Veika Vakasakiti mai nai ka 193 ni Koniferedi Raraba Vakayabaki

“Eda sa mai vakani vakayalo ena rua na siga sa oti oqo,” a kaya o Peresitedi Russell M. Nelson ena itinitini ni ika 193 ni Koniferedi Raraba Vakayabaki ni Na Lotu i Jisu Karisito ni Yalododonu Edaidai (raica na tabana e 127). Na kana magiti oqori e oka kina na ivakasala me vakatotomuria na iVakabula o Jisu Karisito—vakaisosomitaka na veiqati ena loloma uasivi, na yalololoma, kei na veisaututaki (raica na Peresitedi Nelson, tabana e 98; raici rau talega o Elder Christofferson kei Soares, tabana e 77 kei na 85).

“Au sureti kemuni mo ni dikeva na nomuni bula vakatisaipeli ena ivakarau ni nomuni qaravi ira na tani,” a kaya o Peresitedi Nelson. “Au vakalougatataki iko mo cakava na veisau ka gadrevi me vakaturaga kina nomu itovo, veidokai ka matataka edua ka muri Jisu Karisito ena yalodina” (tabana e 98)

Vata kei Peresitedi Nelson, o ira na iliuliu ni Lotu tale eso era vakaraitaka ni isau ni noda taro, bolebole, vakanuinui kara, kei na mate e kune ena ivakaraitaki, ivakavuvuli, Veisorovaki, kei na Tucaketale ni iVakabula o Jisu Karisito, ka solia vei keda “na isolisoli ni vakacegu” (Peresitedi Eyring, tabana e 29; raica talega na Peresitedi Oaks, tabana e 102; Peresitedi Johnson, tabana e 81; kei Elder Meurs, tabana e 39). Era vakayaloqaqataki keda o ira na vosa me da vakanamata vua na iVakabula (raica na Elder Camargo, tabana e 64), sokalou Vua (raica na Elder Stevenson, tabana e 6), lako mai Vua (raica na Peresitedi Cordon, tabana e 10), vaqaqacotaka noda ivakadinadina baleti Koya (raica na Peresitedi Ballard, tabana e 105), veiqaravi me vaka na Nona veiqaravi (raica na Elders Gong kei Uceda, tabana e 16 kei na 70), ka vakavinakataka cake noda bula vakatisaipeli (raica na Elders Bednar, Rasband, kei Bragg, tabana e 123, 108, kei na 60).

Era vakayaloqaqataki keda talega na iliuliu ni Lotu meda vakamareqeta na noda veivakalougatataki vakapeteriaki. O ira era se bera ni ciqoma na nodra veivakalougatataki vakapeteriaki era a vakasalataki me ra masulaka “na gauna donu” me ra ciqoma kina e dua (raica na Elders Bennett kei Yamashita, tabana e 42 kei na 88).

E vakananumi keda o Peresitedi Nelson, ka kacivaka na tara ni 15 na valetabu vou, “O Jisu Karisito na vuna eda tara valetabu kina” (tabana e 127; raica talega na Elders Renlund, De Hoyos, kei Duncan, tabana e 35, 52, kei na 95).

Eda a tokoni iratou e lima na Vakaitutu Raraba vou ena Vitusagavulu, e dua na Mataveiliutaki Raraba vou ni Goneyalewa, kei na dua na lewe vou ni Mataveiliutaki Raraba ni Cauravou, ka vakaraitaki e dua na vakavinavinaka mai vuniyalo vei ira era sa vagalalataki se ena qai vagalalataki ena ika 1 ni Okosita, 2023.

Ni da taleva lesu na koniferedi raraba, vulica na itukutuku, ka “vakasamataka na dina era vakavulici kina” (Peresitedi Nelson, tabana e 127), eda na vakila, vata kei ira era vosa, na gagadre meda veivosakitaka, rekitaka, vunautaka, ka vakadinadinataka ni o Jisu Karisito—na ivurevure ni noda vakabulai (raica na 2 Nifai 25:26).