Ana Iteraniba te Aono
Aomata aika Itiaki ae kaain Niue a Rinanon te Kimwareirei n te Tembora Imwin te Maan ae Kaniia Tenibwi te Ririki
“I namakinna bwa a bane ni mauna au kangaanga ao raraomau.”
N te moan tai inanon 27 te ririki, kaain te aro i Lakepa -te Mwaanga ae Toi Niue, kaain te taromauri ae karako mwaitiia man Ana Ekaretia Iesu Kristo ibukiia Aika Itiaki ni Boong aika Kaitira, a mwananga 2,484 te kiromiita raroana mai abaia bwa a na bane n nebonebo n te Tembora i Hamilton New Zealand n Tianuare 2023.
Aomata n tatabemaniia nako ao utu, a kawakin mwane, a karikirake, a tataromwaaka ao n aki mamatam bwa e aonga n nakoraoi aron mwanangaia.
A iriira naba waakin te mwakuri ni kakae ibukin rongorongon te utu, a ikotii rongorongoia aia utu aika a tangiraki irouia ae mwaitiia 120 ake a tia ni mate.
Inanon te tembora, kaain te aro i Niue a karaoa te mwakuri n tei ibukiia aia utu aika a tangiraki irouia bwa aonga ni karekea te bwabetito ao tabeua otenanti aika a tabu inanon te tembora.
N ana webutiaite te Ekaretia ibukin ana tembora e taku taekana: “Te tua ibukin mwakuri n bonomwii ni karaoan otenanti (te mwakuri n tei ibukin temanna) e riki n taainako bwa mwakoron ana euangkerio Iesu Kristo. Ni koauana, Ana Mwakuri ni Kamaiu bon te mwakuri ae moan te kakawaki n tei ibukin temanna n ana rongorongo te aonaaba. Rinanon Ana anga karea, E karaoia ibukiia aomata ni kabane are ti aki kona ni karaoia ibon ibukira. Bwa mai Irouna, a kona ni manga uti aomata ni kabane. A na ongo aomata ni kabane taekan te euangkerio, ao a na bane naba n reke ara tai ni manga oki nakoia ara Karo ake i Karawa.”1
Te Beretitenti ae Timothy Wilson, te tia kairiiri ae tei ibukin Lakepa-te Mwaanga ae Toi Niue, e taku, “E bon rangi ni kakukurei noorakiia angiina kaain ara Mwaanga . . . ni karaoi mwakuri aika tabu ibukiia naake a tia n rimoara.”
E reitia, “Ti namakina ae ti a kaan riki ma ara Tia Kamaiu Iesu Kristo inanon te tembora. E rangi ni kaunganano aei nakoiu n te maiu n tamnei, ibukiia kaain te mwaanga ake a maan n tuai manga nako n te tembora, ao ibukiia ara roronrikirake ake a karekei aia taneiai inanon te tembora n aia moantai.”
Mereoni ae 13 ana ririki ni maiu ma tarina, ae Karis, ao tibuia teunnaine, ae Tapu Pihigia.
“Ngke I mwananga nako moan te tembora, I namakinna kanga ai aron ae a mauna au kangaanga ao raraomau,” e taku Mereoni. “I namakina te rau.”
E reitia tibuna te unnaine, “E tuai man toki taekinan mwanangara nakon te tembora irouia natiu aine man te tai are a okira iai mweengaia. Ti bon aki kona ni mwaninga taekan mwanangara aei nakon te tembora.”
A taku Aomata Aika a Itiaki bwa taian tembora bon taabo aika a tabu iaon te aba ike a ukoria bwa a aonga ni kaan riki ma te Tia Kamaiu ao ike a karaoaki inanona reitaki ae moan te kakawaki ibukiia utu bwa a na akea tokina.
Beretitenti Alan Leuluai, temanna kaain te Beretitentii n te New Zealand Auckland Mition, e kaitibo ma kaain te roronrikirake imwaain okiia nako Niue.
E anga ana taeka n reirei nakoia bwa a na “uringa te namakin are [a] namakinna inanon te tembora.”
Beretitenti Leuluai e kabotaua te tembora ma ana Itoi Tawita are e kairiia taan rabakau nakon Kisto ao ni kaungaia te roronrikirake bwa a na wanawana ao ni “karaoa te tembora bwa aia itoi, ni kaira kawaia nakon te maiu are akea tokina.”
Iai 11 mwaitiia kairake ake ngaiia mwakoron te kurubu, a ira naba ana bwabwaro te FSY ibukin Kakorakoraia te Roronrikirake, te maungatabu ibukiia te roronrikirake ae mwanenaki man te Ekaretia ae booaki i Auckland, New Zealand ni moan Tianuare.