Ana Iteraniba te Aono
Rikiraken te Onimaki ao Bwaai Riki Tabeua Aika Raraoi i Kiribati
Buokakiia te koraki ake a korakora aia kangaanga bon ana mwakuri te Tia Kamaiu ao bon te tai ae kakukurei ni Buokiia.
Tiaki nanona bwa ko na kabanea am tai ni ukoukoriia naake a kainnanoa te ibuobuoki ma bon ana botoniango Ana Ekaretia Iesu Kristo ibukiia Aika Itiaki ni Boong aika Kaitira bwa e na buokiia natin te Atua ni kabane n aron ana kawai Kristo.
E kakaei aanga te Ekaretia ibukin waakinan karikirake ibukin boutokaakin aanga ake ana kona ni kaungaa te riki n toronibwai, te iwawaaki ao te reita ni maiu.
Te karikirake anne e waaki ngkai iaon Kiribati n Aban te Betebeke.
Tamana Natanaera, te manatia n te riki n toronibwai n te tabo ibukin Ana Ekaretia Iesu Kristo ibukiia Aika Itiaki ni Boong aika Kaitira, e mwiokoaki bwa e na kakaeia membwa aika iai aia atatai n te ununiki ao iai nanoia ibukin kaikawakin bwaai.
Te mwakuri ma taan kairiiri n te tabo irouia Aika Itiaki ni Boong Aika Kaitira, e ibuobuoki Tamana ni kakaeia membwa aika tau ake e araniia bwa “tiambion.”
A anganaki tiambion n tatabemaniia nako te bwai ni mwakuri ni katea te tabo ni kabwebwe are e na tau nakon ana tabo ae tauraoi teuanne ke neienne.
Te auti ni katantan ae beebete e karaoaki bwa e na kawakin ao ni kamanoi turee ni kabwebwe, ao n raonaki ma karekean te nuu ae kainnanoaki. A karekeaki koraa ibukin kabwebwean kai n amwarake n aron te kukambwa, bwaingan, bebwa, kabiti, tomato, watermelon, bwabwaia ao te rock melon.
Te tititem ibukin karekean te ran bon te bwai ae rang ni kainnanoaki i Kiribati. E ngae ngke aban Kiribati ake 33 a biri inanon taari ae 3,500,000 te tikuea kiromiita, e rang ni karako te ran ae mam.
Ngaia are anganaki tiambion n tatabemaniia nako ma te tititem ibukin karekean te ran n tebo aroka are raonaki ma te tiora bwam are e na katika te ran man te mwanibwa, te tangke n ran ma te bwai are e na toka iai, ao te tititem ibukin te bwaibu.
E kunea Tamana Natanaera bwa te tititem n te ran are anganaki tiambion e rang n ibuobuoki bwa e buokiia “ni kanakoraoa aia konabwai ni unika ae mwaiti riki.”
Man bwaai ni mwakuri aikai, a kona tiambion n te ununiki ni karaoa tabeia. Inanon uoua te ririki ngkai, a tia ni kabwebwei koraa inanon turee aika uarereke ao ni kaikawaia.
Ngkana a tauraoi kabwebwe n unikaki inanon te onaroka, e moanna te tiambion n tibwauaia ma kain rarikina ao raoraona. A na tuangiia taan kairiiri n te Ekaretia ae a na katanoata nakoia kain te taromauri bwa a tauraoi ngkai kabwebwe. A kona naba n anga taian kabwebwe nakoia raoia ni mwakuri ke kain rarikiia n aia komiunitii ake iai nanoia ni karaoa te ununiki.
N ana katautau te Tiambion Koruea Kaburara ao e a tia ma kainnabana ni buokiia 100 aomata ni katoa namwakaina. E rang n tararuaia raoi te koraki ake e anganiia taian kabwebwe man anganakiia kaetieti ao aron tararuakiia.
N tabetai e buokiia n anganiia te tano ke kanan te aroka ake e karaoi.
E anga Koruea arokana aika e mamate nanona iai nakoia ake bon iai nanoia ni koaua ni kan ira te waaki. “A mwaiti membwa aika a kawarai ao aomata naba n au tabo ni mwakuri ao n au komiunitii. I namakinna bwa I tangiria ni buokiia. A kukurei ni karekei arokaia.”
Ngkana iai nikiran ana koraa te tiambion, a kona n uniki n oin aia onaroka bon ibukiia ke a kona ni manga tibwauai tataran ake a karekei nakoia kain rarikiia.
E a kona Koruea ni kamwarakeia ana utu ao ni karekea ana mwane rinanon ana babaire ae nakoraoi. A rang ni kukurei kain rarikina ni kabooi aia uaanikai mai irouna. Te waaki ae nakoraoi aei e kakabwaiaia naake a irekereke mangaia ao ni kona ni kateimatoaaki.
Ana Ekaretia Iesu Kristo ibukiia Aika Itiaki ni Boong aika Kaitira e na katauraoi koraa nakoia tiambion ibukin teuana riki te ririki ao ni banen te tai anne, a riai taan ununiki ni kona ni karekei oin aia koraa ni kateimatoa unikakin ao tibwauakin taian kabwebwe. E na reitinako te burokuraem ni kakabwaiaia aomata aika a mwaiti inanon komiunitii iaon Kiribati.
Te karikirake aei tiaki ti te katooto ibukin kaikawakin taian kabwebwe, ma karikirakean naba te riki n toronibwai, te nano ni komiunitii ao te iraorao ma kain rarikim. Boutokaan bwaai aikai ni kabane bon rikiraken te onimaki—irouia kaina aika mwaiti—are E karikii bwaai ni kabane, ao are E tabe ibukiia Natina, temanna imwiin temanna.