BWEBWENATO KO AN IJO JOKWE IE
Armej ro Rekwojarjar ilo Niue Rej Ioon Lan̄lōn̄ ilo Aer Kabun̄jar ilo Tampeļ eo Enan̄in Jilu Epepen ko
“Ikar en̄jake āinwōt n̄e aolep aō trouble im inepata rekar jakoļo̧k.”
Ej kab jinointata ilo 27 iiō, member ro ilo Lakepa-Toi Niue Branch, juon kumi in jar eo edik an Kabun̄ eo an Jisōs Kraist im Armej ro Rekwojarjar ilo Raan ko Āliktata, rekar em̧m̧akūt 2,484 kilomita ettoļo̧k jān āne eo āneer n̄an kabun̄jar ippān doon ilo Hamilton New Zealand Tampeļ eo ilo Janwōde 2023.
Kajjojo armej ro im baam̧le ko rekar kakkoņ jāām, kōm̧m̧ani kōbajet ko, kōm̧m̧an elōn̄ jar ko im jitlo̧k ko n̄an kōm̧m̧an bwe en maron̄ tōprak tūreep eo.
Rekar barāinwōt bōk koņaer ilo kappukot menmenbwij ko an baam̧le, kobaik meļeļe ko kōn 120 armej ro remej.
Ilo tampeļ eo, member ro ilo Niue rekar bōk jikin ro rejitōnbōro ippāer n̄an bōk peptaij im kain̄i ko rekwojarjar an tampeļ.
Website eo an Kabun̄ in ej kalikkar: “Katak eo kōn kain̄i ko kōm̧m̧ani n̄an ro jet (bōk jikin) ekar baj wōt m̧ōttan gospel eo an Jisōs Kraist. Ilo m̧ool, Pinmuur eo An ej juon m̧akūtkūt eo eļaptata kar kōm̧m̧ane n̄an bar jet ilo bwebwenato ilo laļ in. Kōn en̄taan eo An, Ekar kōm̧man n̄an aolep armej ta eo jejjab maron̄ kōm̧m̧ane n̄an kōj make. Kōn E, aolep armej renaaj jerkakpeje. Aolep renaaj ron̄ gospel eo, im aolep enaaj wōr aer bar juon iien kajjeon̄ n̄an jepļaak n̄an Ro Jined im Jemed Ilan̄.”1
Būreejtōn Timothy Wilson, ritōl eo an Lakepa-Toi Niue Branch, ekar ba, “Ekar kanoojin em̧m̧an n̄an loe elōn̄ iaan Branch membōr ro ad . . . kōm̧m̧ane jerbal in ekwojarjar n̄an ro em̧ōj aer ilo̧k jān mour in.”
Ekar kakkobaba, “Jej en̄jake ad epaake Rilo̧mo̧o̧r Jisōs Kraist ilo tampeļ eo. Ekar im̧we eō ilo jetōb, ilo an membōr ro an Branch eo ro ekar to aer ettoļo̧k jān tampeļ eo, im n̄an jodikdik ro am im ej kab nej juon kattōn aer etal n̄an tampeļ.”
13 iiō drettan Mereoni ekar kobaļo̧k ippān sister eo an, Karis im jibūn, Tapu Pihigia.
“Ke ikar etetalļo̧k n̄an jikin peptaij eo ilo tampeļ eo, Ikar en̄jake an jako aolep aō burom̧ōj im inepata,” Mereoni ekar ba “Ikar en̄jake aenōm̧m̧an.”
Jibūn ekar kakkobaba, “Leddik ro jibū rejjan̄in bōjrak aer ekōnono kōn tūreep in tampeļ eo jān ke jekar ro̧o̧ļtok. Jejjamin melo̧kļo̧k tūreep in n̄an tampeļ eo.”
Armej ro Rekwojarjar rej kile tampeļ ko āinwōt jikin ko rekwojarjar tata ilo ioon laļin ijo rej kappukot n̄an epaakeļo̧k Rilo̧mo̧o̧r im ijo jemjerā ko an baam̧le raorōk rej kōm̧m̧an n̄an indeeo.
Būreejtōn Alan Leuluai, juon membōr in New Zealand Auckland Mijen Būreejtōnji eo, ekar ioon jodikdik ro m̧okta jān aer jepļaak n̄an Niue.
Ekar kapilōk er n̄an “Keememej en̄jake ko [rekar] en̄jaki ilo tampeļ eo.”
Būreejtōn Leuluai ekar keidi tampeļ eo n̄an Iju in David me ekar tōlļo̧k rimāletlet ro n̄an Kraist ajri eo im rōjan̄e jodikdik ro n̄an māletlet im “kōm̧m̧an bwe tampeļ eo en iju eo aer, n̄an tōl iaļ eo aer n̄an mour indeeo.”
11 rūm̧m̧an ded ro im rekar m̧ōttan kurup eo, rekar barāinwōt kobaļo̧k ilo FSY, N̄an kōkajoorļo̧k Jodikdik ro, juon kweilo̧k an jodikdik ro ekar kōm̧m̧an ilo Auckland im Kabun̄ in ekar eddoiki, ilo New Zealand jinoin kar Jānwōde eo.