Lakang 2: Motuo nga ang gahom sa Dios makapahiuli kanato ngadto sa hingpit nga espirituhanong kahimsog.

Mahinungdanong Baroganan sa Paglaom

Sa diha nga among naamgohan nga wala kami mahimo kabahin sa among pagkaadik, kadaghanan kanamo mibati nga nawagtangan og bisan unsang paglaom. Naningkamot kami sa paghunong sa daghang higayon. Pipila namo nag-ampo ngadto sa Dios sa daghang higayon. Nangayo kami og pasaylo sa among gawi ug misaad nga mag-usab. Apan sa pabalikbalik nga kapakyasan, misugod kami sa paghunahuna nga ang Dios nasagmuyo namo ug dili na motabang namo. Ang uban kanamo nga nagdako nga walay ideya bahin sa Dios nakaseguro nga nahurot na namo ang tanang kapanguhaan og tabang. Bisan asa niini, ang lakang 2 mipresentar kanamo og tubag nga among gibaliwala o wala gayod namo mahunahunai—ang pagkaplag og paglaom diha kang Jesukristo ug sa gahom sa Iyang Pag-ula.

Sa kataposan nagpaubos, nangayo kami og tabang. Human sa unsay gibati nga gamay kaayong paglaom, misugod kami sa pagtambong og mga miting aron maulian. Sa una namong pagtambong sa mga miting, napuno kami sa mga pagduhaduha ug kahadlok. Kami nahadlok, gikapoy ug tingali gani nagpanagana, apan maayo na lang kay mitambong kami.

Sa mga miting alang sa paningkamot nga maulian, ang mga tawo tinud-anay nga mihulagway kon unsa ang ilang kanhi nga mga kinabuhi, unsay nahitabo nga nakapausab nila, ug unsa ang pagpakabuhi aron maulian. Among nahibaloan nga daghan sa mga tawo nga among nakaila niini nga mga miting mibati usab kaniadto og kawalay paglaom sama sa among gibati. Apan samtang nagpadayon kami sa pagtambong, nakita namo nga daghan nila ang tinuoray nga nangatawa, nakigsulti, nagpahiyom, ug nagmadasigon mahitungod sa umaabot. Daghan ang among nakita nga nakasinati og dakong kausaban sa ilang kinabuhi, usa ka kausaban nga among gitinguha.

Sa hinay-hinay, ang mga baroganan nga ilang gipakigbahin ug gisunod hinay-hinay nga miepekto kanamo. Samtang nagpadayon kami sa pagbalik, misugod kami sa pagbati og usa ka butang nga wala na namo mabati sa mga katuigan—paglaom. Kon adunay paglaom alang sa uban nga anaa na sa ngilit sa kalaglagan, tingali adunay paglaom usab alang kanamo. Mapasalamaton kami nga nakadungog nga kon modangop kami ni Jesukristo, “walay gawi, walay pagkaadik, walay pagsupil, walay kalapasan, walay sala nga dili maapil sa saad sa hingpit nga kapasayloan” (Boyd K. Packer, “The Brilliant Morning of Forgiveness,” Ensign, Nov. 1995, 19).

Niini nga kahimtang sa hugot nga pagtuo ug pagpamatuod, nakakaplag kami og paglaom nga misugod sa pagpukaw kanamo ngadto sa kaluoy ug gahom sa Dios. Misugod kami sa pagtuo nga Siya makapalingkawas kanamo gikan sa pagkaulipon sa pagkaadik. Among gisunod ang mga ehemplo sa among mga higala nga naayo na. Misugod kami sa pagbuhat sa mga lakang, sa pagpangayo og suporta sa uban—lakip na sa among mga esponsor—ug sa pagtambong sa mga miting aron maulian. Samtang kami nag-ampo, namalandong, ug migamit sa mga kasulatan, sa kadugayan misugod kami sa pagkaaktibo sa Simbahan. Ang among kaugalingong mga milagro nahitabo og sugod, ug among nakita ang among kaugalingon nga gipanalanginan sa grasya ni Jesukristo aron matabangan kami nga magpadayon sa among paghunong usa lang ka adlaw sa matag higayon.

