Lakang 5: Moangkon sa atong kaugalingon, ngadto sa atong Langitnong Amahan pinaagi sa ngalan ni Jesukristo, ngadto sa tukmang awtoridad sa pagkapari, ug ngadto sa laing tawo sa eksaktong matang sa atong mga sayop.

Mahinungdanong Baroganan: Pagkompisal

Sa among mga pagkaadik, kadaghanan namo mibati nga gisalikway ug nag-inusara. Bisan diha sa mga okasyon nga ang uban tingali mobati nga konektado, gibati namo nga daw wala kami mohaom. Daghan namo mibati nga nasakitan ug naghunahuna nga walay modawat o mohigugma namo, labi na kon mahibalo sila sa among mga pagkaadik. Sa among pagtambong sa mga miting aron maulian, misugod kami sa pagpakig-uban gikan sa pagpalayo nga maoy nakapagrabe sa pagkaadik. Sa sinugdanan, kadaghanan namo naglingkod lang ug naminaw, apan sa kataposan mibati kami nga luwas ra nga mopakigbahin sa among mga kasinatian. Sa gihapon, daghan kami og gitagoan sa among kaugalingon—mga butang nga makauulaw, mga butang nga makaguol, mga butang nga naghimo kanamo nga mobati nga huyang.

Ang pagbuhat sa lakang 4 tingali mopabalik niining mga pagbati sa kaulaw, mao nga among irekomendar ang pagbuhat sa lakang 5 human dayon makompleto ang lakang 4. Ang paglangay niini susama ra sa pagkahibalo nga adunay samad nga naimpeksyon apan wala limpyohi. Ang pag-angkon sa among mga sayop maingon og lisod kaayo, apan sa dihang nangayo kami og tabang ni Jesukristo, Siya mihatag kanamo og kaisog ug kalig-on.

Ang pagpakigbahin sa among mga kasinatian ngadto sa mga esponsor ug dayon ang pagkompisal ngadto sa among mga bishop murag mao ang labing lisod nga butang nga among nahimo. Apan kadtong nag-una namo mitabang namo nga masabtan ang kaimportante niini nga lakang. Ang pagsulat sa among mga kasinatian nakatabang namo nga hingpit nga masayod sa among mga sayop, mga kahuyang, ug mga sala. Apan ang pagkasayod niini dili igo. Ang pagkaadik mograbe kon itago. Pinaagi sa pagbuhat sa lakang 5, among napahunong kana nga pagtago. Si Sister Carole M. Stephens mitudlo, “Ang paglaom ug pagkaayo dili makit-an pinaagi sa pagtago niini apan diha sa kahayag ug gugma sa atong Manluluwas, si Jesukristo” (“Ang Gamhanan nga Tig-ayo,” Liahona, Nob. 2016, 11). Ang hingpit nga pagkamatinuoron mag-andam kanato alang sa sunod nga lakang ug magtugot ni Jesukristo sa pag-ayo nato sa mas hingpit nga paagi.

Si Presidente Spencer W. Kimball mitudlo: “Ang paghinulsol dili gayod moabot hangtod nga ang tawo nakapadayag sa iyang kalag ug miangkon sa iyang mga binuhatan nga walay mga pasumangil o mga pangatarongan. … Kadtong mga tawo nga mopili sa pag-atubang sa isyu ug pag-usab sa ilang kinabuhi makakaplag nga ang paghinulsol lisod nga dalan sa sinugdanan, apan ilang makaplagan nga maayo kaayo kini nga dalan samtang makatilaw sila sa mga bunga niini” (“The Gospel of Repentance,” Ensign, Oct. 1982, 4).

Misalig sa Dios ug nagbaton og kaisog, nakadesisyon kami sa pagbuhat sa lakang 5. Dili kami segurado kon makahimo ba kami sa pagbuntog sa grabe nga pagbati sa kaulaw ug sa kahadlok nga isalikway. Pipila namo misugod sa pagpakigbahin o pagkompisal apan gidaog sa kahadlok ug kinahanglang mosulay pag-usab. Nag-ampo kami ug mihangyo sa Dios nga tabangan kami nga makabaton og kalig-on nga among kinahanglanon. Ang pagpakigbahin ug pag-angkon sa among mga sayop usa ka gamhanang kasinatian. Sa among paghimo niini, among gibati ang gugma ni Jesukristo alang namo, nga nakahatag namo og paglaom nga ma-okey ra kini.

