Lakang 10: Ipadayon ang paghimo og personal ang imbentaryo, ug kon sayop kita, dawaton dayon kini.

Mahinungdanong Baroganan: Inadlaw nga Pagkamay-tulubagon

Ang lakang 10 makatabang namo nga molambo diha sa among bag-o, espirituwal nga panghunahuna nga paagi sa kinabuhi. Mahitungod kini sa paghimo sa among kaugalingon nga manubag sa matag adlaw pinaagi sa personal nga ebalwasyon, pagdawat sa unsay among madiskobrehan, ug maghinulsol dihadiha dayon. Dili kami hingpit ug padayon nga makahimo og mga sayop sa among kinabuhi ingon man usab sa among pagpaningkamot aron maulian. Pipila namo tingali nabalaka nga dili kami molambo sa among pagpaningkamot aron maulian gawas kon among kompletohon ang matag lakang sa hingpit nga paagi o magpakabuhi nga dili masayop. Ang lakang 10 manalipod namo batok sa pagpamugos sa pagpakabuhi sa hingpit nga paagi. Gipahinumdoman kami nga padayon kaming magkinahanglan sa Ginoo samtang naglambo sa among pagpaningkamot aron maulian.

Diha sa Basahon ni Mormon, si Alma nagtudlo nga ang dakong kausaban sa kasingkasing nagkinahanglan og hugot nga pagtuo diha sa Pagtubos ug Pagkabanhaw ni Kristo (tan-awa sa Alma 5:14–15). Gamit ang sitwasyon sa Adlaw sa Paghukom ug naghatag og daghang ehemplo sa mga pangutana nga mahimo namong ipangutana sa among kaugalingon, si Alma mihatag og gibug-aton sa mahinungdanong tahas sa matinuoron nga pagsuta sa kaugalingon diha sa pagbukas sa among kaugalingon ngadto sa matubsanong gahom Kristo. Magamit namo kini nga baroganan pinaagi sa pagpangutana sa matang sa masusihong mga pagpangutana nga gisugyot ni Alma mahitungod sa among mga pagbati, mga hunahuna, mga motibo, ug pamatasan. Ang inadlaw nga personal nga ebalwasyon ug ang matubsanong tabang sa Ginoo mopahunong namo sa pagkasugamak ngadto sa paglimod, kakompiyansa, ug pagbalik sa bisyo.

Ang maanindot nga proseso aron maulian mao ang pagtugot sa Ginoo sa pag-usab sa among mga hunahuna, mga pagbati, ug mga kasingkasing. Agi og resulta, ang among mga pamatasan mausab. Kadtong nag-una kanamo miawhag namo nga magbantay sa garbo sa tanang porma niini ug mapaubsanong motugyan sa among kahuyang ngadto sa Langitnong Amahan. Ang inadlaw nga pagkamay-tulubagon makatabang namo sa pag-ila sa higayon nga manginahanglan kami og tabang ug makapugong namo sa pagbalik ngadto sa karaan nga mga gawi.

Normal lang nga adunay negatibo nga mga hunahuna ug mga pagbati. Kon kami mabalaka o mobati og kaluoy sa kaugalingon, kahasol, kasilag, kahigal, o kahadlok, makadangop dayon kami ngadto sa Amahan ug mohangyo Kaniya sa pagpanalangin namo og kalinaw ug panglantaw. Tingali madiskobrehan usab namo nga nagtinir pa gihapon kami og negatibo nga mga gituohan. Mahimo kami nga mohangyo sa atong Amahan sa Langit sa pagtabang namo sa paghimo og matinuoron nga paningkamot sa pagbag-o. Sa pagbuhat sa lakang 10, dili na kami mobati og panginahanglan sa pagpangatarongan, pagrason, o pagpasangil. Ang among tumong mao nga ipabiling bukas ang among mga kasingkasing ug ang among mga hunahuna nakatutok sa Manluluwas ug sa Iyang grasya.

Buhaton namo ang lakang 10 pinaagi sa paghimo og inadlaw nga pag-imbentaryo. Samtang among planohon ang among adlaw, mainampoon kami nga mosusi sa among mga binuhatan ug sa posible nga mga motibo: Nagbuhat ba kita og daghan ra kaayo o diyotay ra kaayo? Giatiman ba nato ang atong nag-unang mga panginahanglan sa espirituwal, emosyonal, ug pisikal? Nagserbisyo ba kita sa uban? Aduna bay bisan unsa nga mga sitwasyon sa atong adlaw nga lisod o makaugtas? Nagkinahanglan ba kita og tabang sa uban sa pagdumala niining lisod nga mga butang? Nakakita ba kita og bisan unsang karaan nga mga pamatasan o sundanan sa paghunahuna? Kini nga mga matang sa mga pangutana makatabang namo nga magtarong sa pagpakabuhi, makapalig-on sa among pagpaningkamot aron maulian, ug makapaduol namo ngadto ni Jesukristo.

