iTukutuku ni Lotu

Na Vulici ni Lima na Yabaki ni Veiqaravi vaka Peresitedi ni Lotu nei Peresitedi Russell M. Nelson

Ena imatai ni nona vosa raraba vaka i ka 17 ni Peresitedi ni Lotu i Jisu Karisito ni Yalododonu Edaidai, ka soli ena lima na yabaki sa oti, e a vagolea tani kina na rai o Peresitedi Russell M. Nelson mai vua me vakanamata vei Jisu Karisito ka rai yani ki liu.

“Sa dau veivakasalataki tikoga ena veigauna na Turaga ka na vakauqeti ira tiko na Nona parofita,” e a vakaraitaka. “Na Turaga sa tu ena uli. Oi keimami sa tabaki me keimami vakadinadinataka na Yacana tabu e vuravura taucoko ka keimami na tomana me kila na Lomana ka muria.” (“Ni Da Lako Vata Yani ki Liu,” Liaona, Epe. 2018, 6).

Ciqomi ni iVakatakila me Dusimaka na Lotu

Sa cakacakataka na veidusimaki ni Turaga o Peresitedi Nelson ena nona lako ki na 35 na matanitu, moica eso na ituvatuva ni Lotu, vakayagataki na tekinolaji me wasei kina na kosipeli, liutaka na Lotu ena loma ni dua na matedewa, solia eso na veisureti vakairogorogo, ka vakatorocaketaka na veimaliwai.

Ena nona gauna vaka-Peresitedi ni Lotu, sa vosa oti o Peresitedi Nelson vei ira e drau vakaudolu na Yalododonu Edaidai ka veisiko vei ira na tui, peresitedi, kei na paraiminisita. Sa vakacegui ira na vakaleqai tu ena basulawa kei ira era rarawa ka vakatitobutaka na veimaliwai vata kei ira na iliuliu e cake ni iSoqosoqo Raraba ni Vakatorocaketaki ni Yago Loaloa (National Association for the Advancement of Colored People) (NAACP), ciqoma e dua na veisureti me vosa ena 2019 ena bose levu ni NAACP e Detroit, Michigan, Amerika.

Ena ivakatakila kei na veitokoni taucoko ni Mataveiliutaki Taumada kei na Kuoramu ni iApositolo Le Tinikarua, sa vakayacora talega kina e vuqa na veisau ni lawatu ena loma ni Lotu.

Ena ruku ni nona veiliutaki veivakauqeti, o ira na iliuliu ni Yalododonu Edaidai era sa vakaisosomitaka na veisiko kei na veituberi ni vuvale ki na veiqaravi; moica na ituvatuva ni soqoni ena sigatabu me veisotari kei na vulici ni kosipeli ka kena usutu na vuvale, ka tokona na Lotu; ka kerei ira na lewe ni lotu mera taurivaka na yaca dodonu taucoko ni Lotu. Sa virikotora na Lotu e dua na lawatu ka vakatarai kina vei ira na veiwatini era vakamau vakamatanitu me ra vauci ena valetabu ena gauna ga era sa vakarau kina; vakayacani vou ni veivakatarogi ni ikatini me soli itukutuku ni ikatini; ka tauyavutaka e dua na lawatu ka rawa kina vei ira na marama me ra ivakadinadina ni veivauci ena valetabu, itabagone, kei ira na gonelalai era sa lewe ni Lotu bula kilikili me ra ivakadinadina ena veipapitaisotaki.

“E dua vei ira na ka e sa dau vakavotuya wasoma ki na noqu vakasama na Yalotabu mai na gauna ni noqu kacivi vou me Peresitedi ni Lotu na yalorawarawa ni Turaga me vakatakila na Nona vakasama kei na lewa,” a kaya o Peresitedi Nelson ena koniferedi raraba ni Epereli 2018 (“Na iVakatakila ki na Lotu, Na iVakatakila ki na Noda Bula,” Liaona, Me 2018, 94).

