၁ နီဖိုင်း ၅

အခန်းကြီး ၅

စာရိယသည် လေဟိကို အပြစ်တင်မြည်တမ်း၏—သူတို့၏သားများ ပြန်လာသောကြောင့် နှစ်ဦးစလုံး ရွှင်လန်းဝမ်းမြောက်ကြ၏—သူတို့သည် ယဇ်များ ပူဇော်ကြ၏—ကြေးပုရပိုက်ပြားများတွင် မောရှေနှင့်ပရောဖက်တို့၏စာများ ပါဝင်၏—လေဟိသည် ယောသပ်၏အမျိုးအနွယ်ဖြစ်ကြောင်း ပုရပိုက်ပြားများက ဖော်ပြ၏—လေဟိသည် သူ၏အမျိုးအနွယ်တို့အကြောင်းနှင့် ပုရပိုက်ပြားများကို ထိန်းသိမ်းစောင့်ရှောက်ခြင်းအကြောင်းကို ပရောဖက်ပြု၍ဟော၏။ ဘီစီ ၆၀၀–၅၉၂ ခန့်။

၁ ဤသို့အားဖြင့်အချိန်တန်လာသောအခါ၊ ငါတို့သည် ငါတို့၏အဘဆီသို့၊ တောရိုင်းထဲသို့ ဆင်းလာကြလေပြီးနောက်၊ ရှုလော့၊ သူသည် ဝမ်းမြောက်ခြင်းနှင့်ပြည့်စုံ၏။ ငါ၏အမိ စာရိယသည်လည်း အလွန်ဝမ်းသာ၏။ အကြောင်းမူကား၊ သူမသည် ငါတို့ကြောင့် အမှန်ပင် ငိုကြွေး မြည်တမ်းခဲ့ရလေပြီ။

၂ တောရိုင်းထဲ၌ ငါတို့ပျက်စီးလေပြီဟု သူမထင်မှတ်လေ၏။ သူမသည် ငါ့အဘကိုလည်း ရူပါရုံရသူဟုပြောလျက်၊ အပြစ်တင်မြည်တမ်း၍ ဆိုလေသည်ကား၊ ရှုလော့၊ သင်သည် ငါတို့ကို ငါတို့၏အမွေခံရာမြေမှဆောင်ခဲ့သဖြင့်၊ ငါ့သားများလည်းမရှိကြတော့။ ငါတို့သည်လည်း တောရိုင်းထဲ၌ ပျက်စီးကြ၏။

၃ ဤကဲ့သို့သောစကားဖြင့်၊ ငါ၏အမိသည် ငါ့အဘကို အပြစ်တင်မြည်တမ်းလေ၏။

၄ ဤသို့အားဖြင့်အချိန်တန်ခဲ့လေသောအခါ၊ ငါ၏အဘကလည်း သူမကို ဆို၍ ပြောလေသည်ကား၊ ငါသည် ရူပါရုံရသူဖြစ်ကြောင်း သိ၏။ အကြောင်းမူကား၊ ငါသည် ဘုရားသခင်၏အမှုတော်များကို ရူပါရုံအားဖြင့် မမြင်ခဲ့ရလေလျှင်၊ ဘုရားသခင်၏ကောင်းမြတ်ခြင်းကို သိခဲ့ရလိမ့်မည်မဟုတ်ဘဲ ယေရုရှလင်မြို့ ၌ နေခဲ့လေသဖြင့်၊ ငါ၏အစ်ကိုတို့နှင့်အတူပျက်စီးရလေမည်။

၅ သို့ရာတွင်၊ ရှုလော့၊ ငါသည် ကတိတော်မြေကို ရရှိလေပြီ။ ထိုအရာများ၌ ငါရွှင်လန်းဝမ်းမြောက်၏။ ထိုမှတစ်ပါး၊ ငါ့သားများကို လာဗန်၏လက်မှ ကိုယ်တော်ရှင်ကယ်လွှတ်တော်မူပြီး၊ တောရိုင်းထဲရှိငါတို့ထံ တစ်ဖန်ဆောင်ယူတော်မူလိမ့်မည်ဖြစ်ကြောင်းကိုလည်း ငါသိ၏။

၆ ငါတို့သည် ယုဒလူမျိူးတို့၏မှတ်တမ်းကို ရယူခြင်းငှာ ယေရုရှလင်နယ်မြေအထိ တောရိုင်းထဲ၌ ခရီးသွားစဉ်တွင်၊ ငါ၏အဘလေဟိသည်လည်း ငါတို့နှင့်စပ်လျဉ်း၍၊ ငါ၏အမိစာရိယကို ဤကဲ့သို့သောစကားဖြင့် နှစ်သိမ့်စေ၏။

