Lakang 3: Mohukom nga itugyan ang atong mga kabubut-on ug ang atong kinabuhi ngadto sa pag-atiman sa Dios, ang Mahangtorong Amahan, ug Iyang Anak si Jesukristo.

Mahinungdanong Baroganan: Mosalig sa Dios

Ang lakang 3 mao ang lakang sa pagdeisyon. Sa unang duha ka lakang, miangkon kami unsay dili namo mahimo sa among kaugalingon ug unsay gikinahanglan namo nga buhaton sa Dios alang kanamo. Diha sa lakang 3 gipaila kami sa bugtong butang nga among mahimo alang sa Dios. Mahimo kami nga modesisyon nga ang among mga kaugalingon mahimong bukas ngadto Kaniya ug itugyan ang among tibuok kinabuhi—nangagi, karon, ug umaabot—ug ang among kabubut-on ngadto Kaniya. Ang lakang 3 usa ka buhat sa kabubut-on. Kini ang labing importante nga pagpili nga among himoon niini nga kinabuhi.

Si Elder Neal A. Maxwell mihimo sa mosunod nga pamahayag mahitungod niining labing mahinungdanon nga desiyon: “Ang pagtugyan sa kabubut-on sa tinud-anay mao lamang ang talagsaong personal nga butang nga mahalad nato diha sa altar sa Dios. Lisod kana nga doktrina, apan tinuod kana. Ang daghan pang mga butang nga atong gihatag sa Dios, bisan unsa kini kanindot para kanato, sa tinud-anay mga butang nga Iya nang gihatag kanato, ug gipahulam Niya kini kanato. Apan kon mosugod kita sa pagtugyan sa atong kaugalingon pinaagi sa pagpahisubay sa atong kabubut-on ngadto sa kabubut-on sa Dios, nan naghatag gayod kita og makahuloganong butang ngadto Kaniya” (“Insights from My Life,” Ensign, Aug. 2000, 9).

Si Presidente Boyd K. Packer mihulagway sa iyang desisyon sa pagtugyan sa iyang kabubut-on ngadto sa Dios ug sa kagawasan nga nahatag niana nga desisyon nganha kaniya: “Tingali ang labing dako nga nadiskobre sa akong kinabuhi, walay duda ang labing mahinungdanong pasalig, miabot sa dihang sa kataposan misalig ako sa Dios nga akong ipahulam o itugyan ang akong kabubut-on kaniya—walay pagpamugos o pag-aghat. … Kon buot sabton, … ang pagtugyan sa kabubut-on … ug moingon, ‘Buhaton nako sumala sa imong pagbuot,’ mosangpot sa pagkat-on nga pinaagi sa pagbuhat sa ingon mas mahimo kang gawasnon sa paggamit sa imong kabubut-on” (Obedience, Brigham Young University Speeches of the Year [Dec. 7, 1971], 4).

Sa una namong pagtambong sa mga miting aron maulian, tingali mibati kami nga napugos o gipugos sa uban aron moadto didto. Apan sa pagbuhat sa lakang 3, kinahanglan kami nga mohukom sa paglihok alang sa among kaugalingon. Nakaamgo kami nga ang pag-usab sa among kinabuhi nagkinahanglan sa among kaugalingong desisyon. Dili kadto mahitungod sa unsay gihunahuna o gusto sa among mga pamilya ug mga higala. Kami kinahanglan nga magmatinguhaon nga magpadayon sa pagpaningkamot aron maulian bisan unsa pa man ang mga opinyon o mga pagpili sa uban.