Samtang among gibuhat ang lakang 2, nahimo kaming andam nga ang pagsalig sa among kaugalingon ug sa among pagkaadik pulihan og hugot nga pagtuo diha sa gugma ug gahom ni Jesukristo. Among gibuhat kini nga lakang sa among mga hunahuna ug mga kasingkasing inubanan sa suporta uban, ug among nakat-onan nga ang pundasyon aron maulian gikan sa pagkaadik kinahanglan nga espirituwal. Dayon, samtang nagpadayon kami sa unahan ug nagbuhat sa kada usa sa mga lakang nga girekomendar niini nga giya, ang espirituwal nga pamaagi aron maulian balikbalik namong napamatud-an.

Kini nga programa espirituwal, ug usa kini ka programa sa buhat. Alang namo ug sa daghan pa, ang buhat aron maulian takos sa matag paningkamot. Sa among paggamit niini nga mga baroganan ug sa pagtugot niini nga moepekto sa among kinabuhi, nahibalik ang among kalunsay sa hunahuna ug hinpit nga espirituwal nga kahimsog. Nakakaplag kami og tinuoray nga relasyon sa among kaugalingon, sa uban, ug sa Manluluwas nga si Jesukristo.

Alang sa pipila namo, ang milagro sa pagkaayo daw paspas kaayo; alang sa uban, ang pagkaayo anam-anam. Bisan asa niining duha ka paagi, ang importante nga butang mao nga kami nagpadayon sa pagpraktis sa pagtuo ug pagsalig nga ang Dios ang mohimo alang namo nianang dili namo mahimo sa among kaugalingon. Wala madugay sa kataposan nakaingon kami nga pinaagi sa “pagkamakanunayon diha kang Kristo,” kami naluwas gikan sa pagkaadik ug nakatagamtam og “hingpit nga kahayag sa paglaom” (2 Nephi 31:20).

Ang atong Langitnong Amahan ug ang Iyang Aank, si Jesukristo, nag-uban kanamo sa matag lakang sa dalan. Sila mitabang sa pag-amuma ug sa pagpalapad sa among paglaom diha kang Kristo. Si Presidente M. Russell Ballard mitudlo:

“Alang kaninyo nga nahimong bihag sa bisan unsang matang sa pagkaadik, adunay paglaom tungod kay ang Dios nahigugma sa tanan Niya nga mga anak ug tungod kay ang Pag-ula ni Ginoong Jesukristo naghimo nga posible sa tanang butang.

“Akong nakita ang talagsaong panalangin sa pagkaayo nga maghimo sa usa ka tawo nga gawasnon gikan sa mga kadena sa pagkaadik. Ang Ginoo mao ang atong Tigbalantay, ug walay makulang kanato samtang kita mosalig sa gahom sa [Iyang] Pag-ula. Ako nasayod nga ang Ginoo makahimo ug mohimo nga gawasnon sa nangaadik gikan sa pagkaulipon, kay si Apostol Pablo mipahayag, ‘Mahimo ko ang tanang butang pinaagi kang Kristo nga nagapalig-on kanako’ (Mga Taga-Filipos 4:13)” (“O Kanang Maliputon nga Laraw sa Daotan,” Liahona, Nob. 2010, 110).

Sa higayon nga kami mobalik sa bisyo, nakita namo ang kabililhon nga modangop ngadto sa Dios ug pagpakigsulti sa among mga esponsor. Tingali matental kami nga mawad-an sa tanang paglaom. Apan ang pagbalik sa bisyo dili makaguba sa kalamboan nga among nahimo, ug kinahanglang dili kini makaguba sa among paglaom. Ang pagbalik sa bisyo usa ka lig-ong pahinumdom sa atong panginahanglan nga moadto sa mga miting aron maulian, mangayo og suporta sa mga esponsor ug sa uban, motahan ngadto sa Dios, ug mobuhat niini nga mga lakang. Samtang nagpadayon kami sa unahan, gibati namo ang gahom ni Jesukristo sa among kinabuhi. Mas nakahimo kami sa paghunong, ug ang among paglaom milambo.

