Veitomani na Daulagasere mai na Veivanua kei na Tabernacle Choir ena Koniferedi

Ena imatai ni gauna, o ira na vakaitavi ka tiko e taudaku kei Amerika era a tomana na matasere na Tabernacle Choir ena Lomanibai ni Valetabu ena gauna ni koniferedi raraba.

E se qai vakarabailevutaka wale toka ga oqo na matasere na nona navunavu me yacova ira yani na dauvakarorogo e vuravura raraba, e kaya na peresitedi ni matasere o Michael O. Leavitt, ka vakamacalataka na isevu ni parokaramu me dua na itosotoso matau ena tubu ni matasere. “Keitou sa vakayacora tiko ena sala duadua ga keitou kila, sai koya me dua na ikalawa dua na gauna—vuli, vakavinakataka, ka kerea vua na Turaga na veidusimaki levu cake,” a kaya o koya. “Ena veikalawa yadua, sa yaco me matata mai ni na rawa ni yaco oqo.”

Ena vuku ni ituvatuva kaukauwa ni vakatovotovo ni matasere, sa gadrevi kina vei ira na lewe ni matasere me ra tiko ena loma ni 100 na maile (160 km) mai na Valecavu makawa e Salt Lake City. Ia, a kaya o Baraca Leavitt ni isevu ni parokaramu oqo e dolava na katuba vei ira na tani era kila vinaka na ivakatagi mera vakaitavi talega mai vagauna.

Me salavata kei na nodra rawa ni lagasere, e a gadrevi talega vei ira na vakaitavi mai na veivanua mera vakaraitaka nodra rawa ni wilika na ikabakaba ni sere ka kila na vosa vaka Vavalagi ena gauna ni veidigitaki.

O ira era digitaki me ra lagasere vata kei na matasere era lako mai na ono na matanitu:

• Alvaro Jorge Martins mai Natal, Brazil, baritone

• Rodrigo Domaredzky mai Curitiba, Brazil, baritone

• Thalita De Carvalho mai Sao Paulo, Brazil, ikarua ni soprano

• Tubo-Oreriba Joseph Elisha mai Accra, Ghana, tena

• Jonathan How of Kuala Lumpur, Maleya, ikarua ni tena

• Denisse Elorza Avalos mai Tijuana, Mexico, ikarua ni soprano

• Georgina Montemayor Wong mai Monterrey, Mexico, ikarua ni soprano

• Ronald Baa mai Cagayan de Oro, Filipaini, tena

• Sundae Mae Indino mai Cagayan de Oro, Filipaini, imatai ni soprano

• Pei-Shan Chung (Kylie Zhong) mai Taipei, Taiwan, imatai ni alato

Era a vakaitavi ena vakatovotovo ni matasere o ira na daulagasere mai na veivanua, sikova e vica na vanua ivakananumi makawa ni Lotu, ka sarava na Lomanibai ni Welefea ni Lotu, Lomanibai ni Valetabu, kei na iLololo nei Bisopi.

Ni cava na koniferedi raraba, era a lagata na lewe ni matasere ka vakaitikotiko e Utah na “Me sa Tikoga kei Kemuni” kivei ira na vakaitavi era veisiko tiko mai me iotioti ni veitalatala.

E vakaraitaka o Gérald Caussé na Bisopi Vakatulewa na nona loloma kei na vakavinavinaka vei iratou na vakaitavi ka lako mai na veivanua. “Au nuitaka ni gauna ko ni na lesu kina ki na nomuni vanua, ko ni na vakadinadinataka na ka o ni sotava oqo ka ko ni na susuga cake e dua na itabatamata vou daulagasere ena veivanua kecega—e vuravura taucoko,” a kaya o koya.

Na ka e sotavi ena rua na macawa a vukei ira na vakaitavi me ra vakila e dua na yalo cecere ni veisemati kei na duavata kei ira na lewe ni Lotu. “Keitou a vakayagataka e levu na gauna vata kei na tabacakacaka ni sere kei na ivakatagi ni Lotu. Ni keimami sota tiko, au vakila vakaidina ni o ira na iliuliu ni Lotu era nuitaka ni o ira na Yalododonu Edaidai e veiyasai vuravura e rawa ni titobu cake na nodra vakila na veika vakayalo ena sereivakatagi,” a kaya o Pei-Shan Chung.