Noda Tabana
Sa Yacova o Dau Qito Volleyball na Vanua Cecere Ka sa Vakatikitikitaka na Qito me laki Qaravi Ira na Tamata
Na-Dauqito kei Amerika taucoko e “taleitaki” ira na lewenivanua e Niu Siladi
Sa dau tikitaka o daukaulotu na veika kece e gadrevi ena veigauna—ena daramaka e dua na sote vulavula ka vakaneketai, me na vakarautaki na nona ivolanikalou, ka me tiko vua me vakabauta vakaidina na Kalou. Ia e dua tale na ka e kilai tani kina o Elder Gavin Chambers maivei ira na tamata.
O Chambers e 206 na sedimita (6-na fute 9-na idi) e dau qito volibol e Amerika taucoko! Mai Corona e California sa mai sosomitaka na nona isulu ni volibol me laki curui ki na isulu ni kaulotu tudei.
A veiqaravi tiko o Elder Chambers ena yasana o Papatoetoe ena Tabana ni Kaulotu e Niu Siladi Okaladi, ena gauna a tekivu veituberi tiko kina vei ikarua ni itokani ni daukaulotu, o Elder Bryce Jacobson “Au dau raici Elder Chambers cake,” a kaya o Elder Jacobson, me tukuna tiko vakamatata ni o koya e nona itokani iliuliu. Ia ena kena balavu, sa matau tu vei Chambers me dau raici cake yani.
Sa balavu dina o koya. “Ena gauna au se qai 13 kina sa 182 cm (ono na fute) na kequ balavu. Ia na noqu tubu dina a sega ni gu mai me yacova niu sa yabaki 15 e koronivuli torocake.” Sa yacova na kena balavu taucoko ena yabaki torocake ka me vakataki ira na vuqa na cauravou balabalavu, sa nanumi tiko me na qito basketbol. A qai sega ni yaco.
“Au a sega ga ni taleitaka na basketbol,” a kaya. “O ira na vo ni gone kei dauveivakavulici era a dau vakalialiai au; ka kaya ni sega ni rawa meu lade.”
A qai vakayaloqaqataki koya o tinana, me saga e dua tale na timi ni volibol veivakarautaki ena nona yasana. “Au a sega tu ga ni dau marautaka sara e dua na qito cava ga e liu, a kaya o Chambers. “Au a rawai sara e dina ga au a sega ni vinaka sara kina, au a gole i vale ka kaya vei tinaqu niu sa na qito volibol!”
A vukei koya na veituberi vakaqito ena kena isoqosoqo me tudonu ena qito oqo, ni ena vuku ni kena balavu sivia, era a biuti koya me dautataro e lomadonu. Sa qai yaco, na icolacola ni “tamata balavu” me sa kauta mai na vinaka. Ni oti e dua na yabaki ni qito volibol, sa maqusa o koya me lewena na nona timi ni koronivuli torocake ka vakatovolea kina na nona kila. Ia a qai yaco e dua na vakacala-ka ena imatai ga ni nona sasaga oqo.
“Au a lade ka dedeki au cake meu tovolea meu tarova e dua na polo, ni gauna au sa tau kina e ra au a butuka na yavana e dua tale ena yasa kadua ni neti ka ramusu kina na noqu qurulasawa,” e vakananuma lesu o Chambers. “Au sa mai dara kina e dua na vava levu ena veivanua kecega ni oti o ya sa sega tale niu qito ena ituvatuva e tarava.”
“Sa veivakararawataki dina me yaco na toso cake vakaoqo ena qito vou oqo au sa mai taleitaka vakaidina, me qai vakadrukai ena gauna ni qito taucoko o ya.”
Ia mai na dravusa ni druka o ya a lasika cake mai na “manumanu vuka vou” ni dauqito taucoko. Ena tolu na yabaki e tarava sa yaco o Chambers me dauqito rerevaki sara ena vanua ni qito, ka ra sa wanonovi koya matua mai na veitimi ni volibol ni koliji e Amerika taucoko. A sega ni ciqoma na nodra vakatutu na veikoronivuli lelevu—oka kina o Stanford kei UCLA—ni sa taleitaka ga na kena e vinakata dina: o ya me qito ena timi cecere kilai ena vanua taucoko o ya na Brigham Young University mai Provo, Utah (Amerika).
