ENNAAN AN RITŌL AN ERIA
Aiin Aolep n̄an Tampeļ eo
Jān iien eo Būreejtōn Russell M. Nelson ekar ekkapit ilo Eprōl 2018, eļakkar karuwaineneik kōj n̄an mour ilo juon wāween eutiejļo̧k im ekwojarjarļo̧k, im n̄an kaitokļo̧k erreim̧aanļo̧k eo ad ilōn̄inļo̧k apan̄ ko an mour in n̄an iien ko rem̧m̧an an mour indeeo.
Ilo Eprōļ 2018 ekar ba: “Ennaan eo ad n̄an laļ in eļam̧ waan im em̧ool: jej karuwaineneik aolep ajri ro nejin Anij rej pād jim̧or ilo turājet ko ilo rōn̄ōļ eo n̄an itok n̄an Rilo̧mo̧o̧r eo aer, bōk kōjeram̧m̧an ko an tampeļ eo ekwojarjar, bōk lan̄lōn̄ ejjeļo̧k jem̧ļo̧kin, im bōnjān ko rem̧m̧an an mour indeeo.”1
Juon iiō tokālik ilo kweilo̧k eo eļap ekar katakin: “Jibadbad eo an Anij ej jibadbad eo ad. Ekōņaan bwe ajri ro Nejin ren kāālet n̄an ro̧o̧ļ n̄an Ippān, pojak, karbab, im bōk menin letok kwojarjar eo, liāp, im tiljek n̄an bujen ko kar kōm̧m̧ani ilo tampeļ ko rekwojarjar.”2
Ruttoļo̧k ilo Australia, tampeļ eo am epaaktata ekar pād ilo Hamilton, New Zealand im āinwōt juon mijinede ekāāl ilo Janwōde 1976 eo iaar bōk menin letok kwojarjar eo aō [endowment] ijo. Ij keememej aiboojoj im aenōm̧m̧an eo ikar en̄jake ilo aō kar kabun̄ ilo m̧weo im̧ōn Irooj. Ilo aō kar laleļo̧k lan̄lōn̄ eo ippān ripālele ro ruo rerūtto, ikar en̄jake ke ikar aikuji kāālet juon m̧ōtta n̄an indeeo n̄an bōk tarlep in kōjeram̧m̧an ko tampeļ ej letok.
Ikar kile kōjeram̧m̧an eo ilo Janwōde 1979, ke ikar jepļaakļo̧k kōn Maxine Thatcher, juon leddik jān ward eo aō eo eļap an deo im jim̧we mour eo an. Kom̧ro ekar liāp n̄an indeeo. Ekar ļo̧kjeņ am̧ro im lan̄lōn̄ ilo bujen ko kom̧ro ekar kōm̧m̧ani n̄an doon im n̄an Irooj. Kom̧ro ekar en̄jake eddo ko am̧ro im kajoor in kōjeram̧m̧an ko indeeo me kar liāpe ioon bōram̧ro. Bōtaab n̄an kom̧ro, āinwōt elōn̄ ro rej jokwe ilo Australasia ilo iien eo, en̄jake ko raiboojoj ilo tampeļ rekar ede ko jekar kōtmene n̄an en̄jaki.
Jon̄an am kar lan̄lōn̄ ke Sydney Australia Tampeļ ekar aje ekepaak jiljino iiō ko tokālik ilo Jeptōm̧ba ilo 1984 eo. Kōm ekar ettōr 1100 km ko n̄an kobaļo̧k ilo iien kōjeram̧m̧an eo an tampeļ eo. Jān iien eo, rikwojarjar ro retiljek jān Melbourne im Brisbane rej etal aolep jem̧ļo̧kin juon wiik ilo bus ko (12 awa kajjojo tūreep ko) n̄an Sydney tampeļ—em̧m̧akūt ālikin wōt jerbal ilo Bōļaide, joļo̧k iien ko ilo Jādede ilo tampeļ eo im ilo iaļ eo ilo bon̄in eo n̄an jepļaak n̄an kapijuknen n̄an tōparļo̧k awa in jar ilo Jabōt.
Ilo 1988 eo, baam̧le eo aō rekar em̧m̧akūtļo̧k n̄an Perth Australia—Ekar wōr juon peļļo̧k n̄an juon jerbal ekāāl n̄an n̄a. Ilo tōrein Sydney tampeļ eo ekar 4000 km ettoļo̧k jān m̧weo im̧ōm. Kōm ekar kōm̧m̧ane juon kallim̧ur an baam̧le n̄an ettōrļo̧k n̄an Sydney tampeļ aolep ļo̧kin ruo iiō. Ilo amim pād ijo, kōm ekōn joļo̧k juon wiik ilo am bōk koņaam ilo kain̄i ko an tampeļ. Ej wōr wōt ippān ajri ro nejūmim emeemļo̧kjeņ in iien ko reban meļo̧kļo̧k kōn iien eo ekwojarjar kōm ekar joļo̧k ippān doon ettōrļo̧k jilu awa im jimettan raan kajjojo iaan tūreep ko ilo Australia.
