၁ နီဖိုင်း ၁၀

အခန်းကြီး ၁၀

ယုဒလူမျိုးတို့ကို ဗာဗုလုန်မြို့သားတို့ ဖမ်းဆီးချုပ်နှောင်သွားလိမ့်မည့်အကြောင်း လေဟိကကြိုတင်၍ ဟောကိန်းထုတ်၏—ယုဒလူမျိုးတို့၌ မေရှိယ၊ ကယ်တင်ရှင်၊ ရွေးနှုတ်ရှင် ကြွလာတော်မူမည့်အကြောင်း သူပြောပြ၏—ဘုရားသခင်၏သိုးသငယ်ကို ဗတ္တိဇံပေးမည့်သူ ကြွလာတော်မူမည့်အကြောင်းကိုလည်း လေဟိပြောပြ၏—မေရှိယ၏သေခြင်းနှင့် ရှင်ပြန်ထမြောက်တော်မူခြင်းအကြောင်းကို လေဟိကပြောပြ၏—သူသည် ဣသရေလအမျိုးတို့ ကွဲပြားပြန့်ကျဲခြင်းနှင့် စုဝေးခြင်းအကြောင်းကို သံလွင်ပင်နှင့်ပမာပြု၏—ဘုရားသခင်၏သားတော်အကြောင်း၊ သန့်ရှင်းသောဝိညာဉ်တော်၏ ဆုကျေးဇူးအကြောင်းနှင့် ဖြောင့်မတ်ခြင်းရှိဖို့ လိုအပ်ခြင်းအကြောင်းတို့ကို နီဖိုင်းဟောပြော၏။ ဘီစီ ၆၀၀–၅၉၂ ခန့်။

၁ ယခုမူကား၊ ငါနီဖိုင်းသည် ငါ၏လုပ်ဆောင်မှုများ၊ ငါ၏အုပ်စိုးခြင်းနှင့် အမှုတော်ဆောင်ခြင်းတို့အကြောင်းကို ဤပုရပိုက်ပြားများပေါ်၌ ဆက်၍ရေး၏။ သို့ဖြစ်၍၊ ငါ၏မှတ်တမ်းကို ဆက်၍ရေးရန် ငါ့အဘနှင့်၊ ထို့အတူ ငါ့အစ်ကိုတို့နှင့်လည်း ဆိုင်သောအရာများကို ငါအတော်အသင့် ပြောပြရပေမည်။

၂ အကြောင်းမူကား၊ ရှုလော့၊ ဤသို့အားဖြင့်အချိန်တန်လာသောအခါ၊ ငါ၏အဘသည် သူ့အိပ်မက်အကြောင်း စကားများပြောဆိုခြင်းနှင့် အလုံးစုံသောလဝီရိယကို ပြုကြစေရန် သူတို့အား တိုက်တွန်းခြင်းတို့ကိုလည်း လက်စသတ်ခဲ့လေပြီးနောက်၊ ယုဒလူမျိုးတို့၏အကြောင်းကို ပြောပြ၏—

၃ သူတို့နှင့် ယေရုရှလင်မြို့ကြီးပင် ဖျက်ဆီးခံရလေပြီးနောက်၊ များစွာသောသူတို့သည် ဗာဗုလုန်မြို့သို့ ဖမ်းဆီးချုပ်နှောင်ပြီးသယ်ဆောင်သွား ခံရ၍၊ ကိုယ်တော်ရှင်၏ ကာလအချိန်တန်သောအခါ၌၊ သူတို့တစ်ဖန် ပြန်လာရ၊ အထူးသဖြင့်၊ ဖမ်းဆီးချုပ်နှောင်ခြင်းမှပင် ပြန်၍ထုတ်ယူ ခံရကြလိမ့်မည်။ ဖမ်းဆီးချုပ်နှောင်ခြင်းမှ ပြန်၍ထုတ်ယူ ခံရပြီးမှ၊ သူတို့၏ အမွေခံရာမြေကို တစ်ဖန်ပြန်၍ ပိုင်ဆိုင်ကြလိမ့်မည်။