Mahimo namong susihon ang among kaugalingon bisan kanus-a pinaagi sa paggahin og panahon sa paghunahuna, pagpamalandong, ug sa paggamit sa mga lakang nga among nakat-onan. Kon among makaplagan ang among kaugalingon nga anaa sa panahon sa kalisod, mahimo kami nga mangutana sa among kaugalingon ug sa Dios, “Unsa nga mga kahuyang sa kinaiya nga anaa nako ang napukaw? Unsay akong nahimo nga nakatampo niini nga problema? Aduna bay bisan unsa nga akong masulti o mabuhat nga walay pagpakaaron-ingnon nga moresulta ngadto sa matinahorong solusyon alang kanako ug sa laing tawo? Kami mahimong mopahinumdom sa among kaugalingon, “Ang Ginoo aduna sa tanang gahom. Ako motugyan niini ngadto Kaniya ug mosalig Kaniya.”

Sa higayon nga among makaplagan ang among kaugalingon nga naghimo og negatibo nga buhat ngadto sa laing tawo, kami makahimo sa pagtarong sa mga sayop dihadiha dayon kutob sa mahimo. Importante nga ihiklin ang among garbo ug hinumdoman nga ang matinud-anong pagsulti nga “Nasayop ko” kasagaran sama ra ka importante sa pagsulti nga “Gihigugma ko ikaw.”

Sa pagtapos sa adlaw, among sutaon kon kumusta ang mga butang. Kumusta ang among gibuhat? Kinahanglan pa ba gihapon namo nga magpakitambag sa Ginoo mahitungod sa bisan unsang negatibong mga gawi, hunahuna, o pagbati? Mahimo usab nga makig-istorya sa usa ka sakop sa pamilya, higala, esponsor, o kasaligan nga tigtambag aron matabangan kami nga mas klarong makita ang mga butang.

Siyempre, padayon kaming makahimo og mga sayop bisan pa sa among labing maayo nga mga paningkamot. Apan ang inadlaw nga pagkamay-tulubagon usa ka pasalig sa pagdawat sa responsibilidad alang niini nga mga sayop. Kon among susihon ang among mga hunahuna ug mga binuhatan matag adlaw, mosulbad niini, ug maghinulsol pinaagi sa Manluluwas, ang negatibo nga mga hunahuna ug mga pagbati mahanaw.

“Walay laing mas makapagawasnon, mas makapahamili, o mas importante sa atong kaugalingong paglambo kay sa kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo [tan-awa sa 2 Nephi 9:23]” (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67).

Ang inadlaw nga pagkamay-tulubagon, o ang inadlaw nga paghinulsol, makatabang namo nga makasinati sa kalipay ug kagawasan nga gitanyag sa Manluluwas kanamo. Dili na kinahanglan nga magpuyo kami nga magpalayo sa Ginoo o sa uban. Makabaton kami og kalig-on ug hugot nga pagtuo sa pag-atubang sa mga kalisdanan ug sa pagbuntog niini. Mahimo kami nga magmaya sa among pag-uswag ug mosalig nga ang pagpraktis ug pagpailob moseguro og padayon nga pagkaayo.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Espirituwal nga pagpangandam alang sa matag adlaw

Ang importante nga bahin sa inadlaw nga pagkamay-tulubagon mao ang pagplano sa among adlaw, pagpadayon sa among mga plano, ug dayon pagrebyo kon kumusta ang mga butang sa pagtapos sa adlaw. Kon kami motuyo sa pagbuhat niini, mapanalipdan kami gikan sa pagkaunlod og balik ngadto sa karaan nga mga gawi.

Si Elder David A. Bednar nagtambag nato sa pag-andam sa atong adlaw uban sa Ginoo inigka buntag: “Ang makahuluganon nga pag-ampo sa buntag usa ka butang diha sa espirituhanon nga pagpangandam sa matag adlaw—ug nag-una sa temporal nga pagpangandam o sa tibuok nga pagtrabaho niana nga adlaw” (“Pag-ampo sa Kanunay,” Liahona, Nob. 2008, 41).

