Wase 21

Sasagataka na Vinaka

E rawa vakacava vei keda me ra sasagataka na noda maroroya na ivunau “O koya mo dou qai vinaka sara”?

iVakamacala Taumada

O Peresitedi Harold B. Lee e vakatavulica na bibi ni noda muria na vakaraitaki ni Vakabula e na noda sasagataka na vinaka:

“Au sa vakacegu ni naiVakavuvuli a sega ni vakanananutaka walega e na nona tukuna, ‘O koya mo dou qai vinaka sara, me vaka sa vinaka sara na Tamamudou sa tiko mai lomalagi.’ [Maciu 5:48.]. … O nanuma na iVakabula e vakatura e dua na inaki me na sega ni rawa ni yacovi ka na vakalialiai keda e na noda sasaga ni bulataka na savasava? E na dredre vei keda e na noda bula vakayago me da rawata na ivakatagedegede ni savasava e tukuna tiko na iVakavuvuli, ia e na bula oqo me da vakadavora e dua na yavu me da tara cake kina na bula tawamudu; ia me da nanuma vinaka ni yavu e vakadeitaki e na dina, dodonu me da maroroya na ivunau ni Kalou ka dina tiko me yacova ni oti na noda bula eke, ni sa oti eke kuria tiko na dodonu kei na kilaka me yacova ni da sa vakataki koya na Tamada mai Lomalagi….

“… [O Paula na iApositolo] e dusia na sala e laurai kina na vinaka. Ni cavuti o Jisu, e kaya, ‘ia sa dina ga sa Luvena ko koya, a sa vakatavulici ga e na ivalavala ni talairawarawa, ni sa vosota tiko na ka rarawa; ia ni sa vakarautaki oti, sa yaco me vu ni bula tawamudu vei ira kece ga sa talai rawarawa vua’ (Iperiu 5:8–9.)…

“… Me kua ni sivi e dua na siga ia me da vulica mai na ivolatukutuku ni nona bula na Karisito nona gaunisala ni bula savasava ka cakacakataka mai kea na noda inaki tawamudu.”¹

iVakavuvuli nei Harold B. Lee

E rawa vakacava na noda kilaka e na ka eda malumalumu kina me vukei keda me da vinaka?

E tolu [na ka] bibi e dodonu me vakuqeta e dua me bulataka na bula vakarisito—se, vosataka vakadodonu na vosa e na ivolanikalou, me bula dodonu me vaka na nona bula na iVakavuvuli. Na imatai ni ka bibi au na cavuta me rawa ni na vakadonui sa ikoya: E dodonu me yadra na tamata yadua e na vakavulici se bulataka na dodonu ka qarauna na ka e gadreva.

Na gonetagane vutuniyau e sega tale ni gadreva me vakavulici e na veivutuni ni laba sega na vakanananu ni daulaba. I koya e sega ni vinakati me vuli tale e na veivutuni ni veibutakoci, sega e na butako, lasu, se na nona sega ni vakarokorokotaka na tinana. Ni ka kece oqo e tukuna ni se vakabauta mai na gauna e se qai tubu cake mai kina; ia na nona taro sa, “a cava tale sa vo vei au?” [Raica na Maciu 19:16–22.]

Na iVakavuvuli, kei na ka e kilai kina na Nona kaukauwa na Qasenivuli Levu, e kilai vinaka kina na ka e baleta na gonetagane vutuniyau. Na nona gagadre kei na ka e malumalumu kina e dodonu ga me vakamalumalumutaka na noda domona na veika vakavuravura, nona dauvakararavitaka na bula e na iyau. A qai vakaraitaki ko Jisu na kena isoqoni: “Kevaka ko sa vinakata mo vinaka sara, mo lako, mo volitaka na nomu iyau, ka solia vei ira na dravudravua, ko na qai vakaiyau mai lomalagi: ia mo lako mai, mo muri au” (Maciu 19:21.)