၄ ထိုမှတစ်ပါး၊ ငါ့အဘ ယေရုရှလင်မြို့ကို စွန့်ခွာခဲ့သည့်အချိန်မှစ၍ နှစ်ပေါင်း ခြောက်ရာပင်ကြာလျှင် ပရောဖက်တစ်ပါး—အမှန်စင်စစ် မေရှိယတစ်ပါး၊ သို့မဟုတ်၊ တစ်နည်းအားဖြင့် လောက၏ကယ်တင်ရှင်တစ်ပါးကို ကိုယ်တော်ရှင်ဘုရားသခင်က ယုဒလူမျိုးတို့၌ ပေါ်ထွန်းစေတော်မူလိမ့်မည်။

၅ သူသည် မိမိပြောလေသော ဤမေရှိယ သို့မဟုတ်၊ လောက၏ ဤရွေးနှုတ်ရှင်နှင့်စပ်လျဉ်း၍ ဤအရာတို့အကြောင်းကို သက်သေခံလေသည့် အလွန်များသောပရောဖက်တို့ အကြောင်းကိုလည်း ပြောပြ၏။

၆ သို့ဖြစ်၍၊ ခပ်သိမ်းသော လူသားတို့သည် ပျောက်ဆုံး၍ ကျရှုံးရာအခြေအနေ၌ ရှိလျက်၊ ဤရွေးနှုတ်ရှင်ကို အားမကိုးလျှင်၊ ထိုအခြေအနေ၌ အစဉ်အမြဲရှိကြပေလိမ့်မည်။

၇ ကိုယ်တော်ရှင်၏လမ်းကို ပြင်ဆင်ရန် မေရှိယမတိုင်မီလာမည့် ပရောဖက်တစ်ပါးအကြောင်းကိုလည်း သူပြော၏—

၈ ထိုမှတစ်ပါး၊ သူသည် တောရိုင်းထဲသို့ပင်သွား၍ ဟစ်ကြော်မည်ကား၊ ကိုယ်တော်ရှင်၏လမ်းကို သင်တို့ပြင်ဆင်ကြလော့၊ သူ၏လမ်းခရီးတော်တို့ကို ဖြောင့်စေကြလော့။ အကြောင်းမူကား၊ သင်တို့မသိသောသူသည် သင်တို့၌ ရပ်လျက်ရှိ၏။ သူသည် ငါ့ထက်ပို၍ တတ်စွမ်းနိုင်၏။ ထိုသူ၏ခြေနင်းတော်ကြိုးကိုမျှ၊ ဖြည်ခြင်းငှာ ငါမထိုက်တန်ဟုဖြစ်၏။ များစွာတို့ကို ငါ့အဘပြောသည်မှာလည်း ဤအရာအကြောင်းပေတည်း။

၉ ထိုသူသည် ယော်ဒန်မြစ်တစ်ဖက် ဗေသဗရရွာ၌ ဗတ္တိဇံပေးလိမ့်မည်ဟု ငါ့အဘကဆို၏။ သူသည်ရေဖြင့်ဗတ္တိဇံပေးလိမ့်မည်။ အမှန်စင်စစ်၊ မေရှိယကို ရေဖြင့်ဗတ္တိဇံပေးလိမ့်မည်ဟုလည်း သူဆို၏။

၁၀ သူသည် မေရှိယကို ရေဖြင့်ဗတ္တိဇံပေးလေပြီးနောက်၊ လောကီသားတို့၏အပြစ်များကို ယူဆောင်သွားမည့် ဘုရားသခင်၏သိုးသငယ်ကို ဗတ္တိဇံပေးကြောင်း အသိအမှတ်ပြု၍၊ သက်သေခံလိမ့်မည်။

