“Elder Robert M. Daines,” Liaona, Me 2023.
Elder Robert M. Daines
Vakaitutu Raraba ena Vitusagavulu
A cakacaka tiko vaka parofesa ni lawa kei na bisinisi o Elder Robert M. Daines ena Univesiti e Stanford ena gauna a kacivi kina me qasenivuli ni semineri ena mataka lailai.
Me vaka e dua na Yalododonu Edaidai ena nona bula taucoko, a kila o Elder Daines na kosipeli, ia e dua na ka me baleta na veikacivi oya a uqeti koya me vulica na ivolanikalou me vaka a se bera ni bau cakava vakadua. E kaya o Ruth na watina, ni dau moce vakatotolo ka dau yadra ena 4:00 ena mataka caca baleta ni gadreva o koya e tolu na auwa me vakarautaka kina na nona lesoni vei ira e 15 na gonevuli e veisiga.
“Eso na tamata e tu na nodra taledi; eso era na cakacaka vakaukauwa,” a kaya o koya. “O au oka ena iwasewase ni ‘E dodonu meu na cakacaka vakaukauwa’.”
E kaya o Elder Daines ni a vulica matua na ivolanikalou ena veisiga baleta ni vinakata me kila ka vakila na loloma ni iVakabula ka qai vukei ira na nona gonevuli me ra vakila na veika vata oya. Na tini na yabaki ni veika sotavi oqo e a vakayaco-ka vakalevu ki na nona vakabauta kei na ivakadinadina.
“Au vakila ni vaka au sa saumaki dina ka mai kilai Jisu Karisito vaka qasenivuli ni semineri e Palo Alto, Kalifonia,” a kaya o Elder Daines, ka tokoni me dua na Vakaitutu Raraba vou ena Vitusagavulu ena koniferedi raraba ni Epereli 2023.
A sucu o Robert Merrill Daines mai Bloomington, Indiana, Amerika, ena ika 28 ni Julai, 1964, vei Robert Henry Daines III kei Janet Lundgren Daines. A tubu cake e Provo, Uta, ka vakamautaki Ruth Ann Glazier ena Valetabu e Salt Lake ena Tiseba ni 1988. E lima na luvedrau.
A taurivola mai na Brigham Young University o Elder Daines ni bera ni rawata e dua na koroi ni lawa ena Univesiti e Yale. A cakacaka vaka-itokani vei Goldman Sachs (baqe ni vakatubuilavo) ka qai veivakavulici ena New York University kei Yale. Ena ruasagavulu na yabaki sa oti, a cakacaka tiko o Elder Daines vaka ivukevuke ni iliuliu ka dua na Parofesa ni Pritzker ni Lawa kei na Bisinisi ena Stanford University.
O Elder Daines a veiqaravi vaka daukaulotu tudei ena tabana ni kaulotu e Zurich Suwitiseladi. Na veikacivi tale eso ni Lotu e oka kina na peresitedi ni iteki, lewe ni matabose e cake, bisopi, kei na iliuliu ni isususu. E a veiqaravi tiko vaka peresitedi ni iteki ena gauna ni nona kacivi.