Lesona 22 Anomea mo le Sauniuniga o le Vasega: Auai faatasi ma Iesu Keriso i le Toefuataiga Faifai Pea
“Lesona 22 Anomea mo le Sauniuniga o le Vasega: Auai faatasi ma Iesu Keriso i le Toefuataiga Faifai Pea,” O Iesu Keriso ma Lana Talalelei e Faavavau Anomea a le Faiaoga (2023)
“Lesona 22 Anomea mo le Sauniuniga o le Vasega,” O Iesu Keriso ma Lana Talalelei e Faavavau Anomea a le Faiaoga
Ata
alii talavou i fafo o se malumalu
Lesona 22 Anomea mo Sauniuniga o le Vasega
Auai faatasi ma Iesu Keriso i le Toefuataiga Faifai Pea
Pe ua e mafaufau ea pe aisea na auina mai ai oe e le Tama Faalelagi i le lalolagi i lenei taimi? Sa aoao mai Peresitene Dieter F. Uchtdorf, i lena taimi o se fesoasoani i le Au Peresitene Sili e faapea, o loo faaauau pea le Toefuataiga i o tatou aso ma o loo tatou ola i “se tasi o vaitau sili ona ofoofogia o le talafaasolopito o le lalolagi!” (“O E Moe i lenei Taimi o le Toefuataiga?,” Liahona, Me 2014, 59). O loo faaauau pea ona taitai malosi e le Faaola Lana Ekalesia ma galue mo le faaolataga o tagata uma i le lalolagi. A o e suesueina lenei lesona, mafaufau pe mafai faapefea ona e auai faatasi ma Ia i Lana galuega tele.
Vaega 1
O le a la’u vaega i le Toefuataiga faifai pea?
Na ala mai i le Perofeta o Iosefa Samita, na toefuatai mai ai e le Alii Lana talalelei ma toefaatuina Lana “ekalesia moni ma ola” i luga o le fogaeleele (Mataupu Faavae ma Feagaiga 1:30). Na saunoa mai Elder LeGrand R. Curtis Jr. o le Fitugafulu:
Ata
Elder LeGrand R. Curtis Jr.
E ui i le matagofie o mea na faaalia mai e le Atua e ala mai ia Iosefa Samita, e lei faamaeaina le Toefuataiga i le soifuaga o Iosefa. E ala mai i perofeta ina ua mavae atu o ia, ua tatou maua ai mea e pei o le atinaega faifai pea o galuega i le malumalu; tusitusiga paia faaopoopo; o le faaliliuga o tusitusiga paia i le tele o gagana; le auina atu o le talalelei i le lalolagi atoa; [ma] le faatulagaga o le Aoga Sa, Tamaitai Talavou, Peraimeri, ma korama o le perisitua. …
“O i tatou o molimau i se faagasologa o le toefuataiga,” na saunoa ai Peresitene Russell M. Nelson. “Afai e te manatu ua toefuatai mai atoatoa le Ekalesia, ua na o le amataga ua e vaaia. E tele nauā isi mea e oo mai.” (“O Le Toefuataiga Faifai Pea,” Liahona, Ape. 2020, 21)
A o faaauau pea ona fofola mai e le Alii Lana galuega, e tāua mo i tatou taitoatasi ona mafaufau pe mafai faapefea ona tatou auai. Na fesili Peresitene Uchtdorf:
Ata
Peresitene Dieter F. Uchtdorf
A maea lo tatou taimi i le olaga nei, o a ni aafiaga o le a mafai ona tatou faasoa atu e uiga i lo tatou lava sao i lenei vaitau taua o o tatou olaga atoa ai ma le faalauteleina o le galuega a le Alii? …
E tāua tele lenei mea mo i tatou o ni tagata taitoatasi, o ni aiga, ma ni tagata o le Ekalesia a Keriso e lē tatau ai ona tuu atu na o sina taumafaiga lē atoatoa i lenei galuega paia.
O le avea ai ma se soo o Iesu Keriso e lē o se taumafaiga e faatasi ona fai i le vaiaso pe faatasi i le aso.
