Lokol Pej
Strong Tingting blong Askem
Laef blong Te Awhina olsem wan pikinini i bin had. Bubu woman blong hem i bin lukaotem hem kasem taem we hem i gat 8 yia, mo afta, hem i muv long wan hom i go long narawan, ol ples we i moa isi blong faenem ol drag mo vaelens bitim kaekae o fet. “I no bin gat wan toktok blong wan God,” hem i talem, “I nogat toktok blong faenem hiling mo fogivnes . . . Mi groap wetem wan posen blong no laekem mo stap nogud long ol narafala from se oli no bin tijim wan moa gud samting long hemia.”
Olsem wan yangfala, hem i bin lus. “Mi nogat wan gaed, nogat sefti, mo nogat man we bae mi lukluk i go antap long hem. Mi bin konfius mo nogat wan ples blong go long hem blong faenem pis,” hem i tingbaot. Hem i bin save wan kaen laef nomo long taem ia, mo sloslo, hemia i lidim hem i go long wan fasiliti we i blong stopem adiksen blong hem blong alkohol.
I no long taem afta we oli lego hem i kamaot long fasiliti ia, hem i mitim ol misinari blong Jos Ia blong Jisas Kraes blong Ol Lata-dei Sent. Hem i bin luk olgeta olbaot ia, mekem se hem i luksave olgeta, be blong sam risen long dei ia, Te Awhina i gat strong filing blong singaotem olgeta i kam.
“Mi bin gat wan kwestin,” hem i tingbaot. “Ating bae yu ting se hem ia i wan krangke kwestin, be taem yu groap mo no save God . . . Mi jes no bin save.” Hem i talem long ol misinari, “?Sapos yu save ansarem wan kwestin blong mi, bae mi lisin long [mesej blong yufala].”
Afta hem i askem: “?God hem i wan man o woman?”
Wan long ol misinari i ansa, “God hem i Papa blong yumi long heven we i lavem yumi tumas.”
Ansa ia i bin givim wan filing blong klia tingting mo pis i kam long Te Awhina. Hem i bin wantem blong lanem moa. “Okei,” hem i talem long ol misinari. “Bae mi lisin long yufala.”
I bin 10 yia nao stat long taem we Te Awhina i bin baptaes i kam wan memba blong Jos Ia blong Jisas Kraes blong Ol Lata-dei Sent. Hem i bin kam wan misinari hemwan i no long taem afta long baptaes blong hem, taem hem i bin givim seves long Ostrelia Brisban Misin. Afta, long 2020, hem i maredem Josh, ‘man blong ol drim blong hem.’ Kapol ia i stap lukluk fored blong sil long wanwan long tufala—blong taem ia mo taem we i no save finis—taem we bae Niu Silan Hamilton Tempol i open bakegen.
Te Awhina i stap luklukbak long wokbaot blong laef blong hem wetem wan simpol kwestin, hem i luksave se Profet Josef Smit i bin kasem tu revelesen blong hem we i bigwan long ol narafala, from se hem i gat strong tingting ia blong askem long God . . . mo olsem Josef Smit, Te Awhina i bin lanem se samtaem, ansa i no kam isi.
Taem ol misinari oli bin eksplenem Tok blong Waes long hem faswan, ansa we Te Awhina i givim hem i, “No tangkyu.” Be nomata se hem i faenem i had wetem tingting ia blong stopem ol drag, hem i sapraes hemwan from hem i bin obei kwiktaem. Be “Long en blong [misinari] lesen ia, mi nomo wantem kofi,” hem i laf.
Evri samting i no foldaon stret long wan isi wei, be Te Awhina i gohed strong mo i kasem praes we i hiling mo fogivnes tru long Atonmen blong Jisas Kraes. Truaot long ol yia, blong save se yang Josef Smit i bin faet wetem wan strong tudak, i givim hem paoa mo hop, hemia bifo nomo we hem i eksperiensem merikel ia blong Fas Visen, we i pusum i kam niufala dispensesen blong gospel long wol.
Ol toktok blong Elda Jeffrey R. Holland i bin helpem Te Awhina blong andastanem fasin ia:
“Hem i trutok ia we i simpol mo semtaem series, we bifo long ol bigbigfala taem, mo yes bifo ol taem blong spirit, enemi, fasin blong agens, mo tudak, i save kam. Laef i gat sam long ol taem blong yumi, mo wanwan taem, mo oli kam long stret taem we yumi stap kam kolosap long wan impoten desisen o impoten step long laef blong yumi.”1
“Taem mi selebretem 10-yia aniveseri blong mi blong joenem jos ia, mi faenem hiling we i kam nomo taem yumi lukluk i go long Kraes mo sakem sin,” Te Awhina i talem. “Mi talem tangkyu long ol misinari, from ol trutok we oli bin tijim long mi . . . mo from wanem we gospel i bin mekem long laef blong mi.”