28-р хичээл
Авралын ажлыг яаравчлуулах нь
Оршил
Сүүлийн үед Сүмийн удирдагчид “Өөрийн ажлыг … яаравчлуулах болно” (С ба Г 88:73) гэсэн Их Эзэний бошиглолыг онцлох болсон. Авралын ажилд гишүүдийн номлолын ажил, хөрвөгчдийг үлдээх, идэвх султай гишүүдийг идэвхжүүлэх, ариун сүмийн болон гэр бүлийн түүхийн ажил, сайн мэдээг заах зэрэг орно. Энэ хичээл нь суралцагчдад Есүс Христийн Хожмын Үеийн Гэгээнтнүүдийн Сүмийн гишүүний хувьд энэ ажилд оролцох өөрсдийн үүргийг илүү сайн ойлгоход нь тусална.
Нөхцөл байдлын тухай унших материал
-
Дийтр Ф.Угдорф, “Та сэргээлтийн ажлын үеэр унтаж байна уу?” Ensign эсвэл 2014 оны 4-р сарын Ерөнхий чуулган, 78–81.
-
“Hastening the Work of Salvation,” Ensign, 2013 оны 10-р сар, 36–39.
Заах зөвлөмж
Сургаал ба Гэрээ 138:53–56
Их Эзэн Өөрийн ажлыг яаравчлуулж байна
Суралцагчдад ерөнхийлөгч Жозеф Ф.Смит нас барахынхаа өмнөхөн сүнсний дэлхийн тухай үзэгдэл харсан бөгөөд энэ нь Сургаал ба Гэрээ 138-д цэдэглэгдсэн гэдгийг хэл. Тэрээр сүүлчийн эрин үеийн удирдагчид болон “бусад” олон хүн дэлхий дээр өөрсдийн үүргийг биелүүлэхээр мөнх бус амьдралын өмнөх дэлхийд бэлтгэгдсэн гэдгийг олж мэдсэн байна. Нэг суралцагчийг Сургаал ба Гэрээ 138:53–56-г чанга уншихад мөн ангийнхныг уг хэсгийг дагаж хараад, эдгээр удирдагчид мөнх бус амьдралын өмнөх дэлхийд хүлээлгэн өгсөн үүргийг олж мэдэхэд урь.
-
Мөнх бус байдлын өмнөх оршихуйд эдгээр удирдагчид ямар үүрэг өгөгдсөн бэ? Тэнд тэд ямар бэлтгэлийг хүлээн авсан бэ?
-
Мөнх бус байдлын өмнөх оршихуйд танд ямар үүрэг хүлээлгэсэн байж болох вэ? Та ямар бэлтгэлийг хүлээн авсан байж болох бэ? (Суралцагчдыг санал бодлоо хуваалцах хооронд, тэдэнд дараах зарчмыг олж тогтооход нь тусал: Мөнх бус байдлын өмнөх оршихуйд бид цаг хугацааны бүрэн байдалд дэлхийд ирж, хүмүүний бодгалийг аврахын тулд ажиллахаар бэлтгэгдсэн.)
Нэг суралцагчаас ерөнхийлөгч Томас С.Монсоны хэлсэн дараах үгийг чанга уншихыг хүс:
“Сэргээгдсэн Сүм 100 гадастай болох үедээ 98 настай байсан гэдгийг та нар мэдэх үү? Гэхдээ гуч хүрэхгүй жилийн дараа гэхэд Сүм хоёр дахь 100 гадсыг зохион байгуулсан байсан. Үүнээс ердөө наймхан жилийн дараа Сүм 300 гаруй гадастай болсон байна. Өнөөдөр [2014 онд] бид 3000 гаруй гадастай болж, илүү хүчирхэгжээд байна.
Яагаад ийм хурдацтай өсөж байна вэ? Энэ нь бид илүү сайн танигдсан учраас уу? Аль эсвэл бид хараа булаам сайхан сүмийн барилгуудтай учраас тэр үү?
Эдгээр нь чухал зүйл боловч Сүм өнөөдөр өсөн тэлж байгаагийн шалтгаан нь Их Эзэн ийм болно хэмээн хэлсэн учраас юм. Их Эзэн Сургаал ба Гэрээнд ‘Болгоогтун, бибээр өөрийн ажлыг зохих цагт нь яаравчлуулах болно’ хэмээн хэлсэн [С ба Г 88:73].
Тэнгэрлэг Эцэгийн сүнсэн хүүхдүүдийн хувьд бид энэ агуу ажлыг яаравчлуулахад оролцохоор энэ цаг үед дэлхий рүү илгээгдсэн юм” (“Hastening the Work,” Ensign, 2014 оны 6-р сар, 4).