Samtang nagbuhat kami sa lakang 3, among nahibaloan nga sa pagpaninangkamot aron maulian mas dako ang resulta sa mga paningkamot sa Ginoo kay sa among paningkamot. Gibuhat Niya ang milagro sa dihang gidapit namo Siya sa among kinabuhi. Mipili kami sa pagtugot sa Dios sa pag-ayo ug pagtubos namo. Midesisyon kami sa pagtugot Kaniya nga modumala sa among kinabuhi, naghinumdom nga kanunay Siya nga motahod sa among kabubut-on. Among gitugyan ang among kinabuhi sa Iyang mga kamot sa dihang midesiyon kami nga magpadayon sa pagsunod niining nakatutok sa espituwal nga programa aron maulian.

Sa dihang among gibuhat kini nga lakang, nahadlok kami sa unsay wala namo mahibaloi. Unsay mahitabo kon magpaubos kami sa among kaugalingon ug hingpit nga motugyan sa among mga kinabuhi ug kabubut-on ngadto sa pag-alima sa Dios? Alang sa kadaghanan kanamo, ang pagkabata lisod kaayo, ug nahadlok kami nga mahuyang pag-usab sama sa gagmayng mga bata. Tungod sa mga kasinatian kaniadto, nakombinser kami nga ang pagpasalig nga maulian murag imposible. Nakakita kami og daghang tawo nga wala makatuman sa daghan kaayo nga mga pasalig, ug kami mismo daghan usab kaayo og wala matuman. Apan nakadesisyon kami sa pagsulay sa unsay gisugyot sa among naayo na nga mga higala: “Ayaw na paggamit. Tambong sa mga miting. Pangayo og tabang.” Kadtong nag-una kanamo sa pagbuhat sa mga lakang sa pagkaayo midapit kanamo sa pagsulay niining bag-ong paagi sa pagpakabuhi. Mapailobon silang naghulat kanamo nga mahimong andam sa pag-abli sa pultahan ngadto sa Dios bisan gamay lang.

Si Jesukristo mipadangat sa sama nga pagdapit: “Tan-awa, nagatindog ako sa pultahan, ug nagatuktok: kon may magapatalinghog sa akong tingog, ug moabli sa pultahan, kaniya mosulod ako, ug makigsalo ako sa pagkaon uban kaniya, ug siya uban kanako” (Pinadayag 3:20).

Sa sinugdanan, nabalaka ug nagpanagana kami sa among mga paningkamot. Nagpadayon kami sa paghatag ni Jesukristo sa among pagsalig ug unya bawion na usab kini. Nabalaka kami nga masuko Siya sa among pagkadili makanunayon ug mokuha sa Iyang suporta ug gugma gikan kanamo. Apan wala Niya buhata.

Sa hinay-hinay among gitugotan si Jesukristo nga mopakita sa Iyang makaayo nga gahom ug sa kaseguroan sa pagsunod sa Iyang dalan. Ang matag usa kanamo nakaamgo nga dili lang kami kinahanglang nga mobiya sa among pagkaadik, apan kinahanglan usab kami nga motugyan sa among tibuok kabubut-on ug kinabuhi ngadto sa Dios. Sa among pagbuhat niini, nasayran namo nga Siya mapailobon ug madawaton sa among nagkaluya nga mga paningkamot sa pagtugyan ngadto Kaniya sa tanang butang.

Ang among abilidad sa pagbuntog sa tentasyon nakaangkla na karon ngadto sa mapainubsanong pagtugyan ngadto kabubut-on sa Dios. Among gipahayag ang among panginahanglan sa gahom sa Pag-ula sa Manluluwas, ug misugod kami sa pagbati niana nga gahom sulod kanamo, naglig-on kanamo batok sa sunod nga tentasyon. Nakakat-on kami sa pagdawat sa kinabuhi base sa mga kondisyon sa Ginoo.

Ang pagtugyan ngadto sa Dios lisod kaayo alang namo. Nagkinahanglan kini nga among ipahinungod pag-usab ang among kaugalingon ngadto sa Iyang kabubut-on sa matag adlaw, usahay sa matag oras, o gani sa matag gutlo. Sa dihang andam na kami sa pagbuhat sa ingon, among nakaplagan ang grasya ug ang makaabag nga gahom, sa pagbuhat sa unsay dili namo mabuhat sa among kaugalingon.

