Pasiuna

Una ug labaw sa tanan, kami gusto nga mahibalo ka nga adunay paglaom gikan sa pagkaadik. (“Kami” mga lalaki ug mga babaye nga nag-antos sa makadaot nga mga epekto sa lainlaing mga pagkaadik ug nakasinati og taas nga panahon nga pagkaulian.) Nakasinati kami og dakong kasubo, apan among nakita ang gahom sa Manluluwas nga miusab sa among labing makahugno nga mga kapildihan ngadto sa mahimayaong espirituwal nga mga kadaogan. Kami kanhi nagpuyo nga adunay inadlaw-adlaw nga depresyon, kabalaka, kahadlok, ug makaluya nga kasuko apan karon nakasinati og kalipay ug kalinaw. Nakakita kami og mga milagro sa among kinabuhi ug sa kinabuhi sa uban nga nalaang sa pagkaadik.

Gibayran namo ang grabe nga kantidad pinaagi sa kasakit ug pag-antos tungod sa among pagkaadik. Apan ang Dios mipanalangin namo samtang mihimo kami sa matag lakang padulong sa pagkaayo. Among nakita ang among kaugalingon isip minahal nga mga anak sa Dios. Kay nakaangkon og espirituwal nga pagkahigmata, naningkamot kami matag adlaw sa pagpalambo sa among relasyon uban sa Langitnong Amahan; sa Iyang Anak, si Jesukristo; sa among kaugalingon; ug sa uban. Sa laktod nga pagkasulti, ang Manluluwas ang naghimo alang namo sa unsay dili namo mahimo alang sa among kaugalingon.

Ang ubang mga tawo mokonsiderar sa mga pagkaadik nga ngil-ad nga mga binuhatan nga among mabuntog pinaagi lamang sa kinabubut-on nga tinguha, apan hilabihan na ang among pagkagumon sa usa ka gawi o butang nga wala na kami kahibalo kon unsaon sa paghunong niini. Nawad-an na kami og panglantaw ug pagsabot sa ubang mga prayoridad sa among kinabuhi. Wala nay mas importante pa kaysa pagtagbaw sa among desperadong panginahanglan. Sa dihang naningkamot kami sa paghunong, nasinati namo ang grabe nga pisikal, sikolohikal, ug sa emosyonal nga mga kahidlaw. Sa dihang nagpadala kami sa among mga kahidlaw ug mga pagkaadik, ang among abilidad sa paggamit sa among kabubut-on nawala o nalimitahan. Si Presidente Boyd K. Packer mitudlo, “Ang pagkaadik adunay kapasidad sa pagkuha sa kabubut-on sa tawo ug mowagtang sa moral nga kabubut-on” (“Revelation in a Changing World,” Ensign, Nov. 1989, 14).

Gisugdan namo ang proseso aron maulian pinaagi sa pagpaubos ug pagkamatinuoron, pinaagi sa pagtawag sa Dios ug sa uban alang sa tabang, ug pinaagi sa paghimo sa mga buluhaton nga gilatid niini nga giya. Ang 12 ka lakang aron maulian nagtudlo namo kon unsaon sa paggamit ang ebanghelyo ni Jesukristo diha sa among kinabuhi. Si Presidente Jeffrey R. Holland miingon: “Aduna ka bay pakigbugno sa kadaotan sa pagkaadik—tabako o drugas o sugal o … pornograpiya? … Bisag unsa pang mga lakang nga kinahanglan nga imong buhaton sa pagsulbad niining mga suliran, moduol og una ngadto sa ebanghelyo ni Jesukristo” (“Mga Butang nga Guba Mahimong Ayohon,” Liahona, Mayo 2006, 70).

Ang mga lakang 1–3 nagtudlo namo kon unsaon paggamit sa hugot nga pagtuo sa Langitnong Amahan ug ni Jesukristo. Ang mga lakang 4–9 nagdala namo ngadto sa usa ka proseso sa tinuoray nga paghinulsol. Ang mga lakang 10–12 nag-awhag namo sa pagpanubag, sa pagtinguha og balaanong giya ug gahom nga magpabilin diha sa dalan sa pakigsaad, sa pagpakigbahin ngadto sa uban sa milagro nga miabot sa among mga kinabuhi, ug sa paglahutay ngadto sa kataposan.

