Wase 5

Lako voli e na Rarama ni iVakadinadina

E rawa vakacava na rarama ni ivakadinadina me tubu ki na “ramase ni kila deivaki”?

iVakamacala Taumada

E sivia na 32 na yabaki, e a ivakadinadina uasivi ni iVakabula, Jisu Karisito o Harold B. Lee. E a vakadinadinataka, “E na yalobibi, mai na vu ni yaloqu taucoko, au wasea vei kemuni na noqu ivakadinadina ni’u kila ni bula tiko o Jisu, ni o koya na iVakabula ni vuravura.”¹

E na nona vosa me rawati vakacava na ivakadinadina e a kaya:

“Dua na gauna e a sikovi au mai e dua na italatala ni Katolika gone ka sala vata voli mai kei na dua na daukaulotu ni iteki mai Colorado. Au a tarogi koya se cava e mai cakava, e a qai kaya, ‘Au lako mai me’u mai raici kemuni.’

“ ‘E baleta na cava?’ Au a taroga.

“ ‘Daumaka,’ e a kaya, ‘Au vaqara tiko me’u vakadeitaka eso na veivakanananu ka’u a sega sara ga ni kunea rawa. Ia au vakasamataka ni’u sa qai kunei ira rawa oqo vei ira na Momani.’

“Na veivosaki o ya e taura e veimama ni auwa. Au a tukuna vua, ‘Father, ni sa tukuna vei iko na lomamu na veika e sega ni kila na nomu vakasama, sa tiko dina vei iko na Yalo ni Turaga.’

“E sigege ka kaya, ‘Au vakasamataka ni sa yaco oti vei au na ka oqori.’

“ ‘Ia kua ni wawa vakadede,’ au kaya vua.

“Ni oti ga e vica na macawa sa vosa mai vei au e na talevoni. E kaya, ‘Siga Vakarauwai mai qo au sa na papitaiso me’u lewenilotu, baleta na lomaqu e a kaya vei au ni levu na ka era sega ni kila na noqu vakasama.’

“E a saumaki. E a raica na ka e a dodonu ga me raica. E a rogoca na ka e a dodonu ga me rogoca. E a kila na ka e a dodonu ga me kila, ka a qai cakacakataka. E tiko nona ivakadinadina.”²

Na iVakavuvuli nei Harold B. Lee

A cava na ivakadinadina?

Na ivakadinadina e rawa ni vakamacalataki vakarawarawa me ivakatakila vakalou vua na tamata ni vakabauta. Na daunisame e nanuma lesu na vakasama vata oqo: “ … sa dina na itukutuku i Jiova. … ” (Same 19:7.) O Paula, na iapositolo, e vakadeitaka “ … a sa sega e dua sa kaya rawa [se kila] ni sa Turaga ko Jisu, ke sega ni vuna na Yalo Tabu.” (1 Koronica 12:3.) Era a vakavulica na veiparofita kevaka mo “dou kerea e na yalodina, e na lomamudou taucoko, ka vakabauta na Karisito, e na vakatakila vei kemudou ko Koya e na kaukauwa ni Yalo Tabu ni sa dina.” (Moronai 10:4–5.) …

E bula tiko na Kalou! O Jisu na iVakabula kei vuravura! Na kosipeli i Jisu Karisito me vaka era tu taucoko e na veiivolanikalou makawa kei na ka vou e dina! Na veika kece oqo au kila mai na ivakadinadina ni Yalo Tabu ki na yaloqu.³

