BWEBWENATO KO AN IJO JOKWE IE
Kappeik Dren ko ilo Tanna
Āne eo Tanna, ilo Tafea Province ilo Vanuatu, ej 45 minit kelo̧k n̄ane—ak juon iaļ aitok ilo lojetļo̧k—n̄an Efate Island, ijo mijen opij eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata ej pād ie.
Ilo iien ajedeed in nan̄inmej eo ipeļaakin laļin, em̧akūtkūtļo̧k n̄an Vanuatu ekar kanooj pen, ekōm̧m̧an bwe en pen n̄an an Kabun̄ in ilo eria eo jilkinļo̧k ak bōk mijinede ro. Āliktata, āne eo Tanna ekar ejjeļo̧k mijinede ro rej jerbal aolep raan ie im jerbal in mijinede ekar rūm̧uj.
Ilo jinoin 2022 eo, mour ekar jino bar ro̧o̧l n̄an m̧okta, mijen būreejtōn eo an Vanuatu, Mark Messick, ekar m̧ōņōņō ilo an kar bōk juon kajjitōk jān District Būreejtōn eo an Tanna: “Jilkintok mijinede ro iien eo em̧ōkajtata!”
Būreejtōn Messick ekar jeļā ke ilo an ejjeļo̧k mijinede ro ilo Tanna, membōr ro an Kabun̄ in im ro em̧ōj aer kar mijen ilo āne eo rekar wōnm̧aanļo̧k n̄an katakin kōn gospel eo n̄an ro m̧ōttāer im ro ritūrier, im ekar wōr 85 armej ro rekar pojak n̄an intōrpiu im peptaij. Būreejtōn Messick ekar m̧ōkaj im karōke n̄an jilkinļo̧k mijinede Rijippan̄ ro an Būreejtōn eo (APs) n̄an Tanna.
Karōk eo kar karūm̧ujļo̧k kōnke volcano eo emourur ilo Tanna ekar jinoe em̧akūtkūt. Innem, juon aire in kōto ekar waļo̧k ilo āne eo, kakkure aolepān jikin eo—wōnm̧aanļo̧k ilo an kallikar ia eo Vanuatu epād ie āinwōt kein kajuon ilo Laajrak in Kauwōtata ko ilo Laļin (World Risk Index) jān jorrāān in mejatoto ko. Ilo wōt an Tanna kar jinoe em̧m̧anļo̧k jān aire in kōto eo, juon ajedeed ejidimkij in nan̄inmej in COVID-19 kar kōbōjrak aolep m̧akūtkūt ko ioon Vanuatu, im bar juon alen, itoitak ekar bōjrak.
Ekar jab m̧ae lukwōn Okwoj eo ke Būreejtōn August ekar āliktata kiiō maron̄ jilkinļo̧k AP ro n̄an Tanna n̄an intōrpiuki armej ro im kōpooj er n̄an peptaij ilo Kabun̄ in. Jān iien eo, Būreejtōn ekar inepata bwe kōn aitokin iien kōttar eo jet iaer renaaj kar eļļo̧k, bwe ikdeleel eo aer emaron̄ kar jako.
Bōtaab ke Elder Silas Toa im Brian Moses Nalin rekar jikrōkļo̧k—pojak kōn pepa in jerbal ko n̄an intōrpiu ko an peptaij—rekar loe bwe ekar oktak. Ejjab wōt 85 rekar wōt kijoroor n̄an peptaij ilo Kabun̄ in, ak bōnbōnier ekar ļapļo̧k kōn 29. Kiiō, 114 armej ro rekar kōttar ilo tiljek n̄an intōrpiu im peptaij. Elder ro rekar jinoe jibadōkļo̧k branch ko an Kabun̄ in ilo Tanna.
Ālkin aer kar intōrpiuki im peptaiji jiljino armej ilo branch eo m̧oktata, Elder Toa im Nalin rekar jibadōkļo̧k Sideseawi, juon eria emakeļo̧k ilo ijo eutiej ilo toļ ko.Ekar ejjeļo̧k wāween n̄an aer tōpar branch būreejtōn an Sideseawi bōtaab ekar kōtmene wōt aer etal, kōn menin mijinede ro rekar ettōrļo̧k kōn truck eo waer jon̄an eo remaron̄e innem wōnm̧aanļo̧k im etetal laļļo̧k ilo awa ko 3 āliktata ilo iaļ eo. Āliktata, ke rekar tōprakļo̧k, branch būreejtōn eo ekar jako. Elder ro rekar tallōn̄ļo̧k n̄an tōpar ijo ak ejjeļo̧k tokjen.
Innem tokālik ekar ļap an wōt. Aolep ilo Sideseawi rejeļā bwe n̄e ej jinoe an eddo an wōt, walaļļo̧k ilo toļ ko ekanoojin kauwōtata. Elder Toa im Nalin rekar ekairir im jepļaak n̄an truck eo waer, ilo aer jeļā ke eaorōk bwe ren ekairiir m̧okta jān an reba eo ibwijleplep im kōm̧m̧an menin an apan̄ n̄an kijooni. Rekar m̧ōkaj aer tōprakļo̧k truck eo n̄an aer ettōrļo̧k im eļļā jān reba ko kein kajuon im karuo, bōtaab rejeļā bwe reba eo kein kajilu enaaj kar apan̄.