Kōjeram̧m̧an ko rekar wōnm̧aanļo̧k ilo Jeptōm̧ba 2001 eo ke kar aje Perth Australia tampeļ eo. Ilo lowaan ruo iiō ko ilo Australia, tampeļ ko rekar barāinwōt aji ilo Melbourne, Brisbane, im Adelaide.
Ilo ekōnono eo an, “Menin Aorōk ko ilo Jetōb,” ilo M̧wen̄an eo an Kōrā ilo Oktoba 2019 Kweilo̧k eo Eļap, Būreejtōn Nelson ekar ba:
“Ilo an Kabun̄ in eddōkļo̧k, elōn̄ļo̧k tampeļ ko renaaj ekkal bwe en lōn̄ļo̧k baam̧le ko rej maron̄ delo̧n̄e kōjeraam̧m̧an ko reļļap tata, eo ej an mour indeeo. Jej kile juon tampeļ āinwōt m̧weo ekwojarjartata ilo Kabun̄ in. Jabdewōt karōk ko kar kōjjeļā kaki n̄an kalōke juon tampeļ ekāāl, ej erom̧ juon m̧ōttan eaorōk an bwebwenato eo ad.”3
Ilo Pacific Eria in, jej mour ilo juon iien eļap bwebwenato ilo ekkal tampeļ. Iien aje bwidej ko ilo iiō in rej kōkaļļāik ijjino in ekkal eo an Vanuatu im Papua New Guinea tampeļ ko. Auckland tampeļ eo ej wōnm̧aanļo̧k ilo em̧m̧an, ippān an dedeļo̧k nam̧ōjen im dedeļo̧kin lowaan ej wōnm̧aanļo̧k wōt. Pija im karōk ko rej wōnm̧aanļo̧k wōt ikkijeen tampeļ ko em̧ōj kōjjeļā kaki ilo Kiribati, Neiafu Tonga, American Samoa im Wellington, New Zealand. Jāān ko rej kōjerbali n̄an tampeļ ko ej juon kam̧ool eo ej wōnm̧aanļo̧k wōt kōn aorōkin kain̄i ko rekwojarjar an tampeļ im kabun̄jar ilo tampeļ.
Ilo Oktoba 2018 eo Būreejtōn Nelson ekar katakin:
“Kalōk im kōkm̧anm̧anļo̧k tampeļ ko emaron̄ jab ukōt mour eo am̧, ak joļo̧k iien ilo tampeļ eo em̧ool emaron̄ ukōt mour eo am̧. N̄an ro rekar to aer jab pād ilo tampeļ, ij rōjan̄ kom̧ n̄an m̧aanjabpopo im ro̧o̧ltok iien eo em̧ōkajtata. Innām ij karuwaineneiktok kom̧ n̄an kabun̄jar ilo tampeļ eo im jar n̄an en̄jake m̧wilaļ in iakwe eo eļap an Rilo̧mo̧o̧r n̄an kom̧, bwe kom̧ kajjojo komin maron̄ bōk naan in kam̧ool eo ami make ke E ej tōl jerbal in ekwojarjar im ejjeļo̧k jem̧ļo̧kin.”4
Ke kom̧ro Maxine ekar m̧are 40 iiō emootļo̧k ilo New Zealand tampeļ, kōjatdikdik eo n̄an kabun̄jar aolep iien ilo tampeļ ekar juon ettōņak eto kitien. Wōn enaaj kar ļōmņak ke 25 iiō ko tokālik, Australia enaaj kar wōr 5 tampeļ ko rej jerbal?
Ilo Pacific in jemaron̄ kōļapļo̧k ad bōk koņaad ilo tampeļ ko rej jerbal im kōppopo n̄an kōjeram̧m̧an ko an tampeļ ilju im jakļaj. Ilo ad kōttar iiō kein m̧aanļo̧k n̄an dedeļo̧k in tampeļ ko kar kōjjeļļā kaki, jemaron̄ bōk bun̄tōn kein ruo:
1. Kōkāāl pepa in mālim n̄an deļo̧n̄e tampeļ
Būreejtōn Nelson ekar leļo̧k juon menin leļo̧k n̄an Kabun̄ in ke ekar kwaļo̧k kajjitōk ko an pepa in mālim eo ekāāl n̄an deļon̄e tampeļ āinwōt m̧ōttan naan in ikkilōk ko an ilo kweilo̧k eo ilo Oktoba 2019. Kajjitōk kein remaron̄ jipan̄ kōj n̄an ukweļo̧k im kōppopo n̄an bōk intōrpiu in mālim ko ippān branch/ward/ ak stake/ritōl ro an mijen. Kōmij rojan̄ aolep membōr ro rerūtto, ekoba aolep ro em̧ōj aer etal n̄an tampeļ, n̄an kōkāāl aolep iiō pepa in mālim ko aer n̄an deļo̧n̄e tampeļ. Men̄e kwoj en̄jake ke kwojjab maron̄ bōke, etal ippān Branch Būreejtōn ak Bisop eo am̧, eo enaaj m̧ōņōņō in jipan̄ eok kōppopo. En̄in ej juon iaan eddo ko reaorōk tata im ekwojarjar tata āinwōt juon riekajet ilo Israel.
