Suporta samtang Naningkamot nga Maulian

Ang Kaimportante sa Pagpangita og Suporta

Ang suporta gikan sa uban importante aron matabangan kami nga maulian ug maayo. Kanang may kaduolan kita nga tawo sa panahon sa kahuyang kasagaran namatud-an nga importante. Ang paglimod ug ang pag-inusara maoy kasagarang mga timailhan sa dili makontrolar ug makaadik nga mga lihok. Dali ra ang pagbalik niini nga mga kinaiya kon wala ang suporta ug panglantaw sa uban. Importante alang kanamo nga makakuha og suporta sa labing dali nga panahon sa among paningkamot nga maulian.

Ang pagkonektar ngadto sa uban dili lang maghatag sa kadasig nga among gikinahanglan kondili makatabang usab kanamo sa paghinumdom nga kami takos sa gugma isip mga anak sa Dios. Samtang modangop kami sa uban alang sa suporta, mapanalanginan kami, ug kadtong mosuporta kanamo mapanalanginan usab. Samtang gamiton namo ang 12 ka lakang ug mangita og suporta gikan sa uban, tingali makabenepisyo kami gikan sa mosunod nga mga tinubdan sa suporta:

• Langitnong Amahan, Jesukristo, ug ang Espiritu Santo. Ang Langitnong Amahan, si Jesukristo, ug ang Espiritu Santo mao ang labing maayo nga mga tinubdan sa suporta. Ang kausaban mahimong posible pinaagi ni Jesukristo ug sa Iyang Pag-ula. Sa Basahon ni Mormon, si propeta Alma mipakigbahin nga si Kristo “modala diha kaniya sa ilang mga kahuyang, aron ang iyang kasingkasing mapuno sa kaluoy, sumala sa unod, aron iyang masayran sumala sa unod unsaon sa pagtabang ang iyang katawhan sumala sa ilang mga kahuyang” (Alma 7:12). Mobati kita nga gitabangan ug gialimahan kon kita mapaubsanong moduol sa atong Langitnong Amahan ug sa Iyang Anak, si Jesukristo.

  Importante nga dili mabaliwala ang tabang sa Manluluwas pinaagi sa Pag-ula. Siya nagtudlo kanato, “Ako mao ang dalan, ang kamatuoran, ug ang kinabuhi” (Juan 14:6). Ang Espiritu Santo makahatag kanato og kahupayan, kalinaw, ug espirituwal nga kalig-on aron makapadayon.

• Mga sakop sa pamilya. Ang mga sakop sa pamilya mahimong tinubdan sa suporta pinaagi sa pagtanyag og gugma ug pagdawat. Mapalambo nila ang ilang abilidad sa pagsuporta pinaagi sa paggamit sa mga baroganan sa ebanghelyo nga gitudlo diha sa Suporta nga Giya: Tabang alang sa mga Kapikas ug Pamilya Niadtong Naningkamot nga Maulian. Bisan og dili tanang sakop sa pamilya ang anaa sa emosyonal nga kahimtang sa paghatag og kahupayan, kadtong makahimo sa kasagaran mao ang labing gamhanan nga mga tinubdan sa suporta.

• Mga higala. Ang mga higala makahatag og gugma ug suporta sa higayon nga kami moistorya nila mahitungod sa among mga panglimbasog, itug-an man namo kanila o dili ang mga detalye. Kon ang mga higala adunay kaisog sa pagtug-an sa mga kinaiya nga kinahanglan namong hunongon, o kon sila modasig kanamo sa pagpangita og tabang, makapadayon kami sa among paglambo nga maulian. Samtang masinati namo ang gugma ug suporta gikan sa mga higala, makapahinumdom kini kanamo sa among bili ug kabililhon.

• Eklesyastikal nga mga lider. Ang eklesyastikal nga mga lider makahatag og mahinungdanong suporta sa proseso sa kausaban. Kini nga mga lider makatabang kanamo nga mobati sa gugma sa Manluluwas ug adunay mahinungdanong papel sa pagtabang kanamo nga makahinulsol ug mahimong limpyo sa espirituwal nga paagi gikan sa dili makontrolar ug makaadik nga mga gawi.