E na ivukivuki ni veisau nei Paula na iApositolo e na kena a cilavi koya e dua na rarama ka vakabutobutotaka na nona rai e na nona gole tiko i Tamasiko …, ka sa rogoca e dua na domo sa kaya vua: “Saula, Saula, ko sa vakacacani au e na vuku ni cava?” [Cakacaka 9:4.] Ia, mai na boto ni uto i Saula e yaco mai kina e so na taro e dau tarogi vakawasoma mai vua e dua e kila tu ni gadreva e so na ka: “Turaga, a cava ko ni sa vinakata me’u cakava?” [Cakacaka 9:6.]…

O Inosi na makubui Liai, a tukuna na nona a veitaratara vata kei na Kalou, ni se bera ni bokoci kina na nona ivalavala ca. A sega ni tukuni vei keda se ivalavala ca cava ko koya, ia sa vakatusa vakarawarawa. Ka qai kaya, “A sa uqeti vakalevu na yaloqu. …” [Inosi 1:4.] Sa raica, na kila ka, kei na yalo ni gadreva na veika e vuqa, kei na vakasaqara, e kauta vakavoleka mai ki matana na ka e sega vua kei na veika e gadreva.

Na vakasamataki vinaka ni nona gagadre e dua a vakaraitaki e na Vunau mai na Ulunivanua ni a tukuna kina na iVakavuvuli, “Sa kalougata ko ira na yalomalumalumu: ni sa nodra na matanitu vakalomalagi” (Maciu 5:3.) Na yalomalumalumu, e kena ibalebale o ira na malumalumu vakayalo, era nanuma ni ra sa vakadravudravuataki vakayalo, ka ra dodoliga yani ni gadreva na veivuke. …

Vei keda kece sara, ke rawa ni da yacova na vinaka e na dua na gauna, me da tarogi keda e na taro oqo, “A cava tale sa vo vei au?” Kevaka me da tekivuna noda toso cake ni vakatagedegede torocake ni vinaka sara….

Na noda sucu tale e vukei keda vakacava me da vinaka?

Na ikarua ni ka bibi ni vinaka sara oya au na cavuta e laurai mai na nodrau a veitalanoa na iVakavuvuli vata kei Nikotimo. E kilai tani o koya ni lako mai vua o Nikotimo me vakasaqara na isau ni taro era dau tarogi koya kina e vuqa: “A cava me’u cakava me’u rawata kina na bula?” A qai sauma na iVakavuvuli, “E dina, E dina, au sa kya vei iko, kevaka sa sega ni sucu tale na tamata, e na sega ni raica rawa na matanitu ni Kalou.” Sa kaya vua ko Nikotimo, “Sa sucu rawa vakaevei na tamata ni sa qase mai ko koya?” Sa kaya ko Jisu, “E dina, E dina, au sa kaya vei iko, kevaka sa sega ni sucu e dua e na wai kei na Yalo Tabu, e na sega ni curu rawa ki na matanitu ni Kalou” (Joni 3:3–5.)

Na tamata e dodonu me “sucu tale” ke rawa ni yacova na vinaka, me rawa ni raica se curu ki na matanitu ni Kalou. E na sucu vakacava tale e dua? Oqori na taro vata ga a tarogi o Inosi. Ka o qai nanuma na isau ni taro rawarawa a saumi lesu mai. “Baleta na nomu vakabauta na Karisito, o koya o se bera vakadua ni rogoca se raica. Ia e na vakaraitaki koya mai vakayago ni oti e vuqa na yabaki, o koya mo ia ka lako, sa vakabulai iko na nomu vakabauta” [Inosi 1:8.]

Au a dabe tiko vata kei Brother Marion G. Romney e na valenivolavola e na dua na siga sa basika mai e dua na gonetagane. A sa vakarau tiko me gole e na kaulotu, a sa vakatarogi ga e na so na ka e dodonu me tarogi kina, sa tusanaka mai e so na cala e dau vakayacora. A qai kaya vei keirau, “Au se sega ni vakacegu mai na noqu vakatutusa walega. E rawa ni’u kila vakacava ke’u sa vosoti?” E na dua tale na tikina, “Au na kila vakacava ke’u sa sucu vou tale?” E vakila ni sega ni dodonu me se kaulotu e na nona ituvaki ni bula e tu kina.