Sa among pagdumala sa among adlaw, naghambin kami og pag-ampo sulod sa among kasingkasing alang sa mapadayonon nga panabang ug paggiya. Usahay ang mga butang wala mahitabo sama sa among giplano, ug kinahanglan nga mapahiangayon kami ug magpadayon sa pagpangayo og tabang sa Langitnong Amahan.

Si Elder Bednar midugang sa pagtambag nato: “Sa pagkahuman sa atong adlaw, moluhod na usab kita ug motaho pagbalik ngadto sa atong Amahan. Atong balikon pagtan-aw ang mga panghitabo niana nga adlaw” (“Pag-ampo sa Kanunay,” 42). Samtang motan-aw og balik uban sa Ginoo ug morebyo sa among adlaw, kami mahimong magsaulog sa among mga kalamposan ug mahibalo kon asa kami nasayop. Makigtambag kami sa Ginoo kon unsay kinahanglan namong buhaton sa paghinulsol o sa pagtarong sa mga sayop ug unsaon nga kami makahimo og mas maayo sa sunod higayon.

Inadlaw nga paghinulsol

“Usa lang ka adlaw sa matag higayon” usa ka pamilyar nga hugpong sa mga pulong nga nagpasabot nga magpakabuhi sa usa ka gutlo sa usa ka higayon. Pinaagi sa padayong pagkonsiderar sa atong mga hunahuna, mga pagbati, ug mga pamatasan, kita adunay oportunidad sa paghinulsol ug sa pagpaduol ngadto sa atong Amahan sa Langit. Sa among paghinulsol, among nadiskobrehan ang kamatuoran nga ang paghinulsol dili usa ka makaguol, mapig-oton nga kalisod apan usa ka makapalipay ug makapalingkawas nga kasinatian nga mahinamon natong hangopon.

Sa among paghinulsol matag adlaw, nakadiskobre kami og lain pa nga mga kasaypanan o makahinumdom sa miaging mga binuhatan nga nagkinahanglan og pagtagad ug, sa pipila ka sitwasyon, pakig-uli. Mahimo na kining kabahin sa atong inadlaw nga paghinulsol ang pagtutok pag-usab sa nag-unang mga lakang nga gihimo aron matangtang ang atong mga kalapasan o makahimo og pakig-uli. Ang pagrebyo uban sa among mga esponsor sa unsay among nakat-onan gikan sa among mga paningkamot sa inadlaw nga paghinulsol makahatag og katin-awan sa unsa pay angay nga buhaton aron makahinulsol sa hingpit. Mahimong nagkinahanglan usab kami nga mokompisal ngadto sa tukmang awtoridad sa pagkapari.

Si Presidente Russell M. Nelson miawhag nato nga “sinatia ang makapalig-on nga gahom sa matag adlaw nga paghinulsol—sa pagbuhat ug mahimong mas maayo matag adlaw” (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 67). Sa among pagpaubos sa among kaugalingon ug sa pagpaningkamot nga magmatinuoron matag adlaw, mas napaduol kami ngadto sa Manluluwas. Ang Manluluwas mipahimangno sa Iyang mga disipulo, “Kon adunay buot mosunod kanako, kinahanglan magdumili sa iyang kaugalingon, ug magpas-an sa iyang krus, ug magsunod kanako” (Lucas 9:23). Ang paghinulsol ug ang pagpas-an sa among krus aron mosunod sa Manluluwas matag adlaw moandam namo alang sa lakang 11.

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Magbantay sa among mga hunahuna, mga pulong, ug mga buhat

“Kon dili kamo magbantay sa inyong kaugalingon, ug sa inyong mga hunahuna, ug sa inyong mga pulong, ug sa inyong mga buhat, ug mosunod sa mga sugo sa Dios, ug magpadayon sa pagtuo sa inyong nadungog kabahin sa pag-anhi sa atong Ginoo, gani hangtod sa kataposan sa inyong kinabuhi, kamo gayod mangamatay. Ug karon, O tawo, hinumdomi, ug ayaw pagkamatay” (Mosiah 4:30).

Mahimong peligroso o makamatay kon dili kita mohatag og pagtagad sa unsay atong gibuhat samtang mag-drayb og sakyanan. Isulat ang mahitungod sa pagkahimong mapaniiron sa kaugalingon.

• Sa unsang paagi nga ang pagsuta sa kaugalingon makatabang nako nga makalikay nga mobalik sa akong mga pagkaadik (ug malaglag)?

Pagkamapainubsanon ug pagpugong sa kaugalingon

“Bulahan sila kinsa magpaubos sa ilang mga kaugalingon nga wala pugsa sa pagpaubos” (Alma 32:16).

