Lakang 6: Magmahimong hingpit nga andam nga ang Dios motangtang sa atong tanang kahuyang sa karakter.

Mahinungdanong Baroganan: Kausaban sa Kasingkasing

Daghan namo ang nakakaplag og kalamposan ug pagkaayo pinaagi sa lakang 5. Kami nahingangha ug mapasalamaton sa kausaban sa among mga kaugalingon. Kadaghanan namo nakakaplag nga ang among pagkaadik dili na kaayo grabe ug dili na kaayo permi nga motental namo. Pipila namo nakakita na og sugod sa mga panalangin sa pagpaningkamot aron maulian. Kaming tanan mibati nga mas napaduol ngadto sa Langitnong Amahan ug nakabaton og dugang kalinaw sa among mga kinabuhi. Uban nianang dakong mga kausaban, pipila namo naghunahuna kon mao lang ba kini ang kinahanglan namong buhaton. Apan nagkinahanglan gihapon kami og dugang nga pagkaayo aron magpadayon ug magpabilin kami nga maulian .

Among namatikdan nga ang paghunong nakapahimo sa among kahuyang sa kinaiya nga mas klarong makita. Tungod kay dili na namo gamiton ang among pagkaadik aron moeskapo, mas klaro namong nasabtan ang among mga problema. Naningkamot kami sa pagkontrol sa among negatibong mga hunahuna ug mga pagbati, apan padayon kini nga mogawas, naghasol kanamo ug naghulga sa among bag-ong kinabuhi nga naningkamot aron maulian. Matental kami sa paggamit sa among makaadik nga mga gawi ug pagkamatinumanon sa gusto aron mosulay sa pagkontrol sa among mga kahuyang sa kinaiya ug sa pagsugakod sa kaugtas sama sa among nasinati kaniadto.

Kadtong nakasabot sa espirituhanong implikasyon sa pagkaayo miawhag kanamo sa pag-ila nga samtang ang dayag nga kausaban sa among kinabuhi maanindot, si Jesukristo adunay mas daghang panalangin alang kanamo. Ang uban mitabang namo nga makita nga kon kami gusto nga dili lamang makalikay sa among pagkaadik apan mawagtang gayod ang tinguha nga mobalik niini, kinahanglan kami nga makasinati og kausaban sa kasingkasing. Kini nga tinguha alang sa kausaban sa kasingkaisng mao ang katuyoan sa lakang 6.

Tingali maghunahuna ka kon unsaon nimo nga matuman kana nga kausaban. Ang lakang 6, sama sa mga lakang nga nag-una niini, murag bug-at kaayo nga hagit. Ayaw pagkawala sa kadasig tungod niini nga mga pagbati. Bisan kon sakit man kini, moangkon ka niini, sama sa among gihimo, nga ang pag-angkon ug pagkompisal sa imong mga kahuyang sa kinaiya diha sa mga lakang 4 ug 5 wala magpasabot nga andam na ka nga mohunong niini. Tingali padayon pa gihapon kami nga naghupot sa karaan nga binuhatan samtang naningkamot kami sa pagsugakod sa kaugtas.

Ang labing makapaubos nga butang mao ang pag-ila nga naningkamot kami sa pag-usab sa among mga kaugalingon nga walay tabang sa Dios. Ang lakang 6 nagkinahanglan nga among itugyan ngadto sa Dios ang tanang nahabilin nga garbo ug pagkamatinumanon sa gusto. Sama sa mga lakang 1 ug 2, ang lakang 6 nagkinahanglan nga kami magpaubos sa among kaugalingon ug moangkon sa among panginahanglan sa matubsanon ug makapausab nga gahom ni Kristo. Human sa tanan, ang Iyang maulaong sakripisyo ang nakapahimo namo nga makabuhat sa matag lakang hangtod niining puntoha. Mao usab gihapon ang lakang 6.