-
Ерөнхийлөгч Томас С.Монсоны хэлснээр бид яагаад дэлхий рүү энэ цаг үед илгээгдсэн бэ? (Суралцагчдыг хариултаа хуваалцах хооронд тэдэнд дараах зарчмыг ойлгоход нь тусал: Бид Тэнгэрлэг Эцэгийн ажлыг яаравчлуулахад оролцох үүрэг хариуцлагатай.)
-
Та Бурханы ажил ямар арга замаар “яаравчилж” байгааг гэрчилж байсан бэ? (Номлолын үйлчлэлийн насанд өөрчлөлт орсон мөн номлогчдын болон ариун сүмийн тоо өсөж байгаа, гэр бүлийн түүхийн ажлыг хялбарчлах хэрэгсэл нэмэгдэж байгаа гэх мэт олон хариулт бий.)
Эдгээр хариулт нь Их Эзэн Өөрийн ажлыг гивлүүрийн хоёр талд яаравчлуулж байгааг нотолж байгаа гэдгийг онцол. Өнөөдрийн Сүмийн удирдагчид авралын ажлын доторх таван хэсгийг онцолж байгаа бөгөөд хожмын үед Бурханы ажлыг яаравчлуулахын тулд бидний хүн нэг бүрийг эдгээр хэсэгт гар бие оролцохыг хүсэж байгааг тайлбарла. Нэг суралцагчаас Далын ерөнхийлөгчийн зөвлөлийн ахлагч Л.Витни Клэйтоны хэлсэн дараах үгийг чанга уншихыг хүс. Ангийнхнаар авралын ажлын хэсэг болох таван хэсгийг олж тогтоолго.
“Амьд бошиглогч, төлөөлөгчид ‘Есүс Христийн Сүмийн гишүүд “хүмүүний бодгалиудын авралын төлөө түүний талбайд хөдөлмөрлөхийн тулд илгээгдсэн юм” (С ба Г 138:56) гэж заадаг’. Авралын энэ ажилд гишүүдийн номлолын ажил, хөрвөгчдийг үлдээх, идэвх султай гишүүдийг идэвхжүүлэх, ариун сүмийн болон гэр бүлийн түүхийн ажил, сайн мэдээг заах зэрэг орно [Гарын авлага 2: Сүмийн удирдах нь (2010), 5.0]” (“The Work of Salvation: Then and Now,” Ensign, 2014 оны 9-р сар, 63).
Суралцагчдыг таван хэсгийг олж тогтоож байх хооронд дараах хэллэгүүдийг самбар дээр бич:
Гишүүний номлолын ажил
Хөрвөгсдийг үлдээх
Идэвх султай буюу идэвхгүй гишүүдийг идэвхжүүлэх
Ариун сүм ба гэр бүлийн түүхийн ажил
Сайн мэдээг заах
Сургаал ба Гэрээ 88:73
Бид Их Эзэний ажлыг яаравчлуулахад хувь нэмэр оруулж чадна
Нэг суралцагчийг Сургаал ба Гэрээ 88:73-ыг чанга уншихад мөн бусад суралцагчийг уг хэсгийг дагаж харахад урь. Дараа нь суралцагчдад бидний хүн нэг бүр Их Эзэний ажлыг яаравчлуулахын тулд хувь нэмрээ нэмэгдүүлэхийг хичээх хэрэгтэй гэдгийг тайлбарла. Хичээлийн төгсөлд байгаа тараах материалыг тарааж өгөн, уг тараах материал нь тэдэнд өөрийн хувь нэмрийг хэрхэн нэмэгдүүлэх талаар бодоход тусална гэдгийг тайлбарла. Суралцагчдыг тараах материал дээрх нэг буюу түүнээс дээш хэлсэн үгийг уншаад, тараах материалын асуултад хариулахад бэлдэхэд урь:
Суралцагчдад уншиж, бэлтгэх хангалттай цаг гаргаж өгсний дараа, нэг суралцагчийг эхний эшлэлийг чанга уншихад урь. Дараа нь цөөн хэдэн суралцагчаас гишүүний номлолын ажил дээр анхаарлаа хандуулан, тараах материал дээрх гурван асуултад хариулахыг хүс. Энэ үйл ажиллагааг таван эшлэл бүр дээр давтан хий.
Суралцагчдаас дараах асуултыг асууж, авралын ажилд оролцохын үнэн болон ач холбогдлыг мэдрэхэд нь тусал:
-
Эдгээр авралын ажлын нэг эсвэл түүнээс дээш хэсэгт оролцсоноороо та нар ямар адислалуудыг хүлээн авсан бэ? Та нарын хувьд маш чухал нэг юм уу түүнээс дээш хэсэгт оролцож байхдаа та ямар туршлага олж авсан бэ?
