Ana Iteraniba te Aono
Te Tataninga ibukin Ana Kakabwaia te Uea are E Beritanna
E bungiaki Aulola Mateialona inanon Ana Ekaretia Iesu Kristo Ibukiia Aika Itiaki ni Boong Aika Kaitira. E kaikawaaki irouia tiibuna aika kakaonimaki n aia tabo ae Ha’alaufuli, Vava’u, Tonga ao n ana kawaniua n ririki ao e a bwabetitoaki. Imwiina ao Aulola e a karekea ana beeba man te Liahona High School, ae ana reirei te Ekaretia.
Ngke e koro 15 ana ririki, Aulola e karekea ana kakabwaia te tamanuea, are e berita nakoina bwa ngkana e teimatoa ni kokoaua nakon ana berita ma te Uea, e na mare n te tembora. Tabeua te ririki imwiina, ngke e katauraoi ni beku bwa te mitinare ae bwanin ana tai, e mataata iroun Aulola aron kakawakin te kakabwaia ae beritanaki anne. Ngke e nakonako rinanon te Nuku’alofa Tonga Tembora n te moan tai, e korakora nanona bwa e na oki n te bong teuana ma raona ao ni kabaeaki ma ngaia n akea tokina n te tabo ane tabu anne.
Bwaai ake a riki inanon maiun nei Aulola, bon tiaki are e a tia ni kantaningaia nakon are e a tia ni baireia mai inanona. Imwiin ana mwakuri ni mitinare, ao e bon anaa tabeua te tai imwain ae e a iangoia bwa e nang iein, ao n te tai anne are e a reke nanona iroun temanna ae kaokoro ana onimaki ma ngaia.
“Bon te mwaane ae tamaroa,” E taku nei Aulola. “E rang ni butimwaeiia mitinare man [au Ekaretia] nakon mweengara ao ni kamwarekeia, ma kaanga bon akea nanona ni kan ongora nakon aia rongorongo.” A rang ni matoatoa ana utu n aia onimaki, ao e aki kan urua aron tein aia taneiai. E rotaki aia mare ni kakaokoron aia onimaki. E aki kona ni kakaei raoi bootaki n toa n aron are tangiria, ao e aki kona ni kaikawaiia natina inanon te Ekaretia n aron are e a tia ni kaikawaaki iai ngaia. Ni karokoa ao e a roko ni matoatoana te nakobuaka inanon mweengaia. Imwiin 23 te ririki, ao a iangoia taanga aikai bwa a nang maenako.
E rang n rawawata neie Aulola. E a bua ana mare, ao n raonaki, ma ana kantaninga ao ana iango ibukin ana utu nakon taai aika imwaaia, ao ngkai e a manga taonaki n te aoraki. Inanon rawawatana ao marakina, ao e a rairaki nakon Tamana are i Karawa ibukin ana kairiiri. “I karaoa au aki mamatam ao n tataro, ao ni berita nakon te Uea bwa ngkana e manga kariaia okiu, ao n na bon aki manga tannako mai Irouna.”
Ana tataro aki toki ni kaakaira ana iango nakon ana kakabwaia n tamanuea, are e a anganna te rau ao te kabebeteaki inanon tain te nakobuaka aei. N te bong teuana, ao e wareka kanoan te berita are e na katiteuanaaki n tembora, ao ikanne are e ataia nei Aulola te bwai ae riai ni karaoia. “I ataia ae ngkana I aki karaoa tabeu, ao e na bon aki kona n mwakuri.” Ni bon te tai naba anne, ao e a manga moan motikia bwa e na kawakin ana tua Tamana are i Karawa, ni kaaniia ma Ngaia rinanon kakaean te taromauri, te tataro ni katoa bong ao kamatebwaian booki aika tabu.
Imwiin te tai ae aki maan, ao e a rereitaki Aulola ma temanna raoraona inanon ana tai ni kairake ngkoa bon iaon Tonga: Te Tari ae Semisi Mounga Mateialona, ae bon kain te nakoanibonga ao are e a tibwa raure naba. A kamatoai aia rereitaki rinanon aia tai n tibwauai kanoan taai ake ngkoa ao aia tangira ibukin ana euangkerio Iesu Kristo, are e a ataia naba iai Aulola bwa aio te mwaane ae tau ibukina. A mareaki taanga aikai n te ririki 2019 i Nutiran ao n raabanen Tebetembwa 2022, a kaea te Tembora I Nuku’alofa Tonga bwa a na kabaeaki ibukin te tai aei ao ae akea tokina.
N tain te fireside teuana n te Papatoetoe Titeiki I Auckland, ao e a karakinna nei Aulola aron taraakin te bwai ae e aranna bwa te kakai. Ngke e ataeinnaine, ao e a kaman namakina mimitongin te tembora ao kakawakin te nebonebo inanona. Ma imwiin, 23 te ririki, ao akea ataakina ae e na reke angana ni karekei kakabwaia man te tembora n aron are beritanaki n ana kakabwaia n tamanuea . . . ao e bon aki bwara nanona.
E maan te tai, ma te nanorinano ao te aekaki n onimaki are e na kona ni bita te maiu, ma ngkai ao e a namakinna nei Aulola ae e a okira kainikatikuna. N te tai aei, ao e a kona ni kakoauaa: “Ngkana ko teimatoa ni kaniiko ma te Atua, ao E na Kakabwaiako nakon are E a Tia n taekinaki n te berita . . . tii ngkana ko karaoa tabem.”