Lakang 11: Magtinguha pinaagi sa pag-ampo ug pagpamalandong nga masayod sa kabubut-on sa Ginoo ug aron makabaton og gahom sa pagbuhat niini.

Mahinungdanon nga Baroganan: Personal nga Pagpadayag

Diha sa lakang 11, naghimo kami og inadlaw nga pasalig sa pagtinguha aron masayod sa kabubut-on sa Ginoo ug sa pag-ampo aron makadawat og gahom sa pagbuhat niini. Among nahibaloan nga ang Dios gusto nga makigsulti namo ug nga kami makakat-on kon unsaon sa pagpaminaw Kaniya. Si Presidente Russell M. Nelson mipahayag, “Ang Dios buot ba gayod nga makigsulti kaninyo? Oo!” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95). Ang katuyoan niini nga lakang mao ang pagpalambo sa among mga abilidad sa pagpaminaw ni Jesukristo, sa pagdawat og personal nga pagpadayag, ug sa pagadawat og gahom sa pagdumala sa atong kinabuhi sumala niini. Kini nga tinguha alang sa personal nga pagpadayag sukwahi ra kaayo sa mga kahidlaw nga among nasinati sa dihang nahisalaag pa kami tungod sa among pagkaadik.

Kaniadto naghunahuna kami nga ang paglaom, kalipay, kalinaw, ug katumanan moabot gikan sa kalibotanong mga tinubdan sama sa mga ilimnong makahubog, mga druga, kahigal, dili himsog nga pagkaon, o ubang makaadik o mapugsanon nga mga gawi. Ang among sundanan mao ang paglikay sa negatibo nga mga emosyon pinaagi sa pagbaliwala niini gamit ang among mga pagkaadik. Pipila namo misulay sa pagpuno sa kahaw-ang sa among kinabuhi sa bisan unsa nga butang gawas lang sa Dios. Kadugayan among nadiskobrehan nga ang bisan unsang positibo nga mga epekto sa among mga pagkaadik kadali lamang, peke nga mga solusyon nga nagbilin namo og kahaw-ang.

Ang pagtinguha sa pagpadayag usa ka importante nga lakang nga makaangkon og malungtaron nga pagkaayo. Si Presidente Nelson miingon: “Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag, tungod kay ang Ginoo misaad nga ‘kon kamo [mangita], kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayod sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon’ [Doktrina ug mga Pakigsaad 42:61]” (“Pagpadayag alang sa Simbahan, Pagpadayag alang sa Atong mga Kinabuhi,” 95).

Misugod kami sa pagpasalamat sa among panginahanglan sa Manluluwas, ni Jesukristo, ug sa pagsabot sa Iyang tahas sa among kinabuhi. Pipila namo mibati nga bakikaw ug wala maanad sa sinugdanan samtang nag-ampo kami, apan misugod kami sa pag-ampo ngadto sa Amahan pinaagi sa ngalan ni Jesukristo alang sa mas suod nga relasyon ngadto Kaniya. Nasayod kami nga mas daghan ang among mahimo uban Kaniya kaysa wala Siya. Misugod kami sa pagkat-on nga ang pagpaningkamot nga maulian wala lamang magtutok sa pagkaadik o pagkabuotan; naglangkob kini sa pagdapit sa giya sa Ginoo ngadto sa tanang aspeto sa among kinabuhi.

Ang pag-ampo, pagpamalandong, ug pagtuon sa kasulatan mahinungdanon sa pagduol ngadto kang Kristo. Makatabang kini kanamo nga makadungog sa Iyang tingog ug makadawat sa Iyang gahom nga mapatuman ang Iyang kabubut-on. Naningkamot kami sa pag-ampo uban sa kamapaubsanon, nasayod nga nagsalig kami sa balaanong giya ug kalig-on sa Ginoo. Mohunong kami og kadali ug mamalandong sa tibuok adlaw, naningkamot sa pagpakalma sa among mga hunahuna ug sa pagpaminaw sa ligdong, hinagawhaw nga tingog. Nagtuon kami sa mga kasulatan, ilabi na sa Basahon ni Mormon, tungod kay nagpamatuod kini sa kaandam sa Ginoo sa paghatag namo og giya ug gahom. Sa among pagbuhat niini nga mga butang, nakasinati kami og personal nga pagpadayag ug nakadawat og panalangin sa “kanunay [nakabaton] sa iyang Espiritu uban [kanamo]. (Moroni 4:3).

