Baraca Michael T. Nelson

iKarua ni Daunivakasala ena Mataveiliutaki Raraba ni Cauravou

Vei Baraca Michael T. Nelson, na nona gauna vaka peresitedi ni kaulotu a vakadeitaka ni nodra vakavulici na itabatamata ka qai tubu tiko mai ena ivakavuvuli dodonu ka qai nuitaki ira e kunei kina na vua vinaka duadua—me baleta ruarua na cakacaka ni kaulotu kei na nodra bula na daukaulotu yadua.

“Na ka bibi duadua sai koya na veivakabauti. Keirau a vulica me nuitaki ira”, a kaya ena nona cakacaka vata kei ira na daukaulotu tudei ena Tabana ni Kaulotu e San Bernardino Kalifonia, ka rau a veiqaravi kina na Nelson vaka iliuliu ni tabana ni kaulotu mai na 1998 ki na 2001.

E kaya o Baraca Nelson ni vuli—kei na solia vei ira na itabagone na madigi me ra veiliutaki—sa tiki bibi tiko ga ni nona veiqaravi ena Lotu ka na tomana tikoga ena nona veikacivi vou ena Mataveiliutaki Raraba ni Cauravou. Ena tolu na yabaki sa oti, sa veiqaravi oti o Baraca Nelson vaka sekeriteri liu ki na Mataveiliutaki Raraba ni Cauravou. Ena rua na yabaki sa oti, a veiqaravi vakalewe ni matabose ka sa vakatokai oqo me Matabose Veivakasalataki Raraba ni Cauravou.

A sucu o Michael Terry Nelson ena ika 10 ni June, 1956, e Salt Lake City, Uta e Amerika, vei rau o Monte Cannon kei Viola Eliza Nelson ka tubu cake ena yasana o Salt Lake. Ni oti nona veiqaravi ena Tabana ni Kaulotu e Santiago Chile, a vulica na ivakarau ni veitaratara vakaisoqosoqo ena Brigham Young Univesiti kei na Univesiti e Utah. Ena 1982 a vakamautaki Barbara Fluckiger ena Valetabu e Jordan River. Erau a vakaitikotiko na Nelson e Sandy, Uta, ni bera ni rau toki ki Wallsburg, Uta. E ciwa na luvedrau.

O Baraca Nelson e liutaka na qaravi ni veikavakailavo ni dua na kabani ni vakatubu ilavo kei na volitaki vale vakabisinisi kei na kena me taukeni. O rau na Nelson, oka kina e rua na gone erau vakaitikotiko e vale, eratou cakacakataka tale tikoga e dua na iteitei lailai ena nodratou itikotiko. Na yavalavala kei na vakayagataki ni gauna e tautuba sa dodonu me ka bibi vei ira na itabagone ena Lotu, e kaya o Baraca Nelson, me vaka vei iratou nona matavuvale.

Sa veiqaravi oti o Baraca Nelson vaka peresitedi ni iteki, daunivakasala ena mataveiliutaki ni iteki, sekeriteri liu ni iteki, bisopi, kei na peresitedi ni Cauravou ena tabanalevu kei na iteki. A veivuke ena 1997 ena kumuni ilavo, volayaca, kei na tuvanaki ni ika 150 ni yabaki ni itui kareti ka vakananumi kina na ilakolako ni imatai ni kabani ki na Buca e Salt Lake.