Bisan og ang among mga esponsor mitabang namo sa pagsulat sa among mga kasinatian, kinahanglan namong ipakigbahin ang among mga kasinatian ngadto nila o sa laing kasaligan nga tawo. Nakita nila ang mga butang gikan sa lahi nga panglantaw ug mitabang namo nga makita ang mga sundanan nga wala namo makita. Sila mitabang namo nga mas masabtan ang among mga hilig paingon sa negatibo nga mga hunahuna ug mga emosyon (sama sa pagkamatinumanon sa gusto, kahadok, garbo, kaluoy sa kaugalingon, kasina, pagpamatarong sa kaugalingon, kasuko, pagpanimalos, kahigal, ug uban pa). Kini nga mga hunahuna ug mga pagbati mopakita sa matang o mao ang mga bunga sa among mga sayop. Apan ang among mga esponsor nakakita sa kamaayo nga anaa kanamo ug mitabang namo nga makita ang kamaayo nga anaa sa among kaugalingon.

Mikompisal kami ngadto sa among mga bishop o mga presidente sa branch sa bisan unsa nga butang nga ilegal o makapugong namo nga makabaton og rekomend sa templo. Kon kami adunay pagduhaduha mahitungod sa unsay among ikompisal, nangutana kami sa among mga lider sa pagkapari. Ang among mga pagkompisal naglakip sa pagtinguha og kapasayloan gikan ni Jesukristo pinaagi sa pag-ampo ug tukmang awtoridad sa pagkapari. Sa kadaghanan namo, kini nga kasinatian nakapalingkawas. Among gihaw-as ang among bug-at nga mga palas-anon ug gibutang kini diha sa tiilan sa Manluluwas. Mibati kami og kalinaw, kalipay, ug gugma. Kini nga kasinatian sagrado ug matam-is.

Mga Lakang nga Buhaton

Kini usa ka programa sa paglihok. Ang among kalamboan nagdepende sa makanunayon nga paggamit sa mga lakang diha sa among inadlaw nga mga kinabuhi. Nailhan kini isip “pagbuhat sa mga lakang.” Ang mosunod nga mga buluhaton motabang namo sa pagduol ngadto ni Kristo ug sa pagdawat sa giya ug gahom nga kinahanglanon sa sunod nga lakang sa among pagpaningkamot aron maulian.

Mopakigbahin sa among mga kasinatian gikan sa lakang 4 ngadto sa among mga esponsor ug mokompisal sa among mga sala ngadto sa Dios ug sa tukmang mga awtoridad sa pagkapari kon gikinahanglan

Si Alma mitambag sa iyang anak nga lalaki nga si Corianton nga “moangkon sa [iyang] mga sayop ug mga kalapasan nga [iyang] nabuhat” (Alma 39:13). Kini nga tambag magsilbing giya ug inspirasyon sa pagbuhat sa lakang 5. Kini nga lakang naglakip sa pagpakigbahin sa atong mga kasinatian gikan sa lakang 4 ngadto sa laing tawo, kasagaran sa usa ka esponsor, nga nakaagi na sa proseso ug makatabang nato sa pagpakigbahin sa matinuoron ug maayo nga paagi. Kon walay esponsor, mainampoong mopili og laing kasaligan nga tawo, mas pilia ang tawo nga nakasinati og hingpit nga pagkaayo gikan sa pagkaadik. Likayi ang tawo nga sa imong suspetsa mohatag og dili tukma nga giya, mosangkap og sayop nga impormasyon, o maglisod sa pagtipig og mga kompidensiyal. Mosugyot usab kami nga magbantay sa pagpakigbahin sa atong mga kasinatian ngadto sa duol nga mga sakop sa pamilya. Importante nga makigtambag sa atong mga bishop o mga therapist sa pagdesisyon kon kanus-a itug-an ang atong mga gawi ngadto sa kapikas aron malikayan nga madugangan ang ilang kasakit.