Daghan namo nga nagpakabuhi aron maulian ang miapil gihapon sa Programa aron Maulian gikan sa Pagkaadik. Nakakaplag kami og dakong suporta sa among tinguha sa pagpabilin sa among kagawasan gikan sa pagkaadik. Ug napanalanginan kami samtang nagtinguha kami sa pagtabang sa uban nga naulipon sa pagkaadik. Nagtuo gayod kami nga nausab kami pinaagi sa Pag-ula ni Jesukristo. Sama sa mga Anti-Nephi-Lehi sa Basahon ni Mormon (tan-awa sa Alma 24:17–19), nakasinati kami og pagkaayo ug kausaban mismo sa among kinaiyahan pinaagi sa grasya ug gahom ni Jesukristo. Dili kami gusto nga mawala kana nga gasa, mao nga matag adlaw mopili kami sa paghinumdom sa among hingpit nga pagsalig Kaniya. Samtang nagpadayon kami sa pag-apil sa Programa aron Maulian gikan sa Pagkaadik, mapahinumdoman kami nga ang pagkaadik gamhanan ug mahimong modangat sa pagbalik ngadto niini imbes ngadto sa Dios kon hikalimtan namo kini nga mga kamatuoran—. Ang among tinguha mao ang pagpabilin sa unsay gihatag sa Dios namo nga hilabihan ka dako nga grasya.

Kon mibati ka nga naadik ug adunay gamay kaayo nga tinguha nga makalingkawas ug andam sa “pag-eksperimento” sa pulong sa Dios (Alma 32:27), kami modapit nimo sa pag-apil namo sa pagtuon ug sa paggamit sa mga baroganan sa eanghelyo ni Jesukristo sama sa gitudlo niini nga giya. Ang among kasinatian nagpakita nga kon kinasingkasing nimong sundon kini nga paagi, makaplagan nimo ang gahom nga imong gikinahanglan aron maulian gikan sa pagkaadik. Kini nga gahom gitawag og grasya. “Ang grasya sa Dios makatabang nato kada adlaw. Makalig-on kini nato sa pagbuhat sa maayong mga buhat nga dili nato mabuhat sa atong kaugalingon” (Mga Hilisgotan ug mga Pangutana, “Grasya,” Librarya sa Ebanghelyo). Samtang matinud-anon nimong gamiton ang matag usa niining 12 ka lakang, ang Manluluwas molig-on kanimo ug ikaw “mahibalo sa kamatuoran, ug ang kamatuoran magahatag kaninyog kagawasan” (Juan 8:32).

Nasayod kami pinaagi sa among kaugalingong kasinatian nga makalingkawas ka gikan sa mga kadena sa pagkaadik. Bisan unsa pa ang imong gibati nga kawalay paglaom, anak ka sa mahigugmaong Langitnong Amahan. Kon wala ka makakita niini nga kamatuoran, ang mga baroganan nga gipasabot niini nga giya makatabang nimo nga madiskobrehan kini pag-usab ug maestablisar kini sa kahiladman sa imong kasingkasing. Kini nga mga baroganan makatabang kanimo sa pagduol ngadto ni Kristo ug motugot Kaniya nga mousab kanimo. Samtang imong gamiton ang mga lakang, makasalig ka sa gahom sa Pag-ula ug ang Ginoo moluwas kanimo gikan sa pagkaulipon.

Kadtong anaa uban namo nga naningkamot aron maulian modapit nimo uban sa tanan namong pagbati ug gugma nga moapil namo sa usa ka mahimayaong kinabuhi sa paglaom, kagawasan ug kalipay, nga gigakos sa mga bukton ni Jesukristo, ang atong Manunubos. Ingon nga kami naayo, ikaw usab mamaayo ug makatagamtam sa tanang panalangin sa ebanghelyo ni Jesukristo.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang nato sa pagduol ngadto kang Kristo ug sa pagdawat sa giya ug gahom nga kinahanglanon aron magpadayon sa atong pagpaningkamot aron maulian. Palihog hinumdomi nga makigtambayayong sa imong esponsor.

