Lakang 12: Kay nakaangkon og espirituwal nga pagkahigmata tungod sa Pag-ula ni Jesukristo, isip resulta sa paghimo niining mga lakang, ipakigbahin nato kini nga mensahe ngadto sa uban ug gamiton kini nga mga baroganan sa tanan nga atong buhaton.

Mahinungdanon nga Baroganan: Pagserbisyo

Samtang nagpadulong kita sa lakang 12, kita moila nga dili kini ang kataposan sa atong panaw. Isip resulta sa pagbuhat niini nga mga lakang, natagamtaman namo ang kinabuhi nga naulian pinaagi sa grasya ug kaluoy sa Dios. Kami mopamatuod nga ang pagbuhat sa mga lakang sa usa ka higayon dili gayod igo. Among nahibaloan nga lisod kaayo ang pagpadayon sa pagbuhat niini nga mga lakang, sa pagpraktis niini nga mga baroganan sa tanang aspeto sa kinabuhi, ug sa pagdala sa mensahe sa paglaom ngadto sa uban.

Aduna kami mensahe sa paglaom alang sa uban nga nanglimbasog sa pagkaadik ug alang sa tanang tawo nga nag-atubang sa mga hagit sa pagkamortal: Ang Dios usa ka Dios sa milagro, ingon nga Siya mao gayod sa kanunay (tan-awa sa Mormon 9:11, 16–19). Ang among kinabuhi nagmatuod niana. Matag usa namo gibag-o pinaagi sa Pag-ula ni Jesukristo. Kami mahimong mopakigbahin niini nga mensahe sa labing maayo pinaagi sa pagserbisyo sa uban. Ang pagpakigbahin sa among pagpamatuod mahitungod sa Iyang kaluoy ug sa Iyang grasya mao ang usa sa labing importante nga mga serbisyo nga among mahatag. Si Presidente Spencer W. Kimball mipahinumdom, “Usa sa labing importante nga mga butang nga atong mabuhat mao ang pagpahayag sa atong mga pagpamatuod pinaagi sa pagserbisyo, diin kini, sa laktud, makamugna og espirituhanon nga pagtubo, mas bug-at nga panaad, ug usa ka mas dako nga kapasidad sa pagtuman sa mga kasugoan” (Mga Pagtulun-an sa mga Presidente sa Simbahan: Spencer W. Kimball [2006], 110).

Ang pagpas-an sa mga alantoson sa usag usa pinaagi sa mga buhat sa pagkamabination ug dili hinakog nga pagserbisyo usa ka bahin sa among bag-ong kinabuhi isip sumusunod ni Kristo (tan-awa sa Mosiah 18:8). Ang tinguha sa pagtabang sa uban usa ka natural nga resulta sa espirituwal nga pagkahigmata. Sama sa mga anak nga lalaki ni Mosiah nga nagtinguha sa pagpakigbahin sa ebanghelyo ngadto sa mga Lamanita human sa ilang kaugalingong pagkakabig, kami usab nagtinguha sa pagpakigbahin sa paglaom ug pagkaayo nga among nasinati pinaagi sa Pag-ula ni Kristo (tan-awa sa Mosiah 28:1–4). Nagtinguha kami sa pagpanalangin, pagtabang, ug pagbayaw niadtong anaa sa among palibot. Among maamgohan ang kamatuoran sa gitudlo ni Hari Benjamin sa dihang miingon siya, “kon kamo anaa sa pag-alagad sa inyong isig ka tawo kamo anaa lamang sa pag-alagad sa inyong Dios” (Mosiah 2:17).

Ang usa ka natural nga paagi sa pagserbisyo mao ang pagkahimong usa ka esponsor o tigtudlo sa uban nga bag-o pa sa proseso sa pagpaningkamot aron maulian. (Palihog rebyoha ang “Pagpili og usa ka Esponsor” nga dokumento sa pagkasayod og dugang pa.) Among pahibaloon ang ubang mga partisipante sa mga grupo aron maulian nga among gitambongan o ang among lokal nga mga lider nga gusto kami nga motabang isip usa ka esponsor o tigtudlo. Kon mahibaloan namo nga adunay usa ka tawo nga nanglimbasog sa pagkaadik, among ipakigbahin ang impormasyon mahitungod sa Programa aron Maulian gikan sa Pagkaadik. Sultihan namo sila mahitungod sa paglaom alang sa pagkaayo pinaagi sa Manluluwas nga si Jesukristo, ug dapiton namo sila sa pagtambong sa miting uban namo.