Si Jesukristo mitudlo nga ang pagkompisal usa ka mahinungdanon nga bahin sa proseso sa paghinulsol: “Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokompisal niini ug mobiya niini” (Doktrina ug mga Pakigsaad 58:43). Busa, mokompisal kita sa atong mga sala ngadto sa atong Langitnong Amahan pinaagi sa ngalan ni Jesukristo ug mangayo sa Iyang kapasayloan. Dugang pa, kinahanglan kita nga mokompisal sa atong mas bug-at nga mga kalapasan ngadto sa bishop o presidente sa branch. Kon ikaw dili segurado kon unsay ikompisal, paminaw sa imong tanlag ug pagmatngon sa seksuwal nga mga sala o ubang imoral nga mga pamatasan. Kon nagduhaduha, hinumdomi ang imbitasyon ni Isaias nga “ngari kamo ug maghusay kita” (Isaias 1:18) ug isulti ang imong mga pangutana ngadto sa imong lider sa pagkapari.

“Samtang ang Ginoo lamang ang makahimo sa pagpasaylo og mga sala, kini nga mga lider sa pagkapari adunay mahinungdanon nga tahas diha sa proseso sa paghinulsol. Sila mopabiling kompidensiyal sa imong pagkompisal ug motabang nimo sa tibuok proseso sa paghinulsol. Pagmatinuoron sa hingpit ngadto kanila. Kon gamay lang ang imong ikompisal, nga naghisgot lamang sa mas ginagmay nga kasaypanan, dili ka makahimo sa pagsulbad sa mas bug-at, wala ikatug-an nga kalapasan. Kon imong dalion ang pagsugod niini nga pamaagi, mas dali ka nga makakaplag og kalinaw ug hingpit nga kalipay nga moabot uban sa milagro sa pagpasaylo” (True to the Faith: A Gospel Reference [2004], 134).

Tugotan ang kalinaw nga mosulod sa atong kinabuhi

Ang paghinulsol ug pagkompisal magdala og kalinaw sa atong kinabuhi. Si Elder Quentin L. Cook mihulagway sa kalinaw pinaagi sa pagpahayag: “Kon dunay dako nga sala, ang pagkompisal gikinahanglan aron makaangkon og kalinaw. Tingali walay ikatandi sa kalinaw nga moabot sa tawo nga nakasala nga mitugyan sa iyang mga palas-anon ngadto sa Ginoo ug nangayo sa mga panalangin sa Pag-ula” (“Personal nga Kalinaw: Ang Ganti sa Pagkamatarong,” Liahona, Mayo 2013, 32).

Usahay ang mga tawo nga anaa sa mga miting aron maulian o anaa sa laing mga sitwasyon magsige og balikbalik og sulti sa ilang mga sala ug mga kasaypanan. Bisan og kanunay sila nga nagkompisal sa ilang mga sayop, wala gayod sila makakaplag og kalinaw. Ayaw saypi ang lakang 5 isip usa ka naghingapin nga tinguha nga magpadayon diha sa negatibo nga mga butang. Ang tuyo sa lakang 5 mao ang sukwahi niini. Nagbuhat kita sa lakang 5 dili aron sa paghupot sa mga butang nga atong gikompisal apan sa pagsalikway niini.

Sa dihang matinuoron ug hingpit namong nakompleto ang lakang 5, kami wala nay gitago. Dayag namong gipakita ang among tinguha nga “biyaan ang tanan [namong] sala” (Alma 22:18) aron madawat namo ang mas dakong kahibalo bahin sa gugma sa Dios ug sa gugma sa daghang tawo nga nagpakabana namo.

Pagtuon ug Pagsabot

Ang mosunod nga mga kasulatan ug mga pamahayag gikan sa mga lider sa Simbahan makatabang sa among pagpaningkamot aron maulian gikan sa pagkaadik. Mahimo namo kining gamiton alang sa pagpamalandong, pagtuon, ug pagsulat sa journal. Kinahanglan nga among hinumdoman nga magmatinuoron ug maghatag og piho nga detalye sa among pagsulat aron makabaton sa labing maayo nga benepisyo gikan niini.

Mokompisal ngadto sa Dios

“Ako, ang Ginoo, mopasaylo sa mga sala ngadto niadto kinsa mokompisal sa ilang mga sala sa akong atubangan ug mangayo og pasaylo” (Doktrina ug mga Pakigsaad 64:7).

