Na Turaga o Jisu Karisito sa Vakavulica vei Keda Meda Veiqaravi
Au vakadinadinataka ni ena veivuke ni noda iVakabula, sa rawa meda lomani ira na Nona sipi mareqeti ka veiqaravi tiko ga vei ira me vaka na Nona veiqaravi.
E kaya na Turaga ko Jisu Karisito:
“Oi au na ivakatawa vinaka: sa solia na nona bula na ivakatawa vinaka ena vukudra na sipi. …
Me vaka sa kilai au ko Tamaqu, ka me vaka kau sa kilai Tamaqu: kau sa solia talega na noqu bula ena vukudra na sipi.”1
Ena vosa vaka Kiriki ni ivolanikalou oqo, na vosa vinaka sa kena ibalebale talega na “totoka, cecere.” Ia nikua, au via vosa baleta na iVakatawa Vinaka, na iVakatawa totoka, na iVakatawa Cecere, o ya o Jisu Karisito.
Ena Veiyalayalati Vou, e vakatokai o koya me “ivakatawa levu,”2na “ivakatawa levu,”3 kei “nai Vakatawa o koya sa raica na [yaloda].4
Ena Veiyalayalati Makawa, a vola kina o Aisea “ena vakani ira na nona qele ni sipi me vaka nai vakatawa.”5
Ena iVola i Momani, e vakatokai o koya “na ivakatawa vinaka”6 kei na “nodra ivakatawa uasivi ka dina.”7
Ena Vunau kei na Veiyalayalati, e kaya o Koya, “Au sa tu ena kemudou maliwa, ka sai Au na ivakatawa vinaka.”8
Ena noda siga oqo, a kaya o Peresitedi Nelson: “Na iVakatawa Vinaka sa karona ena loloma na Nona qele ni sipi kecega, kei keda sa Nona ivakataveivuke. Sa noda madigi meda taura na Nona loloma me ikuri ni noda loloma kivei ira na itokani kei na wekada—veivakani, veiqaravi, ka susugi ira—ni sa vinakata na iVakabula meda cakava.”9
A vakavulica o Peresitedi Nelson: “Dua na ivakaraitaki ni lotu dina bula ni Turaga sai koya na kena tuvalaki vakamatau, ki na nodra qaravi yadudua na luvena na Kalou kei ira nodra matavuvale. Baleta ni oqo e Nona Lotu, o keda na Nona italai eda na qarava e dua, me vakataki Koya. Eda na veiqaravi ena Yacana, ena Nona kaukauwa kei na lewa, kei na Nona loloma yalovinaka.”10
Na gauna era a kudruvaka kina na Turaga o ira na Farisi kei na vunivola, “ka kaya, Ko koya oqo sa veilasamaki vata kei ira na tamata ca, ka kana vata kei ira,”11 A sauma o Koya ena nona tukuna e tolu na italanoa totoka eda sa kila tiko ni vosa vakatauvata ni sipi sa yali, na vosa vakatauvata ni tiki ni siliva a yali, kei na vosa vakatauvata ni gone cidroi.
E ka talei meda kila ni gauna sa vakatakila kina o Luke, a vola na Kosipeli, ni tukuna tiko na tolu na italanoa, e vakayagataka na vosa vakatauvata vakayadudua, sega ni vakalevutaka.12 E vaka me vakatavulica tiko na Turaga e dua na lesoni totoka ena tolu na italanoa oqo, e ratou matataka na iwiliwili duidui, 100 na sipi, 10 na tikini siliva, kei na rua na cauravou.
Na ulu ni naba ni tolu na italanoa yadua, sa ikoya na naba dua. Na lesoni eda na taura mai na naba o ya ni ko sa ivakatawaveivuke ni 100 na italatala qase kei ira sa namaki mera italatala qase ena nomu kuoramu ni italatala qase, se nodra daunivakasala e 10 na goneyalewa. se qasenivuli ni 2 na gone ena Lalai, ia o na dau veiqaravi tikoga vei ira, karona ka lomani ira vakayadudua. O na sega ni kaya, “Sa dua na sipi lialia,” se “E dina, au sega ni gadreva na tikini siliva o ya,” se “Sa qai gone itovo ca dina.” Ke tiko kei iko kei au na “loloma taucoko i Karisito,”13 oi kedaru na tamata ena italanoa ni sipi sa yali daru na “biuta laivi tu na ciwasagavulu ka ciwa … ka laki vakasaqarai koya sa yali, me, [yacova, me yacova ni daru] kunea mada.”14 Se na yalewa ena italanoa ni tikini siliva sa yali, eda na “tutuvaka na cina, ka taviraka na vale. ka vakasaqara matua, [vagumatua] me yacova, [me yacova ni da sa] kunea.”15 Ke sa tiko kei keda na “loloma taucoko i Karisito,” eda na muria na ivakaraitaki nei tamanigone ena italanoa ni gone cidroi “ni sa yawa sara, sa raici koya, a sa lomana, ka cici, ka mokota, ka reguca.”16
Eda sa vakila beka na maqusa ni yaloi koya na tamata a yali e dua ga na sipi? Se na maqusa ni yaloi koya na yalewa a vakayalia e dua ga na tikini siliva? Se na loloma cecere kei na yalololoma nei tamani gone cidroi?
