Mo Lako Tikoga—ena Vakabauta
Noda cakacakataka noda vakabauta na noda iVakabula, o Jisu Karisito, ena vukea meda lako curuma na yalolailai se dredre cava ga eda sotava.
A ciqoma o Elder George A. Smith, e dua na iApositolo, na ivakasala mai vua na Parofita o Josefa Simici ena dua na gauna dredre sara: “A kaya vei au meu kakua vakadua ni yalolailai, se cava sara na dredre era vakavoliti au. Keu sa lutudromu beka ki na qara titobu sara kei Nova Scotia ka ra buluti au na Veiulunivanua na Rocky, meu kakua sara ni yalolailai ia meu ququmi matua tikoga, vakabauta tikoga, ka yaloqaqa tiko vakavinaka kau na lamata vakaidina mai na veika sa buluti au tu”1
A rawa vakacava vua na o Parofita Josefa Simici me kaya o ya—ki vua e dua sa vakararawataki tiko? Baleta ni kila tu o koya ni ka dina o ya. A bula curuma o koya. A sotava vakaveitarataravi o Josefa na veika dredre rarawa ena nona bula. Ia, ni sa vakabauti Jisu Karisito kei na Nona Veisorovaki, ka sa lako tikoga, a uabaleta rawa na veivakataotaki vakaitamera sara.2
Nikua au gadreva meu vakavouia na vakamamasu nei Josefa me kakua ni uabaleti keda na rarawa eda sotava, na veika mosimosi, na noda dui malumalumu, se veibolebole tale eso.
Niu tukuna tiko na rarawa, au sega ni kaya tiko na veiluluqa ni ibolebole ni sotavi na lomaocaoca, veilecayaki, se tauvimate tale eso e gadrevi me qaravi vakamatau.3 Au tukuna tikoga na yalolailai sa tu makawa e tadu mai ni vinaka se ca na bula.
Era vakauqeti au na noqu tamata qaqa era sa lako tikoga—ena vakabauta—se cava ga e yaco.4 Eda wilika ena iVola i Momani, me baleti Soramu, na tamata nei Lepani. Na gauna sa taura mai kina o Nifai na peleti parasa, sa na digitaka kina o Soramu me na muri Nifai kei rau na tacina ki na lekutu se me vakayalia na nona bula.
Sa dua dina na digidigi! A vinakata e liu o Soramu me sa dro, ia a tauri koya o Nifai ka yalataka vua ke na lako vata kei iratou, ena tamata sereki ka na okati ki na nodratou vuvale. A qai yaloqaqa o Soramu ka lako vata kei iratou.5
A sotava o Soramu e levu na ka rarawa ena nona bula vou oqo, ia a gu ga ki liu ena vakabauta. Eda sega ni kila ni a ququmi tikoga o Soramu ena nona bula makawa se cudruva tiko na Kalou se eso.6 A itokani dina sara i Nifai, e dua na parofita, ka bula o koya kei na nona kawa ena bula galala kei na sautu ena vanua yalataki. Na ka a veivakataotaki vakalevu ena salatu nei Soramu a qai veimuataki ki na kalougata sautu, ni a yalodina ka lomana sara me lako tikoga—ena vakabauta.7
Au a rogoca walega qo ni a wasea e dua na marama yaloqaqa ni a gumatua tikoga ena gauna dredre.8 A sotava eso na ibolebole, ka dua na Siga Tabu ni dabe tiko ena iSoqosoqo ni Veivukei ni rogoci qasenivuli tiko ka nanuma ni bula uasivi sara o qasenivuli—ka duidui mai vei koya. Sa oca sara ka yalolailai. E vakila ni sa sega sara ni gumatua rawa—se bau oka kina—sa qai tucake ka gole, ka nanuma me kakua tale ni lesu mai na lotu. Ni sa gole ki na nona motoka, sa vakila e dua na veiuqeti matata sara, “Lako ki valenilotu ka mo rogoca na vosa ena soqoni ni sakaramede.” A vakataroga na veivakauqeti o ya ka vakila ni sa kaukauwa cake ga, sa qai gole ga ki na soqoni.