၁၁ ဤသို့အားဖြင့်အချိန်တန်လာသောအခါ၊ ငါ့အဘသည် ဤစကားများကို ပြောခဲ့လေပြီးနောက် ငါ၏အစ်ကိုတို့ကို ယုဒလူမျိုးများ၌ ဟောပြောရမည့် ဧဝံဂေလိတရားတော်အကြောင်းနှင့် ယုဒလူမျိုးတို့ ယုံကြည်မှုလျော့ပါးဆုတ်ယုတ်လာသည့် အကြောင်းတို့ကိုလည်း ပြော၏။ ကြွလာတော်မူမည့် မေရှိယကို သူတို့ကွပ်မျက်လေပြီးနောက်၊ သူသည်လည်း ကွပ်မျက်ခံရလေပြီးနောက်၊ သေခြင်းမှထမြောက်တော်မူလိမ့်မည်။ သန့်ရှင်းသောဝိညာဉ်တော်အားဖြင့် တပါးအမျိုးသားများသို့ သူကိုယ်တိုင် ထင်ရှားစွာပြတော်မူလိမ့်မည်။

၁၂ ထိုမှတစ်ပါး၊ အမှန်စင်စစ် ငါ့အဘသည် တပါးအမျိုးသားတို့အကြောင်းနှင့် အခက်အလက်များကျိုးပဲ့၍၊ မြေကြီးမျက်နှာပြင်တစ်ခုလုံးပေါ်၌ ကွဲပြားပြန့်ကျဲလိမ့်မည့် သံလွင်ပင်နှင့် ပမာပြုရမည့် ဣသရေလအမျိုးသားတို့အကြောင်းကိုလည်း များစွာပြော၏။

၁၃ သို့ဖြစ်၍၊ ငါတို့သည် မြေကြီးမျက်နှာပြင်တစ်ခုလုံးပေါ်၌ ကွဲပြားပြန့်ကျဲလိမ့်မည်ဟူသော ကိုယ်တော်ရှင်၏နှုတ်ကပတ်တော်ပြီးပြည့်စုံသည့်တိုင်အောင် ကတိတော်မြေသို့ တညီတညွတ်တည်း ပို့ဆောင်ခံရစေရန် လိုအပ်ကြောင်း သူပြော၏။

၁၄ ဣသရေလအမျိုးသားတို့ ကွဲပြားပြန့်ကျဲကြပြီးနောက်၊ တစ်ဖန် အတူတကွစုဝေးလျက်၊ နောက်ဆုံး၌ တပါးအမျိုးသားတို့သည် ဧဝံဂေလိတရားတော်အပြည့်အစုံကို ရရှိကြလေပြီးနောက်၊ သံလွင်ပင်၏ပကတိအခက်များ သို့မဟုတ် ဣသရေလအမျိုးသားတို့မှ ကျန်ကြွင်းသောသူများကို အကိုင်းဆက်၍စိုက်ကြ၊ သို့မဟုတ် မှန်သောမေရှိယ၊ သူတို့၏ကိုယ်တော်ရှင်နှင့် သူတို့၏ ရွေးနှုတ်ရှင်အကြောင်း အသိပညာသို့ ရောက်ကြလိမ့်မည်။

၁၅ ဤကဲ့သို့သောစကားဖြင့် ငါ၏အဘသည် ငါ့အစ်ကိုတို့ကို ပရောဖက်ပြု၍ဟောလျက် ဆိုရာ၊ ဤကျမ်းတွင် ငါမရေးသည့် ပို၍များလှစွာသော အရာများလည်းပါဝင်၏။ အကြောင်းမူကား၊ ငါ့အနေဖြင့် ထိုအရာများထဲမှ ရေးရန်သင့်လျော်သမျှကို ငါ၏အခြားသောကျမ်း၌ ရေးလေပြီ။

၁၆ ငါပြောလေသည့် ဤအရာခပ်သိမ်းတို့ ဖြစ်ခဲ့သည်မှာ၊ လေမွေလချိုင့်ဝှမ်းရှိတဲ၌ ငါ၏အဘနေထိုင်စဉ်ကဖြစ်လေသတည်း။

