Pagpili og Esponsor

Ang pagpakigtambayayong sa usa ka esponsor makatabang kanimo aron maulian. Ang usa ka esponsor makasuporta kanimo sa imong pag-uswag ug determinasyon aron sa pagbuntog sa mga hagit, mga pagkagumon, o makaadik nga mga buhat nga imong giatubang. Sa imong panaw aron maulian, wala ka mag-inusara; ang usa ka esponsor mao ang tawo nga “andam sa … paghupay niadtong nanginahanglan og kahupayan, ug mobarog isip mga saksi sa Dios” (Mosiah 18:9). Palihog ikonsiderar ang pagpakigtambayayong sa usa ka esponsor sa labing dali nga panahon.

Unsa ang Esponsor?

Ang esponsor mao ang tawo nga naulian na pinaagi sa pagpaningkamot gamit ang 12 ka lakang. Posibleng makasabot sila sa pihong mga hagit nga may kalabotan aron maulian bisan kon wala ka mahibalo niini. Ang usa ka esponsor wala magpasabot nga siya ang labing suod nga higala o propesyonal sa kahimsog sa pangisip. Kondili, ang tahas sa esponsor mao ang pagtabang kanimo sa paningkamot nga mabuhat ang mga lakang aron maulian.

Pagpangita og usa ka esponsor

Sa Programa sa Simbahan aron Maulian gikan sa Pagkaadik, dili ka itahan ngadto sa usa ka piho nga esponsor. Mahimo ka nga mohangyo og usa ka esponsor sa paagi nga mohaom sa imong indibidwal nga kasinatian, panginahanglan, ug personalidad. Ang pag-sponsor usa ka hiniusa nga desisyon nimo, sa esponsor, ug sa Ginoo.

Ang pagkaplag og usa ka tawo nga mo-sponsor nimo mahimong malisod, apan ang uban makatabang kanimo. Ang labing maayo nga paagi sa pagpangita og esponsor mao ang pagtambong sa mga miting alang sa paningkamot nga maulian. Kadtong adunay susama nga mga hagit sa kasagaran adunay mas dako nga abilidad sa pagsabot sa imong nga panglimbasog. Ang mosunod nga mga ideya makatabang sa paghukom mahitungod sa pagpili og tukma nga esponsor:

1. Pagtinguha og espirituwal nga giya gikan sa Langitnong Amahan pinaagi sa pag-ampo ug pagpuasa bahin sa kinsa ang mahimong esponsor alang kanimo.

2. Ikonsiderar ang pagpili og usa ka tawo kinsa nakagahin na og dakong oras nga naulian ug nakabuhat sa 12 ka lakang.

3. Paminaw samtang ang mga tawo mopakigbahin sa ilang mga kasinatian sa pagpaningkamot nga maulian ug ikonsiderar kinsa ang pwede nimong ikakonektar.

4. Ang mga lider ug mga facilitator sa grupo mahimo nga mopaila kanimo ngadto sa tukma ug andam nga mga tawo.

5. Hangyoa ang usa ka tawo nga gibati nimo nga kwalipikado.

6. Kinahanglan nga mopili ka og usa ka esponsor nga sama nimo og sekso (gawas kon ang sponsor imong kaliwat).

7. Samtang imong sugdan ang proseso sa pag-usab, posible ka nga mahimong huyang sa pisikal, emosyonal, ug sa espirituwal nga paagi. Pagmatngon nga dili ka makapalambo og relasyon nga magsalig na lamang sa usa ka esponsor .

8. Makahimo ra ka nga mohangyo sa usa ka tawo nga mahimo nimong temporaryo nga esponsor. Mahimo ra ka nga mag-ilis og mga esponsor bisan kanus-a.

Pagkahimong epektibo nga esponsor

Ang pagkahimong esponsor usa ka dakong buhat sa pagserbisyo samtang mopakigbahin ka sa kaugalingon nimong kasinatian, hugot nga pagtuo ug paglaom nga imong nakaplagan samtang naningkamot hangtod sa ika-12 ka lakang aron maulian ug mamaayo pinaagi sa Manluluwas nga si Jesukristo. Ang mga esponsor mangutana og makapahunahunang mga pangutana, magpunting sa mga kapanguhaan, mopakigbahin sa praktikal nga tabang kon unsaon sa pagbuhat ang mga lakang, ug modasig niadtong ilang gisponsoran sa pagtambong sa mga miting. Ang usa ka esponsor nakasabot nga ang uban mahimong adunay tahas aron maulian ang usa ka tawo ug dili masilo kon kadtong ilang gi-sponsoran magtinguha og suporta gikan sa uban o mopili nga mag-ilis og mga esponsor. Anaa sa ubos ang pipila ka baroganan aron mahimong epektibo nga esponsor:

1. Unaha ang Dios sa dili pa ang tanan. Sa kanunay hinumdomi ang Dios ug tabangi kadtong imong gisponsoran nga mosalig Kaniya. Pagmatngon nga dili tugotan kadtong imong gisponsoran nga manobra nga magsalig nimo. Ang imong responsibilidad isip usa ka esponsor mao ang pag-awhag sa uban nga modangop ngadto sa Langitnong Amahan ug sa Manluluwas alang sa giya ug gahom. Ang imong tahas mao ang pagpakigbahin sa imong mga kasinatian sa hugot nga pagtuo ug paglaom aron matabangan ang tawo nga imong gisuportahan nga mobati nga gihigugma ug gisuportahan sa grasya sa Dios.

