Peresitedi Emily Belle Freeman

Peresitedi Raraba ni Goneyalewa

E vuqa na tamata era sa na kilai Emily Belle Freeman me dua na dauvosa, dauvolaivola, daukakaburaki, ka qasenivuli. Ia vei ira era sega ni kilai koya—kei ira sara mada ga era kilai koya—e nuitaka o Peresitedi Freeman me imatai ni ka era kila me baleti koya oya ni tu vua e dua na vakabauta titobu ka dei vei Jisu Karisito.

“Ena vuku ni veika au a sotava vata kei Koya sa yaco meu mai kila kina na Tamada Vakalomalagi ka yaco vei au na ivakatakila,” a kaya o Peresitedi Freeman. “Sai koya oqori na ka e veivakauqeti ki na noqu bula—na veitokani ena bula taucoko vata kei Koya.”

Ni tekivuna na nona cakacaka vaka dauvolaivola ka daukakaburaki, e a tarogi koya vakai koya se cava e vinakata me vakanamata kina. Na kena isau sai koya me vakadinadinataki Jisu Karisito kei na Nona Veisorovaki.

A sucu o koya ena ika 31 ni Tiseba, 1969, mai Boston, Massachusetts, Amerika, ena gauna a vuli tiko kina na tamana, o McKinley McVichie Oswald, ena Harvard University. E kaya o Peresitedi Freeman ni o tinana, o Leslie James Oswald, e a dua vei ira na marama ena nona vuvale “ka dau waribariba ka sinai ena loloma.”

O Peresitedi Freeman, na ulumatua vei iratou e lewe ono na gone, a tubu cake mai Sandy, Uta. A veisau na nona bula ena gauna ni nona yabaki ni vuli torocake ena gauna rau a kacivi kina na nona itubutubu me liutaka na Tabana ni Kaulotu e Ventura Kalifonia. E dau vakaitavi vata kei iratou na tacina ena koniferedi kece ni tabana ni kaulotu, iwasewase, kei na iteki vata kei rau na nodratou itubutubu. Ni oti na vuli torocake, a biubiu mai Kalifonia me laki vuli ena Brigham Young University.

Ni lesu ki vale o Gregory Garth Freeman ki Bountiful Uta, ni oti nona veiqaravi ena Tabana ni Kaulotu e Ventura Kalifonia, erau a kerei koya na nona iliuliu ni kaulotu me laki rogoca na luvedrau yalewa ena dua na nona itavi vosa e Uta. Rau sa tekivu veigadivi o Emily kei Gregory ka rau vakamau ena Tiseba ni 1989 ena Valetabu e Los Angeles Kalifonia. E lima na luvedrau.

Sa vola oti o Peresitedi Freeman e sivia ni dua na daseni na ivola ka vosa ena veimataqali koniferedi, vuli leleka, kei na vakasoqoni vata. A veivakavulici ena vuqa na yabaki ena iVakarau ni Vuli ni Lotu ka sa veiqaravi oti vakaqasenivuli ni iVunau ni Kosipeli kei na peresitedi ni Goneyalewa kei na iSoqosoqo ni Veivukei ena tabanalevu.