Alang sa kadaghanan namo, ang ideya bahin sa pagdawat og personal nga pagpadayag lisod tungod kay nagtuo kami nga dili kami takos sa gugma sa Dios. Sa among mga pagkaadik, naghunahuna kami nga ang Langitnong Amahan ug si Jesukristo walay igong pagpakabana nga makig-istorya namo o nawala na kanamo ang katungod sa pagdawat og pagpadayag tungod sa among mga kaagi. Pipila namo naghunahuna nga wala gayod kami makadawat og pagpadayag. Nag-ampo kami ug namalandong, ug ingon og walay nahitabo. Wala kami mobati og bisan unsang butang nga espesyal o makadawat og bisan unsang maila nga mga tubag. Dihang nahitabo kini, ang among karaang paagi sa paghunahuna mitumaw: “Ang Dios motabang sa uban, apan dili Siya motabang nako.”

Daghan kanamo ang nanglimbasog pa gihapon niini nga mga pagbati. Apan sa dihang among nahibaloan ang Iyang gugma ug kaluoy, kining sayop nga mga gituohan nawala. Ang among pagsalig nga Siya nahigugma kanamo nga sa ingon makig-istorya kanamo mahimong molambo kon among gamiton ang lakang 11 sa among kinabuhi.

Ang among buhat diha sa lakang 11 nagkinahanglan sa among hugot nga pagtuo nga Siya motubag kanamo, ug makakat-on kami sa pag-ila sa Iyang tingog. Tingali dili kini mahitabo dihadiha dayon o pinaagi sa milagroso nga timailhan gikan sa langit. Apan mahimo kami nga maminaw ug magmapailobon. Kitang tanan makapaminaw Kaniya sa lainlaing mga paagi. Usahay dili namo makuha ang piho nga giya dihadiha dayon. Wala kini magpasabot nga Siya wala mahigugma namo. Kondili, tingali nagpasabot kini nga Siya gusto nga kami makakat-on sa pagsalig Kaniya ug sa paggamit sa mga kamatuoran nga nahatag na Niya kanamo. Ang among pagsalig diha Kaniya makatabang namo nga mahimong andam nga maghulat Kaniya ug motubo ang among abilidad sa pagpaminaw sa Iyang tingog (alang sa dugang nga impormasyon, tan-awa sa Richard G. Scott, “Learning to Recognize Answers to Prayer,” Ensign, Nov. 1989, 30).

Kasagaran ang Ginoo motubag sa among mga pag-ampo pinaagi sa uban. Si Presidente Spencer W. Kimball mitudlo: “Ang Dios nakakita kanato, ug siya nagbantay kanato. Apan sa kasagaran ipaagi niya sa lain nga tawo ang pagtubag sa atong mga panginahanglan” (“Small Acts of Service,” Ensign, Dec. 1974, 5). Importante nga kami makigsuod sa uban, ilabi na sa mga nagsuporta namo. Makapaminaw kami sa Iyang tingog pinaagi sa among mga lider sa Simabahan, mga sakop sa pamilya, ug mga higala ingon man usab pinaagi sa pagbasa sa mga kasulatan, pagtuon sa mga pakigpulong sa komperensiya, ug sa pagpaminaw sa sagrado nga musika. Makadawat usab kami og inspirasyon ug giya kanunay kon kami motambong sa mga miting aron maulian ug mobuhat sa mga lakang aron maulian uban sa mga esponsor.

Ang pagpalambo sa among abilidad sa pagtinguha ug pagdawat og pagpadayag nagkinahanglan og praktis ug pailob. “Sa tinuod lang, aduna tingali mga higayon nga inyong bation nga daw sirado ang kalangitan. Apan ako mosaad nga samtang kamo magpadayon nga magmasulundon, mopahayag og pasalamat alang sa matag panalangin nga gihatag sa Ginoo kaninyo, ug samtang kamo mapailubon nga motahud sa panahon sa Ginoo, pagatagaan kamo sa kahibalo ug pagsabut nga inyong gipangita. Ang matag panalangin sa Ginoo alang kaninyo—gani mga milagro—mosunod. Mao kana ang mabuhat sa personal nga pagpadayag lang kaninyo” (Russell M. Nelson, “Pagpadayag alang sa Simbahan, Pagpadayag alang sa Atong Kinabuhi,” 95–96).