2. Mamahimong aktibo nga partisipante sa paningkamot nga maulian. Ang usa ka esponsor kinahanglan nga usa ka tawo nga naulian na sa dugay nga panahon sa dili pa maka-sponsor ni bisan kinsa (kasagaran 12 ka bulan o mas taas pa) ug aktibong nanginlabot sa paggamit ug pagtuon sa mga baroganan sa aron maulian. Mahimo kang mobati og dugang nga kabug-at sa imong kaugalingon nga pagkaayo kon magsugod na ka og sponsor og laing tawo. Pagmatngon nga dili mameligro ang imong kaugalingon nga pagkaayo pinaagi sa pagsponsor og laing tawo. Ang usa ka esponsor maantigong moatiman sa kaugalingon ug mangayo og tabang o suporta kon gikinahanglan.

3. Pagmapainubsanon. Isip usa ka sponsor, ang imong tahas mao ang paggamit sa imong kusog aron sa pagtanyag og suporta ug giya.

4. Respetohi ang kabubut-on sa uban ug pagbaton og pasensiya. Ang epektibong pag-sponsor makab-ot pinaagi “sa pagdani, sa pagka-mainantoson, sa kalumo ug kaaghop, ug sa tiunay nga paghigugma; pinaagi sa pagkamabination, ug putli nga kahibalo” (Doktrina ug mga Pakigsaad 121:41–42). Likayi ang pagsulay og ayo sa uban sa bisan unsang paagi. Tabangi ang uban nga mokonsiderar sa mga baroganan ug mga pamaagi ug dayon suportahan sila samtang mohimo sila og ilang kaugalingon nga mga desisyon. Respetohi ang ilang kabubut-on ug pagbaton og paglaom nga ang Ginoo motabang kanila samtang sila modangop Kaniya. Ang tawo nga imong gitabangan posibleng dili pa andam nga magpadayon. Siya posible nga mobalik sa iyang dili maayo nga buhat o hinay nga mosunod sa mga baroganan ug mga pamaagi sa sinsero nga kausaban. Ang usa ka esponsor kinahanglan nga pasinsyoso sa uban samtang sila nagpanaw ngadto sa pagkaulian.

5. Moserbisyo sa walay paghinakog. Ang walay hinakog nga pagserbisyo nagkinahanglan sa paghatag nga walay paghunahuna og balos. Ang usa ka esponsor kinahanglan nga adunay dakong kapasidad sa pagsabot ug andam nga mogahin og oras ug kakugi niadtong ilang gi-sponsoran. Likayi ang tinguha nga dayegon, pasidunggan, unongan, o uban pang emosyonal nga mga ganti gikan niadtong imong gisponsoran.

6. Tahora ang imong personal nga mga gisaad nga buhaton. Ang pagkahimong usa ka esponsor wala magpasabot nga kadtong imong gi-sponsoran kinahanglan nga kanunay makagamit sa imong oras ug mga kapanguhaan. Mahimong ipakita nimo ang ehemplo sa kaimportante sa mapuslanong mga kinutoban pinaagi sa pagtahod sa imong mga gisaad nga buhaton, lakip sa imong pamilya, sa Simbahan, imong panarbaho, ug imong personal nga panahon. Hinumdomi ang tambag nga gihatag diha sa Mosiah 4:27: “Ug seguroha nga tanan niining mga butanga mahimo sa kaalam ug kahusay; kay wala kinahanglana nga ang tawo modagan labaw pa kay sa iyang kusog.”

7. Magmainampoon. Sa matag higayon nga ikaw mopili sa pag-sponsor og usa ka tawo, tinguhaa ang giya sa Ginoo aron mahibalo kon unsa ang mga baroganan o mga buhatonon nga labing makatabang alang sa kasamtangan nga mga panginahanglan sa indibidwal. Pagmainampoon samtang mokonsiderar ka og mga paagi sa pagserbisyo, magtinguha kanunay nga magiyahan sa Espiritu.

8. Ipamatuod ang kamatuoran. Tingali bation nimo nga giaghat sa pagpakigbahin sa mga kasinatian aron magtugot sa uban nga mahibalo nga ikaw makasabot. Mahimo usab nga mopamatuod ka bahin sa Manluluwas ug sa Iyang makaayo nga gahom. Ang kamatuoran nga ang Dios usa ka Dios sa mga milagro importante (tan-awa sa Moroni 7:29). Ang pagpakigbahin sa imong pagpamatuod sa Iyang kaluoy ug sa Iyang grasya tingali mao ang usa sa labing importanteng mga serbisyo nga imong matanyag.

9. Matngoni ang pagkakompidensyal. Isip usa ka esponsor, aduna kay responsibilidad sa pagpanalipod sa pagkapribado sa uban. Ang dili pagpasundayag sa kaugalingon ug ang pagkakompidensiyal maoy kinauyokang mga baroganan sa pagpalig-on sa imong abilidad sa pag-sponsor ug pagtabang sa uban.