Kon kami modangop ngadto ni Jesukristo, mangayo og tabang alang niini nga lakang, kami dili masagmuyo. Kon kami mosalig Kaniya ug magmapailobon sa proseso, among makita nga ang among garbo hinay-hinay nga mapulihan og pagkamapainubsanon. Mapailobon Siya nga naghulat namo nga mapul-an sa among mga pagpaningkamot sa pag-usab nga kami ra nga walay tabang. Kon kamo modangop dayon ngadto Kaniya, masaksihan na usab namo ang Iyang gugma ug gahom. Imbes mohupot ngadto sa karaan nga mga naandang pamatasan, kami mahimong magbaton og bukas nga hunahuna samtang ang Espiritu hinay-hinay nga mosugyot og mas maayong paagi sa pagpakabuhi. Ang among kahadlok sa kausaban mokunhod samtang among maamgohan nga ang Ginoo nakasabot sa kasakit ug pagkugi nga gikinahanglan niini. Usab, mahitabo kini sa kadugayan ug managlahi alang sa matag usa nato. Usa kini ka pagpraktis sa pagtugyan sa atong mga kabubut-on ngadto sa Ginoo. Usa kini ka proseo, dili usa ka higayon nga panghitabo.

Samtang ang proseso sa pagduol ngadto ni Kristo motuhop sa among kasingkasing, ang atong sayop nga mga gituohan nga nagpagrabe sa negatibong mga pagbati mapulihan sa kamatuoran. Motubo kita diha sa kalig-on kon kita magpadayon sa pagtuon ug sa paggamit sa pulong sa Dios. Pinaagi sa mga pagpamatuod sa uban, ang Ginoo motabang namo nga makahibalo nga kami maabot pa sa Iyang gahom sa pag-ayo. Ang tinguha nga mobasol sa uban o mangatarongan nga maoy among paagi aron makalingkawas niining mahagiton nga proseso mapulihan og tinguha nga manubag ngadto Kaniya ug magmanunoton sa Iyang kabubut-on. Pinaagi ni propeta Ezequiel, ang Ginoo namahayag, “hatagan ko … kamo sa usa ka bag-o nga kasingkasing, ug ang usa ka bag-ong espiritu igabutang ko sa sulod ninyo: kuhaon ko ang batoon nga kasingkasing gikan sa inyong unod” (Ezequiel 36:26).

Ang Mnaluluwas gusto nga mopanalangin namo ug mousab sa atong mga kinaiyahan. Kon kita motugot Kaniya, kita mahimong mas mahiusa ngadto Kaniya, ingon nga Siya nahiusa ngadto sa Langitnong Amahan. Ang Manluluwas gusto nga mohatag nato og kapahulayan gikan sa pagpalayo ug kahadlok nga nakatampo sa atong mga pagkaadik. Siya gusto nga mopanalangin nato sa Iyang grasya ug gahom nga maanaa kanato pinaagi sa Iyang maulaong sakripisyo.

Kon kita monunot sa mga pag-aghat sa Espirit ug motan-aw ngadto sa Dios alang sa kaluwasan dili lang sa pagkaadik apan sa mga kahuyang sa kinaiya, Siya mousab sa atong disposisyon ug kinaiya kon gustohon nato. Ang nagtubo nga tinguha nga mahimong balaan pinaagi sa Dios moandam kanato alang sa kausaban sa atong mga kinaiyahan mismo. Si Presidente Ezra Taft Benson mihulagway niini nga kausaban sama sa mosunod:

“Ang Ginoo moimpluwensya gikan sa sulod sa tawo padulong sa gawas. Ang kalibotan mousab sa tawo gikan sa gawas paingon sa sulod. Ang kalibotan mohaw-as sa mga tawo gikan sa nagdasok nga mga pinuy-anan. Si Kristo mokuha sa nagdasok nga ngil-ad nga mga pagbati sa mga tawo, ug unya sila mohaw-as sa ilang mga kaugalingon gikan niini nga pagdasok. Ang kalibotan moumol [sa mga tawo] pinaagi sa pag-usab sa ilang palibot. Si Kristo mousab [sa mga tawo], kinsa dayon mousab sa ilang palibot. Hulmahon sa kalibotan ang batasan sa tawo, apan si Kristo makausab sa kinaiyahan sa tawo. …

“Hinaot nga makumbinser kita nga si Jesus mao ang Kristo, mopili sa pagsunod Kaniya, mausab alang Kaniya, magiyahan Niya, matinguhaon diha Kaniya, ug matawo pag-usab” (“Born of God,” Ensign, Nob. 1985, 6–7).