Ang padayon nga pagtugyan ngadto sa kabubut-on sa Dios nakapaminos sa kaugtas ug nakahatag og dugang nga kahulogan sa among kinabuhi. Dili kaayo kami daling masuko sa gagmayng mga butang nga sagad makapahasol nato. Modawat na kami sa responsibilidad sa among mga binuhatan. Kami motratar sa ubang tawo sama sa pagtratar sa Manluluwas kanila. Ang among mga mata, mga hunahuna, ug mga kasingkasing bukas na sa kamatuoran nga ang mortalidad mahagiton ug nga kanunay kining adunay potensyal sa paghatag kanamo og kasubo ug kasagmuyo ingon man usab sa kalipay.

Sa matag adlaw among gibag-o ang among pasalig nga motugyan ngadto sa kabubut-on sa Dios. Mao kini ang kasagaran nga gipasabot namo sa dihang moingon kami, “Usa lang ka adlaw sa matag higayon.” Nakadesisyon kami nga ihunong ang pagkamatinumanon sa gusto ug pagtinguha alang kaugalingon lamang nga maoy sinugdanan sa among pagkaadik. Ug nakadesisyon kami sa pagtagamtam og laing adlaw sa kalinaw ug kalig-on nga naggikan sa pagsalig sa Dios ug sa Iyang kaayo, gahom, ug gugma.

Ang mga lakang 1, 2, ug 3 makatabang namo nga masabtan kon unsaon pagpakita og hugot nga pagtuo. Usa sa among labing klaro nga mga timailhan sa pagbuhat sa lakang 3 mao nga kami andam gayod sa pagsalig sa Dios nga mopadayon sa sunod nga lakang.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Modesisyon nga mosalig ug mosunod sa Dios

Kini nga mga pulong—gikuha gikan sa “Serenity Prayer” ni Reinhold Niebuhr—makatabang namo samtang modesisyon kami sa pagsalig ug pagsunod sa Dios, “O, Dios, hatagi ako sa kalinaw sa pagdawat sa mga butang nga dili nako mausab, kaisog sa pag-usab sa mga butang nga mahimo nakong mausab, ug kaalam sa pag-ila sa kalainan.” Kini nga mga pulong maayong pagkauyon sa mga pulong ni Propeta Joseph Smith diha sa Doktrina ug mga Pakigsaad 123:17: “Busa, … kita magmalipayon sa pagbuhat sa tanang butang nga ubos sa atong gahom; ug unya kita magmalinawon, uban ang labing dako nga kasiguroan, nga makasaksi sa kaluwasan sa Dios, ug sa iyang mga bukton nga ipadayag.”

Ang Dios mohatag kanato og kalinaw kon kita mosalig sa Iyang abilidad sa pagtabang nato. Kita modawat nga bisan og dili kita makakontrolar sa mga pagpili ug mga binuhatan sa uban, makadesisyon kita kon unsay atong buhaton sa matag sitwasyon nga atong atubangon. Makadesisyon kita uban sa kaisog nga mosalig sa atong Amahan sa Langit ug mobuhat sumala sa Iyang kabubut-on. Atong isalig ang atong kabubut-on ug kinabuhi ngadto sa Iyang pag-alima. Modesisyon kita sa pagsunod Kaniya ug sa pagtuman sa iyang mga sugo.