Motutok sa atong mahangtorong pagkatawo

Sa dihang si Presidente Russell M. Nelson gipangutana kon unsaon sa pagtabang niadtong nag-antos sa pagkaadik, siya mitubag, “Tudloan sila sa ilang pagkatawo ug sa ilang katuyoan” (diha sa Tad R. Callister, “Our Identity and Our Destiny” [Brigham Young University devotional, Aug. 14, 2012], speeches.byu.edu). Matag usa kanato anak sa mahigugmaong Amahan. Kami nasayod nga Siya nahigugma namo ug aktibong nag-atiman namo.

Dili kanunay nga ingon niini ang among panghunahuna kaniadto. Pipila namo nakombinser nga wala Siya. Pipila namo wala ra magpakabana. Pipila namo mituo nga anaa Siya apan labihan ang Iyang kasuko o kasagmuyo aron motabang namo. Alang sa hapit tanan namo, ang sayop nga pagsabot sa among relasyon ngadto sa Dios misangpot ngadto sa usa ka babag nga nakapugong namo sa padangop Kaniya alang sa tabang. Sa sukwahi, midangop kami ngadto sa makaadik nga mga butang o mga gawi aron matabangan kami nga makasugakod sa mga hagit sa kinabuhi. Kanunay kami nga nasulod sa negatibo nga mga sikulo. Mibuhat kami og dili maayo, nga misangpot ngadto sa mga pagbati og kahasol ug kaulaw, ug misangpot kini ngadto sa mas daghang buhat nga dili maayo aron matabonan ang kasakit niini nga mga emosyon. Ang pagsabot sa among pagkatawo ug katuyoan isip mga anak sa Dios nakahatag namo og kusog sa pagguba sa sikulo.

Nakat-onan usab namo ang kalainan tali sa kahasol ug kaulaw. Ang kahasol mao ang pagbati og dili maayo mahitungod sa butang nga among nahimo, ug ang kaulaw mao ang pagbati og dili maayo kon si kinsa kami. Si Elder David A. Bednar mipasabot sa bili sa kahasol niini nga paagi: “Ang epekto sa kahasol ngadto sa konsensya sama ka sakit ngadto sa atong lawas—usa ka pasidaan sa kakuyaw ug proteksyon sa dugang kadaot.” (“Kita Nagtuo sa Pagkaputli,” Liahona, Mayo 2013, 44). Sa wala pa ang pagpaningkamot aron maulian, daghan namo ang mibati og kaulaw, nag-ingon nga hangtod sa hangtod na kami nga napukan ug dili takos sa gugma sa Dios o ni bisan kinsa.

Hinuon, sa dihang nakita namo ang among diosnong kinaiya ug miangkon sa among panginahanglan og tabang sa langit aron maulian gikan sa pagkaadik, misugod kami sa pagtan-aw sa among kaugalingon sama sa pagtan-aw ni Jesukristo kanamo: masakiton nga mga lalaki ug mga babaye sa espirituhanong paagi nga naningkamot aron maulian pinaagi sa Iyang grasya imbes daotan nga mga lalaki ug mga babaye nga naningkamot nga mahimong maayo aron angayan nga Iyang higugmaon.

Kami nagdapit nimo sa pagpraktis sa pagtuo nga ikaw anak sa Dios ug nga Siya nahigugma nimo bisan unsa pa ang imong nahimo. Bisan og tinuod nga ang makadaot nga mga pagpili makahatag og limitasyon sa atong mga oportunidad, ang atong bili ngadto sa Dios dili gayod mausab. Siya nahigugma nato tungod kay kita Iyang mga anak, dili tungod sa atong mga pagpili: “Bisan kita dili hingpit, hingpit ang gugma sa Dios kanato. Bisan kita dili perpekto, perpekto ang gugma Niya kanato. Bisan og gibati nato ingon og nawala ug walay kompas, ang gugma sa Dios hingpit nga naglibot kanato” (Dieter F. Uchtdorf, “Ang Gugma sa Dios,” Liahona, Nob. 2009, 22).