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Magmahimong andam nga mausab pinaagi sa gahom sa Dios

Sa dihang una namong nahibaloan ang lakang 6, pipila namo miingon, “Siyempre andam na ko nga ang Dios motangtang sa akong mga kahuyang!” Mibati kami nga napildi sa among daghang napakyas nga mga pagsulay sa pagbuntog sa among mga kahuyang nga kami ra. Hinuon, samtang namalandong kami ug nakadawat og tambag gikan sa among mga esponsor, among naamgohan nga mas nagpanagana diay kami sa pagsalikway sa among mga kahuyang.

Ang Balaang Espiritu ug ang uban mitabang namo nga makita nga kanunay namong gigamit ang among mga kahuyang isip pagdepensa o isip mga paagi sa pagpalambo sa among kaugalingon. Pananglitan, pipila namo modangop sa kasilag ug pagbati og kahawod kon bation namo nga gihulga. Ganahan kami nga mobati nga sakto bisan kon kasagaran sayop kami.

Ang uban namo mopakaubos sa among mga kaugalingon ug mopaminos sa among diosnong kinaiya aron dili kami pasakitan sa uban. Nagtuo kami nga kon kami mismo makainsulto gani sa among kaugalingon, niana si bisan kinsa nga mopakaubos namo klaro nga nakaabot sa susama ra gihapon nga konklusyon nga gituohan na namo.

Apan kining dili makatabang nga mga tubag sa mga hagit nagagikan sa among mga kahuyang sa kinaiya, dili sa among mga kalig-on. Nahadlok kami nga kon among isalikway ang among mga kahuyang, mas dali kami nga masakitan. Apan sa dihang gitugotan namo ang Dios nga tangtangon ang among mga kahuyang ug nakigtambayayong sa among mga esponsor, among nadiskobrehan kon unsa kami ka pinangga sa Dios.

Kami modapit nimo nga mahigmata ngadto sa imong tinuod nga bili ug ibutang ang imong pagsalig diha sa pag-alima sa Dios imbes sa mga pagdepensa sa imong kaugalingon.

Pakigsuod sa uban nga naningkamot aron maulian ug diha sa simbahan

Samtang kami nahimong mas komportable sa ubang mga tawo nga naningkamot aron maulian, nakita namo og sugod nga mas susama sila namo kaysa atong gihunahuna. Samtang gipakigbahin namo ang among mga istorya ug naminaw sa ubang mga tawo nga mipakigbahin sa ilaha, ang among kaluoy mitubo. Nailhan namo og sugod ang komon nga kahimtang sa tanang anak sa Dios ug mibati nga mas komportable nga makauban sila. Ang pamilya, mga higala, ug mga lider sa Simbahan midapit namo nga mobalik sa simbahan ug mopalig-on sa among kasamtangan nga mga pasalig. Imbes mosupak o mangatarongan, nakadesisyon kami nga motambong sa simbahan. Sa hina-hinay among nahibaloan nga daghan sa mga butang nga ganahan namo mahitungod sa mga miting aron maulian kabahin diay usab sa pagsimba diha sa Simbahan.

Sa dihang gibunyagan kami, diyotay ra kanamo ang nakasabot sa tibuok kinabuhi nga proseso sa tinuod nga pagkakabig. Hinuon, si Presidente Marion G. Romney yanong mipasabot niini: “Sa tawo nga tinud-anay nga nakabig sa hingpit, ang tinguha alang sa mga butang nga sukwahi sa ebanghelyo ni Jesukristo sa pagkatinuod nahanaw na. Ug busa ang napuli mao ang gugma sa Dios, uban ang hugot nga determinasyon sa pagsunod sa iyang mga sugo” (sa Conference Report, Guatemala Area Conference 1977, 8).