• Sa unsang paagi nga ang pagkompisal sa akong mga sala ngadto sa Dios makatabang nako sa paghimo og positibong mga kausaban sa akong kinabuhi? Sa unsang paagi nga nakahatag kini kanako og kaisog ug kalig-on sa pagkompisal ngadto sa laing tawo?

Motutok diha sa unsay pagtan-aw sa Dios ngari kanato

“Ayaw tugoti si bisan kinsa nga momantala sa iyang kaugalingong pagkamatarong; … sa dili madugay [ipakompisal niya ang] iyang mga sala, ug dayon siya mapasaylo, ug siya modala og dugang pa nga mga bunga” (Joseph Smith, in History, 1838–1856 [Manuscript History of the Church], volume C-1 Addenda, 46, josephsmithpapers.org).

• Usa ka hilabihan nga gipaningkamotan sa mga tawo nga nakigbisog sa pagkaadik mao ang tinguha nga maayo silang tan-awon ngadto sa uban. Sa unsang paagi kini nga tinguha makapugong nako sa pagpalambo ug sa pagdala og “mas daghang bunga,” o mga maayong buhat?

• Sa unsang paagi nga ang akong pamatasan mausab kon mas maghunahuna ko sa unsay pagtan-aw sa Dios kanako?

Magpakasinsero

“Si bisan kinsa nga makalapas batok kanako, imo siyang hukman sumala sa mga sala nga iyang nabuhat; ug kon mokompisal siya sa iyang mga sala sa imong atubangan ug kanako, ug maghinulsol nga adunay sinsero nga pagbati sa iyang kasingkasing, pasayloon nimo siya, ug ako mopasaylo usab kaniya.” (Mosiah 26:29).

Kon mokompisal kita sa atong mga sala, kinahanglan nga sinsero kita.

• Mokonsiderar kon sa unsang paagi nga ang pagpugong og usa ka bahin sa akong pagkompisal mopahuyang sa pagkasinsero sa akong mga paningkamot. Unsa nga bahin sa akong imbentaryo, kon aduna man, nga natental ko nga itago?

• Unsay akong makuha kon akong itago kini nga bahin sa akong imbentaryo? Unsay mawala nako?

• Sa unsang paagi nga si Jesukristo mopanalangin sa akong kinabuhi kon akong unahon sa pagkompisal ang labing lisod nga mga butang ug itugyan kini ngadto Kaniya?

Mokompisal dayon sa among mga sala sa higayon nga kami makaamgo niini

“Niining mao nga tuig gidala sila ngadto sa kasayoran sa ilang sayop ug mikompisal sa ilang kasaypanan.” (3 Nephi 1:25).

• Kini nga bersikulo maoy usa ka ehemplo sa katawhan kinsa wala maglangay sa pagkompisal sa ilang mga kasaypanan sa higayon nga sila nakaamgo niini. Unsa ang kaayohan sa pagkompisal sa akong mga sala human dayon nga ako makaamgo niini?

• Unsa ang makadaot nga mga epekto sa paglangay sa pagkompisal sa akong mga sala?

Makahupay sa kaugtas ug makakaplag og kalinaw

“Dili ko mopadayon sa paghisgot sa imong mga sala, aron sa paghasol sa imong kalag, kon kini dili alang sa imong kaayohan.” (Alma 39:7).

Ang ubang mga tawo tingali makaingon nga ang mga lakang 4 ug 5 nagtutok og maayo sa negatibo nga mga butang ug nagdugang lamang sa kaugtas sa pagpaningkamot aron maulian. Dinhi niini nga bersikulo, atong makat-onan nga ang pagkahibalo sa atong mga kalapasan ug ang pag-atubang sa atong mga kasaypanan makatabang nato aron maulian.

• Sa unsang mga paagi ang mga lakang 4 ug 5 makahupay sa akong kaugtas ug makahatag nako og dugang nga kalinaw?

Mobiya sa sala

“Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokompisal niini ug mobiya niini” (Doktrina ug mga Pakigsaad 58:43).

• Ang pagbiya sa usa ka butang nagpasabot sa pagsalikway niini o paghunong niini sa hingpit. Sa unsang paagi nga ang pagkompisal sa akong mga sala nagpakita sa akong tinguha sa pagbiya sa akong karaan nga mga binuhatan?