Magmahimong andam sa paghunong

Kita sa kataposan andam sa paghunong kon ang kasakit sa problema mas grabe pa kaysa kasakit sa solusyon. Miabot ka na ba niana nga punto? Kon wala pa ug nagpadayon ka sa imong pagkaadik, seguradong moabot ka niana nga punto tungod kay ang pagkaadik usa ka nagkadako nga problema. Usa kini ka nagkagrabe nga sakit, wagtangon niini ang imong abilidad sa paglihok nga normal.

Sa sinugdanan, ang pagpabiling hingpit nga maligdong ingon og lisod kaayo alang namo. Apan samtang nagpadayon kami sa pagpaminaw sa uban nga nakakaplag og kalinaw ug kaligdong nga among gipangita, misugod kami sa pagtuo nga kami maulian usab.

Sa dili pa kami magsugod sa proseso aron maulian, una kinahanglang aduna kami tinguha nga kami usab maulian (tan-awa sa Alma 32:27). Ang kagawasan gikan sa pagkaadik magsugod sa gamay kaayo nga kidlap sa kaandam. Kon gamay pa ug dili makanunayon ang imong tinguha karon, ayaw kabalaka. Samtang molihok ka, motubo kini! Among nakat-onan nga usa sa labing gamhanan nga mga binuhatan nga among mahimo mao ang pag-ampo ug paghangyo sa Dios nga dugangan ang among tinguha sa paghunong.

Kon ikaw wala pay tinguha sa pagsugod aron maulian, mahimo nimong angkonon ang imong pagkadili andam ug hunahunaon ang mga mahimong epekto sa imong pagkaadik. Ilista kon unsay importante nimo. Hunahunaa ang imong relasyon sa imong pamilya ug mga higala, ang imong relasyon ngadto sa Dios, ang imong espirituhanong kalig-on, ang imong abilidad sa pagtabang ug pagpanalangin sa uban, ug ang imong panglawas. Dayon pangitaa ang panagsukwahi tali sa unsay imong gituohan ug gilaoman ug sa imong gawi. Ikonsiderar kon sa unsang paagi ang imong mga binuhatan makadaot sa unsay imong gihatagan og bili. Pag-ampo nga ang Dios motabang kanimo sa pagtan-aw sa imong kaugalingon ug imong kinabuhi sama sa Iyang pagtan-aw niini—uban sa tanan nimong balaan nga potensiyal—ug kon unsay imong girisgo sa pagpadayon sa imong pagkaadik.

Ang pagkahibalo kon unsay mawala kanimo kon magpadayon ka sa imong pagkaadik makatabang nimo nga makakaplag og tinguha nga mohunong. Kon makakaplag ka og bisan gamay lang kaayo nga tinguha, may luna ka na sa pagsugod. Ug samtang mouswag ka diha sa mga lakang niini nga programa ug makita ang mga kausaban nga moabot sa imong kinabuhi, ang imong tinguha motubo.

Pahinumdom: Depende sa matang sa imong pagkaadik, tingali kinahanglan ka nga magtinguha og medikal nga pagtagad sa dili pa magsugod sa imong pagkaayo. Palihog pagpakonsulta og medikal nga propesyonal.

Pangayo og Suporta

Ang panaw aron maulian ug mamaayo dugay ug lisod, apan dili kinahanglan nga kita mohimo niini nga mag-inusara. Ang pagpakabuhi atol sa pagpaningkamot nga maulian nagkinahanglan og hingpit nga kamatinuoron. Ang paglimod, paglimbong sa kaugalingon, ug pagpalayo mao ang makapalisod niini sa pag-angkon og malungtaron ug makanunayon nga kalamboan aron maulian. Importante nga atong iapil ang suporta sa uban dihadiha dayon kutob sa mahimo. Daghang tawo ang andam nga molakaw uban nato ug motabang nato. Si Presidente Spencer W. Kimball miingon: “Ang Dios makakita kanato, ug Iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan” (Mga Pagtulun-an sa mga Presidente sa Simbahan: Spencer W. Kimball [2011], 103).

Ang pagpangayo og tabang gikan sa Dios ug sa uban dili lang makahatag og kadasig nga atong gikinahanglan sa pagpadayon sa panaw apan makatabang usab nato sa paghinumdom nga kita angayan nga tabangan. Kon mangayo ka og tabang, tingali matingala ka sa kadako sa gugma ug pagdawat nga imong makita. Kon mas masuod ka sa uban, mas daghan ka og oportunidad nga makadawat og gugma ug suporta sa pagdiskobre sa tinuod nga pagkaayo ug maulian.

