ENNAAN AN RITŌL AN ERIA
CTR Emaron̄ jutak kōn Current Temple Recommend
Mijeļo̧k Kraist im erom̧ āinwōt E eaorōk n̄an eddōkļo̧k eo ad ilo jetōb. Bōk kwojkwoj eo im kobaļo̧k ilo tampeļ eo rej ruo wāween ko n̄an mijeļo̧k E. Bujen ko jej kōm̧m̧ani n̄e jej bōk kwojkwoj eo im bujen ko jej kōm̧m̧ani ilo tampeļ rej ruo wāween ko reļļap im aorōk n̄an kwaļo̧k ad iakwe im mijeļo̧k Rilo̧mo̧o̧r.
Rainin ikōņaan kwaļo̧k kōn ekwojarjar in im kajoor eo an tampeļ ilo mour ko ad. CTR ej jutak kōn Choose the Right/Kāālet Jim̧we Eo, im ej barāinwōt jutak kōn Current Tempel Reccomend/Mālim Ekāāl Deļo̧n̄e Tampeļ. Kūr eo n̄an aoleped jān iiō 11, ej n̄an bōk juon mālim ekāāl n̄an deļo̧n̄e tampeļ.
Etke eļap an aorōk n̄an kōj aolep n̄an kabwijer mālim ekāāl n̄an deļo̧n̄e tampeļ? Ej kwaļo̧k n̄an Irooj bwe jej ped ilo iaļan bujen eo, im ej kwaļo̧k n̄an Irooj bwe jej ped wōt ilo iaļen bujen eo.
Būreejtōn Russell M. Nelson ekar ba ilo Oktoba Kweilo̧k eo Eļap 2022 kōn bujen ko:
“Nōbar eo kōn kōjparok bujen ko ippān Anij ej kajoor in lan̄—kajoor eo ej kōkajoor kōj n̄an jutak ņae apan̄ ko ad, kapo ko, im būrom̧ōj ko. Kajoor in ej kaenōm̧m̧an iaļ in ad. Ro rej mour kōn kien ko an Jisōs Kraist em̧ōj aer bōk kajoor eo An. Aaet, rikōjparok bujen ro remaron̄ bōk kain kakkije rot in me ej itok n̄an er kōn bujen eo aer ippān Anij.”1
Komaron̄ kajjitōk ta bujen ko. Ilo Bok in Bōk Meļeļe eo Eļap in Kōmeļeļe ko 27:2 ium̧win taitōļ eo, Menin Letok Kwojarjar Eo, ej ba:
“Ilo menin letok kwojarjar eo, membōr ro rej karuwaineneik er n̄an kōm̧m̧ani bujen ko rekwojarjar n̄an:
-
“Mour kōn kien pokake im kajjieon̄ jon̄an ad maron̄ n̄an kōjparok kien ko an Jemedwōj Ilan̄.
-
“Pokake kien wūjlepļo̧k ak kaarmejete, eo me ej meļeļein wūjlepļo̧k n̄an rie jerbal eo an Irooj im ukweļo̧k kōn juon bōro erub im jetōb ettā.
-
“Pokake kien eo an gospel eo an Jisōs Kraist, eo me ej kien eo eutiejtata me E ekar katakin ke Ekar ped ioon laļ in.
-
“Kōjparok kien erreo, eo me ej meļeļein kōtaan ko an mour in m̧ōm̧ an kanniōk en kōm̧m̧ān wōt ippān ro me rej m̧are ilo jetjet im ekkar n̄an kien im kien m̧are an Anij.
-
“Kōjparok kien wūjlepļo̧k, eo me ej meļeļein leļo̧k aolep iien, taļōn, im aolep men ko me Irooj ekar kōjeram̧m̧an eok kaki n̄an kalōk Kabun̄ eo an Jisōs Kraist ioon laļ in.”2
Ewōr kōjeram̧m̧an ko reļļap im aiboojoj rej kōttar ro rej deļo̧n̄e m̧weo ekwojarjar m̧ōn Irooj.
Elder Dale G. Renlund jān Doulul eo an Jon̄oulruo Rijilōk ro ekar kwaļok jet kōjeram̧m̧an ko rekabwilōn̄lōn̄ rej pojak n̄an kōj n̄an bōki n̄e jenaaj bōk koņaad ilo jerbal in lo̧mo̧o̧r n̄an ro jibūd im jim̧m̧aad etto:
-
Jipan̄ bōro ko remetak, rerūb, ak aikuj n̄an kōmour;
-
Maron̄ eo n̄an jab en̄jake ad make iaad;
-
Kōļapļo̧k iakwe n̄an ro jet, eļaptata ro uwaan baam̧le eo am̧ ro remour im remej;
-
Kajoor eo n̄an kile;
-
Eļapļo̧k kareel eo an Jetōb Kwojarjar n̄an en̄jake kajoor im tōl ilo mour ko ad make;
-
Kōļapļo̧k maron̄ eo n̄an ukweļo̧k im kōjparok jān kapo;
-
Kōkōm̧anm̧anļo̧k im kokwojarjar būruōd;
-
Kōļapļo̧k kōjeram̧m̧an ko an baam̧le, jekdo̧o̧k kain jekjek rōt ko kiiō, m̧okta ak ilju eo an baam̧le ak ewi jon̄an an jab wājepdik menmenbwij eo ad;
-
Oktak n̄an Rilo̧mo̧o̧r en m̧wilaļ im pād wōt kōn eļapļo̧k tōmak ilo E im juon meļeļe em̧m̧anļo̧k kōn Pinmuur eo an;
-
Kōļapļo̧k lan̄lōn̄ kōn juon maron̄ eo eļapļo̧k n̄an en̄jake iakwe eo an Irooj;3
Naan in ikkilōk ko an Būreejtōn Nelson ilo Oktoba 2022 Kweilo̧k eo Eļap kar taitōļ e, “Mije Tampeļ eo”.4
Ilo Revelesōn 7 eoon 13–17 ej ba:
“Im juon iaan elder ro ear uwaak im ba n̄an eō, ‘Er rej kōņak nuknuk ko re mouj, Wōn ro? Im rej itok jān ia?’
“Im ij ba n̄an e, ‘Kwe, aō Irooj,’ kwō jeļā. Im e ba n̄an eō, ‘Rein ro raar itok jān en̄taan eo eļap, im raar kwaļe im kamouj nuknuk ko aer ilo bōtōktōkin Lamb’.
“Kōn men in rej im̧aan tūroon an Anij, im rej karijer n̄an E raan im bon̄ ilo tempel eo An; im Eo ej jijet ioon tūroon Enaaj erļo̧ke m̧ōn kōppād eo An ioer.
“Re jāmin bar kwōle, rejāmin bar maro, im aļ e jāmin bar kōjeek er, jab, ak ejjeļo̧k bwil.
“Bwe Lamb eo ej aolepān tūroon Enaaj aer Seperd, im Enaaj tōl er n̄an unin dān ko dān in mour; im Anij enaaj kōm̧ōrāik dānnin kōmjaaļaļ otemjej jān mejeir.”
Jen jouj im, ilo naan ko an Būreejtōn Nelson, “Lo kakkije jān pere, men ko jab jeļā kaki, im anjiwiwi ko an laļin n̄an anjo̧ ioon laļin kōn bujen ko ippān Anij.”5