Ia tatou mataala ma aua le faavaivai i le faia o mea lelei, aua o loo tatou “faataatiaina le faavae o se galuega tele,” [Mataupu Faavae ma Feagaiga 64:33], o le saunia lava lea mo le toe afio mai o le Faaola. (“O E Moe i le Taimi o le Toefuataiga?,” Liahona, Me 2014, 59, 62)
Ata
aikona, mafaufau loloto
Mafaufau Loloto e Sauniuni ai mo le Vasega
Mafaufau i aoaoga talu ai nei mai taitai o le Ekalesia, fetuunaiga i aiaiga faavae a le Ekalesia, po o faasilasilaga aoao a le Ekalesia o ni vaega o le Toefuataiga faifai pea. Mafaufau i mea na aoaoina i le konafesi aoao, o tuuina i luga o le uepisaite a le Ekalesia (ChurchofJesusChrist.org), pe faasilasila atu i le Church’s Newsroom (newsroom.ChurchofJesusChrist.org). O le a se uiga o nei aoaoga po o fetuunaiga mo oe?
Vaega 2
E mafai faapefea ona ou auai i le Toefuataiga faifai pea?
Na aoao mai Peresitene Nelson o se auala e mafai ai ona tatou auai i le Toefuataiga faifai pea o le fesoasoani lea e faapotopoto Isaraelu. Sa ia tautino mai:
Ata
Peresitene Russell M. Nelson
O lena faapotopotoina o le mea aupito sili lea ona tāua o loo tupu i le lalolagi i le taimi nei. E leai se isi mea e faatusalia i lona maoae, e leai se isi mea e faatusalia i le tāua, e leai se isi mea e faatusalia i le malualii. …
… Pe tou te mananao e avea o se vaega tele o le lu’i aupito silisili le mafuaaga aupito silisili ma le galuega aupito silisili i le lalolagi i le taimi nei?
Pe tou te mananao e fesoasoani i le faapotopotoina o Isaraelu i nei aso tāua e gata ai? Pe tou te, outou o le au filifilia, loto e fesoasoani i le sailia o le au filifilia e lei faalogo lava i le sāvali o le talalelei toefuataiina? (Russell M. Nelson ma Wendy Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Liahona, 8, ChurchofJesusChrist.org)
O le faapotopotoina o Isaraelu e taua tele aua e osia ai feagaiga ma faamanuiaga na folafola atu i fanau a Aperaamo, Isaako, ma Iakopo ua avanoa mo tagata uma (tagai Kenese 26:3–4; 35:11–12; Aperaamo 2:8–11).
I aso anamua, o le aiga o Isaraelu, le nuu o le feagaiga a le Atua, na solia a latou feagaiga ma teena le Alii. Sa faataapeapeina i latou “i totonu foi o atunuu uma” (1 Nifae 22:3; tagai foi fuaiupu 4–5). Ae ui i lea, na muai ta’u mai e perofeta e faapea i aso e gata ai o le a faia ai e le Alii se “galuega ofoofogia” (1 Nifae 22:8) i totonu o Isaraelu ma ituaiga uma o le lalolagi. O le a Ia faapotopotoina Isaraelu ua faataapeapeina ma faailoa mai Ana feagaiga (tagai 1 Nifae 15:12–16; 22:8–10).
Ata
aikona, suesue
Suesue e Sauniuni ai mo le Vasega
Faitau le 1 Nifae 22:11–12, ma vaavaai pe mafai faapefea e le faapotopotoina o Isaraelu ona faamanuiaina tagata uma.
Na saunoa foi Peresitene Nelson e uiga i le faapotopotoina o Isaraelu:
Ata
Peresitene Russell M. Nelson
O le faapotopotoina o Isaraelu e lē o se taunuuga faaiu. Ua na o se amataga. O le iuga tatou te tumau ai e aofia ai sauniga o faaeega paia ma faamauga o le malumalu. E aofia ai lo tatou ulu atu i se sootaga faalefeagaiga ma le Atua a le o le gafa po o le vaetamaina ona nonofo faatasi lea ma Ia ma o tatou aiga e faavavau. O le mamalu lena o le Atua—ola e faavavau mo Ana fanau. (“O le Tusi a Mamona, o le Faapotopotoina o Isaraelu, ma le Afio Mai Faalua,” Liahona, Iulai 2014, 31)
A o e mafaufau i le tele o le faapotopotoina o Isaraelu, atonu e te mafaufau po o le a se mea e mafai ona e faia e auai ai. Na aoao mai Peresitene Nelson, “Soo se taimi tatou te faia ai soo se mea e fesoasoani ai i soo se tasi—po o le fea lava itu o le veli—i le osia ma le tausia o a latou feagaiga ma le Atua, ua tatou fesoasoani i le faapotopotoina o Isaraelu” (“Ia Faamuamua le Atua,” Liahona, Nov. 2020, 92–93).