Ikonsiderar ang lainlaing mga tinubdan nga anaa nimo ug kon unsaon sa pagpanagayo og tabang. Kami morekomendar nga mangita ug makigtambayayong sa usa ka esponsor nga malamposong migamit sa 12 ka lakang. Ang pagka-esponsor dili gayod isangon. Kami moawhag nimo nga mainampoong mokonsiderar kon kinsa ang imong hangyoon aron mahimo nimong esponsor sa labing dali nga panahon. Ang usa ka dapit aron mangita og esponsor anaa diha sa usa ka miting aron maulian. Ang mga miting aron maulian usa ka luwas nga dapit alang kanato nga mopakigbahin ug magkat-on mahitungod sa pagpaningkamot aron maulian.

Ang laing importante nga mga tinubdan sa suporta maglakip sa mga sakop sa pamilya, mga higala, mga lider sa Simbahan, ug mga therapist. Ang labing mahinungdanong tinubdan sa suporta mao ang Langitnong Amahan. Ang pagdesisyon kon kinsa ang atong hangyoon ug kon kanus-a kita mohangyo og suporta usa ka personal nga desisyon. Sa pipila ka sitwasyon, dili luwas o makatabang nato nga modangop o mangayo og tabang gikan sa piho nga mga sakop sa pamilya o mga higala. Hinuon, importante kini nga kita makakuha og daghang suporta gikan sa daghang tinubdan kutob sa mahimo. Alang sa dugang nga impormasyon, palihog rebyoha ang“Suporta samtang Naningkamot nga Maulian” nga seksiyon nga makita sa apendiks niini nga giya.

Tingali maulaw kita nga mangayo og suporta gikan sa uban. Tingali dili kita gusto nga adunay laing tawo nga makahibalo sa among mga problema o mga sayop. Tingali dili kita gusto nga mahimong palas-anon o tingali wala mobati nga kita angayan nga tabangan. Apan among nakita nga ang mga tawo mapanalanginan kon mangayo kita sa ilang tabang. Ang lakang 12 mao ang mahitungod sa serbisyo ug pagtabang sa uban. Kon kadtong naningkamot aron maulian moserbisyo sa uban, mapalig-on sila sa ilang kaugalingong paningkamot aron maulian.

Pagtuon ug Pagsabot

Ang mosunod nga mga kasulatan ug mga pamahayag sa mga lider sa Simbahan makatabang kanimo nga masugdan ang imong pagkaayo. Gamita kini alang sa pagpamalandong, pagtuon, ug pagsulat sa journal. Hinumdomi nga magmatinuoron ug mahimong piho sa imong pagsulat.

Ang akong diosnong pagkatawo

“Lingia pagbalik, maghinumdom nga giprobahan ninyo ang inyong katakos sa inyong premortal nga kinabuhi. Mga maisog kamo nga anak sa Dios, ug uban sa Iyang tabang, modaog kamo sa mga pakig-away niining napukan nga kalibotan. Kaniadto nahimo na ninyo kini, ug mahimo na usab ninyo kini.

“Tan-aw sa unahan. Ang inyong mga problema ug mga kasub-anan anaa gayod, apan dili kini hangtod sa hangtod” (Neil L. Andersen, “Nasamdan,” Liahona, Nob. 2018, 85).

• Molingi pagbalik, unsa nga mga pakig-away ang akong gipakigbatokan ug midaog?

• Kanus-a ko nakadawat og tabang gikan sa Ginoo sa akong kinabuhi?

“Sa Simbahan makadungog ko og daghan nga nanglimbasog niini nga isyu: “Dili igo ang akong kamaayo.’ ‘Daghan kaayo ko og mga kakulangan.’ ‘Dili gayod igo ang akong katakos.’ …

“… Isip mga anak sa Dios, kinahanglang dili nato ipakaubos o daoton ang atong kaugalingon, nga daw ang pagsilot nato sa atong kaugalingon makahimo kanato nga tawo nga maoy gusto sa Dios nga kita mamahimo. Dili!” (Jeffrey R. Holland, “Busa, Kamo Kinahanglan Magmahingpit—sa Kataposan,” Liahona, Nob. 2017, 40).