Ni keitou sa veivosaki, a kaya mai o Brother Marion G. Romney: “Cauravou o se nanuma na vosa a kaya na Tui o Penijamini? A vunau tiko vei ira e so ka sa sinai tu na utodra e na ivalavala ca e na ‘nodra dui muria ga na lomadra, ni ra uasivi sobu mai na kuvu ni soso. Era sa kaci e na domo levu ka vaka: Mo ni lomani keimamai mai ka laiva me bokoci na neimami ivalavala ca ka vakasavasavataki na yalo i keimami e na dra ni soro i Karisito; io keimami sa vakabauti Jisu Karisito, na Luve ni Kalou, o koya sa bulia na lomalagi kei na vuravura kei na ka kece ga; ka na lako sobu mai vei ira na luve ni tamata. Ia ni ra sa vosataka oti na vosa oqo sa sobuti ira na Yalo ni Turaga; era sa vakasinaiti e na marau ka vakacegu na yalodra, ni sa bokoci na nodra ivalavala ca, e na vuku ni nodra sa vakabauti Jisu Karisito. …’ ” (Mosaia 4:2–3.)

Sa qai kaya vua o Brother Romney, “Na luvequ, mo wawa ka masu me yacova ni sa yaco vei iko na marau kei na vakacegu ni yalo e na nomu sa vakabauti Jisu Karisito, ko na qai vakila ni sa bokoci na nomu ivalavala ca.” Vakavo walega, me vaka e tukuna o Elder Romney, e na dua vei keda e na vakadravudravuataki, eda na lako voli ga e na kabukabu me yacova ni da sa na sucu vou tale….

O na sega ni rawata na bula Vakarisito … vakavo mo sucu tale. E na sega ni dua e na marau vata kaya na Le Daubau ni Isireli ni sega na veivakasavasavataki kei na vakavoui….

E na vukei keda vakacava na noda bulataka na ivunau me rawa ni da vinaka?

Kei na iotioti ka ikatolu ni ka bibi: na nona vukei o koya se qai vuli me kila na kosipeli kei na nona bulataka. Veivakadeitaki vakayalo ni sa dodonu kina sala ni veivakabulai me yacova na ivakatagedegede e uasivi sara mai na sasaga yadua. Loloma, se na iloloma soli wale mai vua na Turaga e na kaukauwa ni nona sorovaki. Me tukuni tale na ka a tukuna o Nifai, “E na loloma … eda sa vakabulai, eda rawa ni cakava kece” [2 Nifai 25:23.]…

… [Oqo], e dua vei ira na ka bibi kevaka mo bulataka na bula savasava. E dua e dodonu me veisautaka nona vakasama me maroroya na ivunau.

Na iVakavuvuli a sauma na nodra taro na Jiu se ra na kila vakacava na nona ilesilesi sa mai vua na Kalou se o Koya e dua ga na tamata walega. A qai kaya: “Kevaka e dua na tamata sa via cakava na loma i koya, e na kila se sa ka mai vua na kalou na ivakavuvuli, se’u vosa vakai au ga” (Joni 7:17.)

Na ivakadinadina ni dina e na sega ni lako mai vua e dua e dukadukali tu na nona bula. Na Yalo ni Turaga kei na ka e tawa savasava e na sega ni rawa ni mai tiko e na gauna vata e soli vei ira yadua. “Raica o i au, na Turaga, au na vakayacora na noqu yalayala, kevaka dou sa muria na noqu ivakaro; ia kevaka dou sa sega ni muria na noqu ivakaro, dou na sega ni rawata na ka sa yalataki” (V&V 82:10.) “… Kevaka ko sa sega ni muria na noqu ivakaro ko na sega ni rawata na lagilagi oqo” (V&V 132:21.) Vakawasoma na kena dau tukuni na dina e na ivolanikalou.

