A Taura tu na Lomaqu na Vakasama oqo me Baleti Jisu Karisito
Ni ko taura dei tikoga na vakasama i Jisu Karisito, au yalataka vei iko na veituberi vakalomalagi ia na kaukauwa vakalomalagi.
Ena gauna ni Siganimate talei oqo, au via kacivaka na vakamamasu ni serenilotu oqo, “I Jiova na Kalou Cecere, Ni tuberi au edai.”1
Dua nai talanoa talei ena iVola i Momani e tukuna e dua na cauravou mai na matavuvale rawaka na yacana o Alama ka vakamacalataka na ivolanikalou me dua na tawavakabauta.2 A madila ka qaseqase o koya, ena veisiwavi me rawai ira na tani me muri koya. Vakidacala, na basika ni agilosi vei Alama kei iratou na nonai tokani. A lutu ki na qele o Alama ka malumalumu sara ka sa kau yani ki na vale i tamana. Sa sega tu ni vakilai koya tu ena ituvaki e tu kina me tolu na siga.3 Emuri, a vakamacalataka ni ra vakila na tu wavoliti koya ni sa sega ni kilai yalona, a dei sara na nona vakasama ni rarawa tu na yalona, ni vakasamataka na nona bula ni sega ni muria na vunau ni Kalou. A vakamacalataka ni sa “cukiraki tu ena vakasamataki ni levu ni [nona] valavala ca”4 na nona vakasama ka “kuretaki ena rarawa tawamudu.”5
Ena levu ni nona yaluma, sa nanuma o koya na nona a vakatavulici ni se gone ni na “lako mai ni dua o Jisu Karisito, na Luve ni Kalou, me sorovaka na valavala ca ni kai vuravura.”6 Tarava nona tukuna tu na vakasama veivakacudrui oqo: “Niu sa nanuma rawa na ka oqo, au sa tagi e yaloqu: Oi kemuni Jisu, na Luve ni Kalou, ni yalololoma vei au.”7 Ni kerea tu na kaukauwa vakalou ni iVakabula, a yaco e dua na ka veivakurabuitaki: “Niu sa vakasamataka na ka oqo,” a kaya, “au sa sega ni nanuma tale na noqu mosi.”8 Vakasauri nona vakila na vakacegu kei na rarama. A cauraka, “Sega na ka esa totoka ka gasagasa me vaka na noqu marau”9
A “taura tu” o Alama na dina me baleti Jisu Karisito. Kevaka eda vakayagata na vosa “taura tu” me vakasama vakayago, eda rawa ni kaya, “A taura tu o koya na itautauri ni sa tekivu bale tiko,” oya na nona sudra yani vakasauri ka kubeta matua e dua na ka dregati kaukauwa tu ki na dua na yavu dei
Me baleti Alama, na nona vakasama a sudra yani ka vakadeitaka na nona dina kaukauwa ena solibula veisorovaki i Jisu Karisito. Na cakacakataki ni vakabauta ena dina oya, vakakina na kaukauwa kei na loloma soliwale ni Kalou, sa vakabulai o koya mai na yaluma ka vakasinaiti tu ena nuinui.
Ni na sega tu ni duatani na veika eda sotava me vakataki Alama, era sa mareqeti tawamudu tale tu ga. Na lomada talega sa “taura tu na vakasama oqo” i Jisu Karisito kei na Nona solibula loloma, ka sa vakila na yaloda na rarama kei na reki e muria mai.
Taqomaka na Vakasamataki Jisu Karisito
Noqu masu ena gauna ni Siganimate oqo oya meda na tuva, vaqaqacotaka, ka vakadeitaka vakalevu sara na vakasama malaude oqo i Jisu Karisito ki na veitiki ni yaloda,10 ka vakatara me curuma vakayauyau na lomada, ka tuberi keda ena ka eda vakasamataka ka kitaka, ka kauta mai na reki kamica ni loloma ni iVakabula.11
Na vakatawani ni noda vakasama ena kaukauwa i Jisu Karisito e sega ni kena ibalebale ni sai Koya ga eda vakasamata. Sa kena ibalebale ni sa yalani taucoko na noda vakasama ki na Nona loloma, Nona bula kei na ivakavuvuli, kei na Nona solibula sorovaki kei na Tucaketale lagilagi. E sega ni tiko o Jisu ena dua na tikina guilecavi, baleta na noda vakananumi Koya e yaco tikoga kei na “[noda] veika kece e tukuni koya !”12 Eda masu ka vakananuma tu na veika eda sotava esa kauti keda vakavoleka ki Vua. Eda kidavaka na vakasamataki ni vakatakarakara vakalou, ivolanikalou tabu, kei na sere veilaveti eso me vakameautaka na vakasama tuliraki ni veisiga ena noda bula. Na noda lomani Koya ena sega ni taqomaki keda mai na rarawa kei na yaluma ena bula oqo, ia ena vakatara vei keda meda lako curuma na bolebole ena kaukauwa eda sega ni yacova rawa.