Na watiqu, o Maria Isabel, keirau a veiqaravi mai na Loma kei Amerika, e Guatemala City. E kea a noqu madigi meu sotavi Julia, e dua na lewenilotu yalodina ni Lotu. A lomaqu sara meu tarogi koya baleta na nona matavuvale. A mate o tinana ena cancer ena 2011. E a dua na iliuliu yalodina ena iteki o tamana, a veiqaravi vaka bisopi ka daunivakasala vei nona peresitedi ni iteki ena vica na yabaki. E a dua na ivakatawaveivuke ni Turaga. A kaya o Julia vei au na sasaga qaqa nei tamana ena veisiko, veiqaravi, kei na veivukei. A rekitaka vakaidina na vakania ka qaravi ira na sipi mareqeti ni Turaga. A vakamau tale ka tudei tikoga ena Lotu.
Ni oti e vica na yabaki, a sere talega mai na vakamau ka sa laki Lotu duadua tale tiko nikua. Sa vaka me luluqa mai o koya ka vakila ni so na tamata era vakalewai koya baleta ni sa sere. Sa mani sega ni laki lotu ni sa ologi koya e dua na yalo vakatani.
A vosa vakacereataka o Julia na nona ivakatawaveivuke, e a daucakacaka qaqaco, dauloloma, ka tamata yalololoma. Au nanuma sara ni a uqeti maqusa na lomaqu ni sa vakamacalataki koya tiko. Au a gadreva meu cakava e dua na ka vua na turaga o ya, ni a cakava e levu na ka ena veiyabaki taucoko o ya.
A solia mai o koya na naba ni talevoni nei tamana kau sa tekivu qiriti koya, ka nuitaka me keirau na sota e matanavotu. Ni oti e vica na macawa kei na vuqa vakavuqa na qiri ena talevoni tawarogoci, a qai sauma mai o koya na qiri.
Au a kaya vua niu sa sotavi Julia, na luvena, kau sa luvuci ena sala a veivukei kina, veiqaravi, ka lomani ira na sipi mareqeti ni Turaga ena vuqa sara na yabaki. A sega ni namaka o koya na vosa vaka o ya. Au a kaya vua niu sa gadreva vakaidina me keirau veiraci mata e matanavotu. A taroga vei au na vuna au vakatura kina me keirau na sota. Au a sauma, “Au vinakata meu sotava na tamai koya e dua na marama totoka.” E a qai vagagalu ena vica na sekodi na talevoni—na vica na sekodi o ya a vaka me gauna tawamudu vei au. A kaya ga mai, “Na gauna kei na vanua cava?”
Na siga au a sotavi koya kina, au a sureti koya me wasea mai na gauna eso ni nona veisiko, veiqaravi, kei na vukei ira na sipi mareqeti ni Turaga. Ni sa taleva tiko eso na italanoa veiluvuci, au raica ni veisau na voqa eso ni domona ni sa lesu mai na yalo vata ga a vakila e liu ena vuqa na gauna ni a ivakatawaveivuke kina. Ena gauna oqo sa tonawanawa na matana. Au sa kila ni sa gauna donu vei au oqo, ia au raica niu sa sega ni kila na ka meu kaya. Au a qai masu lo, “Tamaqu, ni vukei au.”
Vakasauri ga, sa vosa na domoqu, “Baraca Florian, niu sa italai ni Turaga au sa kere veivosoti ni keimami a sega ni mai raici iko. Yalovinaka, vosoti keimami. Ni solia e dua tale na madigi me keimami vakaraitaka ni keimami lomani iko. Ni keimami gadrevi iko. Ni ko sa rui bibi vei keimami.
Na Siga Tabu e tarava a lesu mai o koya. A balavu na nodrau veivosaki kei nona bisopi ka sa tekivu lotu tale. Oti toka ga e vica na vula a takali yani—ia a lesu mai ki na lotu. A sa lesu mai o koya. Au vakadinadinataka ni ena veivuke ni noda iVakabula, sa rawa meda lomani ira na Nona sipi mareqeti ka veiqaravi tiko ga vei ira me vaka na Nona veiqaravi na iVakabula. Ka yaco kina mai Guatemala City sa kauta lesu mai e dua tale na nona sipi talei na Turaga ko Jisu Karisito kina Nona qelenisipi. Ka qai vakavulica o Koya e dua na lesoni ni veiqaravi, au na sega ni guilecava. Ena yaca ni iVakatawa Vinaka, na iVakatawa Totoka, na iVakatawa Cecere, o Jisu Karisito, emeni.