Samtang among nasinati ang milagro sa padayong pagpaningkamot aron maulian—una gikan sa makaadik nga mga gawi ug dayon gikan sa mga kahuyang sa kinaiya—masinati namo ang tinuod nga pagkakabig. Mahigmata kita ug maulian sa atong pamuot sama sa anak nga nawala nga “naulian sa iyang pamuot” (tan-awa sa (Lucas 15:17).

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Mobiya sa tanan nimong mga sala

“Ang hari miingon: … [U]nsay akong buhaton nga ako matawo sa Dios, aron kining daotan nga espiritu makuha gikan sa akong dughan, ug makadawat sa iyang Espiritu, aron mapuno ako sa kamaya? … Biyaan nako ang tanan nakong gipanag-iya, … aron akong madawat kining hingpit nga. …

“Ang hari miyukbo sa atubangan sa Ginoo, nga nagluhod; oo, gani mihapa siya sa yuta, ug misinggit og kusog, nga nag-ingon:

“O Dios, … biyaan nako ang tanan nakong sala aron makaila kanimo, ug aron ako mabangon gikan sa mga patay, ug maluwas sa kataposang adlaw” (Alma 22:15, 17–18).

• Basaha pag-usab kini nga mga bersikulo sa mainampingong paagi. Unsa nga mga babag, lakip ang mga kinaiya ug mga pagbati, ang nakapugong nako sa pagbiya sa “tanan nakong mga sala” ug mas hingpit nga modawat sa Espiritu sa Ginoo?

Moapil sa pagpakigdait sa Simbahan

“Ug karon, tungod sa pakigsaad nga inyong gihimo pagatawgon kamo nga mga anak ni Kristo, iyang mga anak nga lalaki, ug iyang mga anak nga babaye; kay tan-awa, niining adlawa sa espirituhanong paagi kamo iyang gipanganak; kay nag-ingon kamo nga ang inyong mga kasingkasing nausab pinaagi sa pagtuo sa iyang ngalan; mao nga, kamo natawo kaniya ug nahimong iyang mga anak nga lalaki ug mga anak nga babaye” (Mosiah 5:7).

Samtang atong dad-on ngari kanato ang ngalan ni Kristo ug malig-on sa Iyang Espiritu, makaila kita og sugod sa atong kaugalingon uban sa mga Santos—mga kaigsoonan nga nabunyagan ug misulod ngadto sa Iyang pamilya dinhi sa yuta.

• Kon mas makaila ko sa akong isigka-Santos, unsaon nga mahimo ko nga mas matinguhaon nga moapil sa pagpakigdait sa Simbahan?

Mosinati sa katubsanan

“Kay ang kinaiyanhon nga tawo kaaway sa Dios, ug sukad pa gayod sa pagkapukan ni Adan, ug mao gihapon sa umaabot, ug hangtod sa kahangtoran, gawas kon siya motugyan ngadto sa mga pagdani sa Balaang Espiritu, ug mosalikway sa iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo, ug mahimo nga sama sa usa ka bata, manunoton, maaghop, mapainubsanon, mapailobon, puno sa gugma” (Mosiah 3:19).

Daghan kanato nahimong mga Santos sa ngalan lamang diha sa bunyag ug migahin sa tibuok natong kinabuhi sa pagpanglimbasog nga “mosalikway sa kinaiyanhon nga pagkatawo” ug mopalambo sa mga kinaiya nga gilista dinhi nga bersikulo.

• Sa unsang paagi nga kini nga pagpanglimbasog miandam nako sa pagdawat nga pinaagi lamang sa Pag-ula ni Kristo—pinaagi sa pagkahiusa ngadto ni Jesukristo ug sa Langitnong Amahan—nga ako makasinati og katubsanan?