Na ivakavuvuli taucoko kei na cakacaka tabu ni kosipeli e vakasamataki, ia e veisureti me vulici na kosipeli mai na kena vakamurimuri na ivakavuvuli. E sega ni dua na tamata e na kila na ivakavuvuli ni dua na ikatini, vakavo ke sa sauma na nona ikatini. E sega ni dua e kila na ivakavuvuli ni Vosa ni Vuku, maroroya ka vakatabuya na Siga ni Vakacecegu, se masu e na noda rogoca e dua ni tukuna na ivakavuvuli oqo. Eda vulica na kosipeli e na noda bulataka tiko …

Me’u tukuna e na noqu tinia: Eda na sega ni kila vinaka e dua na ka e na ivakavuvuli ni kosipeli vakavo keda sa kila na veivakalougatataki e na yaco mai e na ivakavuvuli bula.²

E rawa vakacava me ra “lawa ni dua na bula e vinaka sara na iVunau Mai na Ulunivanua”?

O ni via kila beka na “ikabakaba” ka na rawa kina vua e dua me rawa kina ni vakaitovotaki na nona bula, me taucoko kina me rawa kina ni yaco me lewe ni vanua kilikili se “:yalododonu” e na nona matanitu na Kalou. Na kena isau vinaka duadua beka e na rawa ni kune e na kena vulici na bula nei Jisu e na ivolanikalou … e sega ni lako wale ga mai ki vuravura na Karisito me mai sorovaka na ivalavala ca ni kawa tamata ia me mai vakotora na ivakaraitaki ki vuravura me baleta na ivakatagedegede ni vinaka ki na lawa ni Kalou ka vakakina na talairawarawa vei Tamana. E na nona iVunau e na Ulunivanua e solia kina vei keda na iVakavuvuli e vaka e dua na ivakatakila me baleta na nona ivakarau, ka sa vinaka sara … ka e na nona vakayacora vakakina sa solia kina vei keda e dua na ituvatuva me baleta na noda bula vakataki keda. …

E na iVunau mai na Ulunivanua sega ni vakatautauvatani rawa koya, e solia kina vei keda o Jisu e walu na sala duidui eda na rawata kina na… reki. Na nona itukutuku kacivaki yadua e tekivu e na “Sa Kalougata” …Na nona iTukutuku kacivaki oqo na iVakavuvuli e kilai e na ivola ni vuravura ni lotu vakarisito me iVunau e na Ulunivanua. …E lewena na lawa ni bula e vinaka sara.

Me da vakasamataki ira mada vakalailai. E va vei keda a baleti keda yadua, na kena bulataki na noda dui bula yadua e loma, kevaka me da na vinaka sara ka kunea na kalougata ni reki dina sara mai loma.

Sa kalougata ko ira sa yalomalumalumu.

Sa kalougata ko ira sa dautagi.

Sa kalougata ko ira sa via kania ka via gunuva na ivalavala dodonu.

Sa kalougata ko ira sa yalosavasava [Maciu 5:3–4, 6, 8.]

Me da yalomalumalumu.

Mo yalomalumalumu sa i oya na nomu raici iko ni o dravudravua vakayalo, o dau vakararavi tu ga vua na Turaga e na veika mo vakaisulu kina, veika mo kania kei na cagi mo ceguva, na nomu bulabula vinaka, na nomu bula; mo kila ni sega ni dodonu mo lako sivia e da na siga ka sega ni masu ni vakavinavinaka, ni veidusimaki kei na veivosoti kei na kaukauwa me rauta na veisiga yadua. Kevaka e na vakila e dua na itabagone na nona gagadre vakayalo, ni sa tu e na dua na vanua rerevaki ka rawa ni vakaleqai kina na nona bula, e na rawa me dreti yani vakavoleka ki na ivurevure ni dina ka me dusimaki mai na Yalo Tabu e na nona gauna ni vakatovolei duadua. Sa ka rarawataki dina sara vua e dua, me baleta na nona iyau kei na nona kila ka se na nona itutu vakavuravura, me nanuma kina ni sega ni gadreva na veika vakayalo oqo. [Na yalomalumalumu] e veibasai kei na qaciqacia se dokadokai koya … Kevaka o na vakila na nomu gagadre vakayalo e na nomu malumalumu, o sa vakarautaki kina mo okati ki na “Nona Lotu na Ulumatua, ka yaco mo digitaki ni Kalou.” (raica V&V 76:54, 84:34.)

