Ana Iteraniba te Aono
Reken te kakai nakon Temanna te Mitinare inanon boong aikai
Ni moan te ririki ae nako, ao Unimwaane Allistair B. Odgers e tuangiia beretitenti n ana titeiki bwa ana katea aia kouru iaon mwaitiia ara mitinare ake ana karaoa aia beku ae bwanin ibukin Ritembwa 2022.
Imwiin ara tataro ma ara aki mamatam, ao I a katea ara kouru ae e na kona ni karokoira bwa tina riki bwa te titeiki; te kouru aei e na rang ni kainnanoa te onimaki ae korakora are e na kona n uota te taneiai ma te kakai nakon maiuiia ara membwa. I atai mwaitiia ara mitinare ake a teimatoa ni mwakuri, ao mwaitiia ara mitinare ake a tabe ni kakatauraoi bwa e na nakon 10–12 inanon Ritembwa. Ma e kairaki au iango bwa na uotarake ana kouru ara titeiki nakon te mwaiti ae 25.
Inanon te tai ae tawe ao ia moana au bowi ma au bitiobi, beretitenti n te Mwaanga, kauntira aika rietata ao membwa n te kauntira n te titeiki. Ti kaungaiia ni kabane bwa a na kakaeia riki raoia ara mitinare ake 10–15 aika ti tuai waaki ni mwakuri ngkai ma ngaiia. Kaanga bon tabeua te tai, inanon tain te Maungatabu ni Kabuta are boo n Eberi, ao e kaungaiia ataeinimwaane ma ataeinnaine ni kabane ake iai nanoia Beretitenti Russell M. Nelson bwa ana karaoa aia mwakuri ni mitinare ae bwanin. E kaungaiia ni kabane Beretitenti Nelson bwa ana ukora ao man kantaningaa te kakai’ inanon tain kakorakoraan tamneira.1
E tuatua Unimwaane Odgers nakoia beretitenti n taian titeiki inanon ara kauntira ni kairiiri, bwa a na riai bitiobi ma beretitenti n aia mwaanga ni kaoiia uoman mwaane bwa ana karaoi aia mwakuri ni mitinare ni katoa wiiki. Ma ara kantaninga iaon te kakai ae e na kaoti, ao ia manga kaungaiia riki ara taan kairiiri ni kakaei aia kawai aika boou ibukin karekeaia aia mitinare, inanon baraakinan aei ao ti na bon rinanon taneiai mai iroun te tamnei n raonaki ma kakai inanon ara tai n ukora kairan ara iango bwa antai ae ti na kaoa.
N ara bowi n te kauntira are rietata n ara titeiki are imwiina, ao temanna tarira are e tuangiira bwa iai natina uoman aika a kona ni karaoa aia mwakuri ni mitinare. Temanna iai nanona ni beku ibukin te Uea, ma are temanna, bon akea nanona. Natina aei, ten Sione, e a tia ni kabanea ana tai ni maeka n te States, ao bon iai raona te aine, ao e taekinna bwa e tuai man roko kaekaan ana tataro, ae e na riai n nako ni karaoa ana mwakuri ni mitinare.
N aron te Tamnei naba are roko nakon Aramwa, ma ranin matana aika waanako, ao te karo aei e tua ngkana ti kona n tataro ibukin Sione bwa e aonga ni karekea te kaeka mai iroun te Uea.
N ai aroia ni kabane, ao I reitinako n tataro, ao n aki mamatam ibukin te ataeinimwaane aei.
I uti n ingabongin te Kaonobong teuana ao n tabe n iango inanon weneweneu ngke e a tii roko naba irou te bwai ae kamiimi. Te kaotioti ibukin Sione are e a tii roko naba n au iango. I tuangaki bwa na kawaria n te bong are imwiina, imwiin banen raoi tabeu ake n na karaoi n te bong anne. E kabwaranakoaki te kaotioti aei ao I tuangaki titiraki ake n na tabeki nakon Sione. Ao I tuangki naba aron tein ana kaeka, ao arou naba ni manga kabooa. E rangi ni mataata raoi man teretere te rongorongo aei.