Agi og dugang sa pagtabang niadtong nanglimbasog sa pagkaadik, kami moserbisyo usab sa mga sakop sa ilang pamilya ug mga minahal. Kasagaran ang mga tawo magkahiusa sa pagtabang sa tawo nga nanglimbasog sa pagkaadik ug mosalikway sa pag-atiman sa ilang mga minahal. Kami mahimong magmatuod ug moila sa mga kalisdanan nga ilang giatubang. Kami mahimong mopakigbahin sa paglaom nga sila makadangop ngadto sa Manluluwas ug makakaplag og kalinaw ug pagkaayo, bisan pa man kon ang ilang mga minahal mopili o dili mopili nga maulian. Kami mahimong mopakigbahin sa Suporta nga Giya: Tabang alang sa mga Kapikas ug sa Pamilya sa mga Naningkamot nga Maulian ug modapit nila sa pagtambong sa grupo nga miting alang sa kapikas ug pamilya.

Sa among pagserbisyo sa uban pinaagi sa pagsuporta nila aron maulian, kami kinahanglan nga mag-amping nga dili motugot sa uban nga masobrahan sa pagsalig kanamo. Ang among responsibilidad mao ang pag-awhag nila nga modangop ngadto sa Langitnong Amahan ug sa Manluluwas alang sa giya ug gahom. Agi og dugang, kami kinahanglang moawhag nila sa pagpangayo og suporta gikan sa uban. Daghang panalangin ang moabot gikan sa Ginoo pinaagi sa mga lider sa Simbahan, mga esponsor, mga sakop sa pamilya, mga higala, ug uban pa. Kami mahimong mopakigbahin sa “Suporta samtang Naningkamot nga Maulian” nga dokumento ngadto nila, nga makita sa apendiks niini nga giya.

Sa among pagpaningkamot sa pagtabang sa uban, tingali dili pa sila andam nga mohimo niini nga mga lakang. Sa among pagpakigbahin sa mensahe aron maulian ug sa paglaom pinaagi sa Manuluwas, kami kinahanglang mapailobon ug mapaubsanon. Walay luna sa among bag-ong kinabuhi ang garbo o bisan unsang pagbati sa kahawod. Makatabang kini nga hinumdoman ang among kaugalaingong pagkaulipon ug kon giunsa ni Jesukristo pagtubos kanamo pinaagi sa Iyang kaluoy ug grasya (tan-awa sa Mosiah 29:20).

Sa among kadasig sa pagtabang sa uban, maningkamot kami sa pagbalanse tali sa pagpakigbahin sa mensahe ug sa pagpadayon sa paggamit niini nga mga lakang sa among kaugalingong kinabuhi. Kinahanglan nga ang among unang tutokan mao ang pagpadayon sa paggamit niining mga baroganan aron maulian ngari sa among kaugalingon. Ang among mga paningkamot sa pagpakigbahin niini nga mga ideya ngadto sa uban mahimong sama lamang ka epektibo sa pagkaayo nga among gipadayon.

Kon kami andam, makakaplag kami og daghang oportunidad sa pagpakigbahin sa espirituwal nga mga baroganan nga among nakat-onan niini nga programa. Sa among pagpanalangin sa kinabuhi sa uban, ang among kaugalingong kinabuhi napanalanginan. Among nasinati ang baroganan nga gitudlo ni Presidente Ezra Taft Benson: “Ang mga lalaki ug mga babaye kinsa mitugyan sa ilang kinabuhi ngadto sa Dios makakaplag nga siya makahimo og mas daghan pa sa ilang kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, makapalig-on sa ilang mga unod, makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu[bo] og kalinaw. Bisan kinsa ang mawagtangan sa iyang kinabuhi diha sa pagserbisyo sa Dios magapatunhay og kinabuhing dayon” (Mga Pagtulun-an sa mga Presidente sa Simbahan: Ezra Taft Benson [2014], 50).

