Noda Tabana
Raica na Dauvakatagi ni Malevani na Cakamana ena iLakolako ni Vakatagi
Na veiyabaki ni cakacaka mana kei na madigi sa vakavuna na nona mai rawata o Scott Hamilton, mai Ositerelia, na imatai ni icovi na Praiseworthy Award ni isoqosoqo ni vakatorocaketaki bula vakacakacaka, na Latter-day Saints in Publishing, Media and the Arts (LDSPMA).
Ni dua na lewe ni Lotu i Jisu Karisito ni Yalododonu Edaidai, a lakova o Scott na soqo ni LDSPMA Awards Gala ka a caka mai na Utah Valley University, e Amerika, ena Okotova sa oti, ka ciqoma kina na nona icovi ni Praiseworthy Award me baleta e dua na vidio ni nona sere, ‘I See the Christ.’
A vola o Scott na sere a mai rawata na imatai ni icovi me baleta e dua na ivakatagi e bulia ka vakatokai na One Spring Morn, ka vakacaucautaki kina na bula ni parofita o Josefa Simici kei na watina o Emma. E rau a digitaki na ‘I See the Christ’ kei na dua tale na sere mai na ivakatagi oqo, ‘Bring on Tomorrow’, me baleta na soli icovi ena iwasewase ni Vale ni Vakatagi.
A tavoci e Salt Lake City ena 2022, era vakaitavi ena video ni ‘I See the Christ’ na daulagasere o Casey Elliot, mai na ivakatagi domotolu vata kei Gentri, kei Savannah Stevenson, e dua na marama dau lagalaga mai na London’s West End. Eratou tokoni mai vei Jayne Galloway ena piano kei na dau qiri selo a digitaki ena soli icovi ni Grammy, o Nicole Pinnell.
A raici Nicole ena imatai ni gauna me qiriqiri kina ena iyaloyalo ni ivakatagi nei Rob Gardner, Lamb of God, ka a vakatagitaka kina na domoi Karisito mai na nona selo. Ena dua na veivakauqeti ka vosa ki yalona, a veitaratara yani vua o Scott ena initaneti.
“Au kila ni a dolava dina na Tamada Vakalomalagi e dua na katuba vei au ena taledi, yalovinaka kei na isema vakasakiti nei Nicole,” e nanuma lesu o Scott. “Au sa vakavinavinaka vakalevu ni donu e yalona ka lomasoli me rogoca na noqu ivakatagi.”
A vakaveikilaitaki Scott vei Casey Elliot o Nicole, a mani veitaratara yani vei Savannah Stevenson o Scott, ena initaneti talega, ni raica na nona vakaitavi ena dua na parokaramu ni Brigham Young University. A lagata o Savannah na solo ena “Bring on Tomorrow,’ ka rau domoruataka na, ‘I See the Christ’ vata kei Casey.
Ni sa oti na kena caka na vidio, ni oti vakalailai na nona lesu ki Ositerelia, a tauvimate ni mona o Scott ka dra kina vakalevu na ilobi e liu ni nona mona. A vakabulai mai na dua na veisele vakatotolotaki, ena vakavinavinaka-ena cakamana—a rawa kina ni tomana tale nona vakatagi.
Ena vula o Me ni yabaki vata oya, a liutaka na kena katoni e rua tale na nona sere ni tiko vakayawa voli ka sema tiko ena Zoom kina volau ni katokatoni e Salt Lake City.
“Sa tawamudu na noqu vakavinavinaka vei Tamada Vakalomalagi kei ira na dauveisele vakasakiti ena nodra vakabulai au, vakakina vua na watiqu o Jo ena nona biligi au voli vakamalua ena ilakolako ni vakatagi oqo ena rauta ni 15 na yabaki,” e kaya o Scott.
Sa vakakina na nona vakavinavinaka vei rau na nona itubutubu o Nanette kei Frank ka rau a susuga cake na nona taledi ni vakatagi mai na nona gauna ni gone. Ni sa voleka tiko na gauna me takali yani kina na tinai Scott ena 2020, a yalataka vua ni na tomana tikoga na nona vola sere, a mani vakakina.
“Nida sa laki lesu mai ena loma ni buca ni yaloyalo ni mate sa dau vakavuna meda raica vakavinaka tale na veika e bibi ena noda bula. Vei au sai koya na vakabauta kei na matavuvale, io me vakalevu tale na ivakatagi e tara cake na vakabauta,” e kaya o Scott.
Ena gauna oqo sa biuta vata tiko ka vakarautaka na tavoci ni nona ivakatagi sa waraka vakabalavu tu mai, One Spring Morn. Na kena idola a namaki ena 2025—205 vakavinaka na yabaki main a iMatai ni Raivotu nei Josefa Simici—na kena italanoa ena vakelia na veika erau a sotava o Josefa kei Ema Simici, na nodrau nanuma me baleta na vakabauta kei na yalodina vua na nodrau iVakabula, ko Jisu Karisito, kei na nodrau vakavinavinaka ena vuku ni Nona loloma cecere.
Namaka e dua na vakatasuasua ikau ka yavutaki ena ivakatagi oqo mai Malevani, Ositerelia, ena June oqo.