Na Tagi

Na tagi, me vaka na nona lesoni eke na iVakavuvuli e na vakavulica, me na vakaraitaka e dua “na rarawa vakalou ka na yaco kina na veivutuni” ka na rawata vua sa veivutuni na veivosoti ni ivalavala ca ka vakatabuya na lesuvi tale ni ivalavala ka a tagicaka. (raica 2 Korinica 7:10.) Sa ikoya na kena raici me vaka na iApositolo o Paula, “dau reki talega e na vuku ni veika rarawa: ni da sa kila sa tubu na dauvosota mai na ka rarawa; ia na dauveivakatovolei mai na dauvosota; ia na inuinui mai na dauveivakatovolei.” (Roma 5:3–4.) Me lomamudou “mo dou veivuketaka na nomudou icolacola, me mamada kina.” Me lomamudou mo dou tagi vata kei ira sa tagi, ka vakacegui ira sa rarawa. (Mosaia 18:8–9.) Ni tagi e dua na tina e na nona galili me baleta na nona lesu mai e dua na luvena yalewa lako sese, o iko e na nomu yalololoma mo kakua ni laiva e dua me veilewai… Na nomu tagi vata kei ira era sa qase, kei ira na dawai kei na luveniyali mo ivurevure ni veivuke era gadreva. E na dua na kena vosa, mo vakataki koya sa kumuna na ivakacavacava ka kakua ni vakataki koya na Farisi. “Kemuni na Kalou, lomani au mai, ko au na tamata i valavala ca.” (Raica Luke 18:10–13.) Na kemu isau e na nomu vakayacora na veika oqo sa i koya na kalougata ni vakacegu vei iko mai na veivosoti ni nomu ivalavala ca.

Mo Viakana ka viagunu

E sa bau yaco mada e na dua na gauna mo via kania kina vakalevu na kakana se via gunuva na wai ka me nomu iyau talei duadua kina e dua na tiki ni madrai bulagi se dua na itilo wai? Kevaka e sa yacovi iko oti na viakana vakaoqori sa na qai rawa mo vakila na ibalebale ni nona kaya na iVakavuvuli ni sa dodonu me da kania ka via gunuva na ivalavala dodonu. Sa i koya na via kana kei na viagunu oqori era dau biuta kina na vale ka vakasaqara me ra veiwasei vata kei ira na yalododonu. Na soqoni ni sakaramede ka dau vakavuna na qaravi Kalou e na Siga ni Turaga e na veivanua cava ga e da tu kina. Sa i koya na veika edau vakauqeti keda me da masu vagumatua ka dau kauti keda ki na valetabu ka vakavurea na vakarokoroko ni da tiko e loma. Ena dau vakasinaiti e na reki sega ni oti rawa ka dau gadrevi vakalevu sara mai na veivalavala ni marau tawayaga ka dau basika na veioga na veisaqasaqa kei na ivakaro ni Kalou, e dua ka dau vakatabuya na Siga ni Vakacecegu. “Ia kevaka dou sa kerea (e na yalodina, e na lomamudou taucoko ka vakabauta na Karisito, e na vakatakila vei kemudou ko Koya e na kaukauwa ni Yalo Tabu na kena dina,) ia na kaukauwa ni Yalo Tabu e na vakatakila vei kemudou na dina ni veika kecega.” (Moronai 10:4–5.)

Mo yalosavasava

Kevaka mo na raica na kalou, e dodonu mo savasava… e sa na nona i lawalawa o Jisu era raici koya ga me vakak ni luvei Josefa na matai. Eso tale era nanuma ni tamata dau gunu waini se dau mateni ena vuku ni nona vosa. Ia eso era nanuma tikoga ni curumi koya tu na tevoro. O ira ga na yalododonu era raici koya ni luve ni kalou. O na raici walega na Kalou kevaka e savasava na yalomu, ka vakakina ena dua na kena i vakatagedegede e rawa kina mo raica na kalou se na vinaka ni dua na tamata ka na yaco mo lomani koya ena vuku ni veika vinakak ko raici vua. Raica matua na tamata e dau vosa vakacacana na tamata ni Kalou se o ira na i liuliu lumuti ena lotu ni Turaga. O ira vakaoqo era dau vosa mai ena yaloca.

