Baraca Bradley R. Wilcox

iMatai ni Daunivakasala ena Mataveiliutaki Raraba ni Cauravou

Ni vo e vica na yabaki me veiqaravi vakadaunivakasala ena Mataveiliutaki Raraba ni Cauravou, erau a vakauta o Baraca Bradley R. Wilcox kei watina, o Debi, na luvedrau tagane lomalomarua yabaki 14 ki na Vakatabakidua vei ira na iTabagone (VVT) (Especially for Youth) (EFY) ena Brigham Young University.

Erau a lomaleqataka ni “a sega ni tiko vua e dua na ivakarau ni bula vakayalo.” E a kunei vua e dua na duidui levu ni lesu mai—e a vakanamata ka kauwaitaka vakalevu cake na veika vakayalo. Ia oqo, ni oti e vica na yabaki, sa veiqaravi tiko ena matabisopi ka veituberi tiko vei ira na itabagone ena nona tabanalevu.

Oqori na ka a kunea vakawasoma o Baraca Wilcox ena vulaikatakata sa oti ni ra vakaitavi na itabagone Yalododonu Edaidai e vuravura taucoko ena koniferedi ni Me iSakisaki ni iTabagone (MST). Vakawasoma, o ira “era a sega ni vakadeitaka ni ra na lako mai” era lesu ki vale ni ra duidui ka vinaka cake.

O Baraca Wilcox—ka sa veiqaravi oti vaka iKarua ni Daunivakasala ena Mataveiliutaki Raraba ni Cauravou vakatekivu mai na 2020 ka a tokoni me iMatai ni Daunivakasala ena koniferedi raraba ni Epereli 2023—a kaya ni sa dua na gauna taleitaki oqo me veiqaravi vei ira na itabagone Yalododonu Edaidai. Eratou sa cakacaka vata tiko vakawasoma na Mataveiliutaki Raraba ni Cauravou kei na Goneyalewa, kei na “koniferedi ni FSY, idusidusi, kei na kena mekasini e sa yacovi ira tiko e vuqa sara na itabagone.”

A sucu o Bradley Ray Wilcox, 63, e Provo, Utah, Amerika, e nai ka 25 ni Tiseba, 1959, vei Ray T. Wilcox kei Val C. Wilcox. A tubu cake o koya e Provo ia a vakayagataka e vica na yabaki ni nona gauna ni gone e Iciopea.

Ni oti nona veiqaravi vakadaukaulotu tudei e Viña del Mar, Chile, a vakamautaki Deborah Gunnell o Baraca Wilcox ena Valetabu e Provo Utah ena Okotova ni 1982. Erau nodratou itubutubu e va na gone ka ratou vakaitikotiko e Provo, Utah, Amerika.

O Baraca Wilcox a rawata na nona koroi ni bachelor kei na master mai na Brigham Young University (BYU) kei na nona doketa ni veika vakavuli mai na Univesiti e Wyoming. O koya edua na parofesa ena Tabacakacaka ni iVolanikalou Makawa e BYU. Vakatekivu mai na 1985, sa dau solia e vuqa na nona gauna ena vulaikatakata ki na parokaramu ni VVT e BYU.

Sa veiqaravi oti o Baraca Wilcox vakabisopi kei na mataveiliutaki ni iteki, vaka peresitedi ni tabana ni kaulotu na Chile Santiago East Mission, vakakina ena matabose raraba ni Matawilivola ni Sigatabu.