Nanuma, o sa luvena vakayalo na Tamada Vakalomalagi. Me vaka e vakamacalataka na Apositolo o Paula, eda sa “kawa ni Kalou.”14 O sa bula tu ena kemu ivakatakilakila vakai iko ni bera ni ko lako mai ki vuravura. Sa bulia na Tamada na yavu vinaka sara meda lako mai kina ki vuravura, vuli, ka lesu ki Vua. Sa tala mai na Luvena Duabau ni mai na kaukauwa ni Nona Veisorovaki kei na Tucaketale cecere, eda sa bula suruya na ibulubulu; ia ni da sa lomasoli ni vakabauti Koya tu ka veivutunitaka na noda caka cala,15eda sa vosoti ka rawata na inuinui ni bula tawamudu.16
Kauwaitaki Vakalevu cake na Noda Vakasama kei na Yaloda
Ena bula vakayago oqo, sa gadrevi me tudei tu na vakasama kei na yaloda.17 Sa vakatarai keda na noda vakasama meda bula, digidigi, ka vakila na ka vinaka kei na ka ca.18 Sa ciqoma na yaloda na vakadinadina vakadeitaki ni sa Tamada na Kalou, ni sa Luve ni Kalou o Jisu Karisito, ka sa noda idusidusi na Nodrau ivakavuvuli ki na bula marau eke kei na bula tawamudu ena daku ni bulubulu.
A taura tu na lomai Alama na vakasama oqo me baleti Jisu Karisito. A veisautaka tu na nona bula. Na koniferedi raraba sa dua na gauna mo vulica kina na veika e vinakata na Turaga mo kila ka cakava. Sa gauna talega meda vakasamataka vakatitobu na noda tubu. Me vaka sa kauti au ki vuravura taucoko na noqu ilesilesi, au sa raica na tubu cake ni kaukauwa vakayalo vei ira na lewe ni Lotu yalododonu ka yalodina.
Lima na yabaki sa oti, keimami a kerei ni vakabibitaka cake na iVakabula ena ka kece keimami cakava ena vakayagataki ni yaca dina ni Lotu i Jisu Karisito ni Yalododonu Edaidai.19 Eda cavuta tiko na Yacana ena yalodina.
Ena va na yabaki sa oti, ena noda vakalailaitaka na gauna ni soqoni e valenilotu, eda sa vakalevutaka cake na noda vakanamata ena vakaivotavota ena sakaramede ni Turaga. Eda vakananumi Jisu Karisito ka gumatua mai na noda yalayala meda dau nanumi Koya.20
Ena seavu yani ni mate veitauvi e vuravura, kei na veivuke ni Lako Mai, Mo Muri Au, sa vakaibalebale cake na ivakavuvuli ni iVakabula ena noda itikotiko, ka veivuke ena noda sokalou vua na iVakabula ena loma ni macawa.
Noda vakamuri na ivakasala nei Peresitedi Russell M. Nelson “rogoci Koya,”21 eda sa vakavinataka cake tiko na noda rawa ni vakila na vakasolokakana ni Yalo Tabu ka meda raica na liga ni Turaga ena noda bula.
Ena kacivaki kei na vakacavari ni valetabu eso, eda sa curuma wasoma tiko na vale ni Turaga ka ciqoma tiko na Nona veivakalougatataki yalataki. Eda sa vakila tiko kaukauwa uasivi talei ni noda iVakabula ka Dauveivueti.