Me’u wasea mada vei kemuni na veika au a sotava mai na dua vei ira na vakaitutu e cake e na neitou bisinisi. O na watina kei ira na luvedrau era lewenilotu, o koya e sega. … E a kaya vei au, “E sega ni rawa me’u curu e na Lotu me yacova ni sa dua noqu ivakadinadina.” Au kaya vua, “E na dua tale na gauna mo mai tiko e Salt Lake, lako mai ka mai sikovi au.” Ni oti tale e vica na macawa keirau a veivosaki tiko e na gauna e oti kina neitou bose vakacakacaka au a kaya vua, “Au sega ni kila kevaka o vakasamataka tiko se sa dua nomu ivakadinadina se sega; se kevaka o kila se cava na ivakadinadina.” Oti sa qai via kila se cava na ivakadinadina. Au sauma lesu ka kaya, “E na yaco mai na gauna na lomamu e na tukuna vei iko na veika e sega ni kila na nomu vakasama, o ya na Yalo ni Turaga e tukuna tiko vei iko, era tu e so na ka o kila e yalomu ni dina. E sega ni dua na agilosi me na tavia na vatuvatu ni tabamu ka tukuna vei iko ni oqo e dina.” Na Yalo ni Turaga me vaka e tukuna na iVakavuvuli: “Sa liwa na cagi ki na yasana sa digitaka, ia ko sa rogoca na kena rorogo, ka sega ni kila na yasana sa lako mai kina, se na yasana sa lako yani kina, sa vaka talega kina ko koya yadua sa sucu e na Yalo Tabu” (Joni 3:8). Au a mani kaya vei noqu itau, na vakaitutu e cake vakabisinisi: “Qo, nanuma vinaka ni nomu ivakadinadina e sega ni lako mai me vakaivukivuki mai, ia na nona lako mai na wainimata ni marau e na vakasuasuana na nomu ilokoloko e na bogi. O sa na qai kila, noqu itau lomani, ni sa qai koya oqori na ivakadinadina.”⁴

Au wasea vei kemuni na noqu ivakadinadina ni’u kila ni bula tiko na iVakabula, na nomu ivakadinadina kaukauwa duadua Nona bula tiko e lako mai e na kaukauwa ni Yalo Tabu ka wasea na ivakadinadina i lomamu ni bula dina tiko o Koya. E kaukauwa cake mai na rai, kaukauwa cake mai na ilakolako kei na veivosaki vata kei Koya, sa i koya na ivakadinadina ni Yalo Tabu o na lewai kina kevaka mo na saqati Koya. Ia e sa nomuni itavi taucoko. Vakakina o au, me tauyavutaki na ivakadinadina o ya. Eda sa dautarogi vakawasoma, se dau ciqoma vakacava e dua na ivakatakila? Na Turaga e kaya e na dua na ivakatakila vei ira na iliuliu e liu, “Raica e na vakatakila vei iko na Yalo Tabu; io e na lako yani vei iko ko koya ka tukutuku sara ki lomamu. Ia sa i koya oqo na yalo ni ivakatakila; raica oqo na kaukauwa sa kauti ira rawa mai kina na mataqali i Isireli ko Mosese, ka ra kosova na Wasa Damudamu e na qele mamaca.” [Raica na V&V 8:2–3.] E na gauna sa vakadinadinataka kina ki na yaloda na Yalo Tabu, sa i koya o ya na ivakatakila mai vua na Kalou Cecere.⁵

[E na nona mate o Lasarusa, e vakadeitaka na iVakabula vei Maca,] “Oi au na vu ni tucake tale, kei na vu ni bula: ko koya sa vakabauti au, kevaka sa mate, e na bula ga: Ia ko koya yadua sa bula ka vakabauti au, e na sega sara ni mate.” Oti e a qai raici Maca o Koya ka kaya, “Ko sa vakadinata na ka oqo se segai? Mai na vu ni yalona malumalumu na marama oqo, e vakayadrati koya e dua na ka e a mani cavuta kina na vosa me tautauvata sara ga na veivakadeitaki e yaco vei Pita e na nona a kaya, “Io, na Turaga: au sa vakadinata ni sa Karisito ko i kemuni, na Luve ni Kalou, ko koya sa dodonu me lako mai ki vuravura.” [Joni 11:25–27.]

