1 Manje buka, kwenteka kutsi bonkhe bantfu baseveni baweva lamavi, baphindze bawafakazela. Futsi emvakwalamavi kwabakhona kuthula eveni sikhatsi lesingemahora lamaningi

2 Ngoba kwaba kukhulu kakhulu kumangala kubantfu kangangekutsi bayekela kulila nekuhhewula ngenca yekulahlekelwa tihlobo tabo letatibulewe; ngako-ke kwaba khona kuthula kulo lonkhe live sikhatsi lesingemahora lamaningi

3 Futsi kwenteka kutsi kwaphindze kwefika livi kubantfu, bonkhe bantfu baliva, baphindze bafakaza ngalo, litsi:

4 Awu nine bantfu bakulamadolobha lamakhulu lawile, lenibesitukulwane saJakobe, yebo, lenibendlu yaka-Israyeli, kukangaphi nginigcogca njengesikhukhukati sifukamela emantjwele aso ngaphansi kwetimphiko taso, ngiphindze nginondla na?

5 Futsi ngetulu kwaloko, bekuyawuba kangaphi nginigcogca njengesikhukhukati sifukamela emantjwele aso ngaphansi kwetimphiko taso, yebo, Awu nine bantfu bendlu yaka-Israyeli, labawile; yebo, Awu nine bantfu bendlu yaka-Israyeli, nine lenihlala eJerusalema, njengoba niwile; yebo, bekuyawuba kangakhi nginigcogca njengesikhukhukati sifukamela emantjwele aso, kodvwa ningavumi.

6 Awu wenandlu yaka-Israyeli lenginiphephisile, kuyawuba kangakhi nginigcogca njengesikhukhukati sifukamela emantjwele aso ngaphansi kwetimphiko taso, uma ningaphendvuki nibuyele kimi ngenhloso lephelele yenhlitiyo.

7 Kodvwa uma ningeke, Awu nine bendlu yaka-Israeli, tindzawo tenu tekuhlala tiyawusala tingenabantfu kute kube sikhatsi sekugcwaliseka kwesivumelwano saboyise.

8 Manje kwenteka kutsi emvakwekutsi bantfu sebawevile lamavi, buka, bacala kukhala nekuhhewula futsi ngenca yekulahlekelwa tihlobo tabo kanye nebangani.

9 Futsi kwenteka kutsi tinsuku letintsatfu tendlula kanjalo. Bekungusekuseni, bumnyama besuka eveni lonkhe, nemhlaba wema kutamatama, nemadvwala ema kuchekeka, nesililo lesesabekako saphela, nato tonkhe tiphitsiphitsi temsindvo tendlula.

10 Futsi umhlaba waphindze wanamatselana ndzawonye, kangangekutsi wema; lusizi, nekukhala, kanye nekulila kwebantfu labebaphephisiwe baphila kwaphela; nelusizi lwabo lwagucuka lwaba yinjabulo, nekulila kwabo kwaba yindvumiso kanye nekubonga eNkhosini Jesu Khristu, uMhlengi wabo.

11 Futsi kute kube ngumanje imibhalo lengcwele yabe seyigcwalisekile leyayikhulunywe baphrofethi.

12 Bekuyincenye lenkhulu lelungile yebantfu labasindziswa, futsi bekungulabo bebemukele baphrofethi bangabagcobi ngematje; futsi bekungulabo labebangatange bayicitse ingati yalabangcwele, labaphephiswa—

13 Futsi baphephiswa bangacwiliswa baphindze bangangcwatjwa ngumhlabatsi. Abatange bamitiswe ekujuleni kwelwandle; abatange bashiswe ngemlilo, noma kuwele lokutsite etikwabo bafihlitwe bate bafe; futsi abatange batfwalwe sivunguvungu; noma benganywe yinkhungu yentfutfu kanye neyebumnyama.

14 Manje, loyo lofundzako, akacondze; loyo lonemibhalo lengcwele, akayihlolisise, abone aphindze abuke kutsi ngabe konkhe loku kufa kanye nekubhujiswa ngemlilo, nangentfutfu, nangetiphepho, nangetivunguvungu, nangekuvuleka kwemhlaba kutsi ubamite, kanye nato tonkhe letintfo akugcwalisi yini tiphrofetho letiningi tebaphrofethi labangcwele.

15 Bukani, ngitsi kini, Yebo, labaningi bafakazile ngaletintfo ngekuta kwaKhristu, futsi babulawa ngoba bafakaza ngaletintfo.

16 Yebo, umphrofethi Zenoshe wafakaza ngaletintfo, kanjalo naZenokhi wakhuluma mayelana naletintfo, ngoba bafakaza ikakhulukati mayelana natsi, lesiyinsali yentalelwane yabo.

17 Bukani, babe Jakobe ngalokunjalo naye wafakaza mayelana nensali yentalelwane yaJosefa. Futsi bukani, ngabe asisiyo yini insali yentalelwane yaJosefa na? Futsi letintfo letifakaza ngatsi, ngabe atikabhalwa yini kulabongcwengcwe belitfusi babe Lehi labatsatsa eJerusalema na?

18 Futsi kwenteka kutsi ekupheleni kwemnyaka wemashumi lamatsatfu nakune, bukani, ngitawunikhombisa kutsi bantfu baNefi labaphephiswa, kanjalo nalabo labebabitwa ngekutsi ngemaLamani, labaphephiswa, kwaba netento temusa lomkhulu letentelwa bona, kanye netibusiso letinkhulu letehliselwa kubo, kangangekutsi masinyane emvakwekwenyuka kwaKhristu aya ezulwini watibonakalisa ngempela kubo—

19 Wakhombisa umtimba wakhe kubo, wabafundzisa; nemlandvo webufundisi bakhe utawuniketwa emvakwaloku. Ngako-ke kwanyalo ngenta siphetfo semavi ami.