Tomani nodra Veiqaravi na iApositolo e Vuravura Raraba

O Elder David A. Bednar a sikovi Suwitiseladi, Austria, Albania, kei Hungary ena Okotova ni 2022. E Suwitiseladi, e a sikovi ira na vakaitutu e cake ni matanitu cokovata (UN) kei ira na mata ni veisoqosoqo e vuravura raraba ka ra cakacaka vata kei na Lotu ena veivakatorocaketaki raraba baleta na kawatamata. Ena veimatanitu tale eso a sota kina kei ira na lewenilotu, ka vuqa vei ira era a painia ena vakabauta ena veivanua oqori.

“Eda sa veitaratara tiko kei ira na Yalododonu era sa tauyavutaka tiko na yavu ni Lotu ka na yacova yani na veitabatamata,” a kaya.

Mai na Vale ni Vulagi ena Valetabu e São Paulo ena ika 10 ni Noveba, 2022, a vakaitavi o Elder Ronald A. Rasband ena dua na kakaburaki bula ena Facebook, ka wasea na nona ivakadinadina me baleta na iVakabula o Jisu Karisito.

“Dau nanuma tikoga ni o Jisu Karisito na Tui ni tui. O Koya na Turaga ni turaga ka Tui ni Sautu,” a vakadinadinataka o Elder Rasband.

Ena Noveba talega, a vosa kina o Elder Gary E. Stevenson ena bose ni veimatalotu na G20 Religion Forum e Bali, Idonisia. A kaya ni veimatalotu e rawa ni vukea vakavinaka duadua na wali ni leqa e vuravura ni “ra taura dei tiko na uto ni nodra ivakavuvuli ka ra dusimaki talega mai na rarama kei na kila-ka vakalou.”

A vosa o Peresitedi M. Russell Ballard na Peresitedi Vakatawa ni Kuoramu ni iApositolo Le Tinikarua vei ira na daukaulotu ena Koronivuli ni Kaulotu e Mexico City ena Tiseba ni 2022 ka vakadinadinataka na “madigi me tukuni ki vuravura ni o Jisu Karisito na iVakabula ka Dauveivueti ni kawatamata kecega.”

A sikova o Elder Jeffrey R. Holland e dua na kalasi ni semineri e Kalifonia, Amerika, ka vosa vei ira na lewe ni lotu vosa vaka-Sipeni ena walu na iteki wavokiti Ventura, Kalifonia, ena Tiseba ni 2022. A vosa ruarua ena vosa Vakavalagi kei na vosa vaka Sipeni. E vakauqeti ira na lewenilotu me ra vakanamata vei ira na itabagone ka kerei ira na itabagone kei na iliuliu era tiko kina me ra daukaulotu ena gauna sara ga oqo baleta “Ni bula tiko na Kalou, kemuni na taciqu kei na ganequ, e bula tiko na Kalou. Na Lotu e dina.”

A vosa o Peresitedi Dallin H. Oaks, iMatai ni Daunivakasala ena Mataveiliutaki Taumada, vei ira na lewenilotu kei na itokani ni Lotu mai Ilinoi, Idiana, kei Wisconsin, Amerika, ena ika 11 ni Feperueri, 2023. A vosa o koya mai na valenivolavola ni iteki e Wilmette, Ilinoi, ka a kaburaki na soqoni oya ki na 14 na iteki. Ena yakavi ka tarava, e a vosa kina vei ira e rauta ni 900 na itabagone kei na itabagone qase cake era a soqoni tiko ena Valenivolavola ni iTeki e Rockford Ilinoi. A kaburaki na soqoni oya ki na so tale na vanua e Ilinoi, Idiana, kei Wisconsin.

Era a kidavaki Elder Dieter F. Uchtdorf na veiqaravi vakavoladia ni Lotu e Idia ena nona veisiko ki New Delhi, Hyderabad, kei Bengaluru mai na ika 6 ki na ika 17 ni Feperueri. “Keimami lomani Idia kei ira na kena tamata,” a kaya o Elder Uchtdorf. “Keimami sa tarai ka vakauqeti sara vakatitobu.”

A vakavulici ira na Yalododonu mai Madagascar, Zambia, kei Mozambique o Elder Quentin L. Cook ena dua na veisiko ena Feperueri. E sivia ni 500 na tamata era sega ni lewe ni Lotu era a tiko ena dua na koniferedi cokovata ni iteki mai Maputo, Mozambique, me ra rogoca na vosa ni iApositolo. “Baleta ni levu sara era a sega ni lewena na noda vakabauta ena soqoni ni Sigatabu, keitou a moica na neitou itukutuku me kovuta na ivakavuvuli vakaivunau ka boroya e dua na iyaloyalo levu ni kosipeli, vakatakilai na kedra bibi na parofita, ka tara cake na vakabauti Jisu Karisito kei na Nona Veisorovaki,” a kaya o Elder Cook.

Ena Feperueri, o Elder D. Todd Christofferson a sikovi ira na lewenilotu mai Ghana, Nigeria, Ivory Coast, kei Liberia ena dua na veisiko siga-12 ki na iWasewase ena Ra kei Aferika. E okati ena ilakolako oqo e dua na bose vata kei na peresitedi kei Ghana. Erau a veitalanoataka na nodrau raica vata na vakanamata ki na vuli ka railesuva na parokaramu ni BYU–Pathway e Vuravura Raraba kei na parokaramu na Gathering Place.

E a veisiko o Elder Dale G. Renlund ki Honduras, Belize, Panama, Nicaragua, kei Guatemala ena Feperueri. E a tomani Elder Renlund, o Ruth na watina. Ena nona veisiko, a gole ki na dua na valenibula mai Nicaragua, ka veivuke o Sisita Renlund ena dua na cau ni Lotu ni kato ni tiko bulabula kei na isulu vei ira na curuvanua e Honduras.

Ena Maji, a veisiko o Elder Neil L. Andersen ki Brazil, ka laki sota kina kei ira na veiliutaki e cake vakaitikotiko, ka sikova na valetabu ka vakarau me vakatabui tale na Brasília Brazil Temple ka vakavulica ka soli ivakadinadina vei ira na lewenilotu, daukaulotu, kei ira na iliuliu ena vanua taucoko oya. Ena gauna ni veisiko, o koya kei Sisita Kathy Anderson erau a sota kina kei na Marama Liu mai Brazil.

Ena dua na veisiko ena Maji ki Mexico, e a sota kina o Elder Gerrit W. Gong kei Adán Augusto López, na minisita ni veika ni vanua e Mexico. O López e taura tu na ikarua ni itutu e cake ena matanitu o Mexico. Ena dua na soqoni ena itikotiko liu ni Minisitiri ni Veika ni Vanua, e a vosa o Elder Gong me baleta na sasaga e cakava tiko na Lotu me tarai cake kina na veimatavuvale e Mexico. “Ni vakayacori vakakina, eda sa cau tiko ki na vaqaqacotaki ni bula vakaitikotiko,” a kaya o koya.

O Elder Ulisses Soares a vakayaloqaqataki ira na Yalododonu Edaidai ena iWasewase ena Pasifika me ra vakanamata tikoga vei Jisu Karisito. “Ni vakanamata na noda bula vua na iVakabula o Jisu Karisito ka segata me da bulataka na Nona kosipeli vakalesui mai, eda na rawa ni dau kune sautu, vakacegu, kei na reki ena noda ilakolako,” a cavuta ena Maji ena dua na veisiko ki Niu Siladi, Toga, kei Viti.