Sa among pagkaayo, among nasayran nga kinahanglan namong praktison kanunay ang lakang 3. Usahay murag kinahanglan kami nga mopasalig pag-usab matag gutlo o matag adlaw. Dili igsapayan kon pila ka higayon namo kining buhaton. Matag higayon nga kami mobuhat niini, bation namo ang tabang sa Dios ug ang Iyang gugma, ug kami nalig-on sa among pagpaningkamot aron maulian. Si Elder Neal A. Maxwell mipahinumdom kanato: “Ang espirituhanong pagkamanunoton dili makab-ot diha-diha, apan pinaagi sa hinay-hinay nga kauswagan ug pinaagi sa sunod-sunod nga paggamit sa tikanganan nga mga bato. Ang tikanganan nga mga bato gihimo aron tagsa-tagsaon sa paggamit. … Sa kataposan ang atong mga kabubut-on mahimong “kabahin sa kabubut-on sa Amahan” samtang kita “mauyunon sa pagtugyan … sa samang paagi nga ang usa ka bata motugyan ngadto sa iyang amahan’ (tan-awa sa Mosiah 15:7; 3:19)” (“Consecrate Thy Performance,” Ensign, May 2002, 36).

Morebyo ug mobag-o sa mga pakigsaad ngadto sa Dios

Ang pagsalig sa Dios sa tanang butang mahimong sama sa usa ka bag-ong paresan sa antipara ug makita ang tanang butang sa klaro nga paagi. Kon kita modesisyon nga itugyan ang atong kabubut-on ngadto sa Dios, mosugod kita sa pagsinati sa kahupayan ug kalipay nga moabot gikan sa pagtinguha ug pagbuhat sa kabubut-on sa Langitnong Amahan. Usa ka paagi sa pagpakita sa atong kaandam sa pagsalig sa Dios mao ang pagpangandam aron takos nga moambit sa sakramento.

Pakigsulti sa imong bishop o presidente sa branch mahitungod sa imong pagkaadik ug sa imong desisyon sa pagsunod sa kabubut-on sa Dios. Paningkamoti nga motambong sa panagtigom alang sa sakramento matag semana. Samtang magsimba ka, paminaw og maayo sa mga pag-ampo sa sakramento ug ikonsiderar ang mga gasa nga gitanyag sa Langitnong Amahan kanimo. Dayon bag-oha ang imong pasalig nga modawat ug mosunod sa Iyang kabubut-on alang sa imong kinabuhi pinaagi sa pag-ambit sa sakramento kon ang imong bishop o presidente sa branch mouyon nga andam na ka sa paghimo niini.

Samtang ang imong pagpaningkamot aron maulian naglambo, makita nimo ang imong kaugalingon nga mas matinguhaon nga malakip niadtong nagpasidungog sa sakripisyo sa Manluluwas. Mosugod ka sa pagsinati sa reyalidad nga “sa Dios walay butang nga dili mahimo” (Lucas 1:37).

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Ang among ganahan mao nga mangita og labing dali ug labing sayon nga paagi aron maulian. Apan nahibalo kami nga ang pagkamatinuoron ug pagkapiho mas makatabang. Samtang among rebyohon ang among mga tubag sa mosunod nga mga pangutana uban sa among mga esponsor ug uban pa, klaro namong makita ang among mga panglantaw ug mga motibo.

Pagkaplag og panag-uyon uban sa kabubut-on sa Dios

“Ipakig-uli ang inyong mga kaugalingon ngadto sa kabubut-on sa Dios, ug dili sa kabubut-on sa yawa ug sa unod; ug hinumdomi, human kamo makig-uli ngadto sa Dios, nga pinaagi lamang sa grasya sa Dios nga kamo naluwas” (2 Nephi 10:24).

• Unsay ipasabot sa pulong nga pakig-uli?

• Unsay ipasabot nga magpuyo sa akong kinabuhi nga nahiuyon sa kabubut-on sa Dios?

• Sa unsang paagi nga akong mabati ang makaabag nga gahom sa Dios sa akong kinabuhi kon ako modangop ngadto Kaniya?

• Unsay akong gibati mahitungod sa pagtugot sa Dios sa pagdumala sa akong kinabuhi?

• Unsay makapugong nako sa pagtugot Kaniya sa pagdumala sa akong kinabuhi?

