BWEBWENATO KO AN IJO JOKWE IE
Juon Menin Bwilōn̄ Raan Kein Ej Ioon Juon Mijinede
Jinoin iiō eo ļo̧k, Elder Allistair B. Odgers ekar kajjitōk ippān stake būreejtōn ro n̄an kōm̧mane juon kōttōpar kōn jon̄an nōm̧ba in full-time mijinede ro rej katakin ro renaaj kar jerbal ilo Tijem̧ba 2022.
Ālkin eļap jar im jitlo̧k, ikar kōm̧m̧ane juon kōttōpar eo enaaj letok n̄an kōj āinwōt juon stake; juon kōttōpar eo enaaj kar aikuji eļap tōmak im bōktok en̄jake ko ilo jetōb im menin bwilōn̄ ko ilo mour ko an membōr ro. Ikar jeļā jon̄an nōm̧ba in mijinede ro rej jerbal kiiō, im mijinede ro rej kōppopo me jej jerbal ippāer, enaaj kar ejjeļo̧k kajjitōk 10–12 mijnede ro rej jerbal ilo Tijem̧ba. Ikar im̧we n̄an leļo̧k 25 āinwōt kōttōpar eo n̄an stake eo am.
Ilo ejjeļo̧k kōttar ikar jinoe kweilo̧k ippān bisop ro, branch būreejtōn ro, high ko̧o̧njeļ im ro uwaan stake council eo. Kōm ekar kūr aolep n̄an bōro kuk im pukot kakkobaba in mijnede ro jet 10–15 ko kōm ekar jab jerbal ippāer kiiō. Ejjab to tokāļik, ilo Eprōļ Kweilo̧k eo Eļap, Būreejtōn Russell M. Nelson ekar bar juon alen kūr aolep likao ro, jiron̄ ro ewōr aer ikdeelel, n̄an etal im mijen. Būreejtōn Nelson ekar rojan̄ aolep n̄an ‘kappukot im kōtmene menin bwilōn̄ ko’ ilo ad kōļapļo̧k kajoor eo ad ilo jerbal eo ilo jetōb.1
Elder Odgers ekar kajjitōk ippān stake būreejtōn ro ilo coordinating ko̧o̧njeļ eo am, n̄an kūr bisop ro im branch būreejtōn ro n̄an karuwaineneik ruo likao ro aolep wiik n̄an etal im mijen. Tōmak ilo menin kabwilōn̄lōn̄ ko, ikar rojan̄ ritōl ro ad bar juon alen n̄an kōkāāl kijejeto ko n̄an kappukot mijnede ro, kwaļo̧k aorōkin bwe jenaaj bōk en̄jake ko ilo jetōb im menin bwilōn̄ ko ilo ad kappukot im̧we im tōl kōn wōn n̄an karuwaineneik.
Ilo kweilo̧k eo tok juon an stake high ko̧o̧njeļ, juon brother ekar ba n̄an kōm bwe ewōr ruo nejin ļaddik rekkar n̄an etal im mijen. Juon ewōr an ikdeelel n̄an jerbal n̄an Irooj, eo tok juon ekar jab. Ļaddik in nejin, Sione, ekar jokwe ilo Amedka, ewōr juon jeran leddik, im ekar ba ejjan̄in kar bōk juon uwaak n̄an jar ko an, eļan̄n̄e aikuj etal im mijen.
Ilo ejja jetōb eo wōt āinwōt Alma, im kōn dānin kemjaaļaļ ilo mejen, menin jemān ekar kajjitōk eļan̄n̄e kōm maron̄ jar kōn Sione n̄an bōk juon uwaak jān Irooj.
Ejjeļo̧k oktak jān aolep, ikar wōnm̧aanļo̧k ilo jar, im n̄an jitlo̧k kōn likao in.
Ekar m̧ōkaj aō rūj juon jibbon̄in Jādede im kejo̧kļo̧kjeņ kōn iien eo ikar bōk juon en̄jake. Juon visōn in Sione ekar itok n̄an ļōmņak eo aō. Kar kipel eō n̄an loļo̧k e raan eo tok juon, ālkin an dedeļo̧k jerbal ko aō kobban raan eo. Visōn eo ekar mejaļ im ikar bōk jejjōt in kajjitōk ko n̄an kajjitōk ippān Sione. Im ikar ron̄ nej kar uwaak ko an, im wāween aō nej kar tōn uwaak e. Ennaan eo ekar alikkar im jejjōt.