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto kang Kristo ug sa pagdawat sa giya ug gahom nga kinahanglanon aron magpadayon sa sunod nga lakang sa among pagpaningkamot aron maulian.

Moduol ngadto ni Jesukristo pinaagi sa pag-ampo, pagpuasa, ug pagpamalandong

Kadtong uban kanamo nga diyotay ra og kasinatian bahin sa pag-ampo, ang mga pulong ni Elder Richard G. Scott makapadasig: “Ayaw kabalaka bahin sa inyong salikwaot nga mga pagbati. Pakigsulti lang sa inyong Amahan. Maminaw Siya sa matag pag-ampo ug motubag niini sa Iyang paagi” (“Learning to Recognize Answers to Prayer,” Ensign, Nov. 1989, 31). Nakatabang usab ang pagrebyo sa mga bahin sa pag-ampo. Motawag kami sa ngalan sa Langitnong Amahan, mosulti Kaniya usay among pasalamatan, mangayo sa mga panalangin nga among gikinahanglan, ug dayon isira pinaagi sa ngalan ni Jesukristo. Moluhod kami kon makahimo kami. Mag-ampo kami, kasagaran sa kusog nga paagi, ngadto sa Amahan, Iyang giya pinaagi sa Espiritu Santo (tan-awa Mga Taga-Roma 8:26). Dili kinahanglan nga mogamit og mabulokon nga pinulongan. Kita mahimong magmatinuoron ug mopakigbahin sa mga gibati sa among kaisingkasing ngadto sa Langitnong Amahan.

Daghan kanamo ang nakakat-on nga momata og sayo ug mogahin og panahon sa hilom nga pag-inusara aron magtuon ug mag-ampo. Mag-eskedyul kami og oras alang sa pag-ampo ug sa pagpamalandong, kasagaran sa buntag. Niining higayona, among unahon ang Dios, kay ni bisan kinsa nga tawo o sa bisan unsa nga butang nianang adlawa. Dayon magtuon kami, gamit ang mga kasulatan ug mga pagtulun-an sa modernong mga propeta sa paggiya sa among pagpamalandong. Ang pagpuasa mahimong mapuslanong himan nga idugang niini nga paningkamot. Dayon maminaw kami sa among mga kasingkasing ug mga hunahuna aron madungog o mabati Siya. Among isulat ang among mga hunahuna ug mga pagbati samtang mag-ampo ug mamalandong kami.

Kon kining bililhon, pribado nga pagpamalandong matapos na, dili kami mohunong sa pag-ampo. Ang hilom nga pag-ampo, diha sa kinahiladman sa among kasingkasing ug hunahuna, maoy mahimong paagi namo sa paghunahuna sa tibuok namong adlaw. Makigtambag kami sa Ginoo samtang makighinabi kami sa uban, maghimo og mga desisyon, ug magsagubang sa mga emosyon ug mga tentasyon. Magpadayon kami sa pagdapit ug sa pagtinguha sa Iyang Espiritu nga mag-uban namo, nga unta magiyahan kami sa pagbuhat sa saktong butang (tan-awa sa Salmo 46:1; Alma 37:36–37; 3 Nephi 20:1).

Mamalandong diha sa kaligdong ug kahilom

Daghan namo ang nakahibalo nga ang pagpamalandong makatabang samtang nagtinguha kami sa pagpadayag ug giya gikan sa Ginoo. Mangita kami og hilom nga dapit, nga walay makabalda. Si Presidente Russell M. Nelson namahayag, “Ang hilom nga panahon usa ka sagradong panahon” (“Unsa ang Atong Nakat-onan ug Dili Gayod Makalimtan,” Liahona, Mayo 2021, 80). Tingali makatabang nga maanaa sa komportable nga posisyon. Among hawanan ang among mga hunahuna ug morelaks. Mohimo kami og pipila ka hinay, lawom nga mga pagginhawa.

