iVakatekivu

Evakadinadinataka mai vu ni yalona o Harold B. Lee, Na ikatini kadua ni Peresitedi ni Lotu ka iApositolo me sivia e tolusagavulu na yabaki “ni bula tiko na Kalou, ni Dauniveisereki kei Vuravura ko Jisu Karisito.”¹ E na yalodei mai na vuqa na yabaki ni veiqaravi, e tukuna kina, “Na noqu masu sa ikoya me ra kila vakavinaka cake na tamata kecega e veivanua na bibi ni nona veisorovaki na iVakabula ni tamata kecega, o koya ka solia vei keda na ituvatuva ni veivakabulai ka na kauti keda ki na bula tawamudu, ki na nona itikotiko na Kalou kei na Karisito.”²

E itakele ni nona ivakavuvuli vei ira na lewe ni Lotu o Peresitedi Lee na ilakolako lesu i vale vei Tamada mai Lomalagi. E vakauqeti ira vakayadua na luvena na Tamada Vakalomalagi me ra “rawata vakataki ira na ivakadinadina sega ni yavalati rawa ko ya ka na vakadeitaka na yavadra ki na gaunisala ka na kauti ira vakaidina ki na icavacava lagilagi oya na bula vakatukatuka kei na bula Tawamudu.”³

“Na itukutuku bibi taudua e rawa me’u na solia vei kemuni ka vakakina i vuravura taucoko oya mo ni muria na ivakaro ni Kalou,” e kaya o Peresitedi Lee, “Ni sa ikoya oqori na sala e na ganiti iko kina na veidusimaki vakalou e na nomu bula voli e na vuravura oqo, ka vakarautaki iko ki na vuravura sa bera mai mo drau na veitata kina kei Koya na nomu Dauniveisereki, ka mo vakacerecerei kina e na kedrau iserau na Tamada kei na Luvena.”⁴

Eratou sa tauyavutaka na Mataveiliutaki Taumada kei na Kuoramu ni Apositolo Le Tinikarua na veiivola eso e na “Nodra iVakavuvuli na Peresitedi Ni Lotu me vukei ira na lewe ni Lotu me titobu cake na nodra kila na ivakavuvuli ni kosipeli ka toro voleka yani vei Jisu Karisito mai na nodra ivakavuvuli na parofita ni itabagauna oqo. Na ivola oqo e lewena na ivakavuvuli nei Peresitedi Harold B. Lee, ka a kaya:

“Era okati e na ituvatuva ni kosipeli na lawa vakalou, ka sa itavi ni Lotu i Jisu Karisito na kena vakavulici na veilawa oqori ki vuravura.”⁵

“Me volai sara ki yalomuni na veilesoni ka na vakadeitaka tikoga na nomuni rai ki na isausau ni gauna tawamudu, mo ni kakua kina ni druka e na nomuni sasaga ni bula oqo, me rawa kina ni, kevaka e na mani lekaleka se balavu na nomuni bula, o ni sa na vakarau tu ni sa yaco mai na kena siga mo ni lakova yani na kena iserau o Koya o ni sa taura tu na yacana e na nomuni lewena na Lotu i Jisu Karisito ni veisiga e muri oqo.”⁶

E wasei vakava na iwase ni ivola yadua: (1) E dua na taro ka vakamacalataka vakalekaleka na vakasama ka koto e na kera i wase (2) na “iVakatekivu,” e vakamalacataka na itukutuku ni wase ni vola kei na dua na italanoa se ivakasala mai vei Peresitedi Lee, (3) “iVakavuvuli nei Harold B. Lee;” e tukuni kina na veivakavuvuli bibi mai na nona veiitukutuku kei na ivunau e vuqa, kei na (4) Vakatutu me Baleta na Vuli kei na Veivosaki,” ka vakauqeti kina na railesuvi yadudua kei na vakatataro, na vakuri ni veivosaki, kei na kena vakayagataki e na noda bula e na gauna oqo mai na veitaro eso.

Na Vakayagataki ni iVola Oqo

Me baleta na vuli yadudua se Vakavuvale. E inaki ni ivola oqo me vakatorocaketaka na nodra kila na lewenilotu yadua na ivakavuvuli ni kosipeli ka dau vakavulica vakabibi o Peresitedi Harold B. Lee. E rawa me ra na rawata na lewenilotu yadua na nodra dui ivakadinadina me baleta na dina oqo, mai na nodra wilika e na yalo masumasu kei na nodra vulica vakatitobu. E na vakaikuritaka talega na ivola e na nodra valenivola ni kosipeli na lewenilotu yadua na ivola oqo, ka na yaco me ivurevure yaga sara ni veidusimaki kei na vuli e vale.