Ia me rawa ni da curu yani kina Matanitu mai Lomalagi e sega walega ni gadrevi meda vinaka ea e gadrevi meda dau caka vinaka ka vinaka ena so naka. E dodonu mo na vakavulici mai na vo ni va na tiki ni nona lawa me baleta na bula e vinaka sara na i Vakavuvuli, kevaka mo na sasaga tiko ena veisiga ki na bula e taucoko ka vinaka sara. Na veiivunau oqo e baleta na bula veimaliwai ni tamata:

Sa kalougata ko ira sa yalomalua.

Sa kalougata ko ira era dauloloma.

Sa kalougata ko ira sa dautataro.

Sa kalougata ko ira era sa vakacacani. [Raica Maciu 5:5, 7, 9–10.]

Na Yalomalua

Na tamata yalomalua e sega ni dau vakacudrui vakarawarawa se vakasosataki ka na dau vosota na mosi kei na rarawa. E sega ni tautauvata na yalomalua kei na malumalumu. Na tamata yalo malumalumu e tamata kaukauwa, qaqa, ka dau lewai koya vakavinaka. O koya e dau vakayaloqaqataki mai na veika savasava e vakabauta, e dina ni tu na i dre mai vei ira na nona i lawalawa se i soqosoqo. Ena gauna e basika kina na duidui ena dau yaco na duavata ni tau na nona lewa ka na vakameautaka na tiko yavavala vei ira na i lawalawa na nona i vakasala. E dau vakarokoroko; ka sega ni dau karakara. “Sa vinaka caka ko koya sa berabera ni cudru ka ca na tamata qaqa.” (Vakaibalebale 16:32.) O koya na dauni veiliutaki ka digitaki mai na mataivalu kei na matauvalu e wai, ena bisinisi kei na lotu me liu ka ra na muri koya na tamata. Sai koya na “masima” kei vuravura ka na taukena na vanua.

Na Dauloloma

Na noda vakabulai sa vakatau ena loloma eda vakaraitaka vei ira na tani. Na vosa ca ni tawaloloma, se na ivalavala voravora ki na tamata se manumanu, kevaka sara mada ga e sauma lesu kina na veika ca e vakayacori vua, e sa na vakuwau kina o koya e vakayacora ena nona ivotavota ni loloma ena gauna ena gadreva kina na loloma ena itutu ni veilewai vakavuravura se vakalomalagi. E sa bau dua beka me sega ni mosi vua na nona veivakacacani e dua ka dau nanuma tu ni nona itokani? O nanuma tiko beka na dredre ni nomu dau tovolea mo kakua ni sosomitaka na ca? Mo ni kalougata ko i kemuni kece sa dauloloma ni ko ni na lomani!

Na Dau Tataro

Sa kalougata o ira sa dautataro ni ra na vakatokai me ra luve ni kalou. O ira na dau vakatubu ca, o ira na dau vakaduiduile ki na lawa kei na ivakaro, o ira na iliuliu ni ilawalawa ca, o ira na dau basu lawa era dau vakauqeti ena veiinaki ca ak kecaka era na sega ni tarova era nakilai me ra luvei Setani ka sega ni luve ni Kalou. Qarauni iko mai vua e dau vakavuna na lomalomarua ena nona vakatakila na veika tabu ka ni sega ni dau vakasaqara ko koya na tiko sautu ia, me vakatetea ga na veilecayaki. O koya na dau vakatubu veiba se veileti, ka sega ni nona inaki me vakabasikata na dina, sa vorata tiko e dua na ivakavuvuli taumada ka vakatora tu na iVakavuvuli me yaga ena kena tara cake e dua na bula taucoko ka vutuniyau. “A sa veivinakati rawa ko ira e vuravura” na nodra sere na agilosi ka ikau ni nona sucu mai na Ravouvou ni Sautu. [Raica Luke 2:14.]…

Mo vosota ni ko sa vakacacani ena vuku ni valavala dodonu.