Si Elder David A. Bednar nagtudlo: “Tingali sayop kitang maghunahuna nga ang maong mga panalangin ug mga gasa gitagana para sa ubang mga tawo nga makitang mas matarong ug makitang nagserbisyo sa mga pagtawag sa Simbahan. Ako mopamatuod nga ang malumong mga kaluoy sa Ginoo maanaa kanatong tanan ug nga ang Manunubos sa Israel madasigon nga mohatag sa maong mga gasa kanato” (“The Tender Mercies of the Lord,” Liahona, May 2005, 101). Si Jesukristo mohatag namo og daghang malumo nga mga kaluoy sa among panaw paingon sa pagkaayo, usa sa labing importante nga maoy gilaoman nga ang gahom sa Dios makapahiuli namo ngadto sa espirituwal nga kahimsog.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Mopalambo og tukma nga pagsabot bahin sa kinaiya sa Dios

Ang among kaulaw kasagaran maoy makababag sa pagsabot sa kinaiya sa ug gugma sa Dios alang namo. Nabutaan sa among kasakit ug mga pagkaadik, kanunay kami nga motan-aw Kaniya isip usa ka tawo nga madumtanon, nasagmuyo, o nasuko namo. Ang katuyoan niini nga lakang nga buhaton mao ang paghiklin sa sayop nga mga ideya mahitungod sa Dios ug pagpalambo og mas maayong pagsabot bahin sa Iyang gugma, kaluoy, ug kaanam ug tinguha sa pagpanalangin namo.

Una, importante nga masabtan nga ang Dios anaa bisan kon dili nato mabati ang iyang presensya. Ang pagkaila sa Dios nagkinahanglan og kakugi ug pailob. Lisod kini kon naanad kita og dinalian nga katagbawan, apan sa kadugayan makita nato og sugod ug masinati ang Iyang balaanong mga kinaiya. Mas makaila kita sa Dios.

Makahangyo kita sa Langitnong Amahan sa pagtabang kanato nga mas makasabot sa Iyang kinaiya. Mahimo natong tan-awon ang tabang sa Dios diha sa atong kinabuhi ug kon unsa ka daghan ang Iyang nahimo alang nato. Mahimo kita nga magtuon sa mga kasulatan mahitungod sa kaluoy ug grasya sa Manluluwas ug dayon hisgotan kini nga mga kasulatan uban sa atong mga esponsor ug sa uban nga nagsuporta nato.

Samtang magsugod kita sa pagbaton og mas maayo nga panabot bahin sa gugma ug kaluoy sa Dios, magsugod kita sa pagsinati og mas dako nga pagsalig ug paglaom sa gahom sa Dios sa pagluwas kanato. Si Presidente J. Reuben Clark Jr. mipamatuod bahin sa kaluoy sa Langitnong Amahan pinaagi sa pagpahayag: “Ako nagtuo nga ang atong Langitnong Amahan gusto nga moluwas sa matag usa sa iyang mga anak. … Ako nagtuo nga sa iyang pagkamakiangayon ug pagkamanggiluy-on siya mohatag kanato sa kinadak-ang gasa alang sa atong mga binuhatan, mohatag sa tanan nga iyang ikahatag, ug sa sukwahi, ako nagtuo nga siya mopahamtang ngari kanato sa pinakagaan nga silot nga mahimo niya nga ipahamtang” (sa Conference Report, Oct. 1953, 84).

Mag-ampo ug magtuon sa mga kasulatan

Si Presidente M. Russell Ballard miingon: “Kon adunay tawo nga naadik nga adunay tinguha sa pagbuntog, kana adunay paagi alang sa espirituhanong kagawasan—usa ka paagi nga makalingkawas sa pagkaulipon—usa ka paagi nga napamatud-an na. Kini magsugod sa pag-ampo—sinsero, mainiton ug makanunayon nga komunikasyon ngadto sa Tiglalang sa atong mga espiritu ug mga lawas, ang atong Langitnong Amahan” (“O Kanang Maliputon nga Laraw sa Daotan,” Liahona, Nob. 2010, 110).

Samtang atong isalikway ang atong garbo ug maningkamot sa paghimo sa atong labing maayo matag adlaw, kita magtinguha sa pag-ampo alang sa giya ug direksiyon gikan sa Langitnong Amahan. Pipila namo wala pa gayod makaampo o makapamalandong sa mga kasulatan. Pipila namo natental nga mohunong sa pag-ampo o sa pagtuon. Sayop ang among hunahuna nga kini nga mga paningkamot walay epekto tungod kay wala kami mobati nga duol sa Dios o tungod kay nakigbisog gihapon kami sa pagkaadik.

