Pasiuna

Kon ikaw nanglimbasog sa pagkaadik o adunay kaila nga nanglimbasog sa ingon, kini nga giya mahimong usa ka panalangin sa imong kinabuhi. Uban sa pagtugot gikan sa Alcoholics Anonymous, ang 12 ka lakang gipahiangay aron malakip ang mga doktrina, mga baroganan, ug mga gituohan sa Ang Simbahan ni Jesukristo sa mga Santos sa Ulahing mga Adlaw. Niini nga giya, ang mga lakang gipresentar sa han-ay nga paagi uban sa may kalabotan nga baroganan sa ebanghelyo. Kini nga giya makatabang nimo nga makakat-on kon unsaon sa paggamit niini nga mga lakang. Bisan unsa pa ang imong mga kahimtang, kini nga mga lakang makatabang nimo sa pagduol ngadto ni Kristo ug sa pagdawat sa mga panalangin nga maulian ug mamaayo.

Ang mga pagkaadik mahimong maglakip sa paggamit sa mga butang sama sa tabako, alkohol, kape, tsa, ug mga giresita ug ilegal nga mga druga. Mahimo usab kining maglakip sa mga gawi sama sa pagsugal, pagtan-aw og pornograpiya, dili angay nga sekswal nga mga binuhatan, pagdula og bidyo, dili tukma nga paggamit sa teknolohiya, ug pagkaon og dili makapahimsog sa lawas. Samtang ang mga propesyonal alang sa pag-atiman sa kahimsog mikonsiderar sa pagkaadik nga usa ka pisikal nga sakit, ang pisikal nga aspeto kabahin lamang sa problema. Ang pagkaadik makaapekto sa hunahuna, sa lawas, ug sa espiritu, mao nga ang solusyon kinahanglang makasulbad sa tanang aspeto sa sakit.

Kini nga giya wala magpunting ngadto sa bisan unsang partikular nga pagkaadik. Bisan og ang mga tawo nanglimbasog og lainlaing mga matang sa pagkaadik, daghan ang nakakaplag og komon nga solusyon diha sa paagi nga gilatid niini nga giya. Usa kini ka buhatonon nga basahon ug pakisayran alang ni bisan kinsa nga nagtinguha nga maulian gikan sa bisan unsa nga matang sa pagkaadik. Kini nga giya mao ang unang basahon nga materyal diha sa suporta nga mga miting aron maulian gikan sa pagkaadik nga gipasiugdahan sa Ang Simbahan ni Jesukristo sa mga Santos sa Ulahing mga Adlaw.

Ang mga lalaki ug mga babaye nga nag-antos sa makadaot nga mga epekto sa lainlaing mga pagkaadik ug nakasinati og pagkaayo mitabang sa pagpalambo niini nga giya ug gidapit sa pagpakigbahin sa ilang mga kasinatian sa paggamit sa 12 ka lakang. Ang ilang panglantaw (ang “kami” niini nga giya) gigamit sa pagpasabot sa kasakit sa pagkaadik ug sa kalipay nga mamaayo ug maulian. Makakaplag ka og kahupayan ug suporta gikan niini nga mga tawo. Ang mga lider sa Simbahan ug propesyonal nga mga magtatambag mitabang usab sa pagsulat ug sa pagpalambo niini nga giya. Ang hiniusang kaalam ug kasinatian niining daghang tigsulat nagbarog isip laing saksi sa katinuod sa Pag-ula ni Jesukristo ug sa posibilidad nga maulian gikan sa pagkaadik.

