Lakang 7: Mohangyo sa Langitnong Amahan sa mapaubsanong paagi nga tangtangon ang tanan natong pagkulang.

Mahinungdanong Baroganan: Pagpaubos

Ang tanang nangagi nga lakang nag-andam kanato alang niini nga lakang. Ang lakang 1 nagtabang nato nga magpaubos ug modawat nga wala kakitay gahom batok sa atong mga pagkaadik. Ang ilakang 2 ug lakang 3 nagtabang nato sa pagbaton og igong pagtuo ug kamasaligon sa Ginoo sa pagpangayo Kaniya og tabang. Ang atong mga pag-imbentaryo gikan sa lakang 4 nagtabang nga mas klaro natong makita ang atong mga kinaiya ug atong mga pamatasan. Ang pagpaningkamot sa lakang 5 nagpakita sa atong kaisog nga magmatinuoron sa Dios, sa atong kaugalingon, ug sa laing tawo. Ang lakang 6 nagtabang nato nga maandam ug andam nga wagtangon ang atong mga kahuyang sa karakter. Andam na kita karon nga mobuhat sa lakang 7. Tutokan nato karon ang “UNSAON” aron mapaningkamotan ang matag lakang: pagkamapainubsanon, pagkabukas sa hunahuna, ug kaandam.

Ang tanan nga lakang nagkinahanglan og pagpaubos, apan ang lakang 7 nagkinahanglan niini sa labing dayag nga paagi: “Mohangyo sa Langitnong Amahan sa mapainubsanong paagi nga tangtangon ang tanan natong pagkulang.” Dihang gibuhat nato ang unang pipila ka lakang alang sa paningkamot aron maulian, atong nakat-onan nga bisan lisod kaayo ang pagpaningkamot sa atong kaugalingon, dili nato mausab o makaplagan ang pagkaulian nga wala ang tabang sa Ginoo. Kini nga lakang walay kalainan. Ang Matinud-anon sa Tinuohan naghulagway sa pagpaubos isip mga mosunod “Ang pagkamapainubsanon mao ang pag-ila sa mapasalamatong paagi sa imong pagdepende diha sa Ginoo—sa pagsabot nga ikaw kanunay nanginahanglan sa Iyang suporta” (Matinud-anon sa Tinuohan: Usa ka Pakisayran sa Ebanghelyo [2004], 142).

Pipila kanamo nagsugod sa pagbalik sa karaan namong mga paagi ug misulay sa pag-usab nga kami ra sa among kaugalingon. Apan dihang naamgohan namo ang among daghan nga sayop ug mga kahuyang, among nakat-onan nga kinahanglan kaming mosalig sa Ginoo alang sa Iyang tabang aron mausab. Sa pagpaningkamot sa lakang 7, wala kami makalingkawas sa buluhaton nga kami ang angay mobuhat. Kinahanglan magmapailobon kami ug “mopadayon sa unahan uban ang pagkamakanunayon kang Kristo” (2 Nephi 31: 20). Nagkinahanglan kami og makanunayong mga pahinumdom sa pagduol sa Dios ug mangayo sa Iyang tabang.

Naghunahuna kami kon sa unsang paagi ang mga milagro mahitabo kanamo. Lahi kini sa matag usa kanamo, apan dunay pipila ka parehas nga paagi. Talagsa ra kaayong dunay mga tawo nga makasinati og mahinuklogon ug kalit nga mga kausaban sa ilang kinaiya; ang anam-anam nga proseso sa lakang 6 ug lakang 7 sa kasagaran nahitabo sa paagi nga gihulagway ni Elder David A. Bednar:

“Kita isip mga miyembro sa Simbahan daw mohatag og gibug-aton sa kahibulongan ug mahinuklogong espirituhanon nga mga pagpakita nga tingali kita napakyas sa pagdayeg ug gani sa pag-alinggat sa naandan nga sundanan diin ang Espiritu Santo nagbuhat sa Iyang buluhaton” (“Ang Espiritu sa Pagpadayag,” Liahona, Mayo 2011, 88).

Kon pilion nato ang pagtugyan ngadto sa Dios pinaagi sa pag-ampo ug pagpasubay sa atong kabubut-on ngadto Kaniya, ang atong mga adlaw puno sa ginagmayng mga gutlo diin Siya modapit kanato sa paghunong sa atong naandan nga batasan mobalos dayon og tubag apan hinuon mosalig sa Iyang gahom sa pagtabang, pagbayaw, ug paghigugma. Si Sister Rebecca L. Craven mitudlo: “Ayaw kawala sa paglaom. Ang kausaban usa ka tibuok kinabuhi nga proseso. … Sa atong panglimbasog nga mag-usab, ang Ginoo mapailubon kanato” (“Imo na ang Sukli,” Liahona, Nob. 2020, 59).