Ang kaandam sa pagwagtang sa negatibong panghunahuna sa dili pa kini moresulta ngadto sa makapasakit nga kinaiya maoy usa ka paagi sa pagpaubos sa atong kaugalingon nga wala gipugos. Isulat ang mahitungod sa imong pagkaandam sa pagpaubos sa imong kaugalingon. Sulayi sulod sa usa ka adlaw nga walay negatibong mga hunahuna.

• Unsa nga mga panalangin ang miabot nako?

Pagpakabuhi sa karon

“Kon mas nalamdagan ang usa ka tawo, mas magtinguha siya sa gasa sa paghinulsol, ug mas maningkamot siya sa pagpalingkawas sa iyang kaugalingon gikan sa sala sa matag higayon nga mapakyas siya sa balaan nga kabubut-on. … Masabot nga ang mga sala sa mga mahadlokon sa Dios ug sa mga matarong kanunay nga mapasaylo tungod kay sila maghinulsol ug nagtinguha kanunay sa Ginoo sa matag adlaw ug sa matag oras” (Bruce R. McConkie, Doctrinal New Testament Commentary [1973], 3:342–43).

Usa sa labing makaayo nga mga epekto—sa mental, emosyonal, ug espirituwal nga paagi—sa pagsunod sa mga baroganan nga gihulagway dinhi niini nga mga lakang mao nga kami nakakat-on sa pagpakabuhi sa karon.

• Sa unsang paagi nga ang lakang 10 makatabang nako sa pag-atubang sa kinabuhi usa lang ka oras sa matag higayon kon gikinahanglan?

• Sa unsang paagi nakatabang kini nako nga masayod nga kinahanglan nakong sundon ang mga baroganan usa lang ka adlaw sa matag higayon?

Mopadayon sa paghinulsol ug sa pagpasaylo

“Apan kon kanunay sila nga maghinulsol ug mangayo og kapasayloan, uban sa tinuod nga katuyoan, sila pasayloon” (Moroni 6:8).

Ang pagkasayod nga ang Ginoo andam nga mopasaylo namo sa matag higayon nga maghinulsol kami uban sa tinuod nga katuyoan makahatag namo og kaisog nga maningkamot pag-usab sa matag higayon nga masayop kami.

• Unsa ang ipasabot niini ngari nako sa paghinulsol ug sa pagpangayo og pasaylo uban ang “tinuod nga katuyoan”?

Magmapailobon

“Manghinaot ko nga magmapainubsanon kamo, ug magmasinugtanon ug magmalumo; sayon nga hangyoon; puno sa pailob ug mainantoson; mapugnganon sa tanang butang.” (Alma 7:23).

Si kinsa man ang nagsulti sa karaang panultihon “Ang pagpraktis makapahimong perpekto” wala maghisgot kon unsa ka dako nga pailob ang gikinahanglan aron padayon nga magpraktis. Kon kami magmapailobon ug magpadayon sa inadlaw nga pagtarong sa mga sayop ug inadlaw nga pag-imbentaryo, mouswag kami diha sa among dalan paingon sa pagkaayo.

• Sa unsang paagi nga ang pagsuta sa kaugalingon ug ang inadlaw nga pagtarong sa mga sayop moseguro nga ako magpadayon diha sa akong pagpaubos ug sa espirituwal nga kalamboan?

• Sa unsang paagi nga pag-imbentaryo sa pagtapos sa adlaw makatabang nako nga mabuntog ang kalagmitan sa pagtinir og kalagot o ubang makapasakit nga mga emosyon?

Tibuok kinabuhi nga paglambo

“Gibati gihapon nako nga moawhag sa mga Santos sa Ulahing mga Adlaw sa panginahanglan sa paggamit gayod sa mga baroganan sa Ebanghelyo sa atong mga kinabuhi, gawi ug mga pulong ug sa tanan natong buhaton; ug nagkinahanglan kini sa tibuok pagkatawo, sa tibuok kinabuhi nga ihalad ngadto sa kalamboan aron makahibalo sa kamatuoran ingon nga kini anaa ni Jesukristo” (Discourses of Brigham Young, sel. John A. Widtsoe [1954], 11).

Ang pagbuhat niini nga mga lakang mahimong mahulagway isip usa ka “paggamit gayod” sa mga baroganan sa ebanghelyo.

• Sa unsang paagi nga ang kaandam sa pagsusi sa akong kaugalingon kada adlaw sa tanang lebel (mga binuhatan, mga pulong, mga hunahuna, mga pagbati, mga gituohan) makatabang nako sa paghalad sa akong kaugalingon sa tibuok kinabuhi nga paglambo?