Pag-ila ug Pag-abiabi sa Bag-ong Miapil

Ang usa ka bag-ong miapil mao ang usa ka tawo nga bag-o sa mga miting aron maulian. Siya sa kasagaran usa ka indibidwal nga bag-o pang nagsugod sa kausaban, usa ka tawo nga mibalik human sa pagbalik sa gawi, o usa ka higala o sakop sa pamilya sa usa ka tawo nga nagsagubang sa pagkaadik. Si bisan kinsa nga wala nato mailhi tingali usa ka bag-ong miapil, ug tungod kay ang nag-unang pipila ka miting nga tambongan sa mga bag-ong miapil dili sayon, importante gayod nga maningkamot nga kini nga mga indibidwal mobati nga komportable ug giabiabi.

Sa kasagaran ang mga bag-o nga miapil dili segurado ug magpanagana. Hinumdomi nga nagkinahanglan og dakong kaisog ang mga indibidwal aron moangkon nga nalambigit sila sa makadaot nga mga kinaiya, nga ang ilang mga kinabuhi dili na madumala, ug nga sila nagkinahanglan og tabang. Nagkinahanglan usab og kaisog ang mga higala o pamilya aron hisgotan ang mga epekto sa pagkaadik diha sa kinabuhi sa ilang mga minahal ug sa ilang kaugalingong kinabuhi. Ang atong tumong mao ang pagtabang sa mga bag-ong miapil nga gustong mobalik.

Kita adunay responsibilidad sa pagmugna og maabiabihon, madawaton nga palibot sa dili pa, atol sa, ug human sa matag miting. Salig lang nga ang Espiritu mogiya sa mga bag-ong miapil latas sa proseso sa kausaban. Hinumdomi nga ang mga bag-ong miapil kasagaran mobati nga nabug-atan, mao nga pagmahigugmaon ug pagmainampingon sa imong pagtagad. Ang gugma, suporta, ug pag-awhag mao ang mahinungdanong mga elemento sa pagbati nga giabiabi ug giapil.

Nakadawat kami og direksiyon gikan sa Simbahan nga kini nga mga miting alang lamang niadtong 18 anyos ang pangedaron ug mas magulang pa. Kon ang indibidwal ubos sa 18, awhaga sila sa pagkonsulta sa ilang mga ginikanan, bishop, ug tigtabang sa mental nga kahimsog o sa pisikal nga kahimsog alang sa ubang mga opsiyon nga makita nga makatabang. Kon gusto nila og mas detalyado nga pagpasabot, awhaga sila sa pagkontak sa manedyer sa ahensiya sa lokal nga Family Services. Sa higayon nga napahibalo na nimo sila bahin sa lagda, kon magpadayon sila sa pagtambong, ayaw na sila pahinumdomi pag-usab sa lagda ug ayaw pagbuhat og bisan unsa sa pagpatuman sa lagda.

Ang mosunod nga mga sugyot makatabang samtang motabang ka sa mga bag-ong miapil sa wala pa ug sa pagkahuman sa mga miting:

1. Kon motimbaya ka og tawo nga wala pa nimo mailhi, ipaila ang imong kaugalingon ug pangutan-a kon nakatambong na ba siya sa miting kaniadto.

2. Ipaneguro sa mga bag-ong miapil nga anaa sila sa luwas nga dapit. Ipasabot nga nagsunod kita sa baroganan sa pagkakompidensiyal ug kinahanglan lamang sila nga mogamit sa ilang ngalan. Pasabta usab sila nga kon dili sila komportable nga mobasa o mopakigbahin diha sa mga miting, pwede ra silang maminaw.

3. Tugoti nga ang mga bag-ong miapil mopakigbahin lamang sa ilang gusto. Ilha nga sila sa kasagaran mobati nga dili komportable sa pagpasabot kon nganong nagtambong sila sa mga miting.

4. Isugyot nga ang mga bag-ong miapil maminaw sa mga butang nga komon sa ubang mga partisipante. Ang mga bag-ong miapil mas ganahang mobalik sa mga miting kon makasabot sila niadtong nagpakigbahin. Ipasabot nga tungod kay ang atong mga miting bukas para sa tanang indibidwal nga nag-antos sa lainlaing matang sa makadaot nga mga gawi, ang mga sakop sa grupo tingali dili kanunay managsama og kasinatian, apan sa kasagaran makasinati og susama nga mga emosyon, sama niadtong kansang mga kinabuhi naapektohan sa pagkaadik o sa mga kinaiya sa uban. Dapita ang mga bag-ong miapil sa pagpabilin human sa miting kon sila adunay bisan unsa nga mga pangutana.

5. Salig nga ang mga bag-ong miapil makasabot sa programa nga dili makadungog mahitungod sa matag bahin niini. Ipakita sa mga bag-ong miapil ang Pagkaayo pinaagi sa Manluluwas: Ang Programa aron Maulian Gikan sa Pagkaadik 12 ka Lakang nga Giya aron Maulian o ang Suporta nga Giya: Tabang alang sa mga Kapikas ug Pamilya Niadtong Naningkamot aron Maulian ug awhaga sila sa paggamit niini nga mga kapanguhaan (anaa sa Librarya sa Ebanghelyo “Pagkaadik” nga seksiyon sa Tabang sa Kinabuhi). Ipasabot sa mga bag-ong miapil nga pinaagi sa pagpaminaw sa Espiritu, pagtambong sa mga miting, ug pagtuon sa giya, mas makasabot sila og maayo ug magamit ang mga baroganan ug mga pagpraktis nga mogiya ngadto sa kausaban.

6. Ipaila ang mga bag-ong miapil ngadto sa facilitator. Ang mga facilitator mohinumdom kon sama sa unsa ang pag-adto sa unang miting. Sila ang mga ehemplo ngadto sa mga partisipante ug makahatag og personal nga pagsaksi kon sa unsang paagi nga ang programa nakahimo og kausaban sa ilang mga kinabuhi.

7. Kon adunay mga problema nga may kalabotan sa pagpakigbahin sa mga bag-ong miapil sa ilang mga kasinatian, pagmabination kutob sa imong mahimo sa imong pagtubag. Kadaghanan sa mga problema ug mga pangutana mas epektibong masulbad human sa miting kaysa atol sa miting. Sa kadugayan, masabtan ra sa mga bag-ong miapil ang maayong pamatasan sa miting.

8. Ipakigbahin sa mga bag-ong miapil kinsa mga sakop sa pamilya o mga minahal niadtong nakigbisog sa paggamit sa pornograpiya o sa pag-abuso sa druga nga adunay mga miting sa suporta nga grupo alang sa kapikas og pamilya.

9. Human sa miting, personal nga pasalamatan ang mga bag-ong miapil alang sa pagtambong.

10. Hinumdomi nga ang mga bag-ong miapil usa ka panalangin ngadto sa grupo. Ang mga bag-ong miapil maghatag og padayong oportunidad sa pagserbisyo, suporta, ug pagkat-on sa usag usa.