၇ ငါ့အဘ၏တဲသို့ ငါတို့ပြန်လာခဲ့ကြလေသောအခါ၊ ရှုလော့၊ သူတို့၏ဝမ်းမြောက်ခြင်းသည် ပြည့်စုံ၍ ငါ၏အမိသည် သက်သာခြင်းသို့ရောက်၏။

၈ သူမကလည်း ဆိုလေသည်ကား၊ ကိုယ်တော်ရှင်သည် ငါ့ခင်ပွန်းကို တောရိုင်းထဲသို့ထွက်ပြေးသွားရန်၊ မိန့်တော်မူလေကြောင်း၊ ယခုပင် ငါဧကန်အမှန်သိ၏။ ထိုမှတစ်ပါး၊ ငါ့သားများကို ကိုယ်တော်ရှင်ကာကွယ်ပေးတော်မူ၍၊ လာဗန်၏လက်မှ ကယ်လွှတ်ပေးတော်မူလျက်၊ သူတို့အား ကိုယ်တော်ရှင် မိန့်တော်မူလေသည့် အမှုကို ပြီးမြောက်နိုင်စေမည့်အစွမ်းသတ္တိကို ပေးတော်မူကြောင်း ငါဧကန်အမှန်သိ၏ဟု ပြော၏။ ဤကဲ့သို့သောစကားဖြင့်၊ သူမကပြော၏။

၉ ဤသို့အားဖြင့်အချိန်တန်လာသောအခါ၊ သူတို့သည် လွန်စွာရွှင်လန်းဝမ်းမြောက်၍၊ ကိုယ်တော်ရှင်အား ယဇ်နှင့် မီးရှို့ရာပူဇော်သက္ကာများ ပူဇော်ပြီး၊ ဣသရေလအမျိုး၏ဘုရားသခင်ကို ကျေးဇူးတော်ချီးမွမ်းကြ၏။

၁၀ သူတို့သည် ဣသရေလအမျိုး၏ဘုရားသခင်ကို ကျေးဇူးတော်ချီးမွမ်းကြလေပြီးနောက်၊ ငါ၏အဘလေဟိသည် ကြေးပုရပိုက်ပြားများပေါ်၌ ရေးထွင်းထားသည့် မှတ်တမ်းများကိုယူပြီး၊ ရှေ့ဆုံးမှစ၍ စေ့စေ့ဖတ်ရှု၏။

၁၁ ကမ္ဘာကို ဖန်ဆင်းတော်မူခြင်းအကြောင်းနှင့် ငါတို့၏ပထမဦးဆုံးသောမိဘများဖြစ်သည့် အာဒံနှင့် ဧဝတို့အကြောင်းကို ဖော်ပြသည့် မောရှေကျမ်း ငါးကျမ်း၊ ထိုမှတ်တမ်းများ၌ ပါဝင်ကြောင်းကို သူမြင်တွေ့၏။

၁၂ ရှေးဦးစွာမှစ၍၊ ယုဒရှင်ဘုရင်ဇေဒကိ နန်းစံခြင်းအစအထိပင် ယုဒလူမျိုးတို့၏မှတ်တမ်းလည်း ပါဝင်၏။

၁၃ ရှေးဦးစွာမှစ၍၊ ဇေဒကိနန်းစံခြင်း အစအထိပင် သန့်ရှင်းသောပရောဖက်တို့၏ ပရောဖက်ပြုဟောချက်များလည်း ပါဝင်၏။ ယေရမိ၏နှုတ်ဖြင့် ဟောသည့် ပရောဖက်ပြုဟောချက်များစွာတို့လည်း ပါဝင်၏။

၁၄ ဤသို့အားဖြင့်အချိန်တန်လာသောအခါ၊ ငါ၏အဘလေဟိသည် သူ့ဘိုးဘေးတို့၏ဆွေစဉ်မျိုးဆက်မှတ်တမ်းကိုလည်း ကြေးပုရပိုက်ပြားများပေါ်၌ တွေ့၏။ သို့ဖြစ်၍၊ သူသည် ယောသပ်၊ အထူးသဖြင့်၊ ယာကုပ်၏သားဖြစ်သူ၊ အဲဂုတ္တုပြည်သို့ အရောင်းခံရသူ၊ သူ၏အဘ ယာကုပ်နှင့် အိမ်သူအိမ်သားအားလုံးတို့ကို ငတ်မွတ်ခေါင်းပါးခြင်းဘေးကြောင့် ပျက်စီးခြင်းမှ ကာကွယ်စောင့်မနိုင်စေခြင်းငှာ ကိုယ်တော်ရှင်၏လက်တော်ဖြင့်၊ ကာကွယ်စောင့်မထားခြင်း ခံရသော ထိုယောသပ်၏အမျိုးအနွယ်ဖြစ်ကြောင်းကို ငါတို့သိကြ၏။