Нэг суралцагчаас Тэргүүн Зөвлөлийн ерөнхийлөгч Дийтр Ф.Угдорфын хэлсэн дараах үгийг чанга уншихыг хүс:
“Бидний мөнх бус амьдралын хугацаа дуусахад энэ чухал цаг үед өөрсдийн амьдралд болон Их Эзэний ажлыг урагшлуулахад оруулсан хувь нэмрийнхээ талаар бид ямар туршлага хуваалцаж болох вэ? Бид ханцуй шамлан, бүхий л зүрх сэтгэл, хүчин чармайлт, оюун, чадлаараа хичээнгүйлэн ажилласан гэж хэлж чадах уу? Эсвэл бид ихэнхдээ бусдын хөдөлмөрлөхийг л харж байсан гэдгээ хүлээн зөвшөөрөх үү? (“Та сэргээлтийн ажлын үеэр унтаж байна уу?” Ensign эсвэл 2014 оны 4-р сарын Ерөнхий чуулган, 78-81).
Суралцагчдаас дараах асуултыг асууснаар авралын ажилд илүү бүрэн дүүрэн оролцохын тулд юу хийх талаар төлөвлөхөд урь:
-
Та нар бусад хүн Их Эзэний ажлыг яаравчлуулахад ямар арга замаар тусалж байгааг харсан бэ?
-
Та нар ямар арга замаар Их Эзэний ажлыг яаравчлуулахад хувь нэмэр оруулахаар төлөвлөж байна вэ?
-
Сэргээлтийн талаарх мэдлэг болон гэрчлэл маань хэрхэн биднийг авралын ажилд илүү бүрэн дүүрэн оролцоход урамшуулдаг вэ?
Цөөн хэдэн суралцагчаас энэ ангид суралцаж байхдаа Сэргээлтийн талаар олж мэдсэн зүйлээсээ хуваалцахыг хүс. Бошиглогч Иосеф Смитээр дамжин ирсэн сайн мэдээний сэргээлтийн үнэний талаар гэрчлэн, хичээлээ дуусга.
Суралцагчийн унших материал
-
Дийтр Ф.Угдорф, “Та сэргээлтийн ажлын үеэр унтаж байна уу?” Ensign эсвэл 2014 оны 4-р сарын Ерөнхий чуулган, 78–81.
Авралын ажлыг яаравчлуулах нь
Сэргээлтийн үндэс—28-р хичээл
Авралын ажлын таван хэсэг бүртэй холбоотой дараах асуултуудын талаар тунгаан бод:
-
Бурханы ажлын энэ хэсэгт оруулсан таны хичээл зүтгэл хэрхэн бусдыг авралын адислалд ойртуулах вэ?
-
Та нар Их Эзэний авралын ажлын энэ хэсэгт оролцсоноороо ямар туршлага олж авч, ямар адислал хүлээн авсан бэ?
-
Та нар одоогийн Сүмийн дуудлагаасаа үл хамааран авралын ажлын энэ хэсэгт хувь нэмэр оруулахын тулд юу хийж чадах вэ?
Гишүүний номлолын ажил
Арванхоёр Төлөөлөгчийн Чуулгын ахлагч Нийл Л.Андэрсэн ийнхүү заасан байна:
“Ах эгч нар аа, Их Эзэн илүү олон номлогчийг номлолд үйлчлэхэд нь сүнсээр нөлөөлөхийн хажуугаар бас Түүний номлогчдыг хүлээн авах шударга, сайн хүмүүсийн зүрх сэтгэлийг нээж, оюун ухааныг нь бэлдэж байгаа билээ. Та нар тэднийг аль хэдийн таньдаг эсвэл удахгүй тэдэнтэй танилцаж болох юм. Тэдгээр нь танай гэр бүлийн гишүүн эсвэл хөрш чинь байж болно. Тэд гудамжаар таны хажуугаар өнгөрдөг хэн нэгэн эсвэл сургуульд хамт сурдаг, онлайнаар тантай холбогддог байж болно. Та нар ч гэсэн энэхүү тохиох гэж байгаа гайхамшгийн нэг хэсэг мөн.
Та гадуур хувцсан дээрээ номлогчийн энгэрийн тэмдэгтэй бүрэн цагийн номлогч биш бол, Паулын хэлсэнчлэн, ‘бэхээр бус харин амьд Бурханы Сүнсээр’ зүрхэндээ бичих цаг болоод байна’ [2 Коринт 3:3]. … Та нар энэхүү гайхамшигт хувь нэмрээ оруулах ёстой” (“Энэ бол гайхамшиг,” Ensign эсвэл 2014 оны 4-р сарын Ерөнхий чуулган, 89).