Na aoao Peresitene Bonnie H. Cordon o le Au Peresitene Aoao o Tamaitai Talavou le auala e mafai ona e iloa ai lau vaega i le faapotopotoina:
Ata
Peresitene Bonnie H. Cordon
Ole atu ma le agaga tatalo i le Tama Faalelagi po o le a se mea e mafai ona e faia e avea ai ma se vaega o lenei faapotopotoina, ma aumaia isi ia Keriso. Tusi i lalo ou lagona uunai, ona e lototele lea ma galue i ai! E eseese a avanoa e pei lava o i tatou. Ou te faafetai mo se perofeta o loo luitauina i tatou taitoatasi ina ia tulai ae i se tulaga maualuga atu. (Facebook, 3 Iuni, 2018, facebook.com/YWPresident)
Ata
aikona, tusi faamaumau
Tusi Faamaumau Ou Manatu
Mafaufau ma le agaga tatalo i se auala se tasi pe lua e mafai ona e fesoasoani ai i le faapotopotoina o Isaraelu. Fai ma tusifaamaumau se fuafuaga e faatino ai ou lagona uunai. E mafai foi ona e matamata i le “Ua Faaauau Faaaliga” (0:53).
Vaega 3
E mafai moni lava ona ou faia se eseesega?
E i ai taimi atonu e te lagona ai le lē agavaa a o e taumafai e fai le galuega a le Alii. Pe a e lagonaina faapena, e tāua le manatua e te lē o faia lava na o oe Lana galuega.
I le talafaatusa o laau olive, sa faatusa ai e le perofeta o Senosa le tovine i le lalolagi. O le aiga o Isaraelu ua faatusa i se laau olive fanua, ma o Nuuese ua faatusa i laau olive vao. A o lata ina uma le tala, sa faia e le Alii o le tovine, o Iesu Keriso, mea uma i Lona mana e fesoasoani ai i laau uma ina ia uluola (tagai Iakopo 5:47).
Ata
aikona, suesue
Suesue e Sauniuni ai mo le Vasega
Faitau ma le toto’a le Iakopo 5:70–72 , ma vaavaai mo le sootaga i le va o le Alii ma Ana auauna a o latou galulue i le tovine.
Mafaufau po o le a le uiga ia te oe o le galue faatasi ma le Alii. I le Au Paia i aso e gata ai, na fetalai atu ai le Faaola: “Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).
Na saunoa Elder Kim B. Clark, a o avea ma se tasi o Fitugafulu, e uiga i le lagolago a le Faaola:
Ata
Elder Kim B. Clark
Faamolemole ia manatua upu nei a le Faaola: “A ou te le toatasi lava, aua ua ia te a’u le Tama” [Ioane 16:32]. E faapena foi i tatou. E lē o tuua na o i tatou. E alolofa le Alii o Iesu Keriso ma lo tatou Tama Faalelagi ia i tatou, ma o loo faatasi i La’ua ma i tatou. Ona sa silasila atu Iesu i Lona Tama ma faamaeaina le taulaga togiola maoae, e mafai ona tatou vaai atu ia Iesu Keriso ma le faamautinoaga o le a Ia fesoasoani mai ia i tatou. (“Vaai Atu ia Iesu Keriso,” Liahona, Me 2019, 56)
Ata
aikona, talanoa
Talanoa e Sauniuni ai mo le Vasega
Mafaufau i se taimi na e lagonaina ai le fesoasoani a le Alii ia te oe a o e faia Lana galuega. Mafaufau foi e fai atu i se tagata o le aiga po o se uo e faasoa mai se faataitaiga mai lona olaga. Sau sauni i le vasega e faasoa mai.