Na itukutuku sai koya sara ga a gadreva o koya. A vakila na Yalotabu. Sa kila o koya ni vinakata na Turaga me tiko vata kei Koya, me nona tisaipeli, ka dau mai lotu, a qai cakava.
O kila beka na cava a vakavinavinakataka? Ia a sega ni soro o koya. Sa lako tikoga—ena vakabauti Jisu Karisito, ni dau vakacolai mada ga kina, sa mani kune kalougata o koya kei na nona vuvale vakalevu sara ni lako tikoga ki liu.
Na Kalou ni lomalagi kei vuravura ena vukei keda meda vorata rawa na yalolailai kei na ivakatao cava ga ke da rai yani Vua, ka muria na veiuqeti ni Yalo Tabu.9 ka lako tikoga—ena vakabauta.
Eda vakavinavinakataka, ni gauna eda malumalumu se druka kina, e rawa ni vakaukakauwataki keda na noda vakabauta na Turaga. E rawa ni vakarabailevutaka na veika eda na rawata. Au sa sotava oti qori. Sivia e 20 na yabaki sa oti, a vakasauri na noqu a kacivi meu Vitusagavulu ni iWasewase, kau vakila niu sa tawayaga sara. Ni oti na noqu tuberi ena ilesilesi, au sa laki vakatulewa ena isevu ni noqu koniferedi ni iteki.10 Keirau a tuvatuva vakamatailalai sara kei peresitedi ni iteki. Ni bera toka na koniferedi, a kacivi au o Peresitedi Boyd K. Packer, na–Peresitedi Vakatawa ena Kuoramu ni iApositolo Le Tinikarua, me raica me lako vata kei au. Au a kurabui ka donu sara na noqu vakaio. Au a taroga vua na veika me tuvanaka ni sa na vakatulewa tiko kina. A vakatura me sa kua ni caka na ituvatuva ka vakarau me muri ga na Yalotabu. E sa dua na ka vinaka, ni se vo tiko e tini na siga ni vuli, masu, kei na vakavakarau.
Ena ituvatuva raraba, keirau sa dabe toka e cake ni se vo tiko e 20 na miniti me tekivu na soqoni ni veiliutaki. Au a vuki yani vei peresitedi ni iteki ka vakasolokakana, “Oqo e iteki totoka sara.”
A kiniti au vakamalua o Peresitedi Packer ka kaya,“Tabu na veivosaki.”
Au sa galu sara, kei na nona vosa ena koniferedi raraba “Na Vagagalu e Sureta na iVakatakila”11 a votu mai vei au. Au a raica ni a vola tiko o Peresitedi Packer eso na ivolanikalou. A vakadeitaka na Yalotabu vei au ni sa ciqoma tiko o koya na veivakauqeti baleta na soqoni. Sa tekivu e kea na noqu gauna ni vuli.
A vosa o Peresitedi Packer ena imatai ni 15 na minit ka vakamatatataka kina na bibi ni kena liutaki na soqoni ena veidusimaki ni Yalo Tabu.12 A qai kaya, “Eda sa na vakarorogo oqo vei Elder Cook.”
Niu sa gole yani ki cake, au a taroga me vica na miniti me noqu ke tiko e dua na ulutaga e gadreva o koya meu vosa kina. A kaya, “Taura e 15 na miniti ka tomana ni ko sa uqeti tiko.” Au a taura e 14 na miniti ka wasea na veika e tiko ena noqu vakasama.
A tucake tale o Peresitedi Packer ka vosa tale me 15 na miniti. A qai wasea na ivolanikalou oqo:
“Drau tukuna yani na ka au sa vakatakila ki lomamudrau, ia drau na sega ni vakamaduataki e matadra na tamata;
“Raica ena soli vei kemudrau … ena gauna sara ga ko ya, na veika mo drau tukuna”13
A qai kaya, “Eda sa na vakarorogo oqo vei Elder Cook.”