Joteen raan eo, ikar kōpelļo̧k jitlo̧k eo aō im jar bwe aolep men ilo visōn eo ren pād wōt ilo aer alikkar bwe in maron̄ kadedeļo̧k eddo eo em̧ōj kar letok.
Ikar pād ilo juon ward conference raan eo tok juon, kōm̧mane jet intōrpiu ko innem jibadōkļo̧k wa eo waaō. Ilo aō ettōrļo̧k jān m̧ōn jar eo, Jetōb ekar kakemeemej eō kōn eddo eo aō. Ilo juon wāween ekāāl ak ilo jetōb, ikar bar juon alen loe visōn eo ikar bōke raan eo m̧oktaļo̧k.
Tōprakļo̧k ilo m̧weo im̧ōn baam̧le eo, ikar kōļļaļļaļ ilo kōjem eo im kar jiron̄ eō ke jemeer ekar jako āneo, ak jineer epād. Ke jineer ekar itok n̄an kōjem eo, ikar kajjitōk eļan̄n̄e imaron̄ ekkōnono ippāerro Sione. Sione ekar boub in kōmat kejota. Jineer ekar karuwaineneik eō n̄an lowaan m̧weeo im kōmean̄ jilu ekar jijet ilo etōņaak eo im ekkōnono.
Ikar kajjitōk ippān Sione n̄an jar im em̧ōkaj an bar visōn eo mejaļ ilo an alikkar āinwōt kar ilo bar raan eo m̧oktaļo̧k.
Ikar kajjitōk ippān Sione ta ļōmņak eo an kōn etal im mijen? Naan n̄an naan, ekar uwaak āinwōt aō kar loe ilo visōn eo. Ekar kōmeļeļe bwe ekar jab lukkuun jeļā eļan̄n̄e aikuj etal im mijen; im bwe ekar kejo̧kļo̧kjeņ im jar ak ejjan̄in kar bōk juon uwaak. Ikar kajjitōk eļan̄n̄e em̧ōj an kar bōk juon kōjeram̧m̧an eo an petriak. Ekar ba, “Aaet”. Ikar kajjitōk, “Ta eo kōjeram̧m̧an eo an petriak eo am̧ ej ba?” Ekar uwaak, “Inaaj etal im mijen”.
Ilo tu jejjōt in wōt kar kipel eō, ikar kajjitōk “Ekōjkan an Irooj uwaaki jar ko?” Sione ekar kajjeon̄ . . . bōtaab ekar kwaļo̧k an ļōmņak. Kōkajoor jān Jetōb im ilo juon m̧wil obrak kōn en̄jake im ettā, ikar ba, “Kar kipel eō jān Irooj, Jisōs Kraist, kōn revelesōn, n̄an itok im lotok eok rainin. Ij kam̧ool n̄an eok bwe jar ko rej uwaak ilo en̄jake, im̧we, riiti jeje ko rekwojarjar im elōn̄ wāween ko jet. Rainin ij pād ijin ilo etan Rilo̧mo̧o̧r, Jisōs Kraist, in uwaake jar eo am̧ im n̄an joļo̧k aolep ļōkapokpok im pere. Sione, Rilo̧mo̧o̧r ej kūr eok n̄an etal im mijen. Ewōr juon An jerbal n̄an eok n̄an kōm̧m̧ane im ej juon jerbal eo wōt Elder Hala emaron̄ kōm̧m̧ane āinwōt ke ewōr juon eo ejenolo̧k im aorōk ej kōttar n̄an am̧ karuwaineneik n̄an dān ko in peptaij.” Ijo in visōn eo ekar jem̧ļo̧k.
Ikar kajjitōk ekōjkan an en̄jake. Ekar jillo̧k im jan̄, “Jar eo aō em̧ōj an uwaak im ikōņaan etal im mijen”.
Ejjab to Brother Hala enaaj dedeļo̧k etale ko ikkijeen ājmour im n̄iin innem enaaj jilkinļo̧k pepa in mijen eo an. Menin bwilōn̄ ko raan kein rej waļo̧k n̄e jenaaj likūt ad lōke ilo Irooj Jisōs Kraist.