Among nakita nga ang usa sa mga yawe sa kalamposan mao ang pagpadayon sa paggamit niining espirituwal nga mga himan. Ang pag-ampo og kusog, pag-ampo sa yano nga pagpasalamat sa tibuok adlaw, ug pag-ampo alang sa uban mga bag-ong gamhanan nga mga tulumanon alang sa kadaghanan namo. Usa sa mga paagi sa pagpalambo sa gahom sa pag-ampo mao ang mas matinuoron nga pagpahayag sa among mga panglimbasog ngadto sa Dios. Gani sa dihang among gipakigbahin sa Langitnong Amahan ang among kakulang sa kaandam nga mausab, ang among pagkamatinguhaon nalig-on. Nasinati usab namo ang mas kanunay, hilom, ginagmay nga pagbati gikan sa Espiritu Santo. Misugod kami sa pagpangutana sa Dios kon unsa ang ginagmay nga mga lakang nga among mahimo matag adlaw, imbes mangutana lang Niya nga tangtangon dayon ang among mga hagit og mga pagkaadik.

Sa kataposan, ang tinguha sa pagpakigsulti sa Dios midala kanamo ngadto sa pagtuon sa pulong sa moderno ug karaang mga propeta. Ang mainampoong pagtuon sa mga kasulatan, pagpangita og mga tubag sa among mga pangutana, ug pagrekord sa mga gibati gikan sa Epiritu makatabang sa pagtuo nga ang Dios makatabang ug motabang kanamo.

Usa ka maayong dapit sa pagsugod sa pagtuon sa pulong sa Dios mao ang mga kasulatan ug mga kinutlo nga anaa sa kataposan sa matag kapitulo niini nga giya. Ang matag kasulatan ug kinutlo gipili nga naghunahuna bahin sa pagkaayo, ug ang matag pangutana gipangutana uban sa paglaom nga makatabang kini kanamo sa paggamit sa mga kasulatan ug mga kinutlo ngadto sa among kinabuhi. Among nakita nga ang paggahin og pipila ka minuto matag adlaw sa pagtinguha kon unsay gusto sa Dios nga isulti kanamo nakahatag og dagkong mga ganti. Kami mohatag sa among pagsaksi niini nga kamatuoran: “Oo, atong makita nga si bisan kinsa nga magtinguha makadawat sa pulong sa Dios, nga buhi ug gamhanan, nga mobuak sa tanang kaigmat ug mga laang ug mga pagpanghaylo sa yawa,” (Helaman 3:29).

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian gikan sa pagkaadik. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Motuo sa Dios

“Tuohi ang Dios; tuohi nga siya mao gayod, ug nga siya ang milalang sa tanang butang, lakip sa langit ug sa yuta; tuohi nga anaa kaniya ang tanang kaalam, ug ang tanang gahom, lakip sa langit ug sa yuta; tuohi nga dili masabtan sa tawo ang tanang butang nga masabtan sa Ginoo.” (Mosiah 4:9).

• Daghang saksi sa langit ug sa yuta nagpamatuod sa pagkaanaa sa Dios. Unsa nga ebidensya sa Dios ug sa Iyang gugma ang akong nasinati?

Dugangan ang hugot nga pagtuo diha ni Jesukristo

Si Presidente Russell M. Nelson mitudlo: “Sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi” (“Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101).

Daghan kanamo misulay nga maulian gikan sa among pagkaadik pinaagi lamang sa kaugalingong paningkamot o sa among pagsalig sa usa ka higala o therapist. Sa madugay man o sa madali, among nakita nga ang pagsalig sa among kaugalingon o sa uban wala makahatag kanamo og hingpit nga katakos sa pagbuntog sa among pagkaadik. Ang hugot nga pagtuo kang Jesukristo ug sa Iyang abilidad sa pag-ayo kanamo mao ang pundasyon sa among pagkaayo.

• Unsa ang akong gibati karon mahitungod sa pagdangop ngadto sa Manluluwas sa akong mga paningkamot aron maulian?

• Unsay nakatabang nako aron makabaton og hugot nga pagtuo diha kang Jesukristo?

• Unsa ang gisugyot sa akong esponsor, mga lider sa Simbahan, ug sa uban nga akong buhaton aron matabangan nga molambo ang akong pagtuo?

Ang gahom ug kalig-on sa paglaom

Kon kami adunay paglaom sa among mga kasingkaisng ug mga hunahuna, kami makabaton og hayag nga panglantaw sa among umaabot. Ang paglaom nagdala og makanunayong kalig-on imbes temporaryo lang nga kadasig. Ang paglaom mahimo usab nga usa ka tinubdan sa kalinaw, kakalma, ug emosyonal nga kalig-on samtang naglambo kami ngadto sa pagkaayo gikan sa pagkaadik .