E kauta mai vei na ka o ya? E sega ni kau mai e na wili ivola. E sega ni kau mai e na vulici ni cioloji se vakamacala ka se vakadidike ni veika dina. E a sa tu e lomana na ivakadinadina me vakataki Pita ga. Ke a sauma mai na iVakavuvuli; e na kaya o koya, “O sa kalougata, Maca, ni sa sega ni vakatakila vei iko na lewe kei na dra, na Tamaqu ga sa tiko mai lomalagi.” … Na veika e levu duadua na kena isau e rawa ni o taukena sa i koya na ivakadinadina e lomamu ni veika taucoko sara ga oqo e dina.⁶

E na bula vakayago oqo e sega ni lewe levu era veirai kei na iVakabula e na matanavotu, ia o keda yadua eda sa vakalougatataki ka soli vei keda na isolisoli ni Yalo Tabu ni oti noda papitaiso ka na maucokona tu na veivakadeitaki Nona bula tiko me vaka ga eda a sa veirai oti. E dina, eda vakabauta Nona bula dina tiko veitalia ga eda sega ni veirai, me vaka na vosa ni iVakavuvuli vei Tomasi e na Nona a kaya, e na levu cake sara na veivakalougatataki vei ira era “sa sega ni raica, ka ra sa vakadinata” (Joni 20:29), baleta ni “keitou sa lako voli e na vakabauta, ka sega ga e na raica” (2 Koronica 5:7). “O koya dou sa sega ni kunea edaidai, ia dou sa vakabauta ga, ka reki e na reki sa sega ni cavuti rawa ni dou sa rawata na kena itinitini ni nomudou vakabauta, ia na bula ni yalomudou” (raica 1 Pita 1:8–9).⁷

E rawa ni da soqona vata ka qai kaya, ke dua na tamata e sa dua dina na nona ivakadinadina sa kena ibalebale ni a taura na ivakatakila mai vua na Kalou bula, ke sega e a sega na nona ivakadinadina. Ke dua e sa tiko na nona ivakadinadina, ia, ka marautaka na isolisoli ni parofisai, e sa yaco oti vua na yalo ni ivakatakila. E a sa taura oti na isolisoli ka rawa kina vei ira na veiparofita me ra vosataka na veika e baleta na nodra itavi. …

Na Turaga e vukei keda taucoko me da tovolea meda rawata na ivakadinadina ka sa rui bibi e na noda vakavakarau meda kila. E na gauna eda sa rawata kina na vakanananu vakalou ni o Josefa Simici e a parofita e na gauna e liu kei na gauna talega oqo kei na kosipeli ni dina, e levu na veileqa dredre era na seavu yani me vaka na kabu ni bera ni cadra na matanisiga.⁸

Eda vakarautaki keda vakacava me da taura na ivakadinadina?

[Na iVakabula e] kainaki ni a tukuna “ … ni sa tu e na lomamudou na matanitu ni Kalou.” (Luke 17:21.) Na kena ivakavakadewa dodonu cake e na vaka toka beka qo, “Na matanitu ni Kalou e sa tiko vata kei kemudou se e na kemudou maliwa,” ia ni’u vakananuma e dua tale na ivakamacala o ya, “Ni sa tu e na lomamudou na matanitu ni Kalou,” au nanuma lesu tale na veika keitou a sotava e dua na ilawalawa gonevuli mai na Brigham Young University … e na vale makawa nei Brigham Young, era lewe tinikaono, era dui matataka mai na tinikaono na veivanua tani, era a kerei me ra tucake ka ra dui tukuna nodra a kila vakacava kei na nodra a ciqoma na kosipeli, … ka tukuna nodra ivakadinadina. E sa dua dina na bogi taleitaki duadua. Keimami rogoci ira na gonetagane kei na goneyalewa mai Mexico, Argentina, Brazil, na veivanua vaka- Scandinavia, Faranise kei Igiladi. E tautauvata taucoko na italanoa. E na gauna sa tekivu me ra vakamacalataka kina na nodra a kunea na kosipeli, e a vakaoqo: Era a gadreva tu na dina. Era a vakasaqara tu na rarama. Era a sega ni vakacegu rawa, e na maliwa ni nodra vakasaqaqara, e a qai basika mai e dua kivei ira vata kei na dina ni kosipeli. Era a masulaka ka ra vakasaqara matua vua na Turaga, lomadei, e na yalodra taucoko, sa qai yaco me ra taura na ivakadinadina vakalou ka ra qai kila ni sa i koya oqo na kosipeli i Jisu Karisito. … Ia e na loma ni tamata taucoko, o ira vakayadua era yalodina ka vakasaqara na dina, ke tu dina vua na gagadre me kila, ka vulica vagumatua kei na vakabauti Jisu Karisito e na tu e lomana na matanitu ni Kalou, se e na dua tale na kena itukutukuni, na kaukauwa me taura kina e sa nona.⁹