Sunod maghunahuna ug mamalandong kami mahitungod sa unsay importante kanamo ug maminaw sa mga butang nga mosantop sa among mga hunahuna. Mahimo kaming maghunahuna mahitungod sa mga hagit nga among giatubang, ilabi na niadtong anaa sa among pagpaningkamot aron maulian o mga relasyon. Mahimo kaming maghunahuna mahitungod sa mga bersikulo sa kasulatan o pakigpulong sa kinatibuk-ang komperensiya nga among gitun-an. Mahimo kaming maghunahuna lang mahitungod sa umaabot nga adlaw ug sa giya nga among gikinahanglan. Gani mahimo namong isulat ang mga butang nga misantop sa among mga hunahuna diha sa usa ka journal aron mas klaro. Human sa hilom nga panahon, magpadayon kami sa pagpangayo og giya sa Ginoo ug gahom sa tibuok adlaw samtang maningkamot kami sa “paghunahuna ngadto [Kaniya] sa matag hunahuna” (Doktrina ug mga Pakigsaad 6:36).

Si Presidente M. Russell Ballard mitudlo: “Importante kini nga mohilom ug mamati ug mosunod sa Espiritu. Daghan kaayo kita og mga makabalda nga mokuha sa atong atensiyon, dili sama sa bisan unsang panahon sa kasaysayan sa kalibotan. Ang tanan nagkinahanglan og panahon sa pagpamalandong ug sa paghinuklog. … Kitang tanan nagkinahanglan og panahon sa pagpangutana sa atong kaugalingon o magbaton og regular nga personal nga pakighinabi sa atong kaugalingon. Kita sa kanunay daghan kaayo og buhat ug ang kalibotan saba kaayo nga lisod ang pagdungog sa langitnong mga pulong ‘pagmalinawon ug hibaloi nga Ako mao ang Dios’ [Salmo 46:10]” (“Be Still, and Know That I Am God” [Church Educational System devotional for young adults, May 4, 2014], broadcasts.ChurchofJesusChrist.org).

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Paduol ngadto sa Ginoo

“Paduol ngari kanako ug Ako mopaduol nganha kaninyo; pangita kanako nga makugihon ug kamo makakita kanako; pangayo, ug kamo makadawat; tuktok, ug kini pagabuksan nganha kaninyo” (Doktrina ug mga Pakigsaad 88:63).

Ang Ginoo nagtahod sa atong kagustohan ug sa atong kabubut-on. Nagtugot Siya kanato nga mopili sa pagduol Kaniya sa walay pagpamugos. Siya mopaduol kanato kon kita modapit Kaniya sa paghimo sa ingon.

• Unsaon nako sa pagpaduol Kaniya karon?

Mopahayag og pasalamat

“Pag-ampo kamo sa walay paghunong. Pagmapasalamaton kamo sa tanang higayon: kay kini mao ang pagbuot sa Dios diha kang Kristo Jesus alang kaninyo. Ayaw ninyo pagpalonga ang Espiritu” (1 Mga Taga-Tesalonica 5:17–19).

Kon mahinumdom kita nga magmapasalamaton alang sa tanang butang nga naa sa atong kinabuhi, bisan sa mga butang nga wala nato masabti, makahimo kita sa pagpadayon sa kanunay nga pagkontak sa Dios nga gitawag ni Pablo og “[pag-ampo] nga walay paghunong.” Sulayi sa pagpasalamat ang Dios sa tibuok adlaw.

• Sa unsang paagi kini nga buhat sa pagpasalamat makaapekto sa akong kasuod ngadto sa Espiritu?

Pagbusog sa mga pulong ni Kristo

“Ang mga anghel mamulong pinaagi sa gahom sa Espiritu Santo; mao nga, mamulong sila sa mga pulong ni Kristo. Mao nga, gisultihan ko kamo nga, pagbusog sa mga pulong ni Kristo; kay tan-awa, ang mga pulong ni Kristo motug-an kaninyo sa tanang butang unsay inyong angay nga buhaton.” (2 Nephi 32:3).

Niini nga bersikulo, si Nephi mitudlo nga kon kita magbusog diha sa mga pulong ni Kristo, kini nga mga pulong mogiya kanato sa tanan natong kinahanglang mahibaloan ug buhaton. Hunahunaa kon unsa kaha kon si Jesukristo makigkuyog ug makig-istorya kanimo sa tibuok adlaw.

• Unsa ang akong bation kon mamalandong bahin niini?