Kalabot niini nga baroganan, si Presidente Russell M. Nelson namahayag, “Ang paglaom mas gamhanan kaysa pagpangandoy lang. Ang paglaom, nga gipalig-on sa hugot nga pagtuo ug gugma nga putli, makamugna og pwersa nga sama ka lig-on sa puthaw. Ang paglaom mahimong usa ka angkla ngadto sa kalag. … Kon kita mohupot sa angkla sa paglaom, mahimo kining atong panalipod sa kahangtoran” (“A More Excellent Hope” [Brigham Young University devotional, Jan. 8, 1995], 3, speeches.byu.edu).

• Kanus-a nako gibati ang gahom ug pagsalig tungod sa paglaom diha kang Kristo?

• Unsa nga inadlaw nga espirituwal nga mga tulumanon ug mga buluhaton ang akong gihimo atol niana nga panahon?

• Sa unsang paagi nga ang pagkamalaomon nakaapekto sa akong hunahuna, buot, ug diwa? Sa unsang paagi nga nakaapekto kini sa akong umaabot nga mga tumong ug mga plano?

• Sa unsang paagi nga nakaapekto kini sa akong mga relasyon ug pakighinabi sa mga tawo nga nahigugma ug nagpakabana nako?

Lista sa pasalamat

Usa ka paagi aron makita nga anaa ang Dios sa atong mga kinabuhi mao ang kanunay nga pagpamalandong ug pagsulat mahitungod sa atong mga panalangin. Mas masabtan nato ang gugma sa Langitnong Amahan alang nato pinaagi sa pagpangita og ebidensya sa Iyang gugma ug gahom diha sa atong kinabuhi.

• Unsa ang akong pasalamatan?

• Unsa ang maayong mga butang nga nahitabo sa akong kinabuhi?

• Giunsa nako aron makita ang tabang sa Dios diha sa akong kinabuhi?

Mohupot diha sa paglaom bisan pa man sa pagbalik sa bisyo

Si Elder Dale G. Renlund mitudlo: “‘Ang santos usa ka makasasala kinsa nagpadayon sa pagpaningkamot.’ … Mas naghunahuna ang Dios kon si kinsa kita ug kinsa kita sa umaabot, kay sa unsa kita kaniadto. Gusto Niya nga kita magpadayon sa pagpaningkamot” (“Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 56). Kitang tanang nakasinati og mga pagbati nga nawad-an og paglaom sa matag karon ug unya samtang naningkamot kita aron maulian. Tinuod gayod kini kon o sa higayon nga kita mobalik sa bisyo. Apan ang atong paglaom ug pagkaayo mas nakahupot diha sa paglambo kaysa sa pagkahingpit. Ang pagbalik sa bisyo dili mopapas sa atong nag-una nga mga paningkamot o paninguha sa pagdangop ngadto ni Jesukristo. Kita mahimong makat-on sa pagpadayon sa atong paglaom diha kang Kristo bisan kon kita mibalik sa bisyo.

• Sa unsang mga paagi nga ako naningkamot nga mausab, nahimong mas maayo, ug naglambo?

• Unsa ang pipila sa mga kadaogan o mga kalamposan nga akong nabatonan sa akong kinabuhi bag-ohay lang?

• Unsa ang gisulti sa akong esponsor, mga lider sa Simbahan, mga sakop sa pamilya, ug mga higala mahitungod sa akong mga paningkamot ug kalamboan?

Siya makaluwas kanato gikan sa pagkaulipon

“Apan kon modangop kamo ngadto sa Ginoo uban sa hingpit nga katuyoan sa kasingkasing, ug mosalig kaniya, ug moalagad kaniya uban sa tanang kakugi sa hunahuna, kon buhaton ninyo kini, siya sumala sa iyang kabubut-on ug kahimuot, moluwas kaninyo gikan sa pagkaulipon.” (Mosiah 7:33).

• Unsa ang nakatabang nako nga makabaton og dugang nga pagtuo diha sa saad nga si Jesukristo moluwas nako?

• Sa unsang paagi nga ako mas makadangop ngadto ni Jesukristo, makasalig Kaniya, ug makaserbisyo Kaniya sa tanang kakugi sa hunahuna? Unsa ang piho nga mga butang nga mahimo nako nga palamboon?

• Unsa ang ipasabot niini ngari nako nga mag-agad kang Jesukristo nga luwason ko “sumala sa iyang kabubut-on ug kahimuot?”