Na yalododonu, bula savasava, e dodonu me tiko e boto ni noda dui ivakadinadina yadudua, ke sega na Yalo Tabu e sega ni rawa me vakadinadinataka na ilesilesi vakalou ni Turaga se e na cakacaka qo e na noda gauna.¹⁰

Me liu taumada … ni tara cake na ivakadinadina me da vakadeitaka e na dui yaloda yadua na kena taucoko tu na ituvaki ni noda veivale. Nona vakasama kei na yagona me savasava kevaka me na marautaka kina na isolisoli ni Yalo Tabu e lomana me rawa kina ni kila na ivakadei ni veika vakayalo.¹¹

E dodonu me vakaibalebale cake sara vakalevu na saumaki mai na “tauri tikite” vata kei na risiti ni ikatini, na tikite ni o sa lewenilotu, na ivolatara ni valetabu, kei na vuqa tale. Kena ibalebale me vakamalumalumutaka na vagolei ni vakalelewa ka tovolei tikoga me vakavinakataki cake na malumalumu ni yalo ka me kakua ni kena irairai wale ga e taudaku.¹²

Ni ra dau lako yani na noda daukaulotu e na gauna qo, eda dau kaya vei ira ka ra cakacaka tiko kina, “keimami sega ni kerei kemuni mo ni curu mai e na Lotu me volai ga na yacamuni. O ya me kua ni da kauwaitaka. Keimami lako mai me keimami solia vei kemuni na isolisoli levu duadua e rawa ni solia o vuravura, na isolisoli ni matanitu ni Kalou. Oqo e sa tiko e ke kevaka walega mo ciqoma ka vakabauta.” Oqo na bolebole vei keda ki na vuravura. “Keimami rawa ni vakavulici iko e na ivunau ni Lotu i Jisu Karisito ka wasea na ivakadinadina ni cakacaka vakalou, ia na ivakadinadina ni veika keimami vakavulica ni dina me lako sara ga mai e na nomu vaqaqara vakataki iko.”

Eda kaya vei ira na tamata eda vakatavulica, “Qo mo taroga na Turaga. Vulica, cakacaka, ka masulaka.” Oqo na ilakolako ni nodra kau mai na tamata ki na Lotu, kei na gaunisala vata sara ga qo mai na ivakatekivu era a kau mai kina ki na Lotu na yalodo-donu e na veivanua.¹³

Ia ni sa tacake o Jisu e na masu ni “sa yaco mai na gauna,” [raica Joni 17:1] e vakaraitaka na titobu ni dina ka dodonu me levu na kena ibalebale kivei ira na tamata vakayadua: “Ia sa ikoya oqo na bula tawamudu, me ra kilai kemuni na Kalou dina duadua ga, kei Jisu Karisito ko koya ko ni a talai koya mai.” (Joni 17:3.) Me vaka ni ivakaraitaki oqo e titobu sara na kena ibalebale mai na kena au na tukuna e ke, au gadreva me’u kauta mai kina e dua na vakanananu. O na kila vakacava na Tamana kei na Luvena? … Me da tekivuna noda kila na itukutuku sa ikoya me da vulica. Na iVakabula e vakasalataki keda ni “Dou sa vakasaqara e na iVola Tabu; ni dou sa nanuma dou sa rawata kina na bula tawamudu: ia na ivola oqo sa tukuni au.” (Joni 5:39.) E kea e kunei kina na itukutuku ni veiyalayalati ni Kalou kei na tamata e na veitabagauna yadua kei na nodra cakacaka kei na nodra vosa na veiparofita kei na iVakabula vakataki koya me vaka e a soli “mai na ivakaraitaki ni Kalou,” me vaka e kaya o Paula na iApositolo, “a sa yaga oqo me ivakavuvuli, me vunauca na ca, me ia kina na vakadodonutaki, me ia kina na vakatavuvuli e na ka e dodonu: me yaco kina na tamata ni Kalou me vakarau tu, ni sa vakarautaki ki na ivalavala vinaka kecega.” (2 Timoci 3:16–17.) E dodonu vei ira na itabagone me ra wilika na veivola vakamareqeti oqo e na veisiga taucoko.