• Unsaon nako sa pagkat-on gikan sa akong mga sayop samtang maghinumdom gihapon sa akong katakos isip anak sa Dios?

• Unsa ang akong mga hunahuna mahitungod sa paggamit ni Presidente Holland sa pulong nga sa kataposan sa ulohan sa iyang pakigpulong?

Ang akong relasyon ngadto ni Jesukristo

“Ug nakita nila ang ilang mga kaugalingon nga anaa sa kalibotanong kahimtang, gani ubos pa kay sa abog sa yuta. Ug misinggit silang tanan sa kusog nga tingog, nga nag-ingon: O kaluy-i, ug gamita ang maulaon nga dugo ni Kristo aron among madawat ang kapasayloan sa among mga sala, ug maputli ang among kasingkasing; kay nagatuo kami kang Jesukristo, ang anak sa Dios, kinsa milalang sa langit ug sa yuta, ug sa tanang butang; kinsa manaog dinhi uban sa anak sa mga tawo.” (Mosiah 4:2).

Ang proseso aron maulian mahitabo kon kita motutok sa solusyon imbes sa problema. Kon kami mopalig-on sa among relasyon ngadto kang Jesukristo, Siya mohatag namo og gahom ug kalinaw nga among gikinahanglan sa pagpakabuhi aron maulian.

• Unsa ang akong relasyon ngadto kang Jesukristo? Misalig ba ko nga Siya motabang nako?

• Sa dihang akong nahibaloan ang akong mga kahuyang, aduna ba koy kaisog sa pagdangop ngadto sa akong Manluluwas alang sa Iyang matubsanong gahom? Ngano o nganong wala? Kon wala, unsan man nako pagsugod?

“Ang mga kasulatan mipasabot sa doktrina ni Kristo isip pagpakita og hugot nga pagtuo diha ni Jesukristo ug sa Iyang Pag-ula, paghinulsol, pagpabunyag, pagdawat sa gasa sa Espiritu Santo, ug paglahutay hangtod sa kataposan [tan-awa sa 2 Nephi 31].

“Ang Pag-ula ni Kristo naghimo sa mga kondisyon diin kita mosalig sa ‘mga maayong buhat, kaluoy, ug grasya sa Balaang Mesiyas’ [2 Nephi 2:8], ‘mahingpit diha [kang Kristo]’ [Moroni 10:32], moangkon sa matag maayo nga butang, ug moangkon sa kinabuhing dayon.

“Ang doktrina ni Kristo sa laing bahin mao ang paagi—ang bugtong paagi—diin mahimo natong maangkon ang tanang mga panalangin nga anaa alang kanato pinaagi sa Pag-ula ni Jesus” (Brian K. Ashton, “Ang Doktrina ni Kristo,” Liahona, Nob. 2016, 106).

• Ang 12 ka lakang aron maulian usahay gipasabot isip “ginagmay nga mga lakang” tungod kay nag-uswag kini nga mga lakang diha sa proseso sa paggamit sa doktrina ni Jesukristo ngadto sa problema sa pagkaadik. Sa unsang paagi nga ang paghimo niining “ginagmay nga mga lakang” makatabang nako nga madawat ang mga panalangin sa Pag-ula ni Jesukristo?

Ang akong tinguha mao ang paghunong sa pagkaadik

“Samtang mopahilayo kamo gikan sa kalibotanong mga butang, ang pipila ka butang nga ingon og importante kaninyo karon magkawala sa inyong prayoridad. Kinahanglan kamong dili mobuhat sa pipila ka butang, bisan og kini ingon og dili makadaot. Sa inyong pagbuhat ug pagpadayon niining proseso sa tibuok kinabuhi sa pagpahinungod sa inyong kinabuhi ngadto sa Ginoo, ang mga kausaban sa inyong panglantaw, mga pagbati, ug espirituhanon nga kalig-on makapatingala ninyo!” (Russell M. Nelson, “Espirituhanon nga mga Bahandi,” Liahona, Nob. 2019, 77)

Kini nga saad, nga gihimo sa propeta sa Dios, naglatid og makapahingangha nga mga kausaban nga posible kon kita mobalhin sa atong pagtutok ngadto sa Ginoo.