Modawat og personal nga pagpadayag

“Ang Manluluwas miingon ‘Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo’ (D&P 8:2). … Ang usa ka impresyon sa hunahuna piho kaayo. Detalyado nga mga pulong mahimong madungog o mabati ug masulat nga daw gidikta ang mga instruksyon. Ang komunikasyon ngadto sa kasingkasing usa ka impresyon nga adunay kinatibuk-ang kahulogan” (Richard G. Scott, “Helping Others to Be Spiritually Led” [pakigpulong gihatag atol sa Church Educational System Symposium, Aug. 11, 1998], 3–4).

Samtang motubo ang atong pagsabot sa personal nga pagpadayag, kita makamatikod niini sa mas kanunay ug mas daghang lain-lain nga mga paagi.

• Sa unsang paagi nga ako nakadawat ug mga pagbati ug pagpadayag gikan sa Ginoo?

“Sultihan ko kamo nga kini gipadayag ngari kanako pinaagi sa Balaang Espiritu sa Dios. Tan-awa, nagpuasa ug nag-ampo ko sa daghang mga adlaw aron masayod ko niini nga mga butang sa akong kaugalingon. Ug karon nasayod ko sa akong kaugalingon nga kini tinuod; kay ang Ginoong Dios mipakita niini kanako pinaagi sa iyang Balaang Espiritu; ug kini mao ang espiritu sa pagpadayag nga ania kanako” (Alma 5:46).

Ang pagpuasa sumala sa paagi nga gi-orden sa Ginoo makahatag og dakong gahom nga dili mabatonan sa laing paagi (tan-awa sa Mateo 17:14–21). Gani, mahimo kaming magpuasa aron mabuntog ang pagkaadik. Si Isaias mitudlo, “Dili ba mao kini ang pagpuasa nga akong napili? ang paghubad sa mga higot sa kadaotan, ang pagtangtang sa mga bugkos sa yugo, ug ang pagpagawas sa mga dinaugdaog, ug nga inyong bunggoon ang tanang mga yugo?” (Isaias 58:6).

• Sa unsang paagi nga ang pagpuasa ug pag-ampo nakapalambo sa akong abilidad sa pagdawat og pagpadayag?

“Ang ideya nga ang pagbasa sa kasulatan mahimong mosangpot sa inspirasyon ug pagpadayag nag-abli sa pultahan ngadto sa kamatuoran nga ang kasulatan dili limitado sa unsay gipasabot niini sa dihang kini gisulat apan mahimong maglakip usab kon unsay kahulogan niana nga kasulatan ngadto sa magbabasa karon. Dugang pa, ang pagbasa sa kasulatan mahimong mosangpot ngadto sa bag-ong pagpadayag sa bisan unsa nga gusto sa Ginoo nga ipahibalo sa magbabasa niana nga panahon. Wala namo pasobrahi ang punto kon moingon kami nga ang mga kasulatan mahimong usa ka Urim ug Thummim aron sa pagtabang sa matag usa kanato nga makadawat og personal nga pagpadayag” (Dallin H. Oaks, “Scripture Reading and Revelation,” Ensign, Jan. 1995, 8).

Ang pagkat-on sa pinulongan sa mga kasulatan dako og kapareha sa pagkat-on og langyaw nga pinulongan. Ang labing maayong paagi sa pagkat-on mao ang pagsubsob sa atong kaugalingon diha niini—sa pagbasa ug pagtuon niini matag adlaw.

• Kanus-a ko nakadawat og pagpadayag gikan sa usa ka tudling sa kasulatan?

Mangayo og tambag gikan sa Ginoo

“Ayaw tinguhaa ang pagtambag sa Ginoo, apan sa pagdawat og tambag gikan sa iyang kamot. Kay tan-awa, kamo mismo nahibalo nga motambag siya pinaagi sa kaalam, ug sa kaangayan, ug sa dakong kaluoy, sa tanan niyang mga buhat” (Jacob 4:10).

Ang among mga pag-ampo tingali dili epektibo kaniadto tungod kay migahin kami og mas daghang panahon sa pagtambag sa Ginoo—nagsulti Kaniya kon unsay among gusto—imbes sa pagtinguha sa Iyang kabubut-on mahitungod sa among mga desisyon ug pamatasan.

• Aduna ba koy bag-ohay lang nga kasinatian sa pag-ampo? Kon mao, puno ba kini sa tambag ngadto sa Ginoo o gikan sa Ginoo?

• Andam ba ko nga maminaw ug modawat sa Iyang tambag?