E sega ni sa cava ga e na vulici ni Nona bula kei na nona veicakacaka mai na vuli. Sa ikoya sara ga na iVakavuvuli e a sauma na isau ni taro me da na kilai Koya vakacava kei na Nona ivakavuvuli: “Kevaka e dua na tamata sa via cakava na loma i koya, e na kila.” (Joni 7:17.) E na rawa beka mo vakasamataka me dua na kena dau ni vakadidike me se sega vakadua ni se bau vakatovotovo e na vale ni vakadidigo? O na kauwaitaka beka vakalevu na ivakamacala ni dua na vakalelewa ni domo ni ivakatagi mai vua e dua ka sega sara tu ga ni bau kila na domo ni ivakatagi se e dua na vakalelewa ni droigi mai vua e dua ka sega ni daudroigi? E vakakina, me dua e tautauvata kei iko me na “kila na Kalou” ka dodonu me dua e vakayacora na lomana ka taqomaka na Nona ivakaro kei na veivakarau ni itovo savasava e bulataka o Jisu.¹⁴

Na rawati ni kila-ka mai na vakabauta e sega ni sala rawarawa ni vuli. E gadrevi kina na igu ni sasaga kei na tomani ni tovolei vakaukauwa mai na vakabauta. …

Me vakalekalekataki, na vuli ka mai na vakabauta e sega ni dredre vua na tamata vucesa. E dua e a kaya, vakayagataki ni veimataqali vosa, na kena ilakolako e gadrevi kina me loveci taucoko na yalo, kacivi na titobu ni vakasama kei na vakanananu ka sala vata kei na Kalou—na isema dodonu me vakadeitaki. Oqori duadua ga e na qai yaco kina na “kila ka mai na vakabauta.”¹⁵

Na cava e rawa ni da cakava me vakaukauwataki kina na noda ivakadinadina?

[Na iVakavuvuli e a kaya vei Pita,] “Sa kerei kemudou o Setani, me tauvuloni kemudou me vaka na witi: Ia ka’u sa masulaki iko, me kakua ni malumalumu na nomu vakabauta: ia ni ko sa saumaki tale, mo vakataudeitaki ira na wekamu” (Luke 22:31–32). Qo, au vinakata mo raica, e kaya tiko o Koya vei koya na iliuliu levu ni Lewe Tinikarua. Au sa masulaki iko tiko; ia oqo mo lako yani ka saumaki, ni o sa saumaki oti, mo lako ka vakataudeitaka na wekamu. Kena ibalebale [e rawa me da] sega ni saumaki ka rawa talega me da saumaki. Na nomu ivakadinadina sa ikoya e dua na ka e tiko vei iko edaidai ia e sega ni rawa me na tiko vei iko e veigauna taucoko.¹⁶

Na ivakadinadina e dredre ni o taqomaka toka me tautauvata kei na cabe ni vula e vakamareqeti me vaka na se ni okiti; e dodonu mo dau taqomaka matua toka e na veimataka ni nomu bula. E dodonu mo maroroya mai na vuli, kei na vakabauta, kei na masumasu. Kevaka mo vakalaiva na nomu cudru, kevaka e cala na ilawalawa o lewena, kevaka mo vakarogoca na italanoa tawa dodonu, kevaka o vulica na iulutaga sega ni veiganiti, kevaka o vakayacora tiko e so na itovo tawakilikili, e sega ni dua na ka me vakatautauvatani mai na veivakamatei e na kena kau tani mai vei iko na Yalo ni Turaga ka vakatautauvatataki sara ga me vaka na nomu lesu mai e na dua na rumu rarama e na gauna o sa curu yani kina itautuba, e vaka sara ga mo sa lako tiko yani kina dua na vanua vakaturubuto.¹⁷