Хөрвөгсдийг Сүмд үлдээх
Арванхоёр Төлөөлөгчийн Чуулгын ахлагч M.Рассэлл Баллард ийнхүү тунхаглажээ:
“Бид нар Сүмийн гишүүн бүр сайн мэдээнээс хүртэж болох бүх адислалыг бүрэн дүүрэн эдэлж байгааг харахын тулд чадах бүхнээ хийх ёстой.
Ерөнхийлөгч Гордон Б.Хинкли бидэнд Сүмд зориулсан Түүний төлөвлөгөөг хэрэгжүүлэхэд Их Эзэнтэй хамтран ажилладаг байх бидний үүрэг хариуцлагыг сануулсан билээ. Хиймэл дагуулын нэвтрүүлгээр ерөнхийлөгч Хинкли ийн хэлжээ:
‘Их Эзэн бидний өмнө сайн мэдээг бүх бүтээлд заах эрхийг өгсөн’ Үүнийг хийхэд бүрэн цагийн болон гадасны бүх номлогчийн хамгийн сайн хүчин чармайлт хэрэгтэй. Үүнд бишоп, бишопын зөвлөх болон тойргийн зөвлөлийн гишүүн нэг бүрийн хүчин чармайлт шаардагдана …’ (‘Find the Lambs, Feed the Sheep,’ Ensign, 1999 оны 5-р сар, 107). Үүнд гишүүн бүрийн хүчин чармайлт хэрэгтэй” (“Members Are the Key,” Ensign, 2000 оны 9-р сар, 10).
Идэвх султай гишүүдийг идэвхжүүлэх
“[Гишүүний хувьд] бидний үүрэг бол эргэн тойрныхоо хүмүүсийг хайрлаж, тэдэнд үйлчлэх—тусламж хэрэгтэй хамт олноо тайтгаруулах, найз нөхдөө баптисмд урих, өндөр настай хөршдөө гэрийн ажилд нь туслах, идэвх султай гишүүнийг хоолонд урих эсвэл хөршдөө гэр бүлийн түүхийн ажлаа хийхэд нь туслахад идэвхтэй оролцох явдал юм. Энэ бүхэн нь бидний идэвх султай гишүүд болон өөр итгэл бишрэлтэй хүмүүсийг амьдралдаа болоод улмаар сайн мэдээний гэрэлд урих тохиромжтой бөгөөд баяртай арга зам мөн. Тэдэнтэй хамт цагийг хөгжилтэй өнгөрүүлж, өөрсдийн амьдрал дахь нандин хормуудыг тэдэнтэй хуваалцах нь бидний хэнийх нь ч хувьд ‘хүмүүний бодгалиудыг аврахын тулд [Есүс Христийн] талбайд хөдөлмөрлөж’ (С ба Г 138:56) болох хамгийн үр дүнтэй арга зам байж болно” (“Hastening the Work of Salvation,” Ensign, 2013 оны 10-р сар, 36).
Ариун сүм ба гэр бүлийн түүхийн ажил
Арванхоёр Төлөөлөгчийн Чуулгын ахлагч Квинтин Л.Күк заасан нь:
“Сүмийн удирдлагууд өсөж буй үеийнхэнд Елиагийн Сүнсийг мэдэрч, өвөг дээдсээ хайж олон, тэдний төлөө ариун сүмийн ёслолуудыг хийх ажилд техник технологийг ашиглах тал дээр манлайлагчид бай гэсэн уриалга гаргасан. Амьд байгаа болон нас барсан хүмүүст зориулсан авралын ажлыг яаравчлуулах ажлын дийлэнх хэсгийг залуучууд та бүхэн хийж гүйцэтгэнэ” (“Үндэс ба мөчрүүд,” Ensign эсвэл 2014 оны 4-р сарын Ерөнхий чуулган, 63–67).
Сайн мэдээг заах нь
“Сайн мэдээг заах үүрэг хариуцлага албан ёсны багшийн дуудлагатай хүмүүсээр хязгаарлагдахгүй юм. Есүс Христийн Хожмын Үеийн Гэгээнтнүүдийн Сүмийн гишүүний хувьд танд сайн мэдээг заах үүрэг хариуцлага бий. Эцэг эх, хүү охин, эхнэр нөхөр, ах эгч дүү, Сүмийн удирдагч, ангийн багш, гэрийн болон айлчлагч багш, ажлын хамт олны нэг, хөрш эсвэл найз нөхдийн хувьд та нарт заах боломж байгаа билээ. Зарим үед та хэлэх үг, хуваалцах гэрчлэлээрээ нээлттэй, шууд зааж чадна. Түүнчлэн та өөрийн үлгэр жишээгээр үргэлж зааж байдаг билээ” (Teaching, No Greater Call: A Resource Guide for Gospel Teaching [1999], 3–4).
© 2015 by Intellectual Reserve, Inc. Бүх эрх хамгаалагдсан.