N te tairiki anne, ao I kauka au aki mamatam ao n tataro bwa ana teimatoa ni kamatataaki raoi kanoan te kaotioti arei bwa I aonga ni karaoa nanon tibwangau are ia tia n anganaki.
N te bong are imwiina ao I kaea ara maungatabu n ara uoote, I manga karaoi tabeua taian intawiu ao imwiina ia oki rikaaki nakon au kaa. Ngke ia tabe ni butinako man te umwantabu, ao e roko ana kauring te Tamnei ibukin katabeau. E a manga kaoti naba te kaotioti are I a tia ni karekea n te bong are mai imwaaina, n te aro ae kamiimi ao man riinga nanou.
Ngke I a roko ni mweengaia kaain te utu, ao I a karebwebwe n aia mataroa ao ni kaongoaki are tamaia e a tia nako tinaniku. Ngke e kawarai tinaia n te mataroa, ao I a tuanga ngkana I kona ni marooro mangaia ao Sione. E bon tabe ni kuukana aia katairiki. E karinai tinaia ao tia kaai ni bane n tekateka ngaira ake teniman inanon aia katangaina ao ni maroro.
I tuanga Sione bwa e na karaoa ara tataro ao n te tai ae waekoa ao e a kaoti naba kanoan te kaotioti n aron are e a tia n roko n te bong are mai imwaaina.
I tuanga Sione bwa tera ana iango ibukin karaoan ana mwakuri ni mitinare? N ana taeka ake e taekin, ao e kaekaai n aron are e oti n te kaotioti. E kabwarabwaraa bwa e aki raoi koaua ngkana e na nako ni mitinare; ao e a tia naba n tataro ma n ana iango ao e taku bwa e tuai kaekaaki. I titirakinna ngkana iai ana kakabwaia n te tamanuea. E kaeka, “eng”. Ia manga tuanga, “Tera ae mwaneweaki ibuakon am kakabwaia n tamanuea?” E kaeka, “Na nako ni karaoa au mwakuri ni mitinare”.
N tein raoi are I a tia n tuangaki, ao I titirakinna, “Tera raoi aron te Uea ae karaoia ni kaekai taian tataro?” E matoa iangoana iroun Sione . . . ma imwiina ao e a tibwaua ana iango. Ma te korakora are roko mai iroun te tamnei ao ana kairiiri ma te rokonnano ae raonaki n te nanorinano, ao I taku, “I a tia n tuangaki iroun te Uea, Iesu Kristo, rinanon te kaotioti, bwa n na kawariko n te bong aei. I kakoauaa nakoim bwa a kaekaaki tataro rinanon namakin, am iango, am wareware ni booki aika tabu ao n aanga riki aika bati. N te bong aei ao I roko iaan ana babaire te Uea, Iesu Kristo, ni kaekaan am tataro ao n tuangko bwa ko na kanakoi am nanokokoraki. Sione, e kaoiko te Tia Kamaiu bwa kona karaoa am mwakuri ni mitinare. Iai ana mwakuri ibukim ao bon te mwakuri ae bon tii Unimwaane Hala ae kona ni karaoia bwa iai ae temanna ae kakaawaki ae tataningaiko bwa kona kairia nakon ran ni bwabetito”. Aio are ai tokin naba te kaotioti.
I tuanga bwa tera ana namakin. E kabaraaka atuuna ao e tang, “E a tia ni kaekaaki au tataro ao I a tangiria ngkai ni karaoa au mwakuri ni mitinare”.
E na tauraoi ni kabanea ana tutuo Tarira Hala n ikotaki ma ana tutuo iaon wiina ao imwiina e a kanakoa naba ana beeba ni karinrin ibukin te nakoa ni mitinare. Kakai a bon kona naba n riki ni boong aikai tii ngkana ti kabanea ara onimaki iroun te Uea ae Iesu Kristo.