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Pagserbisyo sa uban

Ang tinguha sa pagserbisyo usa ka natural nga resulta sa among proseso sa pagkaayo pinaagi sa Ginoo. Pinaagi sa among pagkaayo, nakasinati kami og dakong kausaban sa kasingkasing ngari sa among kaugalingon ug ngadto sa uban (tan-awa sa Alma 5:14). Si Presidente Russell M. Nelson mitudlo: “[Kita] tinuoray nga nagtinguhang mosunod sa una ug ikaduhang dako nga mga sugo. Kon higugmaon nato ang Dios uban sa tibuok natong kasingkasing, Iyang ipaling ang atong mga kasingkasing ngadto sa kaayohan sa uban diha sa matahom, mahiyason nga paagi” (“Ang Dako ug Ikaduha nga Sugo,” Liahona, Nob. 2019, 97).

Hinuon, ang kausaban dili sayon kanunay. Bisan og gustohon man namo, dili kami makahimo sa pagserbisyo sa tanan nga nanginahanglan. Padayon gihapon kami nga manginahanglan og giya ug gahom gikan sa Ginoo sa pagserbisyo sa uban. Mahimo kami nga mag-ampo alang sa tabang nga makamatikod ug makaila og mga paagi nga gusto Niya nga kami moserbisyo. Mahimo kami nga mangutana sa among palibot mahitungod sa mga oportunidad ug mga panginahanglan. Tingali masurprisa kami kon unsa kadaghan sa mga oportunidad nga anaa na alang namo. Ang pagserbisyo sa uban mahimong ingon ka yano sa usa ka pahiyom, o mas malangkobon kini sama sa dakong proyekto. Kinahanglan nga maalamon kami sa paghukom sa among pagserbisyo aron malikayan nga molapas na kami sa among kalig-on ug kapasidad.

Usa sa labing maayong mga paagi nga kami makaserbisyo mao ang pagpakigbahin sa among mga istorya sa pagpaningkamot aron maulian. Mahimo kami nga mopadayon sa pagtambong sa mga miting aron maulian ug mopamatuod bahin sa grasya ug sa makaayo nga gahom ni Jesukristo. Sa dihang bag-o lang kami nga miapil, nakadawat kami og paglaom gikan niadtong nagbuhat sa mga lakang ug nakakaplag og pagkaayo nga nag-una namo. Kami karon adunay oportunidad nga mopakigbahin sa mensahe sa pagkaayo pinaagi sa pagsulti sa among mga istorya. Mopakigbahin usab kami sa among pagpamatuod mahitungod sa gahom sa Manluluwas kon anaa kami sa simbahan ug kauban ang among pamilya ug mga higala.

Moapil sa buhat sa templo ug family history

Usa ka makahuloganon ug gamhanang paagi nga kami makaserbisyo mao ang pinaagi sa buhat sa templo ug family history. Kini nga pagserbisyo makapanalangin dili lang niadtong namatay na, apan makapanalangin usab kini kanamo. Si Presidente Russell M. Nelson mipahinumdom namo: “Bisan kon ang buhat sa templo ug sa family history adunay gahom sa pagpanalangin niadtong anaa sa kalibotan sa espiritu, kini adunay sama nga gahom sa pagpanalangin sa mga buhi. Kini adunay makapalunsay nga impluwensya niadtong nagbuhat niini” (“Mga Kaliwatan Nasumpay sa Gugma,” Liahona, Mayo 2010, 93). Alang sa kadaghanan namo, ang buhat sa templo ug family history usa ka importante nga bahin sa among pagkaayo.

Pipila namo tingali wala mobati nga andam na nga moserbisyo sa templo. Tingali wala kami mobati nga nadasig o wala gani masayod kon asa magsugod sa buhat sa family history. Apan mahimo kami nga modesisyon sa pagsugod. Mahimo kami nga makig-istorya sa among mga bishop o mga presidente sa branch mahitungod sa among tinguha sa pagserbisyo. Ang among tinguha sa pagbuhat sa kabubut-on sa Ginoo ug sa pagpadayon sa among pagkaayo mao ang makapadasig namo. Tingali nagkinahanglan kami nga maghimo og pipila ka kausaban sa among kinabuhi aron makasulod sa templo. Tingali wala gani kami mahibalo kon unsaon paghimo sa buhat sa family history, apan makapangayo kami og tabang. Ang mga presidente sa Relief Society ug sa korum sa mga elder makatabang namo kon asa magsugod. Adunay online nga mga kapanguhaan usab nga makatabang namo diha sa FamilySearch.org ug ChurchofJesusChrist.org.

