Sisita Tamara W. Runia

Matai ni Daunivakasala ena Mataveiliutaki Raraba ni Goneyalewa

Ena nona bula taucoko, o Sisita Tamara (Tammy) W. Runia a vica vata tu na nona veikacivi—dauniveituberi ni kalasi ni ivolanikalou ena iteki, daunivakasala ena mataveiliutaki ni iSoqosoqo ni Veivukei ni iteki, iliuliu vata kei watina ena Tabana ni Kaulotu e Sydney, Ositerelia—ia a levu ga na nona veiqaravi ena Goneyalewa.

“Au taleitaka na veikacivi kece au a veiqaravi kina,” o Sisita Runia, a sa veiqaravi talega vaka peresitedi ni Goneyalewa ena iteki. Ia, a tomana o koya, “E dodonu meu kaya niu sega ni tiko vaka-vulagi ena Goneyalewa.”

A kaya o Sisita Runia ni sa tiko oti vaka 20 ena keba ni Goneyalewa. Ena dua na yabaki a kerei talega me tiko vaka-dauveivakamarautaki ni keba.

E vinakati ira kece na goneyalewa me ra kila na levu ni nona lomani ira na Tamada Vakalomalagi. Na loloma oya e “rabailevu me vaka na lomalagi, ka titobu me vaka na wasawasa,” a kaya o koya. Na Tamada Vakalomalagi, a kuria, “e vinakati ira kece mera lesu ki vale.”

E a kaya o koya ni kena vakilai na isema oya ena veisautaka na bula vei ira na goneyalewa “baleta ni a yaco vei au.”

A sucu o Sisita Runia ena ika 2 ni Maji, 1961, mai Concord, Kalifonia e Amerika, vei rau o Vincent Alma Wood kei Gail Hilton Wood. A tubu cake mai Walnut Creek, Kalifonia.

Ena imatai ni nona yabaki e Brigham Young University ena vulici ni kakaburaki vaka-dauvolaitukutuku, e a sota kina kei R. Scott Runia. Erau a vakamau ena Me ni 1981 ena Valetabu e Oakland, Kalifonia. E vitu na luvedrau ka rautou sa tiko oqo e Provo, Utah.

A tokoni o Sisita Runia ena koniferedi raraba ni Epereli me iMatai ni Daunivakasala vou ena Mataveiliutaki Raraba ni Goneyalewa. Ena tekivuna na nona veiqaravi ena ika 1 ni Okosita.

Me ikuri ni nona veiqaravi ena Lotu, e sa 20 na yabaki nona lewena na matabose Cokovata ni Kakana kei na Veimaroroi e Provo (Food and Care Coalition), ka dau vakarautaka na ivurevure eso vei ira na sega ni vakavale kei ira na tamata isau lailai.