Motugyan ngadto sa kabubut-on sa Dios

“Ang mga palas-anon nga gipatong diha kang Alma ug sa iyang kaigsuonan gihimong gaan; oo, ang Ginoo mipalig-on kanila aron ilang madaog ang ilang mga palas-anon sa kasayon, ug misunod sila nga malipayon ug mapailobon sa tanan nga kabubut-on sa Ginoo” (Mosiah 24:15).

Ang Dios makahimo sa pagtangtang sa mga palas-anon ni Alma ug sa iyang katawhan. Apan, Siya milig-on kanila aron “madaog ang ilang mga palas-anon sa kasayon.” Timan-i nga wala sila moreklamo apan malipayon ug mapailobon nga mitugyan ngadto sa kabubut-on sa Dios. Hunahunaa ang mahitungod sa pagpaubos nga kinahanglanon aron mahimong andam nga mapagaan ang palas-anon sa hinay-hinay imbes dihadiha dayon.

• Unsay ipasabot nga motugyan ngadto sa Dios?

• Unsaon nako pagtugyan?

• Unsa ang akong gibati mahitungod sa andam ug mapailobon nga pagtugyan ngadto sa tukmang panahon sa Dios?

• Unsaon nga makabaton ko og kaisog sa pagpadayon sa pagsunod sa Iyang kabubut-on?

Magpuasa ug mag-ampo

“Nagpuasa sila ug nag-ampo sa kanunay, ug nag-anam sa pagkalig-on sa ilang kamapaubsanon, ug nag-anam sa pagkamakanunayon sa pagtuo diha kang Kristo, hangtod nga napuno sa kalipay ug kahupayan ang ilang mga kalag, oo, gani sa paglimpyo ug pagbalaan sa ilang mga kasingkasing, diin nga pagbalaan miabot tungod sa ilang pagtugyan sa ilang mga kasingkasing ngadto sa Dios” (Helaman 3:35).

• Kini nga bersikulo naghulagway og katawhan kinsa mitugyan sa ilang mga kasingkasing ngadto sa Dios. Sa unsang paagi nga ang pagpuasa makatabang nako sa pagtugyan sa akong kasingkasing ngadto sa Dios ug sa paghunong sa pagkaadik?

• Mopasalig ba ko nga mag-ampo sa panahon sa tentasyon alang sa pagpaubos ug hugot nga pagtuo diha kang Kristo? Ngano o nganong dili?

• Unsa ka lig-on ang akong kaandam sa pagtugyan sa akong kasingkasing ngadto sa Dios imbes ngadto sa pagkaadik?

Magpaubos sa atong mga kaugalingon sa atubangan sa Dios

“Apan tan-awa, siya miluwas kanila tungod kay nagpaubos sila sa ilang mga kaugalingon sa iyang atubangan; ug kay nangamuyo sila sa hilabihan ngadto kaniya siya miluwas kanila gikan sa pagkaulipon; ug sa ingon ang Ginoo mobuhat pinaagi sa iyang gahom sa tanang mga sitwasyon taliwala sa mga anak sa katawhan, mopaabot sa bukton sa kaluoy ngadto kanila nga mobutang sa ilang pagsalig ngadto kaniya.” (Mosiah 29:20).

Ang pagpaubos sa among kaugalingon usa ka desisyon. Tingali matental kami sa pagtuo nga bisan og ang Dios mitabang sa uban, Siya dili motabang namo tungod kay kami wala nay mahimo ug wala nay paglaom. Kami makaila nga kini usa ka bakak. Sa pagkatinuod, kami mga anak sa Dios.

• Sa unsang paagi nga kini nga kahibalo makatabang nako nga magpaubos sa akong kaugalingon ug magtinguha og tabang sa Dios?

• Unsa ang ubang mga hunahuna ug sayop nga mga gituohan mahitungod sa Dios ug mahitungod nako nga nakapugong nako sa pagpangaliyupo ngadto sa Dios alang sa kalingkawasan gikan sa pagkaulipon?