Ang buhat sa templo ug family history maghatag og gahom ug kalig-on alang sa among pagkaayo. “Makaplagan ninyo dili lamang ang panalipod gikan sa tintasyon ug mga kasakit niining kalibotana, apan makaplagan sab ninyo ang personal nga gahom, gahom sa pag-usab, gahom sa paghinulsol, gahom sa pagkat-on, gahom sa pagkahimong balaan, ug gahom nga mobati ang inyong mga kasingkasing sa mga sakop sa inyong pamilya sa pagtudlo sa usag usa ug pag-ayo sa nagkinahanglan og pagkaayo.” (Dale G. Renlund, “Family History ug mga Panalangin sa Templo,” Liahona, Peb. 2017, 39). Ang mga baroganan niini nga giya mogiya namo sa pagsunod sa Manluluwas ug sa pagtagamtam sa tanang panalangin nga anaa Kaniya alang kanamo.

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Pagkakabig ug pagkaayo

“Ang tinuod nga pagkakabig labaw pa kaysa pagbaton lang og kahibalo sa mga baroganan sa ebanghelyo ug nagpasabot gani og labaw pa kay sa pagbaton og pagpamatuod niadtong mga baroganan. … Ang tinuod nga pagkakabig nagpasabot nga kita naglihok sa unsay atong gituhoan ug nagtugot niini sa pagmugna og ‘dakong kausaban kanamo, o sa among mga kasingkasing,’ [Mosiah 5:2]. … [Ang pagkakabig] nagkinahanglan og panahon, paningkamot, ug buhat” (Bonnie L. Oscarson, “Magpakabig Kamo,” Liahona, Nob. 2013, 76–77).

Samtang giusab sa Ginoo ang among mga kasingkasing pinaagi sa pagkakabig ug pagkaayo, nahimo kami nga mga tinubdan sa kalig-on ngadto sa uban nga nagsugod pa lang niini nga dalan. Ang Manluluwas misulti kang Pedro, “Sa mahibalik na ikaw kanako, lig-ona ang imong mga igsoon” (Lucas 22:32).

• Sa unsang paagi nga ang paghulagway ni Sister Oscarson bahin sa pagkakabig magamit sa akong kasinatian sa pagpaningkamot aron maulian?

• Unsa ang akong gibati mahitungod sa paglig-on sa uban samtang sila nagpaayo gikan sa makaadik nga mga gawi?

Dako nga pag-uswag gikan sa ginagmay nga mga lakang

“Busa, ayaw pagluya diha sa maayo nga buhat, kay kamo nagpahimutang sa tukoranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33).

• Unsa ang akong bation kon maghunahuna ko bahin sa pagsunod niining mga baroganan sa tanang aspeto sa akong kinabuhi?

• Sa unsang paagi nga makatabang kini kanako nga makaamgo nga ang dagkong mga buhat himoon pinaagi sa ginagmay nga mga lakang?

Mopakigbahin sa among mga pagpamatuod ug mohupay sa uban

“Kini mao ang akong himaya, nga unta mahimo ako nga instrumento sa mga kamot sa Dios aron sa pagdala sa pipila ka kalag ngadto sa paghinulsol; ug mao kini ang akong kamaya.

“Ug tan-awa, kon makita nako ang kadaghanan sa akong kaigsoonan nga matinud-anong naghinulsol, ug moduol sa Ginoo nga ilang Dios, niana ang akong kalag mapuno sa kamaya; dayon mahinumdom ako unsa ang nahimo sa Ginoo alang kanako, oo, gani nga siya mipatalinghog sa akong pag-ampo; oo, niana ako mahinumdom sa iyang maluluy-on nga kamot nga iyang gitunol kanako” (Alma 29:9–10).

Among nakat-onan nga importante diha sa pagpaningkamot aron maulian nga mahimong andam nga mopakigbahin sa among mga pagpamatuod niini nga mga baroganan.

• Sa unsang paagi nga ang pagpakigbahin sa akong kasinatian makatabang nako nga magpabiling lig-on sa akong pagkaayo?