• Mga Esponsor. Ang esponsor mao ang tawo kinsa naulian pinaagi sa pagbuhat sa 12 ka lakang. Tungod sa ilang kasinatian, nasayod sila unsaon sa pagtabang kanamo sa pagbuhat ug paggamit niini nga mga lakang. Sa kasagaran mamatikdan nila ang kadili matinuoron ug makasabot sa ubang mga kalisod bisan kon wala kami makamatikod niini.

• Mga miting alang sa paningkamot nga maulian. Ang mga miting aron maulian usa ka luwas nga dapit diin atong makaplagan ang pagdawat, paghigugma ug pagsuporta. Niini nga mga miting mopakigbahin kita sa atong mga kasinatian ingon man usab sa atong hugot nga pagtuo ug paglaom nga maulian pinaagi sa Manluluwas nga si Jesukristo ug pinaagi sa paggamit sa 12 ka lakang ngari sa atong kinabuhi. Ang pagpakigbahin sa atong mga kasinatian makatabang kanato sa pagbuhat sa gikinahanglang mga kausaban ug sa pagkaplag og paglaom nga ang pagpaningkamot aron maulian ug ang pagkaayo posible.

• Mga propesyonal alang sa kahimsog sa pangisip ug sa medikal. Ang mga propesyonal sa kahimsog sa pangisip ug sa medikal makahatag og mga panabot ug talagsaon nga mga kahanas nga gikinahanglan aron maulian ug mamaayo gikan sa dili makontrolar ug makaadik nga mga gawi. Kon nagsagubang gihapon kita sa dili makontrolar ug makaadik nga mga lihok bisan kon miapil na kita sa Programa aron Maulian gikan sa Pagkaadik, kinahanglan nga atong ikonsiderar ang pagpangayo og propesyonal nga tabang gikan sa mga propesyonal sa kahimsog sa pangisip ug sa medikal. Kon mangita og propesyonal nga tabang, ang mga miyembro sa Simbahan kinahanglang mopili og tawo nga maayong mosuporta sa mga baroganan sa ebanghelyo.

Pagpili og mga Tawo nga Mosuporta Kanimo

Diha sa Programa sa Simbahan aron Maulian gikan sa Pagkaadik, dili ka hatagan og esponsor o suporta nga grupo. Ang paghukom kon kanus-a ug kinsa ang pangayoan og tabang usa ka personal nga desisyon. Ikonsiderar sa mainampoong paagi kadtong anaa sa imong palibot nga mibati ka nga komportable kaayo nga pangayoan og tabang, o makatabang kaayo kanimo. Kasagaran, kon mas daghang tawo ang mosuporta kanimo, mas dako ang kahigayonan nga maulian ka. Sa higayon nga imong matino kadtong gusto nimong maanaa sa imong suporta nga grupo, posibleng lisod ug makahadlok ang pagpangayo sa ilang tabang. Apan, kon buhaton nimo, matingala ka sa dakong gugma ug pagdawat nga imong bation. Kon ikaw mas masuod sa uban, mas daghan og oportunidad nga ikaw makadawat og gugma.

Seguroa nga pilion nimo ang hilabihan ka masaligan nga mga tawo aron mosuporta nimo. Ang pipila sa labing epektibong mga tawo nga mosuporta nimo mao kadtong suod nimo sa kasamtangan (mga ginikanan, kapikas, pamilya, o mga lider sa Simbahan), kadtong gusto nga ikaw magmalamposon, aktibo kaayo sa Simbahan, ug nakasabot o adunay tinguha sa pagsabot sa tukma nga matang sa hagit nga imong giatubang. Ang usa ka tawo nga nakabuntog sa iyang kaugalingong mga hagit sa kasagaran adunay mas dakong pagsabot sa mga hagit nga nasinati sa uban. Kadtong adunay mga hagit nga susama sa imong kaugalingon sa kasagaran adunay mas dakong abilidad nga makasabot sa imong panglimbasog.

Samtang imong sugdan ang proseso sa pag-usab, posible ka nga mahimong huyang sa pisikal, emosyonal, ug sa espirituwal nga paagi. Pagmatngon nga dili ka makapalambo og dili tukmang pakigrelasyon ni bisan kinsa nga nagsuporta kanimo.