A yacova o Chambers na cecere ni nona sasaga ni qito ena vulai katakata ni 2022, ena nodratou a qaqa na nona timi na Orange Coast Volleyball Club ena sotasota ni volibol yabaki 18 lako sobu ni vanua taucoko. A rawata o Chambers na icocovi ni imatai ni timi e Amerika taucoko mai na American Volleyball Coaches Association. Na cauravou a “sega ni lade rawa,” sa mai vagalui ira era a vosabeci koya e liu.
“Ni oti na sotasota o ya . . . au a laki marautaka e vica na macawa ni kena taleitaki na veika sa yaco—au a taubena na noqu metali koula . . . ka marautaka na veivakacerecerei oqo,” a kaya o Chambers. “Ia au sa qai kila ni sa kena gauna meu sa toso ena noqu bula.”
Sa kena ibalebale me sa ciqoma na nona kacivi me laki kaulotu ena Lotu i Jisu Karisito ni Yalododonu Edaidai. Ena nona ilesilesi vakasakiti vou oqo, sa rawa ni nanumi kina ni na dredre na gole tani mai na volibol, ia sa vakatulewa oti tu mai kina o Chambers ni se qai yabaki 12. A vinakata me qarava na Turaga ena nona sureti ira na tamata mera lako maivei Karisito. Na gole ki na kaulotu sa dua na ka dodonu me na vakayacori.
“Io e dina, sa ka dredre me tarovi na qito volibol . . . ia au a masulaka na vakatulewa oqo, kau yalonuidei ni nona ituvatuva vei au na Tamada Vakalomalagi o ya meu laki kaulotu ni oti ga mai na noqu vuli torocake.”
A kaya ni nona a vakatulewa ni se qai cauravou lailai a vakarawarawataka me qarava vinaka na veika tale eso a rawa sara ga me vakataotaka na laki kaulotu. “O na vinakata me yaco dina nomu masulaka na nomu vakatulewa talega o ya, baleta ni na tiko eso tale na ka mo cakava ena nomu bula, ia na nomu ituvatuva kei na kena mai vua na Tamamu Vakalomalagi ena rawa me duidui.”
Ena vuku ga ni veika baleta na soli ni visa ki Niu Siladi, a tekivuna o Chambers na nona veiqaravi ni kaulotu ena Tabana ni Kaulotu e West Virginia Charleston. E kea, a raici ira na tamata era a curuma tiko na bula dredre vakailavo, ia a raica rawa o Chambers ni ra sa yalomalua, ka ra sa vakasaqara ga na veidusimaki vakayalo ki na nodra bula.
Na Kosipeli i Jisu Karisito sa kena isau ga.
Na ituvaki mai Niu Siladi e duidui sara toka vakalevu, ia o ira na tamata eke era sa vakasaqara tale tikoga na isau ni taro baleta na bula. “Keimami sa vakaveitokani yani kei ira na tamata ena veivanua keimami gole kina, veivosaki kei ira na tamata ka wasea vei ira na iTuvatuva ni Bula Marau ni Kalou,” a tomana. “E dredre na cakacaka oqo, ka keimami sega ni taleitaki. . . . ia sa vakaitamera na neimami vakabauta ni keimami na kunei ira era sa vakasaqara tiko mai na veisau vakayalo ki na nodra bula,” a kaya. “Ni ra sa tu vakarau mera vakarorogo keimami sa na tiko e kea me laki saumi na nodra lomatarotaro ka vukei ira mera vulica na veika mera na cakava.”
“Niu mai railesu tiko nikua au sa raica rawa na sala a sauma kina na Turaga na noqu masu, ka vukea meu kunea na gauna donu o ya meu laki kaulotu kina,” a kaya o Elder Chambers. “Niu cakava na veika ena sala ni Turaga, a rawa kina meu ciqoma e dua na ilesi meu qito ena dua na koliji ka na rawa kina meu laki kaulotu sara ka bula curuma na noqu tatadra ni volibol ni oti o ya.”