E vaKalou kevaka o sa vakacacani ena vuku ni valavala dodonu, ena dua na itavi levu, sa vakatovolei kina na nomu dodonu kei na dokai. Ena vei gauna sa sivi, era sa tu o ira era a vakamatei ena vuku ni cakacaka vinaka e vuqa. Na ka ca levu ga e rawa ni yaco mai na veivakacacani, e sega ni na laurai vei koya e vakacacani, ia e rawa ga ni na tarova na nona dau cuqena na veika e dodonu. E vuqa na veivakacacani sa vu ga mai ena lecaika, ni dau rawarawa vua na tamata me coqa ga na ka e sega ni kila. Eso vei ira na veika oqo e lako mai vei ira era nakita tu na ca. Ia veitalia ga se cava na vuna, na vei vakacacani e sa dauyaco ga vakalevu vei ira era caka dodonu, ka vakasalataki keda kina na ivakavuvuli, “Dou na ca, ni sa vosa vakavinakataki kemudou na tamata kecega! ni ra sa kitaka vaka kina ko ira na nodra qase vei ira na Parofita vakailasu.” (Luke 6:26.)

… Nanuma na ivakasala ena nomu a dauvakatotogani ka vakalialiai ni o daubese ni vakasuka mai na ivakatagedegede, mo voroka na vosa ni vuku, na nomu dauyalo dodonu, ka bula savasava, me rawa walega kina na nodra veivakadonui na lewe vuqa. Kevaka o tudei e na dina veitalia ga na nodra cikevi iko tiko mai na lewe vuqa, se mo vakamavoataki sara, o sa na taura na icocovi ni veivakalougatataki ni marau tawamudu. O cei e kila, e na yaco talega e na noda gauna me ra basika mai na yalo savasava se iapositolo me vaka e na gauna e liu, me ra solia na nodra bula e na kena taqomaki na dina? Kevaka e na yaco mai na gauna ko ya, e na raica na Kalou me kakua ni yaco wale.

Sa na toso tiko na noda vakasamataka vakatitobu ka masulaka na veivakavuvuli oqo, ka da na sotava e dua na ka, e lewe levu vei keda e se sega tu ni kila, ni Kalou e na nona vakarautaka na noda bula e na nona matanitu, e na sega ni raica se kila na noda itutu eke e na kedra maliwa na tamata, se e na nona Lotu, se na koroi eda sa rawata, ia mai na bula ga e da bulataka, na veika vi naka eda cakava, ka sala vata kei na “Yavu ni Bula sa Dodonu” ka mai vakaraitaka na luve ni Kalou.

Me sa vakalougataki na yavu o sa vakarautaka e na nomu bula ka me nomu tale ga na veivakalougatataki e yalataki kina.³

Veivakasama ni Vuli kei na Veivosaki

E rawa vakacava ni da vuli e na veisiga mai na “vola levu ni lesoni” ni nona bula na Karisito?
Ni da sa saga me da tautauvata kei Karisito, na cava sa rui bibi kina me da dau tarogi keda vakawasoma, se cava e se sega tiko vei keda?
Na cava soti o sa bau sotava, ka vukei iko mo kila ni da na vulica ga na kosipeli e na noda bulataka tiko?
Ni da kila ni da sa vakararavi tu ga vua na Turaga e na veivakalougatataki taucoko e na noda bula, e na laki tara beka vakacava na noda ivakarau kei na ivakavuvuli?
Na cava soti mada na ibalebale ni tukutuku “Sa kalougata o koya sa dautagi”?
E rawa vakacava na noda domona na iyau vakavuravura me vakuai keda mai na noda via kania ka gunuva na veika vakayalo.
E na rawa ni vukei keda vakacava me da raica na nodra vinaka na tani kevaka e savasava na yaloda?
E rawa vakacava me da vakaukauwataki kevaka eda yalomalumalumu.
Na sala cava soti eda rawa ni vakaraitaka kina na noda lomani ira na tani e na noda bula e na veisiga?

E na Vunau e na Ulunivanua a solia vei keda na iVakabula na “Yavu ni bula Vinaka.”