၁၇ ဤသို့အားဖြင့်အချိန်တန်လာ၍၊ ငါ၊ နီဖိုင်းသည် ငါ့အဘ ရူပါရုံ၌မြင်သောအရာများနှင့် ဘုရားသခင်၏သားတော်ကို ယုံကြည်ခြင်းအားဖြင့် သူရရှိလေသည့် တန်ခိုးဖြစ်သော သန့်ရှင်းသောဝိညာဉ်တော်၏ တန်ခိုးအားဖြင့် သူပြောသည့်အရာများနှင့်လည်းစပ်လျဉ်းသော စကားအလုံးစုံကို ကြားလေပြီးနောက်—ဘုရားသခင်၏သားတော်သည်ကား ကြွလာတော်မူမည့်မေရှိယဖြစ်၏—ငါ၊ နီဖိုင်း အလိုရှိသည်မှာ၊ ရှေးလွန်လေပြီးသောကာလများကကဲ့သို့ လူသားများသို့ ဘုရားသခင်ကိုယ်တိုင် ထင်ရှားစွာပြတော်မူမည့် ကာလ၌၊ သူ့ကို လုံ့လဝီရိယထက်သန်စွာ ရှာလေသောသူများသို့ ပေးတော်မူသည့် သူ့ထံမှဆုကျေးဇူးဖြစ်သော သန့်ရှင်းသောဝိညာဉ်တော်၏ တန်ခိုးအားဖြင့် ဤအရာများကို မြင်နိုင်၊ ကြားနိုင်၊ သိနိုင်ခြင်းတို့ပင်တည်း။

၁၈ အကြောင်းမူကား၊ သူသည် မနေ့၊ ယနေ့နှင့် ကာလအစဉ်အဆက် မပြောင်းမလဲရှိတော်မူ၏။ နည်းလမ်းကိုလည်း ကမ္ဘာတည်ကတည်းက ပြင်ဆင်ထားတော်မူလေပြီးဖြစ်ရကား၊ ထိုသို့ဆိုလျှင်၊ လူသားတို့သည် နောင်တရလျက်၊ သူ့ထံသို့လာကြရမည်။

၁၉ အကြောင်းမူကား၊ လုံ့လဝီရိယထက်သန်စွာရှာသောသူသည် တွေ့လိမ့်မည်။ ဘုရားသခင်၏နက်နဲသောအရာများကို ရှေးလွန်လေပြီးသောကာလများကကဲ့သို့ ယခုကာလများ၌လည်းကောင်း၊ လာမည့်ကာလများမှာကဲ့သို့ ရှေးလွန်လေပြီးသောကာလများ၌လည်းကောင်း သန့်ရှင်းသောဝိညာဉ်တော်၏တန်ခိုးအားဖြင့် ထိုသူတို့ကို ဖွင့်ပြတော်မူပေလိမ့်မည်။ သို့ဖြစ်၍၊ ကိုယ်တော်ရှင်၏လမ်းတော်သည်ထာဝရတည်မြဲသော တရားစက်ဝန်းတစ်ခုဖြစ်၏။

၂၀ ထို့ကြောင့်၊ အို အချင်းလူ၊ သင်သည် သင်၏ကျင့်ကြံပြုမူသမျှတို့အတွက် တရားစီရင်ခြင်းသို့ ဆောင်ယူခံရမည်ကို အောက်မေ့လော့။

၂၁ သို့ဖြစ်၍၊ သင်သည် အစမ်းသပ်ခံကာလများ၌ ဆိုးညစ်စွာပြုမူရန် ကြိုးစားအားထုတ်လျှင်၊ သင့်ကို ဘုရားသခင်၏တရားပလ္လင်ရှေ့ ၌ မစင်ကြယ်ကြောင်းတွေ့ရ၍၊ မစင်ကြယ်သောအရာသည် ဘုရားသခင်နှင့် အတူမနေထိုင်နိုင်။ သို့ဖြစ်၍၊ သင်သည် ကာလအစဉ်အဆက် စွန့်ပစ်ခံရမည်။

၂၂ ဤအရာများကို ငါပြောရမည့်အကြောင်း သန့်ရှင်းသောဝိညာဉ်တော်က အခွင့်အာဏာပေးတော်မူသည်ဖြစ်၍၊ ငြင်းဆိုခြင်းမရှိနှင့်။