Bisan kon adik man kita sa ilimnon, sa drugas, sugal, kahigal sa pakighilawas, makadaot sa kaugalingong mga naandang kinaiya sa pagkaon, panubra nga pagpanggasto, og ubang makaadik nga kinaiya o mga substansiya nga gamiton nato sa pagwagtang sa kaluya sa kinabuhi, ang Manluluwas “moluwas [kanato] sumala sa [atong] mga kahuyang” (Alma 7:12). Kon maandam kita sa pag-usab pinaagi sa pagdangop ngadto kang Jesukristo, masinati nato ang Iyang makaayo nga gahom.

Samtang maningkamot niini nga lakang, daghan kanamo makakita nga kinahanglan kaming makigbatok sa natural nga pagbati sa kaulaw. Ang pagtan-aw sa among mga sayop mipabati kanamo nga dili pa igo ang among kamaayo o nga kami pakyas na usab. Apan ang paningkamot sa pagbuhat sa mga lakang ug pagduol kang Kristo naghatag kanamo og bag-ong paagi sa pagtan-aw sa among kaugalingon. Gibati namo ang gugma sa Dios ngari namo isip Iyang pinalanggang mga anak. Kini nga paghigugma nagtabang kanamo nga makabatok sa mga pagbati nga kaulaw ug pagkaluoy sa kaugalingon.

Nagsugod kami sa pagkakita sa among mga sayop ug mga kahuyang isip mga oportunidad sa paghangyo sa Dios sa pagtabang nga makapadayon kami sa among panaw aron maulian.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Mohangyo sa Dios sa pagbuhat sa unsay dili nato mabuhat sa atong kaugalingon

Sa unsang paagi atong masunod ang lakang 7 matag adlaw? Mohunong kita atol sa adlaw sa mga panahon nga mobalik ang atong pagkamatinumanon sa gusto o kon makita nato ang atong mga kahuyang. Niining mga panahon, itugyan nato ang atong kaugalingon ug maminaw. Makahinumdom kita nga wala kitay gahom sa pag-usab sa atong kaugalingon kon walay tabang, ug mosalig kita nga ang Ginoo makausab kanato. Dayon magpadayon kita nga mosalig Kaniya. Pasagdan lang nato ang mga dili nato mahimo, ug mohangyo kita sa Ginoo nga tabangan kita.

Nagkinahanglan kini sa pagduol ngadto sa Dios sa pag-ampo. “Matag usa kanato dunay mga problema nga dili nato masulbad nga wala ang pagpakitabang pinaagi sa pag-ampo ngadto sa mas taas nga kapanguhaan sa kalig-on” (James E. Faust, “The Lifeline of Prayer,” Ensign, May 2002, 59).

Kon mag-ampo kita sa makahuloganong paagi ug may katuyoan, makapaduol kita sa gugma sa Dios. Kon hatagan nato ang atong kaugalingon og panahon sa kalinaw ug dapit nga makonektar sa usa nga balaan, makatukod ug makapalig-on kita sa atong relasyon sa Dios. Pinaagi sa pagbaton og usa ka yanong pag-ampo sulod sa atong kasingkasing, sama sa “Ginoo unsay gusto nimo nga akong buhaton?” (Mga Buhat 9:6) o “Ang imong pagbuot mao ang matuman” (Doktrina ug mga Pakigsaad 109:44), padayon natong mahinumdoman ang atong hingpit nga pagpanginahanglan sa Ginoo. Ang atong gugma sa Dios ug ang Iyang gugma alang kanato motabang kanato sa pagporma og usa ka relasyon diin atong ikahatag sa hingpit ang atong kaugalingon.

Tun-an ang mga pag-ampo sa sakramento

Ang mga pag-ampo alang sa sakramento mga talagsaong pagpahayag sa pagpaubos ug katuyoan sa luyo sa lakang 7. Duna kitay oportunidad nga makaambit sa sakramento matag semana ug makapamalandong sa mga pulong sa mga pag-ampo sa sakramento.

Among gisugyot ang pagbasa sa Moroni 4:3; 5:2 ug mapaubsanong mogamit niining sagradong mga pulong sa kaugalingon ninyong tingog sama sa mosunod: “O Dios, ang Amahan sa Kahangtoran, kami mangayo kanimo pinaagi sa ngalan sa imong Anak, si Jesukristo, sa pagpanalangin ug pagbalaan niining pan ngadto sa mga kalag sa tanan niadto kinsa moambit niini; nga sila unta mokaon agi og handomanan sa lawas sa imong Anak, ug mosaksi nganha kanimo, O Dios, ang Amahan sa Kahangtoran, nga sila andam sa pagdala nganha kanila sa ngalan sa imong Anak, ug sa kanunay mahinumdom kaniya, ug maghupot sa iyang mga sugo diin siya mihatag [kanako], nga [ako] unta sa kanunay makabaton sa iyang Espiritu uban [kanako]” (Moroni 4:3).

