Mubong panapos nga pagpasabot

Sa among pag-abot sa kataposan niini nga giya, kami mopamatuod nga wala pa kami moabot sa kataposan niining sagrado nga panaw. Sa una namong pag-adto sa mga miting aron maulian, naghunahuna kami nga ang labing dakong milagro nga among masinati mao ang among pagkaayo gikan sa pagkaadik. Kadtong uban kanamo nga nakasinati niini nga panalangin nasayod nga adunay mas daghan pa—mas daghan pang buhat nga angayng himoon ug mas daghan pang mga milagro ug grasya nga angayng masinati. “Ang wala makita ug madungog, ug ang wala gayod palandonga sa tawo, mao ang giandam sa Dios niadtong nahigugma kaniya” (1 Mga Taga-Corinto 2:9).

Kami nga nakahimo niini nga mga lakang ug nakakaplag og pagkaayo nanghinaot ug nag-ampo nga ikaw usab mapanalanginan og hingpit nga pagkaayo, lakip na ang nadugang nga mga panalangin sa hingpit nga partisipasyon sa Simbahan. Ang pagkalimpyo ug kaligdong mao ang sinugdanan sa paghangop sa tanang gitagana sa Ginoo alang nato.

Pipila namo nga miapil sa programa, naghunahuna nga naulian na, mihunong sa pag-apil, ug dayon mibalik sa bisyo. Ang uban nakakaplag og pagkaayo apan mihunong sa pagdawat sa mga panalangin sa hingpit nga pagkaaktibo sa Simbahan. Among nakita nga ang tinuoray nga pagkaayo naglakip sa pagkaplag og balanse ug koneksiyon tali sa 12 ka lakang aron maulian ug sa ebanghelyo ni Jesukristo.

Kami nahimong bag-o nga mga nilalang diha kang Kristo, ug sa ingon niana, mahimo kaming mapuslanon nga mga instrumento sa pagtabang sa Ginoo sa duha ka habig sa tabil (tan-awa sa 2 Mga Taga-Corinto 5:17). Kami mopamatuod bahin sa dugang nga kaalig-on nga among nakaplagan samtang nagpadayon kami sa pagpraktis niini nga mga baroganan sa ebanghelyo sa tanang aspeto sa among kinabuhi, lakip na sa among pagkaaktibo sa Simbahan. Ang mga baroganan nga among gigamit aron maulian, ang mga leksiyon nga among nakat-onan, ug ang mga kasinatian nga among naangkon nakatabang namo sa pagduol ngadto kang Kristo sa mas hingpit nga paagi ug naggiya namo sa pagbuhat sumala sa plano sa Ginoo. Nahimo kami nga “matinguhaon nga moapil” nga mga miyembro sa Ang Simbahan ni Jesukristo sa mga Santos sa Ulahing mga Adlaw (Doktrina ug mga Pakigsaad 58:27).

Ang Ginoo mipanalangin namo samtang gigamit namo ang mga himan nga gisugyot niini nga giya. Hinuon, ang Simbahan ni Jesukristo mao ang balay-tipiganan sa tanang himan nga kinahanglanon aron magpabilin kami sa among kabuotan ug motubo ug molambo diha sa dalan sa pakigsaad. Sa among pagtapos niini nga giya, kami modapit sa tanang partisipante diha sa Simbahan nga Programa aron Maulian gikan sa Pagkaadik nga “mopadayon sa unahan uban ang pagkamakanunayon diha kang Kristo, magbaton og hingpit nga kahayag sa paglaom, ug gugma sa Dios ug sa tanang tawo” (2 Nephi 31:20). Kon buhaton nato kini, kita hatagan sa labing mahinungdanon sa tanang gasa sa Ginoo: “Makabaton kamo og kinabuhing dayon” (bersikulo 20).

Agi og pagtapos, kami mobilin nimo sa among pagpamatuod nga adunay paglaom ug pagkaayo pinaagi sa Manluluwas nga si Jesukristo ug niini nga mga baroganan. Nakaapil kami sa ebanghelyo ug nakahimo niini nga mga lakang, ug kami nasayod nga epektibo kini. Kami modapit nimo sa pag-ampo alang sa tinguha ug kaandaam sa pagpadayon niini nga buhat, magtugot sa walay kinutobang grasya ni Jesukristo aron mahingpit ang imong pagkaayo. Hinaot nga ang Dios mopanalangin sa imong panaw.