Na nomu ivakadinadina ni kua e sa na sega tale ni tiko ni mataka vakavo ga kevaka o cakava kina e dua na ka. Na nomu ivakadinadina e sega ni na vakalevutaki se me sa na yali, e na vakatau sara toka ga vei iko. E rawa beka mo nanuma na nomu itavi, e? Na Turaga e kaya, “Kevaka e dua na tamata sa via cakava na loma ikoya, e na kila se sa ka mai vua na Kalou na ivakavuvuli, se’u vosa vakai au ga” (Joni 7:17).¹⁸

E sega ni dua e saumaki dina ki na Yalododonu Edaidai me na rawa ni ivalavala ca. E sega ni dua e saumaki dina ki na Yalododonu Edaidai me na rawa ni lawaki ca, se lasu, se butako. Kena ibalebale o ya e dua e rawa ni rawata nona ivakadinadina ni kua, ia ni sa vakalolovirataki koya me cakava na veika e veibasai kei na lawa ni Kalou, e baleta ni sa yali nona ivakadinadina ka sa na saga e na nona igu me kauta lesu tale mai. Na ivakadinadina e sega ni ka me tiko vei iko edaidai ka maroroya tu e na veigauna taucoko. Na ivakadinadina e na rawa me tubu ka tubu ki na rarama ni veivakadeitaki, se me sa na yali yani ki na sega sara ga, vakatau toka ga ki na cava eda na cakava kina. Au kaya, na noda taqomaka noda ivakadinadina e na veisiga yadua sa ikoya na ka e na vukei keda mai na ilawaki ni meca.¹⁹

E rawa vakacava na ivakadinadina me vakataudeitaka na lomada?

E na dua na gauna donumaka na cakacaka vakaitalatala [i Karisito] na Nona i apositolo liu, o Pita, e a vakataudeitaka vakalevu nona vakabauta kei na nona ivakadinadina ni vakalou na veiqaravi ni iVakavuvuli. “Oi kemuni na Karisito, na Luve ni Kalou bula.” E a sauma na Turaga vei Pita ka vakadeitaka, “ … ni sa sega ni vakatakila vei iko na lewe kei na dra, na Tamaqu ga sa tiko mai lomalagi” ia e na dela “ni vatu oqo”—se e na dua tale na kena itukutukuni, na vakaraitaki ni ivakadinadina ni Yalo Tabu, na ivakatakila ni o Jisu na Karisito—Nona lotu sa kunei oti, ia “e na sega ni rawata na matamata-ni-koro ni etesi.” (Maciu 16:16–18.)²⁰

E sa yaco mai na gauna ka sa wanonovi iko sara tiko ga qo … vakavo wale ga ke tiko na vakataudeitaki ni ivakadinadina o ya ni veika oqo [na kosipeli, na Lotu kei na so tale] era dina o na sega ni rawa mo na vosota na veika dredre era na vakadrukai iko ka tovolea me ra basuraki iko mai na nomu idrodro edaidai. Ia kevaka o kila e yalomu taucoko ni veika kece oqo era ka dina …, o na kila se o cei o Jisu na nomu iVakabula o cei na Kalou na Tamamu; o na kila talega se cava na veivakayarayarataki ni Yalo Tabu. Kevaka o kila na veika kece oqori ko na tudei tu mo ikelekele ka vorata taucoko na cagilaba ka via tabaka nomu vale, me vaka e vakamacalataka na vosa vakaibalebale ni iVakavuvuli. O koya e rogoca Nona vosa ka taqomaka Nona ivakaro e na vaka na vale e a tara toka e na dela ni vatu, ni sa lako mai na cagilaba coka mai na dobui ka tabaka na vale ka liwa na cagi, e na sega ni bale, baleta ni sa tauyavutaki e na dela ni vatu. “Ia ko koya yadua sa rogoca na noqu vosa oqo, ka sega ni cakava, e na vakatautauvatataki kei na tamata lialia, ka tara na nona vale e na dela ni nuku: A sa tau mai na uca, ka coka mai na dobui, ka liwa mai na cagi, ka tabaka na vale ko ya; a sa bale kina: ia na ka levu na kena bale” (Maciu 7:26–27).