A kaya o Peresitedi Nelson: “E sega ni rawarawa se yaco vakataki koya na bula qaqa tu [vakatisaipeli]. Sa dodonu me dei tu na noda vakanamata kivua na iVakabula kei na Nona kosipeli. E sa vereverea saraga meda saga ni raici Koya tu ena vakasamakecega.”22
Ena noda vakanamata tu vei Jisu Karisito, kei na ka kece e wavoliti keda—ni se tikoga—sa vakatakilai kina na noda lomani Koya. Sa seavu na veika bibi lalai, ka da vagalalataka na ka era sega ni tutaka tu na Nona rarama kei na ituvaki. Ni ko tomana tiko mo taura vagumatua na vakasama oqo i Jisu Karisito, vakararavi Vua, ka muria Nona vunau, au yalataka vei iko sega ni veituberi walega vakalomalagi ia na kaukauwa vakalomalagi—na kaukauwa e vakavure qaqa ki na nomu veiyalayalati, vakacegu ki na dredre eso, kei na reki ki na nomu veivakalougatataki.
Vakananumi Jisu Karisito
Vica na macawa sa oti, au a sikova kei Kathy na itikotiko i Matt kei Sarah Johnson. Ena lalaga a toka kina na itaba ni nodratou matavuvale vakasakiti, na vakatakarakara totoka ni iVakabula, kei na droini ni valetabu.
Na luvedrau yalewa e va, o Maddy, Ruby, Claire, kei June, a vakacaucautaki tinadratou saraga vakalevu.
Sivia e dua na yabaki nona lokuca tu o Sarah na ituvatuva ena Vakarauwai me ratou na curuma na matavuvale na valetabu me rawa ni ratou vakaitavi na goneyalewa ena papitaisotaki ni lewe ni matavuvale ka bula tu eliu.
Ena Noveba ni yabaki sa oti, a lokuca o Sarah na ituvatuva ni valetabu ni matavuvale me baleta na iotioti ni macawa ena Tiseba ena Lotulevu ka sega ni Vakarauwai. “Au nuitaka ni sa donu vei iko,” a kaya vei Matt.
A kune tu vei Sarah na kenisa, ia era nanuma na vuniwai ni na bula tu o koya me rua se tolu tale na yabaki. Donuya na soqoni ni sakaramede, a wasea o Sarah na nona vakadinadina kaukauwa, ka kaya se vakacava na ka e yaco vua, sa lomana tu na iVakabula ena vu ni yalona taucoko, ka sa “qaqa oti tu kina” o Koya. Ni toso tu na Tiseba, a lutu totolo tawanamaki sara na bula i Sarah, ka mani curu sara i valenibula. Ena mataka lailai ni Lotulevu, 29 ni Tiseba, sa vakacavara o koya na nona bula e vuravuraa. A kabiti Sarah tu o Matt ena bogi taucoko.
Ena yalo raramusumusu, kei na wawale vakayago levu sara ga, sa yaco i vale o koya, ka luluvu vata kei iratou na luvena yalewa. Ni raica o Matt na nona talevoni, a siqema na ivakananumi ni Lotulevu tawamacala ni tuvatuva ni valetabu a lokuca tu o Sarah ena siga oya. Kaya o Matt, “Niu raica tu, noqu vakasama, qo ena sega ni yaco tu.”
Ia a qai taura tu o Matt na vakasama oqo: “Sa bula na iVakabula. E sega tale na vanua keitou na via tiko kina vakamatavuvale me vakataka na Nona vale tabu.”
Sa basika ki na valetabu o Matt, Maddy, Ruby, Claire, kei June ena vuku ni tuvatuva a lokuca tu o Sarah vei ratou. Ni drodro yauyau tu na wai ni matana, a veipapitaisotaki o Matt kei ira na luvena yalewa. Ratou a vakila na titobu ni nodratou loloma kei na isema tawamudu vata kei Sarah, ka vakila na loloma kei na vakacegu cecekia ni iVakabula. A wasea malua tu o Matt, “Niu luvuci tu ena rarawa kei na yaluma, au sa kaila tu ena reki, ni kila tu na yavu ni veivakabulai i Tamaqu.”
Ena gauna ni Siganimate oqo, au vakadinadinataka na taucoko kei na dina sara ni solibula sorovaki tawatukuni rawa ni iVakabula kei na Nona Tucaketale lagilagi. Ni sa taura dei tu na nomu vakasama ka vakanamatataka vakalevu kivei Jisu Karisito, au yalataka ni ko na vakila na Nona inuinui, Nona vakacegu, kei na Nona loloma. Ena yaca i Jisu Karisito, emeni.