Au a kidacala. Au a sega ni namaka niu na mai kerei meu na vosa vakarua ena dua ga na soqoni. Sa sega niu nanuma rawa na ka meu na kaya. Niu masu vagumatua ka ravi vua na Turaga meu vukei, au a vakalougatataki meu nanuma, e dua na ivolanikalou, kau a vosa rawa me 15 tale na miniti. Au a dabe sobu ena wawale levu.
A vosa tale o Peresitedi Packer me 15 tale na miniti baleta na muria na Yalotabu ka wasea na veivakavulici nei Paula meda kakua ni cavuta “na vosa sa vakatavulica na vuku ni tamata, o koya ga sa vakatavulica na Yalo Tabu.”14 O ni rawa ni raitayalotaka, niu sa uabaleti ni a uqeti o koya me kaya vakatolu, “Eda sa na vakarorogo oqo vei Elder Cook.”
Au sa lala didi. Sa sega na noqu Au kila meu sa cakacakataka vakalevu na noqu vakabauta. Vakamalua, au sa lako tu yani ki na itutu ni vunau, ka kerea na Kalou meu vukei. Niu sa tu yani ena gusu ni ivosavosa, a vakalougatataki au mana na Turaga meu tukutuku tale me 15 na miniti.15
Sa qai mai tini na soqoni, ia au a kila rawa ni soqoni ni qase ena tekivu tiko ena dua na auwa mai oqo. Oi lei! Me vakataki Soramu, au sa via dro dina, ia ni vaka a toboki koya o Nifai, au kila ni o Peresitedi Packer ena toboki au. Na soqoni ni qase a muria na ituvatuva vata ga. Au vosa tale vakatolu. Na siga e tarava ena soqoni raraba, au a vosa ga vakadua.
Ni oti na koniferedi, a kaya o Peresitedi Packer ena loloma, “Me qai caka tale ena dua na gauna.” Au lomani Peresitedi Boyd K. Packer ka vakavinavinakataka na veika au sa vulica.
O kila beka na cava au vakavinavinakataka? Niu a sega ni soro—se vorata. Kevaka beka meu a soro meu gadreva meu dro mai na veisoqoni o ya, keu a calata na madigi me tubu cake na noqu vakabauta ka ciqoma na sovaraki vakaiyauyau ni loloma kei na veitokoni mai vua na Tamada Vakalomalagi. Au a vulica na Nona loloma, na kaukauwa mana gumatua i Jisu Karisito kei na Nona Veisorovaki, kei na veiuqeti kaukauwa ni Yalo Tabu. Se cava na noqu malumalumu,16 au a vulica niu rawa ni veiqaravi; niu rawa ni cau ni sa tiko e yasaqu na Turaga, keu sa lako tikoga—ena vakabauta.
Se cava na kena levu, ituvaki, kei na kaukauwa ni ibolebole eda sotava ena bula oqo, e dau sotava kece na gauna eda nanuma meda sa tu vakadua, biubiu, dro, se soro. Ia ni da cakacakataka noda vakabauta noda iVakabula, o Jisu Karisito, ena vukea meda vorata rawa na yalolailai se cava ga na ivakatao eda sotava.
Ni sa mai vakacavara na iVakabula na cakacaka a soli Vua me cakava, sa tu Vua na kaukauwa me vukei keda meda vakacavara na cakacaka a soli vei keda.17 Sa rawa meda na kalougata meda lako yani ena salatu ni veiyalayalati, se cava sara na kena votovotoa, ka meda sa ciqoma ga na bula tawamudu.18
A kaya o Parofita Josefa Simici, “Mo ni tudei, na Yalododonu ni Kalou, mo ni vosota tale vakalailai, ni cava ni bula oqo ena takali yani, ka na yaco mo ni kune vinaka mai vua na Kalou ni sai kemuni na nona tamata.”19 Ena yacai Jisu Karisito, emeni.