Na iVakavuvuli e a kaya tiko, au na kaya tale vei kemuni ni kua, na uca ni vakacaca, na uca ni dredre, na dobui kei na cagi voravora ni veivakatovolei e na tabaka mai na nomuni vale vakayadudua taucoko sara. E na yaco mai na veitemaki ni ivalavala ca, o na sota kaya na dravuisiga, o na sotava na dredre e na nomu bula. O ira wale ga era na sega ni lutu e na gauna ni veivakatovolei sa i ira era a tauyavutaka na nodra veivale e na dela ni vatu ni ivakadinadina. O na kila, veitalia se cava e na lako mai; o na sega ni rawa mo vosota mai na nodra ivakadinadina na tani. E rawa wale ga mo tu e na rarama e tiko vei iko mai na ivakadinadina ni Yalo Tabu ka tiko taucoko vei kemuni na dodonu mo ni taura.²¹

E sega ni sa rauti keda na Yalododonu Edaidai me da vakamuri ira na noda iliuliu ka ciqoma na nodra ivakasala, ia e tiko na itavi ka levu cake sara me da rawata vakaikeda na ivakadinadina sega ni yavalati rawa ki na ilesilesi vakalou vei ira na tamata oqo, kei na ivakadinadina ni veika era a tukuna vei keda sa ikoya na loma iTamada Vakalomalagi.²²

Au lako mai vei kemuni edaidai me’u ivakadinadina digitaki ka uasivita na veika kece, na ilesilesi me’u ivakaraitaki ni ivakadinadina. E so na veika e yaco vakavoleka e na gauna au sa vakila kina ni dina. E na gauna au a vakasaqara tiko kina na Yalo Tabu me’u vosa e na ulutaga ni Siga ni Mate, na tucake tale mai na mate ni Turaga, au a sogo duadua tiko e na rumu, wilika e va na kosipeli, vakabibi sobu ki na Lauvako e na kauveilatai, na Tucake tale, a qai yaco e dua na ka vei au. E na noqu wilika tiko, e vaka sara ga me’u a bula tiko vakarua. Volekata sara, na ka vata ga o ya, ka sega ni italanoa ga. Au a qai vosa ka’u wasea kina na noqu ivakadinadina vakataki au e na nona mate kei na nona tucake tale na noda Turaga ka iVakavuvuli. Na cava e vuna? E dua na ka e uqeti kina na lomaqu kei na noqu rawa ni vosa e na veivakataudeitaki ka sega ni vakatitiqataki. E rawa talega vei iko. Na ka e veivakacegui duadua e na vuravura taucoko oqo, ka ikelekele tudei duadua e na lomamu, e na gauna ni leqa, e na gauna ni veitemaki, na veigauna ni tauvimate, na veigauna ni veilecayaki na bula, na veigauna ni nomu sasaga kei na cakacaka [sa ikoya] e rawa ni o kila vakaidina ka biliga tani taucoko na vakatitiqataki ni bula tiko na Kalou.²³

Veivakasama ni Vuli me Veivosakitaki

A cava e vuna ni ivakatakila mai vua na Yalo Tabu “na ivakadinadina kaukauwa duadua rawa ni tu vei iko” ni bula tiko na iVakabula?
Na ivakasala cava e solia o Peresitedi Lee me baleta na noda ciqoma vakaevei na ivakadinadina ni kosipeli? Na cava a vukei iko mo rawata kina na nomu ivakadinadina?
E rawa vakacava na noda kila na Tamada Vakalomalagi kei Jisu Karisito?
Na cava o nanuma e vakaibalebaletaka o Peresitedi Lee e na nona a kaya, “Na ivakadinadina e dredre ni o taqomaka me vaka na rarama ni vula: … e dodonu mo rawata tale e na veimataka ni nomu bula”?
Na cava beka e vakavuna na kena yali se mate na noda ivakadinadina? Na cava e dodonu me da cakava me rawa kina na rarama ni noda ivakadinadina me “tubu me ramase sara ka vakadeitaki dina?”
Ni da sa rawata na noda ivakadinadina, eda na vukei ira vakaevei na tani me ra vakaukauwataka na nodra ivakadinadina?
E na sala cava mai na noda kila ni bula tiko na Kalou ni vakadeitaka na lomada e na veigauna ni leqa? E na gauna cava e sa bau ivurevure kina ni kaukauwa vei iko, na nomu ivakadinadina me baleta na iVakabula?