Me baleta na veivosaki e na veisoqoni ni Sigatabu. Na ivola oqo e nodra ivola ni vuli na kuoramu ni Matabete i Melekiseteki kei na iSoqosoqo ni Veivukei e na nodra soqoni e na Sigatabu. E a vakatavulica o Elder Dallin H. Oaks ni veivola yadua e na “Nodra iVakavuvuli na Peresitedi ni Lotu” era lewena tu na ivunau kei na ivakavuvuli eso. Era vutuniyau sara ka ganita vinaka na noda gagadre ni gauna oqo, ka totoka ni vakayagataki e na veivakavulici kei na veivosaki.” Me ra dau vagolea tikoga na nodra rai na qasenivuli ki na lewe ni vola kei na ivolanikalou era veiwekani kaya. Me vaka e vakamacalataka o Elder Oaks, “E sega ni lesi na qasenivuli ni kosipeli me digia na iulutaga ni lesoni ia me vakavulica ga ka veitalanoataka na veika sa tukuni mai.”⁷

Me ra dau tomitomi na qasenivuli mai na veitaro eso e na mua ni veiwase yadua me vakauqeti kina na veivosaki vakalasi. E na rawa me vakuria ka vakatitobutaka na nodra raica na ivakavuvuli nei Peresitedi Lee na noda railesuva rawa na veitaro oqori ni bera ni da vulica na nona ivakavuvuli.

Na veisoqoni e na Sigatabu e dodonu me dau vagolei vakatabakidua ki na ivakavuvuli ni kosipeli, na vakaraitaki yadua ka vakavulici kina na veivakavuvuli oqo, kei na ivakadinadina ni ka dina. Ni ra vakasaqara na Yalo Tabu o ira na qasenivuli e na yalomalumalumu e na nodra vakarautaka kei na nodra vakavulica na lesoni, era na vaqaqacotaki kina, o ira kece era vakaitavi e na nodra kila na dina. Me ra dau vakauqeti ira na lewe ni kalasi o ira na iliuliu kei ira na qasenivuli me ra dau wilika mai na veiwase ni vola ni bera ni ra mai veivosakitaki e na soqoni e na Sigatabu. Me ra dau tukuna tiko vei ira na lewe ni kalasi me ra kauta mai na nodra ivola ki na nodra veisoqoni ka me ra dau rokova na nodra vakavakarau na lewe ni kalasi e na nodra veivakavulici mai na vosa nei Peresitedi Harold B. Lee. Ni ra sa wilika rawa mai na lewe ni kalasi na wase ni vola, era sa na vakarau kina me ra veivakavulici ka veivakatataki cake vakaiira.

E sega ni gadrevi se vakaturi yani me ra volia na lewenilotu eso na ikuri ni itukutuku se ivola idusidusi me tokona na ivola oqo. Era sa vakauqeti na lewenilotu me ra cega na ivolanikalou sa vakaturi mai me vakuri kina na vulici ni ivunau.

Me vaka ni nakiti na ivola oqo me ka ni vuli yadudua kei na idusidusi vakosipeli, era lewena na vei iwase ni ivola e vuqa sara na lewe ni vuli ka na sega kina ni rawa me tarai kece sara e na soqoni ga e na Sigatabu. O koya, sa yaga kina me dau vakayacori na vuli e vale me rawa kina ni da rawata na taucoko ni nona ivakavuvuli o Peresitedi Lee.

Na parofita ni Kalou oqo e kila na gaunisala lesu i vale Vua na Tamada mai Lomalagi, ka sa veidusimaki kina vei ira kece era via rogoca: “Kevaka o ni na vakarorogo ka vakatovotovotaka na veika ko ni sa rogoca, ko ni na via tuberi yani ki na vanua lagilagi ko ya ka yacana o, sega walega ni marau, ia na reki. Na reki e kena ibalebale ni o sa bula e na dua na ivakarau ni bula o sa na vakarau tu kina mo curuma yani na nona iserau na Turaga.”⁸