Āinwōt kar kōtmene, wa eo waer ekar bōjrak lukwōn iaļ eo. Rekar kajjeon̄ uni—ejjeļo̧k tōprak. Rekar ko̧o̧ļe District Būreejtōn eo, im ejjab to ekar itok jipan̄, bōtaab wa eo ekar jab maron̄ em̧m̧akūt. Reba eo ekar utiejļo̧k im ibweeb jon̄an rijipan̄ ro rekar aikuj etal jān ijo n̄an kōjparok er. Innem, Elder Nalin ekar loe juon men ekar kainepataiki. Ekar loe bwe dren ko ilo reba eo tok juon—eo ekar to̧o̧rtok n̄an reba in—ekar ibweebļo̧k im kar menin kamijak n̄an kōbōjrak an to̧o̧r tok.
Kar kile ippān Elder Nalin bwe juon kajoor eo ettiņo̧ ekar dāpij likļo̧k reba eo kein kajilu, āinwōt n̄e ej leļo̧k aer iien . . . bōtaab ekar jeļā bwe eban kar aitok. Dren eo ej to̧o̧rļo̧k ekar m̧ōkaj.
Elder Toa im Nalin rekar waanjon̄ak in likao ro rūm̧m̧an ded ro rem̧m̧antata ilo Vanuatu—jeļā koņaer im em̧m̧an ilo aolep wāween. N̄an er, juon truck epen meļeļe kōn jon̄an wōņeen, eļaptata ilo juon jikin eo baam̧le ko renan̄in jab maron̄ e wōņeen jikuuļ n̄an ajri ro nejier, eļaptata wia wa. Elder ro rekar dim n̄an kōjparok wa eo waan Kabun̄ in, ak kiiō dren eo em̧ōj an wallōn̄ļo̧k n̄an kein kōppeļo̧k kōjem ko. Rekar ko̧o̧ļe Mijen Būreejtōn eo aer. “Ta eo jej aikuj kōm̧m̧ane?”
Uwaak eo an Būreejtōn Messick ekar: “Kom̧m̧o̧ol kōn amiro kar ko̧o̧ļ tok. Kiiō diwōj jān wa ņe im lo̧mo̧o̧ren kom̧ make. Ijjab kea kōn wa ņe; Ij kea kōn kom̧.”
Ke rekar ekairir nam̧ōjļo̧k jān wa eo, Elder Toa ekar tallōn̄ n̄an jea eo ļokan n̄an bōk bok eo an, jeje ko rekwojarjar im pepa in intōrpiu ko 114. Ekar jab maron̄ loe jabdewōt jikin. Innem juon ainikien ekar lam̧ōjļo̧k, “Dren eo ņe tok! Diwōj jān wa ņe!” im Elder Toa ekar diwōj jān kōjem eo ļokan ilo wōt iien eo wa eo ej moot laļļo̧k ilo reba eo.
Mōkaj in wōt an Elder ro kile bwe jeje ko rekwojarjar aer im pepa in intōrpiu ko 114 rekar ped wōt ilo lowaan wa eo—eo im rejjab maron̄ kiiō loe—rekar kōjerbal kajoor eo an priesthood im kipel wa eo n̄an kōjparok pepa in jerbal ko aer raorōk. “Men eo in komaron̄ kōm̧m̧ane kōn priesthood eo,” likao ro rekar ba tokālik, kōn eļap peran. “Komaron̄ kappeik.”
Elder Toa im Nalin rekar maron̄ kadiwōj er make n̄an kōjparok, im ijo ilo tūrin reba eo, rekar bukwelōlō im jar. Ilo aer jar bwe wa eo en ped ilo kōjparok im bok ko aer, jeje ko rekwojarjar aer im pepa in intōrpiu ko ren m̧ōrā wōt, mijinede ro rekar en̄jake juon en̄jake in kaenōm̧m̧an ekajoor bwe aolep men renaaj kar emm̧an. Innem, rekar etetalļo̧k ilo aolepān ļo̧k iaļ eo jān toļ eo.
Raan eo tok juon, Elder ro rekar bōk juon ko̧o̧ļ jān District Būreejtōn eo. Branch būreejtōn eo an Sideseawi ekar loe wa eo waer, 250 mita ko ijo reba eo ej to̧o̧rļo̧k ie ļo̧k. Ke Elder ro rekar tōprakļo̧k n̄an bōke, rekar loe bwe ekar ejjeļo̧k kop ak kurere ilo ānbwinin wa eo, kōjekdoon iaļ eo an ilo reba eo, kijoon wōjke ko, drekā ko, im kobij ko.
Ilowaan wa eo ekar jab em̧m̧an. Ekar lukkuun tutu. Engine eo ekar jorāān jarom ko ie, im aolep men ilo jikin kakkoņ m̧weiuk eo—bok jidikdik ko, bok in bōk meļeļe ko, bok ko—rekar tutu im jorrāān n̄an kōjparoki . . . ijjelo̧kin wōt jeje ko rekwojarjar an Elder ro im pepa in intōrpiu ko 114. Men kein rekar alikkar loi iaan aolep men, rekar kanoojin m̧ōrā.
Ilo aer kar joļo̧k jorrāān ko ilo wa eo, Elder Toa im Nalin rekar kadedeļo̧k tūreep eo aer ilo aer etetal laļļo̧k. Ilo ijo rej nej bōjrakļo̧k ie, rekar intōrpiuki im peptaiji 48 armej ro m̧okta jān aer wōņm̧aanļo̧k im kijooneļo̧k Āne Tanna. “N̄e kwoj mōk in etetal” juon iaer ekar jiron̄ļo̧k juon m̧ōttan mijinede” Etetal kōn būruom̧.”
Būruweer im juon kabwilōn̄lōn̄ an priesthood ekar jipan̄ elder rein retiljek tōpar im boktok 114 armej ro ilo kōjparok n̄an Kabun̄ in an Jisōs Kraist.