• Unsa nga inadlaw nga mga buluhaton ang akong himoon aron makatutok kang Jesukristo?

• Unsa nga mga kalibotanong makabalda ang dili nako buhaton, mosalig nga kini “magkalayo sa prayoridad”?

“Ug ang Ginoo miingon ngadto [ni Alma]: Ayaw pagkahibulong nga ang tanang katawhan, oo, mga lalaki ug mga babaye, tanang kanasoran, kaliwatan, pinulongan ug katawhan, kinahanglang matawo pag-usab; oo, matawo sa Dios, mausab gikan sa ilang kalibotanon ug napukan nga kahimtang, ngadto sa kahimtang sa pagkamatarong, ingon nga natubos sa Dios, mahimo nga iyang mga anak nga lalaki ug mga anak nga babaye;” (Mosiah 27:25).

• Ang akong kaandam nga mag-usab mao ang yawe aron mahimong matubos gikan sa akong “napukan nga kahimtang.” Aduna ba koy tinguha sa paghunong sa akong pagkaadik? Mibati ba ko nga dili matinguhaon? Kon mao, ngano man?

• Ang kaandam moabot kon hunahunaon nako kon unsay mahimong epekto sa akong pagkaadik ngari kanako ug sa uban. Unsay mahimong mga epekto sa akong pagkaadik?

• Unsay mahimong epekto niini sa akong panglawas?

• Unsay mahimong epekto niini ngadto sa akong pamilya? akong mga relasyon? akong abilidad sa pagtabang sa uban?

• Sa unsang paagi nga ang akong pagkaadik makaapekto sa akong relasyon ngadto sa Dios?

Pagkaplag og tabang

“Isip mga sumusunod ni Kristo, dili kita luwas sa mga hagit ug mga pagsulay sa atong kinabuhi. Kita sa kasagaran pabuhaton og lisod nga mga butang nga, kon sulayan sa pagbuhat nga mag-inusara, mahimong bug-at ra kaayo ug tingali imposible. Samtang atong dawaton ang pagdapit sa Manluluwas nga ‘duol ngari kanako’ [Mateo 11:28], Siya mohatag sa suporta, kahupayan, ug kalinaw nga gikinahanglan” (John A. McCune, “Duol ngadto kang Kristo—Magpakabuhi isip mga Santos sa Ulahing mga Adlaw,” Liahona, Mayo 2020, 36).

• Ang Manluluwas mohatag sa kinahanglanon nga suporta, kahupayan, ug kalinaw sa paghimo sa bug-at o imposible nga mga butang. Unsaon nga akong makaplagan ang suporta ug kahupayan nga Iyang gisaad?

• Ang pagkaayo ba ingon og lisod o tingali imposible kon mosulay ko niini nga mag-inusara?

• Sa unsang paagi nga ang pagkahibalo nga walay tawo nga dili makasinati og mga pagsulay sa ilang kinabuhi ug nga kitang tanan nagkinahanglan og suporta makatabang nako nga dili na magpanagana sa paghangyo og tabang sa uban?

• Nag-ampo ba ko kon kinsa ang akong hangyoon nga mahimo nakong esponsor? Aduna bay mga ngalan nga misantop sa akong hunahuna?

“Pinaagi usab kini sa grasya sa Ginoo nga ang mga indibidwal, pinaagi sa hugot nga pagtuo sa Pag-ula ni Jesukristo ug sa paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon mapasagdan lang sa ilang kaugalingong mga paagi. Kini nga grasya mao ang makaabag nga gahom nga nagtugot sa mga lalaki ug mga babaye nga makaangkon og kinabuhing dayon ug kahimayaan human sila makahimo sa labing maayo nga paningkamot” (Bible Dictionary, “Grace”).

• Adunay mga higayon nga nabiyaan nako og kadali ang akong pagkaadik. Unsaon nga magpabilin o kanunay nga gawasnon gikan sa pagkaadik, bisan kon gikapoy na ko o nawad-an na og kadasig?