Būreejtōn Nelson ekar kakkobaba:
“Ikōņaan kōnono n̄an jodikdik ro nejid. Kōmij rojan̄ kom̧ n̄an kōkarbabe kom̧ n̄an bōk peba in mālim ko me ekadu kitien kōjerbali n̄an deļo̧n̄e tampeļ. Naaj kajjitōk ippam̧ kajjitōk ko me eiookwaj eok lo m̧aanjabpopo eo am̧ n̄an kain̄i ko an peptaij im kapen ilo etan juon armej emej im jerbal kake (proxy). Kōmij lukkuun kam̧m̧oolol kōn erreo eo im m̧ōņōņō eo ami n̄an bōk kōņaami ilo jerbal in ekwojarjar an tampeļ.”5
N̄an kōm̧m̧an bwe jodikdik ro en er m̧oktata, bisoprik ro im branch būreejtōn ro rej kweilo̧k ippān aolep jodikdik ro im membōr ro rekāāl n̄an jipan̄ er bōk im kōkāāl pepa in mālim ko n̄an deļo̧n̄e tampeļ.
2. Kōm̧m̧an iien ilo jikejuuļ eo ad n̄an kōmakijkij ad bōk koņaad ilo tampeļ
Karōke tūreep ko n̄an tampeļ eo im likūt iien ko em̧ōj karōki ilo kōļenta ko ad ekam̧ōņōņōik kōj ilo ad bōk koņaad ilo tampeļ eo. Kajjojo iien jej loļo̧k tampeļ eo jej ekkatak eļapļo̧k kōn Jisōs Kraist im eddo eo An eļap ilo an jipan̄ kōj ilo iaļ in ad n̄an jepļaakļo̧k n̄an ippān Jemedwōj Ilan̄.
3. Menmenbwij an Baam̧le
Būreejtōn im Sister Nelson rej wōnm̧aanļo̧k wōt ilo aer jet waanjon̄ak ko rem̧m̧an kōn menmenbwij an baam̧le eo aer make. Būreejtōn Nelson ekkā an kakeememej kōj kōn aorōkin jerbal in karejar n̄an baam̧le ko ad jim̧ōr ilo turājet ko ilo ran̄ōl eo. Ijelā jān en̄jake eo aō make kōn lan̄lōn in kappukot ro jibu im jim̧m̧ao etto, rekoote meļeļe ko kōn er, leļo̧k etāer ilo FamilySearch, innem kōm̧m̧ani kain̄i ko rekwojarjar n̄an er ilo tampeļ.
Juon kout jān naan in ikkilōk ko an Būreejtōn Nelson ilo Oktoba 2022 Kweilo̧k eo Eļap ej kakeememej kōj bwe tampeļ eo, “ej m̧weo Im̧ōn. Ej obrak kōn An kajoor. Jen lale bwe jen jab bōk mejād jān ta eo Irooj ej kōm̧m̧an n̄an kōj kiiō. E ej kōm̧m̧an bwe en pidodoļo̧k wōt tōpar tampeļ ko An. E ej kōm̧ōkajļo̧k bun̄tōn eo me jej kalōk tampeļ ko. E ej kōļapļo̧k maron̄ eo ad n̄an jipan̄ aiintok Israel. E ej barāinwōt kōm̧m̧an bwe en pidodoļo̧k n̄an an kajjojo iaad eddōkļo̧k ilo jetōb. Ij kallim̧ur bwe an ļapļo̧k iien ilo tampeļ enaaj kōjeraam̧m̧an mour eo ami ilo wāween ko ejjeļo̧k bar juon emaron̄ kōjeram̧m̧an āinwōt in.”6
Ij jar bwe ilo m̧oko m̧ōd im ilo baam̧le in ward im branch ko ad, bwe jemaron̄ kaorōk pepa in mālim ko ad n̄an deļo̧n̄e tampel, kōppopo n̄an tampeļ im kōpooj et ko etan baam̧le n̄an kain̄i ko an tampel, bwe jen maron̄ karbōb n̄an bōk kōjeram̧m̧an ko me rej itok jān tampeļ ko rededeļo̧k im rekāāl ilo aer aji ipeļaakin āne kein raiboojoj ilo Pacific in.