၁၅ သူတို့သည် ဖမ်းဆီးချုပ်နှောင်ခြင်းမှလည်းကောင်း၊ အဲဂုတ္တုပြည်မှလည်းကောင်း နှုတ်ဆောင်ခံရသည်မှာလည်း သူတို့ကို ကာကွယ်စောင့်မတော်မူသည့် ထိုမပြောင်းမလဲသောဘုရားသခင်အားဖြင့်ပေတည်း။

၁၆ ထိုကဲ့သို့အားဖြင့်၊ ငါ၏အဘလေဟိသည် သူ့ဘိုးဘေးတို့၏ ဆွေစဉ်မျိုးဆက်မှတ်တမ်းကို ရှာဖွေတွေ့ရှိ၏။ လာဗန်သည်လည်း ယောသပ်၏အမျိုးအနွယ်ဖြစ်၏။ သို့ဖြစ်၍၊ သူနှင့် သူ၏ဘိုးဘေးတို့သည် မှတ်တမ်းများကို ရေးမှတ်ကြ၏။

၁၇ ယခုမူကား၊ ငါ၏အဘသည် ဤအရာခပ်သိမ်းတို့ကို မြင်လျှင်၊ ဝိညာဉ်တော်နှင့်ပြည့်စုံ၍၊ သူ့အမျိုးအနွယ်များအကြောင်းကို ပရောဖက်ပြု၍ဟောစပြုလေသည်ကား—

၁၈ ဤကြေးပုရပိုက်ပြားများသည် သူ၏အမျိုးအနွယ်များဖြစ်သည့် ခပ်သိမ်းသောပြည်သား၊ အမျိုးစု၊ အသီးသီးဘာသာစကားကိုပြောသူနှင့် လူမျိုးတို့ထံ ကူးသွားလိမ့်မည်ဟု ဖြစ်လေသတည်း။

၁၉ သို့ဖြစ်၍၊ ဤကြေးပုရပိုက်ပြားများသည် အဘယ်တော့မျှ ပျက်စီးလိမ့်မည်မဟုတ်ကြောင်းနှင့် အချိန်ကြာလာသည်နှင့်အမျှ နောက်ထပ်၍ မှေးမှိန်သွားလိမ့်မည်မဟုတ်တော့ကြောင်း သူဆို၏။ သူ့အမျိုးအနွယ်များနှင့် စပ်လျဉ်း၍၊ အရာများစွာတို့ကိုလည်း သူပရောဖက်ပြု၍ဟော၏။

၂၀ ဤသို့အားဖြင့်အချိန်တန်လာသောအခါ၊ ငါနှင့်ငါ၏အဘသည်လည်း ကိုယ်တော်ရှင် မိန့်တော်မူလေသော ပညတ်တော်များကို ဤမျှအထိ စောင့်ထိန်း၏။

၂၁ ငါတို့သည်လည်း ကိုယ်တော်ရှင်မိန့်တော်မူလေသည့် မှတ်တမ်းများကိုရယူပြီး၊ စေ့စေ့ဖတ်ရှုလျက်၊ နှစ်လိုဖွယ်ဖြစ်ကြောင်းကိုလည်း တွေ့ရှိ၏။ အမှန်စင်စစ်၊ ငါတို့အတွက် ကြီးစွာပင်အဖိုးထိုက်သဖြင့်၊ ကိုယ်တော်ရှင်၏ပညတ်တော်များကို ငါတို့၏သားမြေးတို့အတွက် ငါတို့ထိန်းသိမ်းစောင့်ရှောက်နိုင်၏။

၂၂ သို့ဖြစ်၍၊ ကတိတော်မြေဆီသို့ တောရိုင်းထဲ၌ ငါတို့ခရီးသွားကြစဉ်တွင် ထိုမှတ်တမ်းများကို ငါတို့နှင့်အတူ သယ်ဆောင်ခြင်းသည်ကား၊ ကိုယ်တော်ရှင်၏ဉာဏ်ပညာတော်အတိုင်းပေတည်း။