RONGORONGO NI KAIRIIRI MAN TE AONO
E Kona RTE n Tei ibukin te Rekomente n te Tembora ae Tuai Bane Taina
Kabotoan ara iango iroun Kristo ao Katotongana e bon kakaawaki nakon rikirakera n tamnei. Tauakin te toa ao kawarakin te tembora bon kawai aika uoua ake a kona ni buokiira bwa tina kona ni kabotoa ara iango Iaona. Berita aika ti karaoi ngkana ti taua te toa ao berita aika ti karaoi n te tembora bon kawai aika uoua aika a kaota ara tangira ao ara iango ibukin ara Tia Kamaiu.
N te bong aei ao I kan tibwaua aron tabun ao mwaakan te tembora inanon maiura. Moan taeka aika RTE a tei ibukin Rinean te Eti, ao bon ibukin naba te Rekomente ibukin te Tembora ae Tuai Bane Taina. Te kakao ibukira ni kabane man te ririki ae 11, bon karekean te rekomente n te Tembora ae tuai bane taina.
Bukin tera e rang ni kakaawaki ibukira ni kabane bwa ti na riai n iai iroura ara rekomente ibukin te tembora ae tuai bane taina? Bwa ti kona iai ni kaotia nakon te Uea ae ti waakirake iaon kawain te berita ae tabu, ao ni kaotia naba nakon te Uea ae ti teimatoa n nakonako iaon kawain ara berita ae tabu.
E taekina aei Beretitenti Russell M. Nelson n te Maungatabu ni Kabuta n Okitobwa 2022 iaon taekan berita aika tabu:
“Te kaniwanga ibukin kawakinan berita ma te Atua bon te mwaaka mai i karawa—te mwaaka are e kakorakoraira ni kaitarai ara kangaanga nako, kariiri, ao e karaui nanora. Te mwaaka aio e karokoira ni kawaira. Te koraki ake a kawakin Ana tua Iesu Kristo aika a korakora a karekea Mwaakana ae korakora riki. Ngaia are, naake a kawakin berita a na karekea okoron motikan rawaia are e roko nakoia rinanon reitakiia n aia berita ae tabu imarenaia ma te Atua.”1
Kona bae n titiraki bwa tera berita akanne. Inanon te Kaetieti n te Aeniboki ni Kabuta 27:2 iaan atuuna ae, Te Entaumente, e taekinaki inanona:
“N te entaumente, ao a kaungaaki membwa bwa a na karaoi berita n aron aikai:
-
“Maiuakina tuan te ongeaba ao ni kataia ni kawakin Ana tua Tamara are i Karawa.
-
“Ongeaba n tuan te anga karea, are nanona te anga karea ni boutoka ana mwakuri te Uea ao n raira nanom ma te nano ae uruaki ao te tamnei ae raraoma.
-
“Ongeaba n tuan ana euangkerio Iesu Kristo, are bon te tua are moan te rietata are E reirei ngke E mena iaon te aba.
-
“Kawakina tuan te itiaki, are nanona bwa te membwa e na ti wene n taanga ma te aomata are teuanne ke neienne a tia ni mareaki ma ngaia iaan te tua ni kaineti nakon ana tua te Atua.
-
“Kawakina tuan te anganano, are nanona a na anga aia tai, tarena, ao bwaai ni kabane ake a tia ni kakabwaiaki iai iroun te Uea bwa a na katea ana Ekaretia Iesu Kristo iaon te aba.”2
A mwaiti kakabwaia aika tamaroa ao ni kakukurei aika a tauraoi ibukiia naake a rin n ana auti te Uea ae tabu.
E tibwauaia te Unimwaane ae Dale G. Renlund man te Kooram n Abotoro n te Tengaun ma Uoman taekan kakabwaia aika a kakukurei ake a tauraoi ibukira bwa ti na karekei ngkana ti katabeira n te mwakuri ni kamaiu ibukiia ara bakatibu:
-
Ibuobuoki ni buoki kangaanga, nano aika uruaki ke n rawawata;
-
Te konabwai n aki namakina te maroa;
-
Karikirakea tangiraia aomata, riki kain ami utu aika a maiu ao ake a tia ni mate;
-
Te mwaaka ni kona n ata te kaokoro;
-
Ana kairoro riki te Tamnei ae Raoiroi n namakina te kairi ni maium;
-
Rikiraken am konabwai n raira nanom ao ni kamanoko man te kataaki;
-
Katamaroan ao kaitiakan nanon temanna;
-
Rikiraken kakabwaia n te utu, n aki taraa ana kangaanga temanna ae e a tia n nako, ke ana kangaanga te utu ae na roko ke e kanga aki nakoraoin ana riki teuana te utu;
-
Te rairaki ao te kakaonimaki ae korakora nakon te Tia Kamaiu rinanon rikiraken te onimaki Irouna ao te mataata riki n Ana Mwakuri ni Kamaiu;
-
Rikiraken te kimwareirei rinanon rikiraken te konabwai n namakina ana tangira te Uea;3
Ana kabanea ni marooro Beretitenti Nelson n te Maungatabu ni Kabuta Okitobwa 2022 e atuunaki, “Kabanea am iango iaon te Tembora”.4
N te Kaotioti 7 kibuna 13–17 e kangai taekana:
“Ao e taetae temanna mai buakoia unimwaane, ao e kangai nako iu, Antai aikai aika kunnikaia n ninira aika mainaina? Ao a nako mai ia?
“Ao I taku nako ina, Au uea, ko ataia. Ao e kangai nako iu, Bon aika nako mai ibuakon te rawawata are korakora, ao a teboki niniraia, ao a kamainainai n raraan te Tibutetei.
“Ma ngaia ae a memena i nanoaan ana kaintokanuea te Atua ao a toro i Rouna ni ngaina ao ni bong ni maneabana: ao Teuae tekateka i aon te kaintokanuea E na taakina umwana i aoia.
“Ane a na aki manga baki, ao a na aki manga taka; ao e na aki riringa taai I aoia, ao a na aki bue.
“Ao te Tiibutetei ae I nanoaan te kaintokanuea e na riki ba aia Tia Kawakin-tiibu, ao E na kairiia nakoni koburaken raan aika kamaiu; ao te Atua E na kaoi rannimataia ni kabane mai mataia.”
Ti kona, n ana taeka Beretitenti Nelson ni, “Kunea te rau man tinebun, ao karawawata n te maiu aei man tokanikaimi ao kangaangan te aonaaba rinanon am berita ma te Atua.”5