Kon maghunahuna kita sa mga pag-ampo sa sakramento niini nga paagi, atong maduol ang Manluluwas sa mas personal nga paagi dala ang masulub-ong kasingkasing ug mahinulsolon nga espiritu. Kon maghunahuna kita sa atong mga kahuyang o bisan unsang mga sayop nga tingali atong nahimo, atong matumong ang atong mga kasingkasing ngadto Kaniya. Makahangyo kita Kaniya sa pagtabang kanato sa paghinulsol, mas momaayo, ug pagtangtang niining mga sayop.

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Ang Iyang grasya paigo

“Ug kon ang mga tawo moduol kanako, akong ipakita ngadto kanila ang ilang kahuyang. Ako mohatag sa mga tawo og kahuyang aron sila magpaubos; ug ang akong grasya igo alang sa tanang tawo nga magpaubos sa ilang mga kaugalingon sa akong atubangan; kay kon magpaubos sila sa ilang mga kaugalingon sa akong atubangan, ug magbaton og pagtuo ngari kanako, niana akong himoon ang mahuyang nga mga butang nga malig-on ngadto kanila” (Ether 12:27).

Tungod sa pagka-mortal ug pagkadili perpekto, kitang tanan ubos sa daghang mga kahuyang. Niini nga bersikulo, gipasabot sa Ginoo nga ang Iyang katuyoan sa pagtugot kanato nga makasinati sa pagka-mortal ug makasugat og ingon niana nga mga kahuyang mao ang pagtabang kanato nga magpaubos. Timan-i nga kitay mopili sa pagpaubos sa atong kaugalingon.

• Unsay buot ipasabot ngari nako sa hugpong sa pulong nga “ang akong grasya igo sa tanang katawhan?

• Duna ba akoy pagtuo nga ang grasya sa Ginoo igo alang kanako?

• Unsay buot ipasabot sa pagpaubos sa akong kaugalingon sa atubangan sa Ginoo?

• Ilista ang pipila sa imong mga kahuyang sa kinaiya. Sa sunod niini, ilista ang mga kalig-on nga ilang maangkon kon modangop kamo kang Kristo.

Pilion ang pagmapainubsanon

“Sama sa akong giingon kaninyo, nga tungod kay kamo napugos sa pagpaubos bulahan kamo, wala ba kamo magtuo nga mas bulahan sila kinsa tinuod nga nagpaubos sa ilang mga kaugalingon tungod sa pulong?” (Alma 32:14).

Kadaghanan kanato desperadong moadto sa mga miting aron maulian, giduso kita sa mga sangpotanan sa atong pagkaadik. Napugos kita sa pagpaubos. Hinoon, ang pagpaubos nga gihulagway dinhi niini nga lakang boluntaryo. Resulta kini sa kaugalingon natong mga pagpili sa magpaubos sa atong kaugalingon.

• Sa unsang paagi ang akong mga pagbati sa pagpaubos nausab sukad nga nagsugod ko sa pagkaulian?

Napuno sa kalipay

“Nakita nila ang ilang mga kaugalingon nga anaa sa kalibotanong kahimtang, gani ubos pa kay sa abog sa yuta. Ug misinggit silang tanan sa kusog nga tingog, nga nag-ingon: O kaluy-i, ug gamita ang maulaon nga dugo ni Kristo aron among madawat ang kapasayloan sa among mga sala, ug maputli ang among kasingkasing; kay nagatuo kami kang Jesukristo, ang anak sa Dios, kinsa milalang sa langit ug sa yuta, ug sa tanang butang; kinsa manaog dinhi uban sa anak sa mga tawo.

“Ug nahitabo nga human sila makapamulong niini ang Espiritu sa Ginoo mianha kanila, ug napuno sila sa kamaya, kay nakadawat og kapasayloan sa ilang mga sala, ug nakabaton og kalinaw sa tanlag, tungod sa ilang naghingapin nga pagtuo kang Jesukristo kinsa moanhi” (Mosiah 4:2–3).

Ang katawhan ni Hari Benjamin mihalad sa matang sa pag-ampo nga atong gihalad samtang nagbuhat kita sa lakang 7. Mibati sila og kalinaw ug kamaya sa dihang ang Espiritu sa Ginoo miabot kanila ug mipasaylo sa ilang mga sala.

• Unsay naangkon nakong mga kasinatian dihang mibati ko og kalinaw ug kamaya?

• Unsa kaha ang bation nga makasinati og kalinaw ug kamaya sa akong kinabuhi matag adlaw?