Ena 2020 a marautaka kina na Lotu na yabaki rua na drau ni Matai ni Raivotu nei Josefa Simici, sega ena dua na soqo ni marau levu ia ena nodra sureti na Yalododonu Edaidai e veiyasa i vuravura mai vei ira na iliuliu ni Lotu mera vulica mera rogoca na domo ni Turaga vakavinaka cake ka vakawasoma. Ena dua na vosa ni koniferedi raraba ni Epereli 2020, a vakaraitaka kina o Peresitedi Nelson e dua na ivakaro vakairogorogo, “Na Vakalesui Mai ni Taucoko ni Kosipeli i Jisu Karisito: A iVakaro ni Ruanadrau na Yabaki ki Vuravura.” (raica na “Rogoci Koya,” Liaona, Me 2020, 91–92).

Liutaka na Lotu ena loma ni COVID-19

Ena nona kila-ka vaka dua na painia dauveisele ni uto ia vakauasivi cake me vaka ni parofita ni Turaga ka iliuliu ni dua na lotu ni vuravura raraba, a liutaka na Lotu o Peresitedi Nelson ena loma ni matedewa na COVID-19 ka tekivu ena 2020.

Na veika a cakava na isoqosoqo ni Yalololoma ni Yalododonu Edaidai ki na matedewa a yaco me cakacaka levu duadua me yacova mai oqo ena itukutuku ni Lotu, ka vakarautaki na veivuke ki na sivia na 150 na matanitu.

Ena dua na veivakatarogi ni Me 2020 kei na iTukutuku ni Lotu, a kaya kina o Peresitedi Nelson, “Ena loma sara mada ga ni o ni rarawa, e se rawa ni kunei tikoga kina na inuinui” (ena Sarah Jane Weaver, “Video: President Nelson Talks about the ‘Painful’ Decision to Close Temples amid COVID-19,” iTukutuku ni Lotu, 27 ni Julai, 2020, thechurchnews.com). Na veika vinaka a yaco ena vuku ni matedewa, a kaya o koya, oya na kunei ni sala me sota kina kei ira na Yalododonu Edaidai ka sega ni gadrevi kina na vuka ena waqavuka. Ena tekinolaji, a vosa kina o Peresitedi Nelson vei ira na Yalododonu Edaidai mai Venezuela kei Iurope vakakina e Kalifonia, Kenada, kei Okalaoma. A vosa talega vei ira na itabagone qase cake e vuravura raraba.

Ena Okosita ni 2022, a lako ena taudaku kei Utah o Peresitedi Nelson ena imatai ni gauna me tekivu mai na gauna a tubu kina na kaukauwa ni matedewa ena Maji ni 2020 me baleta na kena vakatabui tale na Valetabu e Washington D.C.

Ciqomi na icocovi na Gandhi-King-Mandela Peace Prize

Na Morehouse College, edua na koronivuli makawa nodra na Yago Loaloa e Georgia, Amerika, a kacivaka ni na solia tiko na isevu ni icovi na Gandhi-King-Mandela Peace Prize vei Peresitedi Nelson. E a solia na koronivuli na icocovi vou oqo vua na parofita yabaki 98 oqo ena i ka 13 ni Epereli, 2023, ena soqoni ni Worldhouse Interfaith kei na Interdenominational Assembly ena valenilotu na Martin Luther King Jr. International Chapel e Atlanta.

Na icovi oqo e vakayacani vei Mahatma Gandhi, Martin Luther King Jr., kei Nelson Mandela. E kaya na koronivuli, ni kena inaki, me soli vua edua e tokona na veisaututaki kei na veisau vinaka ni tiko vakaveimaliwai ena sala e sega ni vakayagataki kina na itovo kaukauwa ka vakayagataka na nona itutu vaka veiliutaki e vuravura me vakadeitaka na sautu, lewa dodonu, kei na veimaliwai vinaka ni veimatatamata.

A ciqoma o Peresitedi Nelson na icocovi ena vidio, ka a lagasere talega kina ena initaneti na Tabernacle Choir ena Rara ni Valetabu.

Na nona veiqaravi ena lima na yabaki na parofita e sa vakasinaiti ena veivakauqeti meda veilomani ka dokai ira na tamata kecega. Ena dua na soqo ena 2018 ena marautaki ni i ka 40 ni yabaki ni ivakatakila ni 1978 me baleta na veivakalougatataki ni matabete ka soli yani vei ira na lewe ni lotu mai na veimatatamata kece era bula kilikili, a vakavulica kina vei ira na Yalododonu Edaidai mera “tara ikawakawa ni duavata ka sega ni lalaga ni veitawasei” (“Building Bridges,” New Era, Okos. 2018, 6).