Mopili nga mosalig sa Dios

“Ug karon manghinaot ko nga magmapainubsanon kamo, ug magmasinugtanon ug magmalumo; sayon nga hangyoon; puno sa pailob ug mainantoson; mapugnganon sa tanang butang; makugihon nga motuman sa mga sugo sa Dios sa tanang panahon; mangayo sa bisan unsang mga butang nga inyong gikinahanglan, sa espirituwal ug sa temporal; magpasalamat kanunay sa Dios alang sa bisan unsang mga butang nga madawat ninyo.” (Alma 7:23).

Ang pagsalig sa Dios usa ka pagpili. Ang pagkaayo mahitabo pinaagi sa gahom sa Dios apan human lamang sa atong pagpili sa pagtugyan ngadto sa Iyang kabubut-on. Ang atong desisyon moabli sa agianan aron ang Iyang gahom modagayday sa atong kinabuhi. Kini nga kasulatan naghulagway sa mga kinaiya nga gikinahanglan nato sa pagtugyan sa atong kinabuhi ug kabubut-on ngadto sa pag-atiman sa Dios.

• Hain niini nga mga kinaiya ang wala nako?

• Kinsa ang makatabang nako sa pagpalambo sa mga kinaiya nga wala nako?

• Hain niini nga mga kinaiya ang akong kinahanglang trabahoon karon?

• Unsa ang akong mahimo karon aron makasugod sa pagpalambo niini nga mga kinaiya?

Mahimo nga sama sa usa ka bata

“Kay ang kinaiyanhon nga tawo kaaway sa Dios, ug sukad pa gayod sa pagkapukan ni Adan, ug mao gihapon sa umaabot, ug hangtod sa kahangtoran, gawas kon siya motugyan ngadto sa mga pagdani sa Balaang Espiritu, ug mosalikway sa iyang kinaiyanhon nga pagkatawo ug mahimo nga usa ka santos pinaagi sa pag-ula ni Kristo ang Ginoo, ug mahimo nga sama sa usa ka bata, manunoton, maaghop, mapainubsanon, mapailobon, puno sa gugma, mauyonon sa pagtugyan sa tanan nga butang diin ang Ginoo makakita nga angay ipahamtang nganha kaniya, sa samang paagi nga ang usa ka bata motugyan sa iyang kaugalingon ngadto sa iyang amahan” (Mosiah 3:19).

Kadaghanan kanamo nakasinati og dili maayong pagtratar gikan sa mga ginikanan o mga tigbantay, mao nga ang pagkahimong “sama sa usa ka bata” malisod, tingali gani makahadlok.

• Ingon ba niini ang akong sitwasyon? Ako ba adunay wala masulbad nga mga problema ngadto sa ginikanan?

• Unsa ang akong buhaton aron ilahi ang akong mga pagbati mahitungod sa akong mga ginikanan gikan sa akong mga pagbati mahitungod sa Dios?

Pakig-istorya sa Dios

“[Si Jesus] miluhod ug nag-ampo, nga nag-ingon, Amahan, kon buot ka, kuhaa kining kopa gikan kanako; hinoon dili ang akong pagbuot maoy matuman, kondili ang imo” (Lucas 22:41–42).

Niini nga pag-ampo, ang Manluluwas mipakita sa Iyang kaandam sa pagtugyan ngadto sa Langitnong Amahan. Mipahayag Siya sa Iyang mga tinguha, apan mapainubsanon dayon Siya nga mituman sa kabubut-on sa Iyang Amaahan. Usa ka kini ka panalangin nga kami makasulti sa among mga pagbati ngadto sa Dios.

• Sa unsang paagi nga ang pagkahibalo nga ang Langitnong Amahan nakasabot sa akong kahadlok, kasakit, o bisan unsa nga akong gibati makatabang nako nga tinuoray nga moingon, “Matuman ang imong pagbuot”?