Sundon ang mga sugo

“Pabilin kamo kanako, ug pabilin ako kaninyo. Maingon nga ang sanga sa iya rang kaugalingon dili makabunga, gawas kon magapabilin kini sa tanom, sa ingon usab kamo dili makapamunga gawas kon magapabilin kamo kanako.

“Ako mao ang tanom nga parras, kamo mao ang mga sanga: Ang magapabilin kanako, kang kinsa magapabilin ako, mao siya ang magapamungag daghan: kay gawas kanako wala gayud kamoy arang mahimo. …

“Kon magtuman kamo sa akong mga sugo, magpabilin kamo sa akong gugma, sama nga ako nagtuman sa mga sugo sa akong Amahan ug nagpabilin diha sa iyang gugma.

“Kining mga butanga akong gisulti kaninyo aron ang akong kalipay magpabilin diha kaninyo ug ang inyong kalipay mahingpit.” (Juan 15:4–5, 10–11).

• Unsa ang gipasabot ngari nako nga kon ako motuman sa mga sugo sa Manluluwas, “[ako] magpagbilin diha sa [Iyang] gugma?” (bersikulo 10).

• Sumala niini nga mga bersikulo, unsa ang pipila ka gisaad nga mga panalangin sa pakig-uban Kaniya?

• Unsay gibati nako karon mahitungod sa pagtuman sa mga sugo sa Manluluwas?

• Sa unsang paagi ang pagtuman sa mga sugo usa ka pagpahayag sa akong gugma alang sa Dios?

Gugma sa Dios

“Kon atong unahon ang Dios, ang tanan nga butang mapahimutang sa tukma nilang dapit o mawala kini sa atong kinabuhi. Ang atong gugma sa Ginoo modumala sa mga pangangkon sa atong pagbati, sa mga panginahanglan sa atong panahon, sa mga interes nga atong gitinguha, ug sa han-ay sa atong mga prayoridad” (Ezra Taft Benson, “The Great Commandment—Love the Lord,” Ensign,, May 1988, 4).

Kay nagsugod sa pagkahibalo sa kaluoy ug kaayo sa Dios hangtod karon, tingali nagsugod na kita sa pagbati sa gugma sa Dios—alang Kaniya ug gikan Kaniya.

• Gibati ba nako ang paglambo sa gugma samtang naningkamot sa mga lakang? Kon mao, ngano man?

• Sa unsang paagi ang pagpaningkamot sa lakang 7 makatabang nako nga mahan-ay og balik ang akong mga prayoridad ug mabutang og una ang Dios sa akong kinabuhi?

Pagdala ngari sa among kaugalingon sa ngalan ni Kristo

“Ug karon, tungod sa pakigsaad nga inyong gihimo kamo pagatawgon nga mga anak ni Kristo, iyang anak nga mga lalaki, ug iyang anak nga mga babaye; …

“… Manghinaot ko nga kamo modala diha kaninyo sa ngalan ni Kristo, tanan kamo nga nakasulod sa pakigsaad uban sa Dios nga kamo magmasulundon hangtod sa kataposan sa inyong kinabuhi. …

… Kinsa kadtong magbuhat niini makaplagan diha sa tuo nga kamot sa Dios, kay mahibaloan niya ang ngalan diin siya pagatawgon; kay pagatawgon siya pinaagi sa ngalan ni Kristo” (Mosiah 5:7–9).

• Unsa ang ipasabot sa pagatawgon pinaagi sa ngalan ni Kristo ug magrepsentar Kaniya?

• Unsay kinahanglan nakong buhaton aron makaplagan dapit sa tuo nga kamot sa Dios?

• Unsay gipakigsaad nakong buhaton kon bunyagan ako ug kon ako moambit sa sakramento? (Tan-awa sa Mosiah 5:7–9; 18:8–10, 13; Doktrina ug mga Pakigsaad 20:77, 79.)

• Unsay akong bation kon maghunahuna ko sa kaandam sa Manluluwas nga mohatag ngari nako sa Iyang ngalan agig baylo sa paghimo og usa ka pakigsaad Kaniya sa pagtuman ug pagserbisyo Kaniya, nga naglakip sa paghunong sa akong mga sayop?

Itugyan ang atong mga kahuyang

“Ang relihiyon nga wala magkinahanglan og sakripisyo sa tanang butang walay gahom nga igong makaugmad og pagtuo nga gikinahanglan sa kinabuhi ug kaluwasan” (Lectures on Faith [1985], 69).

• Ang ubang tawo mobasa niini nga mga pulong ug maghunahuna nga ang “tanang butang” nagpasabot sa tanan nga kabtangan. Sa unsang paagi ang pagtugyan sa akong mga kahuyang ngadto sa Ginoo mipalambo sa akong panabot kon unsay kahulogan sa pagsakripisyo sa tanang butang?