sua se mi stap toktok long bihaf blong evriwan we i plei long miusik, taem mi talem se mifala i filim tangkyu taem ol brata lida mo ol memba oli tangkyu from miusik we mifala i givim,” hem i talem. “Mi bin plei blong ol miting long wod, stek, mo Pasifik Eria mo long ol kwaea blong Jos, speseli long ol lokol miusik kompetisen.” Hem i filim ona blong save wok wetem plante man blong singsing we oli gat talen, mo olgeta we oli plei ol miusik tul long Jos, taem oli mekem ol spesel miusik.
Ova long ol yia, Walnetta i bin givim seves long plante narafala koling mo hem i enjoem ol eksperiens ia tu. Tedei, hem i gat filing ia blong gat spesel janis ia blong save givim miusik bifo sakramen miting blong wod blong hem long Taupo Wod, blong invaetem Tabu Spirit mo mekem ples i revren. Taem hem i stap luklukbak long lav we hem i gat long koling blong hem, hem i talem tangkyu tumas from presen ia we Elda Ashman i bin givim long hem, evri yia ia we i bin pas, taem hem i askem blong wan i volontia blong plei piano. “Invitesen blong hem blong plei long ol miting blong mifala mo hamas tras [hem] i gat long mi i bin blesem laef blong mi,” hem i talem.
Kwiktaem, miusik i bin kam wei ia blong hem i serem lav blong hem long Papa long Heven mo Jisas Kraes, mo wanwan long ol hym we hem i bin lanem, i gat plante mining tumas long hem. Fas hym we hem i plei long hem i, “Lod, Lego Mifala wetem Blesing blong Yu.”
“Hem i wan prea se Spirit blong God oltaem bae i stap wetem yumi,” Walnetta i talem, “mo truaot long ol yia, trutok ia i bin kamaot long mi long laef blong mi.”
?Walnetta i save jusum wan fevret hym? Afta long sam tingting, Walnetta i talem no. “Wanem i moa impoten long mi i we, nomata wanem hym mi plei, oltaem mi talem tangkyu blong filim Spirit taem mi stap plei long hym ia.” Hem i gohed blong talem: “Wan taem Spencer W. Kimball (1895–1985) i bin talem, ‘Yumi stap long wan ples, olsem ol man blong plei miusik, blong tajem ol sol blong olgeta we oli stap lisin.’1
“Mi filim responsabiliti ia.”