Duol ngadto kang Kristo

Si Elder Richard G. Scott mitudlo: “Bisan unsa pa ang tinubdan sa kalisod ug bisan giunsa nimo pagsugod aron makaangkon og kahupayan—pinaagi sa kwalipikadong propesyonal nga therapist, doktor, lider sa pagkapari, higala, nagpakabana nga ginikanan, o minahal—bisan kon giunsa pa nimo pagsugod, kadto nga mga solusyon dili gayod makahatag og kompleto nga tubag. Ang kataposang pagkaayo moabot pinaagi sa hugot nga pagtuo diha ni Jesukristo ug sa Iyang mga pagtulun-an, uban sa masulub-on nga kasingkasing ug mahinulsolon nga espiritu ug pagkamasulundon sa Iyang mga sugo” (“To Be Healed,” Ensign, May 1994, 9).

Walay bisan unsa kadako nga suporta o pakigdait—bisan diha sa mga grupo sa naningkamot aron maulian o mga kongregasyon sa Simbahan—ang makahatag og kaluwasan. Ang ubang mga tawo mahimong mosuporta ug mopanalangin kanato sa atong panaw, apan sa kataposan kinahanglan kita nga moduol ngadto kang Kristo Mismo.

• Sa unsang paagi nga ang akong panaw aron maulian nagsugod?

• Kinsa man ang instrumento nga nakatabang nako nga maanaa sa dalan sa paghinulsol ug pagpaningkamot aron maulian? Sa unsang paagi nga ang ilang ehemplo mitudlo nako ngadto sa Manluluwas?

• Unsay akong nakat-onan mahitungod sa Manluluwas nga nakatabang o nakaimpluwensya sa akong tinguha o abilidad sa pag-usab sa akong gawi?

Magmapailobon sa proseso

“Kamo gagmay nga mga bata ug kamo dili makaantos sa tanan nga mga butang karon; kamo kinahanglan motubo diha sa grasya ug diha sa kamatuoran.

“Ayaw kahadlok, gagmay nga mga bata, kay kamo akò, ug Ako nakabuntog sa kalibotan; …

“Ug walay usa kanila nga gihatag sa akong Amahan nga mawala” (Doktrina ug mga Pakigsaad 50:40–42).

Usahay mahutdan kita sa pailob o sa kadasig nga ang pagpaningkamot aron maulian usa ka padayon nga proseso. Kini nga mga bersikulo nagpakita sa pagpailob ni Jesukristo ug sa Langitnong Amahan ngari nato isip “gagmay nga mga bata.” Gamita kini nga mga bersikulo sa imong kaugalingon pinaagi sa pagsulat niini nga personal nga magtumong kanimo.

• Sa unsang paagi nga ang mga saad niini nga kasulatan makalig-on nako kon ako mawad-an og kadasig?

Modawat og tabang gikan ni Jesukristo

“Hinigugma kong kaigsoonan, human kamo makasulod niining higpit ug pig-ot nga dalan, mangutana ako kon ang tanan natuman na ba? Tan-awa, sultihan ko kamo, Wala; kay kamo wala pa makaabot niini nga gilay-on kondili pinaagi sa pulong ni Kristo uban sa dili matarog nga pagtuo diha kaniya, mosalig sa hingpit sa maayong mga buhat kaniya kinsa gamhanan sa pagluwas.

“Mao nga, kinahanglan nga kamo mopadayon sa unahan uban ang pagkamakanunayon diha kang Kristo, magbaton og hingpit nga kahayag sa paglaom, ug gugma sa Dios ug sa tanang tawo. Mao nga, kon kamo mopadayon sa unahan, magpakabusog sa pulong ni Kristo, ug molahutay hangtod sa kataposan, tan-awa, sa ingon niana miingon ang Amahan: Makabaton kamo og kinabuhing dayon.” (2 Nephi 31:19–20).

• Sa unsang paagi nga si Jesukristo motabang nako subay sa higpit ug pig-ot nga dalan?

• Sa unsang paagi nga ang akong nagtubo nga gugma sa Dios ug sa ubang mga tawo mopagawas nako gikan sa pagkaadik, motabang nako sa paghunong, ug mopahiuli sa akong paglaom sa kinabuhing dayon?