Hilamani 3–6

Abantakwe uNifayi noLihayi

Ukuva ilizwi elivela ezulwini

UNifayi noLihayi babengabantakwe ababefuna wonke umntu azi ngevangeli kaYesu Krestu. AmaNifayithi namaLeymenayithi ayesemfazweni, kodwa abantakwe babesabafundisa abantu bala maqela omabini. Ngenye imini besahamba beyokufundisa abantu, umkhosi wamaLeymenayithi wabafaka entolongweni.

Hilamani 3:20–21, 37; 4:4–5, 14; 5:4–21

Kwiintsuku ezininzi ezilandelayo, umkhosi weza entolongweni uzokubulala uNifayi noLihayi.

Hilamani 5:22

Phambi kokuba abantu babe nokonzakalisa uNifayi noLihayi, isangqa somlilo sabonakala sibarhangqile. Umlilo awuzange ubatshise. Endaweni yoko, uThixo wabagcina bekhuselekile. Emva koko umhlaba waye washukuma. Kwakukhangeleka ngathi iindonga zentolongo ziza kuwa phantsi. Ngokukhawuleza, ilifu elimnyama lagquma bonke abanye abantu ababephakathi entolongweni. Abantu babesoyika kakhulu.

Hilamani 5:23–28

Ilizwi lavakala ngaphezu kwelifu elimnyama. Lalizolile, njengokusebeza, kodwa abantu baye baliva kwiintliziyo zabo. Eli lalililizwi likaThixo. UThixo wabaxelela ukuba baguquke.

Hilamani 5:29–30, 46–47

Umhlaba nentolongo washukuma ngakumbi. Ilizwi leza kwakhona laze laxelela abantu ukuba baguquke. Abantu babengakwazi ukushukuma ngenxa yelifu kunye noloyiko.

Hilamani 5:31–34

Enye indoda apho kwisihlwele yayinegama elingu-Aminadabhi. Wayekhe waba ngoweBandla likaThixo. Waye waqaphela ukuba ubuso bukaNifayi nobukaLihayi babukhazimla ngokuqaqambileyo. Babekhangeleka ngokungathi ziingelosi. Kwakukhangeleka ngathi babethetha nomntu osezulwini. U-Aminadabhi waxelela bonke abantu ukuba bajonge uNifayi noLihayi.

Hilamani 5:35–39

Abantu baye babuza u-Aminadabhi ukuba kwakufuneka benze ntoni na ukuze balisuse ilifu elimnyama. U-Aminadabhi waye wababela oko wayekwazi ngoThixo noYesu. Waxelela abantu ukuba baguquke, babe nokholo kuYesu, nokuba bathandaze kuThixo. Abantu baye bamamela u-Aminadabhi. Bathandaza bada ubumnyama bemka.

Hilamani 5:40–42

Umlilo osuka kuThixo warhangqa bonke abantu kwaye awuzange ubatshise. Abantu babezaliswe nguMoya oyiNgcwele kwaye babonwabile. Babethetha izinto ezimangalisayo. Ilizwi leza kwakhona. Labaxelela ukuba babe noxolo ngenxa yokholo lwabo kuYesu. Iingelosi zeza kwaye zatyelela abantu.

Hilamani 5:43–49

UNifayi, uLihayi, nabo bonke abantu bemka entolongweni. Baxelela abantu abaninzi kwilizwe lonke ngoko babekubonile kunye noko babekuvile ngalo mini. Uninzi lwamaLeymenayithi akholelwa kwaye akhetha ukulandela uYesu. Bayeka ukulwa kwimfazwe. Endaweni yoko, banceda abantu okokuba babenokholo kuYesu Krestu kwaye baguquke.

Hilamani 5:50–52; 6:1–6