BWEBWENATO KO AN IJO JOKWE IE
Eddōkļo̧k in Tōmak im Men ko Jet Rem̧m̧an ilo Kiribati
Jipan̄ ro rej apan̄ ej jerbal eo an Rilo̧mo̧o̧r im ej juon iien em̧m̧an eļap im jeram̧m̧an n̄an jipan̄ E.
Juon ejjab aikuj n̄an kappukot ijoko ettoļo̧k n̄an loe ro rej ped ilo aikuj im ej kōttōpar eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata n̄an jipan̄ aolepān ajri ro nejin Anij ilo juon wāween eo Kraist enkar kōm̧mane.
Kabun̄ in ej kappukot n̄an kobaļo̧k ilo project ko rej lelōn̄ļo̧k “hand up” me rej rojan̄ un̄n̄are peid make, bōk koņaan im dābiji.
Kain project rōt in ej wōnm̧aanļo̧k ilo Āne ko ilo Pacific in Kiribati.
Tamana Natanaera, juon māānija in un̄n̄are-peid make n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata, kar jerbal n̄an kappukot membōr ro ewōr aer jeļā ilo ekkat im ewōr aer iakwe n̄an kaddōk men ko.
Jerbal ippān ritōl ro Rekwojarjar ilo Raan Ko Āliktata ilo Kabūn ilo jikin eo ej pād ie, Tamana ekar jipan̄ loe jiljilimjuon membōr ro rekkar im ro rekar ņae etāer “champions.”
Kajjojo champion rein kar leļo̧k n̄an er kein jerbal ko n̄an ijjinoe jikin ekkatak ko aer ekkar n̄an jon̄an jikin ko aer.
Juon greenhouse edik im pidodo kōm̧m̧ane kar jipan̄ļo̧k n̄an dāpij im kōjparok tray in ine ko, barāinwōt n̄an leļo̧k ellōr eo aikuji. Ine ko rekar leļo̧ki kar n̄an kaddōkļo̧k leen ko eļap ōōn ie ko āinwōt cucumber, eggplant, capsicum, cabbage, tomato, watermelon, keinabu, im rock melon.
Juon system in dān ej juon menin aikuj ilo Kiribati. Men̄e 33 āne ko rej ejaake Kiribati rej ererakļo̧k 3,500,00 square kilometer ko ilom̧aļo, dānnin draak edik.
Champion rein rekar leļo̧k n̄an kajjojo iaer watering system ko kar kōm̧m̧ane jān juon solar pump jidikdik n̄an kōto̧o̧rļo̧k dren jān aibōjlaļ eo, juon nien in dren ippān juon kein an jutak im juon pipping system.
Tamana Natanaera ekar ba bwe water system eo kar leļo̧k n̄an champion rein ej juon jipan̄ eļap ilo an “kōkm̧anm̧anļo̧k maron̄ eo aer n̄an kalle eļapļo̧k.”
Kōn kein jerbal kein remenin aikuj, riekkatak champion rein rekar maron̄ kōm̧m̧ane ijo koņaer. N̄an ruo iiō kiiō, rej wōnm̧aanļo̧k ilo ekkatak ine ko ilo tray jidikdik ko im kaddōki.
N̄e ine ko rej pojak n̄an ekkati ilo jikin kallūb eo, champion rein rej jino ajeeji ippān ro rūtūrier im ippān ro m̧ōttāer. Remaron̄ kajjitōk ippān ritōl ro an Kabun̄ in n̄an kōjjeļāik n̄an m̧ōn jar eo bwe ewōr ine ko em̧ōj aer jino eddōk n̄an bōki. Remaron̄ barāinwōt leļo̧k ine ko em̧ōj aer jino eddōk n̄an rijerbal ro m̧ōttāer ak ro ritūrier ilo jukjukin pād ko ro rej ikdeelel n̄an kaddōk kijeer make.
Champion Koruea Kaburara ekar būne bwe e im ļāeo pāleen rekar jipan̄ emaron̄ 100 armej aolep allōn̄. Ej tiljek in lale ro ej leļo̧k ine ko nejin n̄an er ilo an leļo̧k kōmeļeļe im laleļo̧k aer jerbal.
Jet iien ej jipan̄ er ilo an leļo̧k bwidej ak m̧ōn̄ā ko kijen menin eddōk ekar kōm̧m̧ani.
Koruea ej leļo̧k menin eddōk kein nejin raorōk n̄an ro rej m̧ool n̄an wōnm̧aanļo̧k. “Elukkuun lōn̄ membōr ro rej itok n̄an ippa im bar armej ro ilo jikin jerbal eo aō im ilo jukjukin pād eo aō. Ij en̄jake ke ikōņaan jipan̄ jim̧ōr. Rej m̧ōņōņō in ebbōk menin eddōk ko.”
N̄e champion ro ewōr bwe ippāer ine em̧ōj an jino eddōk, remaron̄ kōm̧akūti n̄an jikin ekkat ko aer make n̄an aikuj ko aer make ak remaron̄ wia kake leen ko aer n̄an ro rūtūrier.
Koruea emaron̄ naajdik baam̧le eo an im kwaļo̧k jāān jān jeļā in kōtōpalpal eo an. Ro rej jokwe itūrin rej kam̧m̧oolol n̄an maron̄ wiaki le ko rekāāl jān jikin kallūb eo an. System in ekapeel ej kōjeram̧m̧an aolep ro rej pād ie im maron̄ jipan̄ er.
Kabun̄ eo an Jisōs Krasit im Armej ro Rekwojarjar ilo Raan Ko Āliktata ej leļo̧k ine ko n̄an champion ro bar juon iiō im ilo jem̧ļo̧kin period eo, riekkat ro rej aikuj kiiō maron̄ kwaļo̧k make aer ine ko n̄an aer maron̄ kōm̧m̧an bwe ren eddōkļo̧k im ajeej ine ko em̧ōj aer jino eddōk. Būrokuraam̧ eo enaaj wōnm̧aanļo̧k n̄an kōjeram̧m̧an elōn̄ armej ilo jukjukin pād ko ilo Kiribati.
Project in ejjab wōt juon waanjon̄o̧k in kaddōk ine, ak ej barāinwōt kōn kaddōkļo̧k un̄n̄are-peid make, jetōbin jukjukin pād eo im jemjerā ko an doon. Men ko rej ejaake pedped in epen ej juon eddōkļo̧k in tōmak—ilubwiljin elōn̄ ro rekar bōk koņaer—ilo E eo ekar kōm̧anm̧an men otemjej, im eo ej kea kōn ajri ro Nejin, juon ilo̧k juon.