“[Kay kamo] andam sa pagbangotan uban niadtong nagbangotan; oo, ug sa paghupay niadtong nanginahanglan og kahupayan, ug mobarog isip mga saksi sa Dios sa tanang panahon ug sa tanang butang, ug sa tanang dapit diin kamo nahimutang, bisan hangtod sa kamatayon, aron matubos kamo sa Dios, ug maihap uban niadtong maapil sa unang pagkabanhaw, nga makabaton kamo og kinabuhing dayon—

“Karon sultihan ko kamo, nga kon mao man kini ang tinguha sa inyong mga kasingkasing, unsa may inyong isupak mahitungod sa pagpabunyag sa ngalan sa Ginoo, isip pagpamatuod ngadto kaniya nga kamo misulod sa pakigsaad uban kaniya, nga kamo mag-alagad kaniya ug motuman sa iyang mga sugo, nga mobu-bo siya sa kabuhong sa iyang Espiritu diha kaninyo?” (Mosiah 18:9–10).

Ang imong kasinatian sa pagkaadik makatabang kanimo nga mobati alang niadtong nanglimbasog sa pagkaadik; ang imong kasinatian sa pagpaningkamto nga maulian makatabang kanimo sa paghupay kanila.

• Sa unsang paagi nga ang akong tinguha sa pagbarog isip usa ka saksi sa Dios milambo sukad nga misunod ko sa mga lakang aron maulian?

Moserbisyo bisan pa sa pagkadili hingpit

“Gawas lang sa Iyang bugtong hingpit nga Anak, ang dili hingpit nga mga tawo mao ang gikatambayayong sa Dios” (Jeffrey R. Holland, “Nagatuo Ako,” Liahona, Mayo 2013, 94).

“Walay usa nato adunay perpekto nga kinabuhi ni perpekto nga mga pamilya; ako wala usab. Kon kita magtinguha sa pag-empatiya sa uban kinsa nakasinati usab og mga hagit ug mga pagkadili perpekto, kini makatabang nila nga mobati nga sila wala mag-inusara sa ilang mga pakigbisog. Ang tanan kinahanglan nga mobati nga sila gayod nahisakop ug nga gikinahanglan diha sa lawas ni Kristo” (J. Anette Dennis, “Kay Sayon ang Iyang Yugo ug Gaan ang Iyang Palas-anon,” Liahona, Nob. 2022, 81).

Usahay maghunahuna kami kon andam na ba kami nga mopakigbahin sa pagkaayo ngadto sa uban tungod kay wala pa kami hingpit nga nakahimo niini nga mga baroganan.

• Sa unsang paagi nga ang pagkahibalo nga ang Manluluwas nagtrabaho pinaagi sa dili hingpit nga mga tawo makatabang nako nga mahimong mas andam sa pagpakigbahin sa akong kasinatian bahin sa pagkaayo?

Ang gahom sa Dios alang sa kaluwasan

“Kay wala ko igakaulaw ang ebanghelyo [ni Kristo]: kay kini mao ang gahom sa Dios alang sa kaluwasan sa matag usa nga nagatuo” (Mga Taga-Roma 1:16).

• Unsa ang akong mga hunahuna ug mga pagbati samtang motan-aw ko og balik sa akong espirituwal nga kausaban sa tibuok nga proseso sa pagpaningkamot aron maulian?

• Nagpanagana ba ko sa pagpakigbahin sa akong kasinatian sa pagpaningkamot aron maulian? Kon mao, ngano man?

“Lakaw sa imong agianan bisan diin Ako magbuot, ug kini ihatag kanimo pinaagi sa Maghuhupay unsa ang imong buhaton ug asa ikaw paingon.

“Pag-ampo sa kanunay, tingali unya og ikaw matintal ug mawala ang imong ganti.

“Pagmatinud-anon ngadto sa kataposan, ug tan-awa, Ako mag-uban kanimo. Kini nga mga pulong dili sa tawo ni sa mga tawo, apan gikan kanako, gani si Jesukristo, ang imong Manunubos, pinaagi sa kabubut-on sa Amahan” (Doktrina ug mga Pakigsaad 31:11–13).

Ang mga kasulatan puno sa giya aron sa pagtabang namo nga makapadayon og usa ka espirituwal nga paagi sa kinabuhi nga mogiya kanamo balik ngadto sa Dios.

• Unsa ang piho nga mga giya nga akong nakita niini nga mga bersikulo?