Kami modapit ninyo nga moadto sa usa ka miting aron maulian. (“Kami” mga lalaki ug mga babaye nga nag-antos sa makadaot nga mga epekto sa lainlaing mga pagkaadik ug nakasinati og taas nga panahon nga pagkaulian.) Ang mga direksyon alang sa pagpangita og mga miting nga personal nga tambongan, pinaagi sa bidyo, telepono, o girekord (may pagtugot) anaa sa website sa Programa aron Maulian gikan sa Pagkaadik (AddictionRecovery.ChurchofJesusChrist.org). Ayaw tugoti ang imong mga kahadlok nga mopugong nimo sa mga panalangin sa pagtambong sa usa ka miting aron maulian. Palihog hibaloi nga kini nga mga miting mao ang mga dapit sa pagsabot, paglaom, ug suporta, diin imong madiskobrehan nga wala ka mag-inusara ug imong mahibaloan nga posible nga maulian. Nakita namo nga kini nga giya nga labing epektibo kon buhaton nato ang mga lakang uban sa usa ka esponsor ug sa atong bishop. Pipila nato mipaapil og usa ka propesyonal nga magtatambag sa atong panaw aron maulian.

Ang pagkaayo magsugod kon kita matinuoron ug moangkon nga nanglimbasog kita sa pagkaadik. Alang sa ubang mga tawo, ang pag-ila sa ilang kaugalingon isip mga adik diha sa mga miting aron maulian makatabang nila nga mahimong matinuoron ug mahinumdom kon unsa gayod ka grabe ang ilang pagkaadik. Hinuon, kinahanglang mag-amping kita nga dili kini makahatag og limitasyon sa atong paglaom o pagsalig sa Dios. Kon kita moila sa atong kaugalingon isip mga adik, tingali dili matuyo nga atong malimod ang kamatuoran nga si Jesukristo makaayo nato ug makausab sa atong pagkatawo. Sa atong pagpaningkamot aron maulian, kitang tanan kinahanglang kahibalo sa pagbalanse tali sa pagkamatinuoron mahitungod sa kagrabe sa pagkaadik samtang sa samang higayon mosalig nga si Jesukristo makaayo nato ngadto sa hingpit nga espirituhanong kahimsog.

Kon mibati ka nga naadik ug adunay gamay kaayo nga tinguha nga makalingkawas, o kon andam ka nga mopalambo sa tinguha, kami nagdapit nimo sa pag-apil namo sa pagtuon ug sa paggamit sa mga baroganan sa ebanghelyo ni Jesukristo sama sa gilatid niini nga giya. Kon sundon nimo kini nga paagi uban sa sinsero nga kasingkasing, imong makaplagan ang gahom diha kang Jesukristo aron maulian gikan sa pagkaadik.

Si Elder Robert D. Hales mipasabot: “Ang pagkaadik makapahidlaw sa kinaiyanhon nga tawo, ug dili gayod kini matagbaw. Kini walay katagbawan nga kahidlaw” (“Pagkahimong Madaginuton nga Tigsangkap sa Temporal ug sa Espirituhanong Paagi,” Liahona, Mayo 2009, 10).

Dayon iyang gihulagway ang paagi nga gipangandoy gayod nga bation sa daghan kaayo nga mga tawo nga nalaang sa pagkaadik: “Apan isip mga anak sa Dios, ang tinuod nga kinahanglan natong tinguhaon mao ang unsay mahatag lamang sa Dios ngari kanato—Iyang gugma, Iyang pagpabati sa kabililhon, Iyang pagpanalipod, Iyang pagsalig, Iyang paglaom sa umaabot, ug ang kaseguroan sa Iyang gugma, mao ang maghatag nato og mahangtorong kalipay (“Pagkahimong Madaginuton nga Tigsangkap sa Temporal ug sa Espirituhanong Paagi,” 10).

Ang gintang tali sa kon asa kita ug kon asa ang atong gipangandoy nga maanaa ingon og dili masukod, ang Programa aron Maulian gikan sa Pagkaadik ug kini nga giya nakatabang sa daghang tawo sa pagpanaw sa dalan gikan sa pagkaadik ngadto sa pagkaayo, ug kini makatabang usab nimo sa pagbuhat sa ingon.